Salsaludsod Dagiti Agbasbasa
Yantangay situtulok ni Jehova a mangpakawan kadagiti basol maibatay iti pateg ti daton a pangsubbot, apay a nasken pay laeng nga agpudno dagiti Kristiano kadagiti panglakayen iti kongregasion?
Kas makitatayo iti kaso da David ken Bat-seba, pinakawan ni Jehova ti basol ni David, nupay nadagsen daydi, gapu iti napudno a panagbabawi ni David. Idi inasitgan ni propeta Natan, sipapanayag nga impudno ni David: “Nagbasolak a maikaniwas ken Jehova.”—2 Samuel 12:13.
Nupay kasta, saan laeng nga awaten ni Jehova ti napasnek a panagpudno ti maysa a nakabasol sana pakawanen. Mangipaay met kadagiti naayat a probision tapno matulongan ti nakabasol a makaungar iti naespirituan. Iti kaso ni David, naipaay ti tulong babaen ken propeta Natan. Itatta, iti uneg ti kongregasion Kristiano, adda dagiti lallakay a nataenganen iti naespirituan, wenno dagiti panglakayen. Inlawlawag ni adalan a Santiago: “Adda aya asinoman a masaksakit kadakayo [iti naespirituan]? Ayabanna koma dagiti lallakay iti kongregasion, ket ikararaganda koma, nga isu sapsapuanda iti lana iti nagan ni Jehova. Ket ti kararag ti pammati paimbagennanto ti addaan sagubanit, ket isu ibangonto ni Jehova. Kasta met, no nakaaramid kadagiti basol, mapakawanto dayta kenkuana.”—Santiago 5:14, 15.
Adu ti maaramidan dagiti nasigo a panglakayen tapno maep-ep ti saem iti puso ti agbabbabawi a nakabasol. Ikagumaanda a tuladen ni Jehova iti panangtamingda iti nakabasol. Pulos a saanda a kayat ti agbalin a nagubsang, nupay maitutop a maipakat ti nainget a disiplina. Imbes ketdi, siaasi nga ikabilanganda dagiti madagdagus a kasapulan ti indibidual. Siaanus a pagreggetanda nga aturen ti panagpampanunot ti nakabasol babaen ti panangusarda iti Sao ti Dios. (Galacia 6:1) Uray no saan a boluntario nga ipudno ti tao ti basolna, mabalin pay laeng a matignay nga agbabawi no asitgan dagiti panglakayen, kas met laeng idi inasitgan ni Natan ni David. Iti kasta, ti tulong nga ipaay dagiti panglakayen iliklikna ti nagbasol manipud iti peggad a mangulit iti basol ken iti serioso nga ibunga ti nayugali a panagaramid iti basol.—Hebreo 10:26-31.
Talaga a narigat nga ipudno iti sabsabali dagiti aramid a mabalin a pakaibabainan ti maysa ken ti dumawat iti pammakawan. Kasapulan ti napigsa a pakinakem. Ngem no saan, panunotenyo ti mabalin a mapasamak. Kinuna ti maysa a lalaki a di nangipudno iti nadagsen a basolna kadagiti panglakayen iti kongregasion: “Saan a maikkat ti saem iti pusok. Inggagaedko ti nangasaba, ngem nagtultuloy a masidsidir ti konsiensiak.” Impagarupna nga umdasen ti panangipudno iti Dios babaen ti kararag, ngem nabatad a saan, ta napasaranna ti narikna idi ni Ari David. (Salmo 51:8, 11) Anian a nasaysayaat nga awaten ti naayat a tulong nga ipapaay ni Jehova babaen kadagiti panglakayen!