Adda Kadi Manamnama a Pannakaisalakan?
Naawagan ti maika-20 a siglo a maysa kadagiti kadaraan pay laeng a siglo iti sangatauan. Ti krimen, gubat, etniko a panagdadangadang, panagdroga, di kinamapagpiaran, ken kinaranggas ti nangnangruna nga agraraira bayat ti naglabas a sumagmamano a dekada. Mainayon pay ti ut-ot ken panagsagaba gapu iti sakit, panaglakay, ken ipapatay. Siasino ti di mangayat a mawayawayaan kadagiti nadadagsen a parikut iti kaaldawantayo? Bayat a kumitatayo iti masanguanan, adda kadi manamnama a pannakaisalakan?
UTOBENYO ti nasirmata ni apostol Juan agarup 2,000 a tawenen ti napalabas. Insuratna: “Adtoy! Ti tolda ti Dios adda iti sangatauan, ket isu makipagnaedto kadakuada, ket isudanto dagiti ilina. Ket ti Dios a mismo addanto kadakuada. Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.” (Apocalipsis 21:3, 4) Kasta met laeng ti impadto ni propeta Isaias: “Pudno nga alimonennanto ni patay iti agnanayon, ket ti Soberano nga Apo Jehova sigurado a punasennanto ti lulua iti amin a rupa. Ket ti pakaumsian ti ilina ikkatennanto iti intero a daga, ta ni met laeng Jehova sinaona dayta.”—Isaias 25:8.
Panunotenyo laengen no ania ti kaipapanan ti kaitungpalan dagiti kari ti Dios! Maispal, wenno maisalakan ti sangatauan, manipud iti pannakairurumen ken kinaranggas, manipud kadagiti pakaigapuan ti panagsagaba ken rigat. Saantayo nga agsakit, lumakay, ken matay! Ti Biblia a Sao ti Dios inkarina ti agnanayon a biag iti sidong ti perpekto a kasasaad ditoy daga. (Lucas 23:43; Juan 17:3) Matagiragsak dayta ti asinoman a mangtarigagay. “Ti pagayatan [ti Dios] ket maisalakan koma dagiti amin a kita ti tattao ken dumtengda iti umiso a pannakaammo iti kinapudno.”—1 Timoteo 2:3, 4.
Ngem tapno magunggonaan kadagiti kari ti Dios, masapul a maawatantayo ti akem ni Jesu-Kristo iti pannakaisalakantayo ken iparangarangtayo ti pammati kenkuana. Kinuna a mismo ni Jesus: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.” (Juan 3:16) Iti panangipaganetgetna iti napateg nga akem ni Jesu-Kristo iti daytoy a banag, kinuna ni apostol Pedro: “Awan ti asinoman a sabali a pakaisalakanan, ta awan ti sabali a nagan iti baba ti langit a naited kadagiti tattao a masapul a pakaisalakanantayo.” (Aramid 4:12) Indagadag ni apostol Pablo ken ti kaduana a ni Silas iti maysa a napasnek nga agsalsaludsod: “Mamatika ken Apo Jesus ket maisalakankanto, sika ken ti sangakabbalayam.”—Aramid 16:30, 31.
Wen, ni Jesu-Kristo ti “Kangrunaan nga Ahente ti biag,” ket posible ti pannakaisalakan babaen laeng kenkuana. (Aramid 3:15) Ngem kasano a ti maysa a tao agbalin a kangrunaan a pakaigapuan ti pannakaisalakantayo? Ti nalawag a pannakaawat iti akemna iti daytoy a banag pabilgenna koma ti namnamatayo a maisalakan.
[Picture Credit Lines iti panid 2]
Panid 3: Managbomba: rinetrato ti USAF; mabisbisinan nga ubbing: UNITED NATIONS/J. FRAND; maur-uram a barko a pakigubat: rinetrato ti U.S. Navy