Mabalinyo Kadi ti Agbalin a Pudno a Naragsak?
KINABLAAWAN ni George ti amin babaen ti isem. Kenkuana, ti biag ket napateg a sagut a rebbeng a tagiragsaken. Ti kinaragsak ken kinapositibona ti pakabigbigan kenkuana—nangnangruna ta mangrugin nga agsagaba kadagiti pakarigatan gapu iti panaglakay. Agingga iti aldaw ti ipapatayna, pagaammo a naragsak a tao ni George. Naragsakkay kadi a kas ken ni George? Matmatanyo kadi ti tunggal baro nga aldaw kas sagut a rebbeng a tagiragsaken? Wenno ti kadi panangpadpadaan iti baro nga aldaw pagbalinennakayo a nataramnay wenno pagamkennakayo pay ketdi? Adda kadi mangpukpukaw iti ragsakyo?
Ti kinaragsak ket nadepinar kas nasayaat a kasasaad a relatibo ti kapautna. Mailadawan dayta kadagiti emosion, manipud iti pannakapnek agingga iti napalalo ken aglaplapusanan a rag-o ken iti naisigud a tarigagay nga agtultuloy dayta a kasasaad. Pudno kadi nga adda ti kasta a kinaragsak?
Iti kaaldawantayo, itantandudo ti kagimongan ti panangmatmat nga agbalin laeng a naragsak ti tattao no umdas ti kinabaknangda. Minilion ti makumikom nga agpabaknang. Adu ti mangisakripisio iti personal a relasionda kadagiti sabsabali ken dadduma pay a nasken a bambanag iti biag gapu iti panangaramidda iti dayta. Kas kadagiti kuton iti bunton, agdardarasda a kankanayon, ket bassiten ti tiempoda a mangutob iti ar-aramidenda wenno maipaay iti maysa ken maysa. Dayta ti gapuna “nga agtultuloy nga umad-adu ti bilang dagiti tattao a naduktalan a malmalday,” kuna ti padamag iti Los Angeles Times, “ket agtultuloy a bumabbaba ti edad dagiti agpaspasar [iti panagleddaang]. . . . Dagiti agas a panglaban iti panagleddaang addada iti listaan ti alisto a malako dagiti kompania ti agas.” Minilion ti agdroga wenno padasenda a lipaten dagiti parikutda babaen ti panagbartek. Dagiti dadduma aggatangda iti kasta unay no maldaanganda. Iti maysa a surbey, kuna ti pagiwarnak ti Britania a The Guardian a “dagiti babbai ti kalakaan a maigamer iti panaggatang kas pangep-epda. Mamitlo nga ad-adda a mapanda aggatang no malmaldaanganda ngem kadagiti lallaki.”
Nupay kasta, ti pudno a kinaragsak ket saan a masarakan iti paglakuan, arak, pildoras, ringgilia, wenno deposito iti banko. Ti kinaragsak ket saan a magatang; libre dayta. Sadino ti pakasarakantayo iti kasta a nagpateg a sagut? Usigentay dayta iti sumaganad nga artikulo.