Panangtulong Kadagiti Balo Kadagiti Pakasuotanda
TI MAYSA kadagiti kalatakan a pakasaritaan dagiti balo isu ti salaysay ti Biblia maipapan kada Ruth ken ni Noemi a katuganganna. Agpada a balo dagitoy a babbai. Ngem napukaw ni Noemi, saan laeng a ti asawana no di pay ket ti dua nga annakna, a maysa kadakuada ti asawa ni Ruth. Gapu ta nagbiagda iti kagimongan dagiti agtaltalon nga agpampannuray kadagiti lallaki, pudno a nakas-ang ti kasasaadda.—Ruth 1:1-5, 20, 21.
Nupay kasta, addaan ni Noemi iti naisangsangayan a gayyem ken manangliwliwa a ni Ruth a manugangna, a nagkedked a mangpanaw kenkuana. Idi agangay, nagbalin ni Ruth a “nasaysayaat [ken Noemi] ngem iti pito nga annak a lallaki”—saan la a gapu iti nauneg nga ayatna ken Noemi no di pay ket gapu iti ayatna iti Dios. (Ruth 4:15) Idi insingasing ni Noemi nga agsublin ni Ruth iti Moabita a pamiliana ken gagayyemna, insungbat ni Ruth ti maysa kadagiti nailanad a makatukay unay iti rikna nga ebkas ti kinasungdo: “No sadino ti papanam mapanakto, ket no sadino ti pangbusbosam iti rabii busbosekto ti rabii. Dagiti kailiam isudanto dagiti kailiak, ket ti Diosmo Diosko. No sadino ti pakatayam pakatayakto, ket sadiay ti pakaitabonakto. Kasta koma ti aramiden kaniak ni Jehova ken inayonna iti dayta no adda aniaman a banag malaksid ken patay a mamagsina kadata.”—Ruth 1:16, 17.
Ti kababalin ni Ruth ket nakita ni Jehova a Dios. Binendisionanna ti bassit a sangakabbalayan da Noemi ken Ruth, ket idi agangay nakiasawa ni Ruth iti Israelita a ni Boaz. Ti anakda, a nagbalin nga inapo ni Jesu-Kristo, ket inaywanan ni Noemi a kasla anakna. Daytoy a pakasaritaan ket maysa a pagarigan no kasano ti panangipateg ni Jehova kadagiti balo nga umadani ken agtalek kenkuana. Mainayon pay, ibaga kadatayo ti Biblia nga ipatpategna dagidiay siaayat a tumulong kadagiti balo kadagiti pakasuotanda. Kasanotay ngarud a matulongan ita dagiti balo iti nagtetengngaantayo?—Ruth 4:13, 16-22; Salmo 68:5.
Espesipiko Ngem Saan a Naturay
Iti itutulong iti maysa a balo, nasaysayaat no agbalinka a nalawag ken espesipiko ngem saan a naturay. Liklikan dagiti di nalawag a komento a kas iti, “Ipakaammom kaniak no adda masapulmo.” Kasmo la ibagbaga, “Aginudo ken agbussogka” iti daydiay malammin ken mabisin ngem dimo met tulongan. (Santiago 2:16) Adu a tattao ti di agpatulong no adda masapulda; agsagabada lattan a siuulimek. Kasapulan ti pannakaawat iti itutulong kadakuada, a tarusan no ania dagiti kasapulanda. Iti kasumbabangirna, ti nalabes a pannakibiang—nangruna ti panangkontrol iti biag ti balo—mabalin nga agbanag iti pannakasair ti rikna wenno di panagkinnaawatan. Gapuna, igunamgunam ti Biblia a nasken a natimbeng ti pannakilangentayo iti sabsabali. Nupay parparegtaennatayo a maaddaan iti di-agimbubukodan a personal a panaginteres kadagiti tattao, palagipannatayo met a ditay agbalin a mannakibiang.—Filipos 2:4; 1 Pedro 4:15.
Imparangarang ni Ruth ti kasta a natimbeng a kababalin ken Noemi. Nupay sisusungdo a dina pinanawan ti katuganganna, saan a pinilit wenno inturayan ni Ruth ni Noemi. Nagtignay a sinanakman, a kas idi nagsapul iti taraon para kadakuada ken Noemi, ngem tinungpalna met dagiti bilin ni Noemi.—Ruth 2:2, 22, 23; 3:1-6.
Siempre, nagduduma ti kasapulan ti tunggal maysa. Kinuna ni Sandra, a nadakamat itay: “Addaanak kadagiti kasapulak iti panagdukotko—dagiti nakadungdungngo ken naayat a gagayyem nga immarayat kaniak.” Iti kasumbabangirna, ni Elaine, a nadakamat itay, kasapulanna ti agmaymaysa. No kasta, ti itutulong kaipapananna ti panangtarus ken kinatimbeng iti panangraem iti kinapribado ti sabali ken ti sisasagana nga itutulong no kasapulan.
Tulong Manipud iti Pamilia
Dakkel ti maaramidan ti nabara, naayat a pamilia, no adda, tapno maipanamnama iti balo nga agballiginto. Nupay ad-adu ti maitukon a tulong ti dadduma a kameng ti pamilia ngem ti sabsabali a kameng, mabalinda amin ti tumulong. “No ti asinoman a balo a babai addaan iti annak wenno appoko, sursuruen koma nga umuna dagitoy ti panangannurot iti nadiosan a debosion iti bukodda a sangakabbalayan ket agtultuloyda a mangibayad iti maiparbeng a pangsubad kadagiti nagannakda ken kadagiti apongda, ta makaay-ayo daytoy iti imatang ti Dios.”—1 Timoteo 5:4.
Masansan a di masapul ti pinansial a tulong wenno “pangsubad.” Adda umdas a kuarta ti dadduma a balo a gastosen kadagiti kasapulanda, ken kualipikado ti dadduma iti benepisio manipud gobierno, a magun-odan iti sumagmamano a pagilian. Ngem kadagiti kasasaad nga agkasapulan dagiti balo, rebbeng a tulongan dagiti kameng ti pamilia. No awan ti asideg a kabagian ti balo a bumadang wenno saanda a kabaelan ti tumulong, parparegtaen ti Kasuratan dagiti kapammatianna a tulonganda: “Ti porma ti panagdaydayaw a nadalus ken di natulawan iti panangmatmat ti Dios ken Amatayo isu daytoy: panangtaripato kadagiti ulila ken iti balo a babbai kadagiti rigatda.”—Santiago 1:27.
Dagidiay mangyaplikar kadagitoy a prinsipio ti Biblia pudno a ‘padayawanda dagiti balo.’ (1 Timoteo 5:3) Ti panangpadayaw iti maysa a tao kaipapananna ti panangipakita iti panagraem kenkuana. Dagiti tattao a mapadpadayawan mariknada nga adda serbida, maipatpateg, mararaem. Saanda a pagarupen a tultulongan ida ti sabsabali gapu laeng ta pagrebbenganda dayta. Ni Ruth, nupay balo met iti apagbiit a panawen, pudno a pinadayawanna ni Noemi babaen ti situtulok ken siaayat a panangsiguradona a maited dagiti pisikal ken emosional a kasapulan ni Noemi. Kinapudnona, ti kababalin ni Ruth ket dagus a nagdinamag, iti kasta kinuna kenkuana ti agbalinto nga asawana: “Tunggal maysa nga adda iti siudad dagiti kailiak ammona a nakasaysayaatka a babai.” (Ruth 3:11, footnote iti New World Translation of the Holy Scriptures—With References) Kabayatanna, ti ayat ni Noemi iti Dios, ti kinakontentona, ken ti nauneg nga apresasionna kadagiti panagregget ni Ruth maigapu kenkuana ti sigurado a nakaay-ayuan ni Ruth a mangtulong kenkuana. Nagsayaat ketdin nga ulidan ni Noemi kadagiti balo ita!
Umadanikayo iti Dios
Siempre, saan a mapunnuan dagiti kameng ti pamilia ken gagayyem ti pagkurangan nga imbati ti pimmusay nga asawa. Gapu itoy, nasken a ti napanawan umadani a nangnangruna iti “Ama dagiti nadungngo nga asi ken ti Dios ti amin a liwliwa, a mangliwliwa kadakami iti amin a rigatmi.” (2 Corinto 1:3, 4) Usigenyo ti ulidan ni Ana, a maysa a napasnek a balo nga agtawen iti 84 idi naipasngay ni Jesus.
Idi natay ti asawa ni Ana kalpasan ti pito laeng a tawen a panagdennada, ni Jehova ti nagpannurayanna iti liwliwa. “Saan a pulos limmanglangan idiay templo, a mangipapaay iti sagrado a panagserbi iti rabii ken aldaw buyogen dagiti panagayunar ken ar-araraw.” (Lucas 2:36, 37) Sinubadan kadi ni Jehova ti nadiosan a debosion ni Ana? Wen! Imparangarangna ti ayatna kenkuana iti naisangsangayan a pamay-an ta impalubosna a makitana ti ubing nga agbalinto a Manangisalakan ti lubong. Anian a gagar ken pannakaliwliwa ni Ana! Nabatad a napasaranna a pudno ti Salmo 37:4: “Agragsakka iti napalalo ken Jehova, ket itdennanto kenka dagiti kiddaw ta pusom.”
Agtignay ti Dios Babaen Kadagiti Pada a Kristiano
Kinuna ni Elaine: “Nabayag a nagpapaut-otak iti pisikal, a kasla adda imuko nga agtaytayyek iti nagtengngaan dagiti paragpagko. Kunak la no saanak a narunawan. Kimmaro dayta iti maysa nga aldaw ket impagarupko a masapul nga agpadoktorak. Inlawlawag ti maysa a mannakaawat a kabsat a babai a nalabit ti kinaladingitko ti makagapu ket pinaregtanak nga agkiddaw ken Jehova iti tulong ken liwliwa. Inaramidko a dagus ti imbalakadna ket nagkararagak a siuulimek ngem naimpusuan, a kiniddawko ken Jehova a tulongannak iti panagladingitko. Ket pinatgannak!” Simmayaat ti rikna ni Elaine, ket di nagbayag nagpukawen uray ti panagpaut-otna iti pisikal.
Nangnangruna a makaitukon ti papanglakayen iti kongregasion iti naayat a pannakipagayam kadagiti balo nga agladladingit. Babaen ti patinayon a panangtulongda iti naespirituan ken panangliwliwada a sitataktika ken addaan pannakaawat, matulongan ida ti papanglakayen nga agtalinaed a nasinged ken Jehova iti laksid dagiti pakasuotanda. No kasapulan, makatulong pay ti papanglakayen a mangyurnos iti namaterialan a tulong kadakuada. Pudno a dagita a mannakipagrikna, mannakaawat a papanglakayen agbalinda a “paglemmengan a lugar manipud iti angin.”—Isaias 32:2; Aramid 6:1-3.
Manayon a Liwliwa Manipud iti Baro nga Ari ti Daga
Ti nagrag-oan ni Ana a makita dua ribu a tawenen ti napalabas ket maysa itan a Mesianiko nga Ari iti nailangitan a Pagarian. Mabiiten nga ikkaten daytoy a gobierno ti amin a makagapu iti panagleddaang, agraman ni patay. Maipapan itoy, kuna ti Apocalipsis 21:3, 4: “Adtoy! Ti tolda ti Dios adda iti sangatauan . . . Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.” Nadlawmo kadi a tinukoy daytoy a teksto ti “sangatauan”? Wen, mawayawayaanton ti sangatauan iti ipapatay ken amin a panagleddang ken panagsangit nga ibungana.
Ngem adda pay kanayonan a naimbag a damag! Ikarkari met ti Biblia ti panagungar dagiti natay. “Um-umayen ti oras nga amin dagidiay adda kadagiti pakalaglagipan a tanem mangngegdanto ti timekna [ni Jesus] ket rummuarda.” (Juan 5:28, 29) Kas ken Lazaro a pinagungar ni Jesus, rummuardanto kas tattao, saan nga espiritu a parparsua. (Juan 11:43, 44) Dagidiay ‘agaramid iti naimbag a bambanag’ kalpasanna ket agbalindanto a perpekto a tattao ken mapasaranda a mismo ti panangaywan ni Jehova kas ama inton ‘ukradenna ti imana ken pennekenna ti tarigagay ti tunggal sibibiag a banag.’—Salmo 145:16.
Gubuayan daytoy ti dakkel a liwliwa kadagidiay natayan iti asawa ken mamati iti daytoy sigurado a namnama. (1 Tesalonica 4:13) Ngarud no baloka, siguraduem ti ‘agkararag a di agressat’ maipaay iti liwliwa ken tulong a kasapulam iti inaldaw a mangibaklay iti nadumaduma a dadagsenmo. (1 Tesalonica 5:17; 1 Pedro 5:7) Ken iwayaam kada aldaw ti panagbasa iti Sao ti Dios tapno maliwliwanaka ti pampanunot ti Dios. No aramidem dagitoy, makitamto no kasano a pudno a matulongannaka ni Jehova a maaddaan iti talna, iti laksid ti amin a pakasuotan ken karit a maipasango kenka kas maysa a balo.
[Blurb iti panid 5]
Ti itutulong kaipapananna ti kinatimbeng iti panangraem iti kinapribado ti sabali ken ti sisasagana nga itutulong no kasapulan
[Ladawan iti panid 7]
Binendisionan ti Dios ti baket a balo a ni Ana