Lobokami Idi​—Karnerokami Itan!

Idi ubbingkami ken ni Sakina, agkaarrubakami. Dakkel ken napigsa ni Sakina, idinto ta bassit ken narapisak. Kanayonkam idi nga agriri, ngem naminsan talaga a nagapakami. Manipud idin, saankamin nga agtintinnimek ken agkinkinnablaaw. Idi agangay, agpada nga immakarkami iti pagnaedan ket saanmi nga ammo idin no sadino ti ayan ti tunggal maysa.

Idi 1994, rinugiak ti nakipagadal iti Biblia kadagiti Saksi ni Jehova, ket in-inut a nagbaliw ti personalidadko. Uppat a tawen kalpasanna, bayat ti itatabunok iti aldaw ti espesial nga asamblea idiay Bujumbura, Burundi, naklaatak a nakakita ken ni Sakina. Naragsakanak iti kaaddana, ngem saan a nabara ti panagkinnablaawmi. Iti daydi met la nga aldaw, kasla diak mamati iti nakitak. Maysa ni Sakina kadagiti kandidato iti bautismo! Dakkel met ti nagbaliwanna. Saanen a kas daydi mannakiapa a masansan a karirririk. Anian a nakaay-ayat a makita ti panangipaduyakyakna iti panagdedikarna iti Dios babaen ti panagpabautisarna!

Idi rimkuas iti danum, nagdardarasak a napan nangarakup kenkuana sa inyarasaasko: “Malagipmo daydi panagapata?” “Wen,” kinunana, “malagipko, ngem napalabas daydin. Sabaliak a tao itan.”

Agpada a maragsakankami a nakasarak iti mamagkaykaysa a kinapudno a linaon ti Biblia. Kas iti lobo ti personalidadmi idi, ngem ita kaskamin iti karnero a kukua ti Naindaklan a Pastor, ni Jehova a Dios. Agpayso a ti Biblia balbaliwanna ti biag dagiti tattao.