Pagtalinaedenyo a Naraniag ti ‘Namnamayo iti Pannakaisalakan’!
“Ikapettayo . . . ti kas kabal ti ulo ti namnama ti pannakaisalakan.”—1 TESALONICA 5:8.
1. Kasano a makatulong iti panagibtur ti “namnama ti pannakaisalakan”?
NO ADDA namnamana a maisalakan, makaibtur ti maysa a tao uray iti kadadaksan a kasasaad. Ti maysa a tao a nakapataw kalpasan a narba ti barko a naglugananna ket napapaut a makaandur no ammona nga um-umayen dagiti mangalaw kenkuana. Umasping iti dayta, iti rinibribu a tawenen, ti namnama iti “panangispal ni Jehova” pinabilegna dagiti lallaki ken babbai kadagiti narikut a tiempo, ket saan a pulos a nangyeg iti pannakapaay dayta a namnama. (Exodo 14:13; Salmo 3:8; Roma 5:5; 9:33) Inyarig ni apostol Pablo ti “namnama ti pannakaisalakan” iti “kabal ti ulo” ti naespirituan a kabal ti maysa a Kristiano. (1 Tesalonica 5:8; Efeso 6:17) Wen, ti panagtalektayo nga isalakannatayo ti Dios saluadanna ti panunottayo, a tulongannatay nga agparbeng iti laksid ti rigat, ibubusor, ken sulisog.
2. Kadagiti ania a wagas a napateg a paset ti pudno a panagdayaw ti “namnama ti pannakaisalakan”?
2 Kuna ti The International Standard Bible Encyclopedia: “Saan a mangnamnama iti masanguanan ti pagano a lubong,” ti lubong nga adda iti aglawlaw dagiti Kristiano idi umuna a siglo. (Efeso 2:12; 1 Tesalonica 4:13) Ngem, napateg a paset ti pudno a panagdayaw ti “namnama ti pannakaisalakan.” Kasano a kasta? Umuna, mainaig iti mismo a nagan ni Jehova ti pannakaisalakan dagiti adipenna. Inkararag ni salmista nga Asaf: “Saranayennakami, O Dios ti pannakaisalakanmi, tapno pakaidaydayawan ti naganmo; ket ispalennakami.” (Salmo 79:9; Ezequiel 20:9) Maysa pay, tapno maaddaantayo iti nasayaat a relasion ken Jehova, nasken nga agtalektayo kadagiti bendision nga inkarina. Kastoy ti kinuna ni Pablo: “No awan ti pammati isu di mabalin nga ay-aywen unay, ta ti umadani iti Dios masapul a patienna nga isu adda ken isu agbalin a mananggunggona kadagidiay sipapasnek a mangsapsapul kenkuana.” (Hebreo 11:6) Kanayonanna, inlawlawag ni Pablo a ti pannakaisalakan dagiti tattao nga agbabawi ti maysa a napateg a makagapu nga immay ni Jesus ditoy daga. Kinunana: “Matalek ken maikari iti naan-anay a panangawat ti sao a ni Kristo Jesus immay ditoy lubong tapno isalakanna dagiti managbasol.” (1 Timoteo 1:15) Kinuna met ni apostol Pedro a ti pannakaisalakan ti ‘pagtungpalan [wenno, bunga] ti pammatitayo.’ (1 Pedro 1:9) Nalawag nga umiso ti agtarigagay a maisalakan. Ngem ania aya a talaga ti pannakaisalakan? Ket ania ti masapul nga aramidentayo tapno maisalakantayo?
Ania ti Pannakaisalakan?
3. Ania a pannakaisalakan ti napasaran dagiti adipen ni Jehova idi ugma?
3 Iti Hebreo a Kasuratan, ti “pannakaisalakan” masansan a kaipapananna ti pannakaalaw wenno pannakaispal iti panangirurumen wenno iti naranggas, di ninamnama nga ipapatay. Kas pagarigan, kinuna ni David a ni Jehova ti “mangispal” kenkuana: “Ti Dios, batok. . . . ken kamangko; mangisalakanko, isalakannak iti ranggas. Umawagakto ken Jehova a maikari a madaydayaw: iti kasta maispalakto kadagiti kabusorko.” (2 Samuel 22:2-4) Ammo ni David nga ipangag ni Jehova dagiti matalek nga adipenna no dumawatda iti tulongna.—Salmo 31:22, 23; 145:19.
4. Maipapan iti masanguanan a biag, ania ti ninamnama dagiti adipen ni Jehova kasakbayan dagiti Kristiano?
4 Dagiti adipen ni Jehova kasakbayan dagiti Kristiano addaanda met iti namnama iti masanguanan a biag. (Job 14:13-15; Isaias 25:8; Daniel 12:13) Kinapudnona, iti Hebreo a Kasuratan, adu kadagiti kari maipapan iti pannakaispal ti naimpadtuan a mangiladawan iti dakdakkel a pannakaisalakan—daydiay mangiturong iti biag nga agnanayon. (Isaias 49:6, 8; Aramid 13:47; 2 Corinto 6:2) Idi kaaldawan ni Jesus, adu a Judio ti nangnamnama iti biag nga agnanayon, ngem dida inawat ni Jesus kas tulbek ti pannakatungpal ti namnamada. Kinuna ni Jesus kadagiti panguluen ti relihion idi tiempona: “Suksukimatenyo dagiti Kasuratan, agsipud ta pagarupenyo a babaen kadakuada maaddaankayto iti agnanayon a biag; ket dagitoy a mismo saksianda ti maipapan kaniak.”—Juan 5:39.
5. Ania ti naan-anay a kaipapanan ti pannakaisalakan?
5 Babaen ken Jesus, impalgak ti Dios ti naan-anay a kaipapanan ti pannakaisalakan. Kaipapananna ti pannakaluk-at iti panangituray ti basol, pannakaadipen iti palso a relihion, iti lubong nga iturturayan ni Satanas, iti panagbuteng iti tao, ken uray iti panagbuteng ken patay. (Juan 17:16; Roma 8:2; Colosas 1:13; Apocalipsis 18:2, 4) Inton kamaudiananna, kadagiti matalek nga adipen ti Dios, saan laeng a wayawaya iti panangirurumen ken rigat ti kaipapanan ti pannakaisalakan no di pay ket gundaway nga agbiag nga agnanayon. (Juan 6:40; 17:3) Insuro ni Jesus a para iti “bassit nga ipastoran,” ti pannakaisalakan kaipapananna ti pannakapagungarda iti nailangitan a biag tapno makipagturayda ken Kristo iti Pagarian. (Lucas 12:32) Para iti dadduma iti sangatauan, ti pannakaisalakan kaipapananna ti pannakaisubli ti perpekto a biag ken relasion iti Dios a tinagiragsak da Adan ken Eva idiay minuyongan ti Eden sakbay a nagbasolda. (Aramid 3:21; Efeso 1:10) Biag nga agnanayon iti sidong dagiti kasta a kasasaad iti paraiso ti orihinal a panggep ti Dios nga agpaay iti sangatauan. (Genesis 1:28; Marcos 10:30) Ngem kasano a maisubli dagita a kasasaad?
Ti Pakaibatayan ti Pannakaisalakan—Ti Subbot
6, 7. Ania ti akem ni Jesus iti pannakaisalakantayo?
6 Posible ti agnanayon a pannakaisalakan babaen laeng ti daton a pangsubbot ni Kristo. Apay? Ilawlawag ti Biblia nga idi nagbasol ni Adan, ‘inlakona’ iti basol ti bagina ken amin dagiti saan pay idi a naipasngay nga annakna, a pakairamanantayo—isut’ gapuna a kasapulan ti subbot tapno maaddaan ti sangatauan iti natalged a namnama. (Roma 5:14, 15; 7:14) Dagiti daton nga animal iti sidong ti Linteg Mosaiko inladawanda ti panangipaay ti Dios iti subbot para iti intero a sangatauan. (Hebreo 10:1-10; 1 Juan 2:2) Babaen ti panangidatonna iti biagna, tinungpal ni Jesus dagita a naimpadtuan a ladawan. Sakbay ti pannakayanak ni Jesus, impakaammo ti anghel ni Jehova: “Isalakannanto ti ilina manipud kadagiti basolda.”—Mateo 1:21; Hebreo 2:10.
7 Namilagruan a naipasngay ni Jesus ken birhen Maria, ket kas Anak ti Dios, dina tinawid ti ipapatay ken Adan. Gapu iti dayta, agraman ti naan-anay a panagmatalekna, naaddaan ti biagna iti pateg a kasapulan tapno masubbot ti sangatauan iti basol ken patay. (Juan 8:36; 1 Corinto 15:22) Saan a kas kadagiti amin a dadduma a tattao, saan a nakedngan ni Jesus a matay gapu iti basol. Inrantana ti immay ditoy daga “tapno itedna ti kararuana a subbot a kasukat dagiti adu.” (Mateo 20:28) Tangay naaramidnan dayta, adda itan ti pannakabalin ni napagungar ken naitrono a Jesus a mangisalakan kadagiti amin a mangtungpal kadagiti iparebbeng ti Dios.—Apocalipsis 12:10.
Ania ti Kasapulan Tapno Maisalakan?
8, 9. (a) Kasano a sinungbatan ni Jesus ti saludsod ti maysa nga agkabannuag a nabaknang nga agturay maipapan iti pannakaisalakan? (b) Kasano nga inusar ni Jesus daytoy a gundaway a nangisuro kadagiti adalanna?
8 Naminsan, adda nabaknang ken agkabannuag nga agturay nga Israelita a nagsaludsod ken Jesus: “Ania ti masapul nga aramidek tapno matawidko ti agnanayon a biag?” (Marcos 10:17) Mabalin nga inyanninaw ti saludsodna ti kapanunotan dagiti Judio idi kaaldawanna—a kalikaguman ti Dios dagiti naimbag nga aramid ket no aramiden dagita ti maysa a tao, karbenganna nga isu ket isalakanto ti Dios. Ngem mabalin a naibatay iti agimbubukodan a motibo ti kasta a pormal a debosion. Saan a makaipaay dagita nga aramid iti natalged a namnama iti pannakaisalakan, ta awan ti imperpekto a tao a makatungpal a naan-anay kadagiti pagalagadan ti Dios.
9 Kas sungbat iti saludsod ti lalaki, pinalagipan laeng ni Jesus a tungpalenna dagiti bilin ti Dios. Impatalged a dagus ti agkabannuag nga agturay ken ni Jesus a tinungpalnan dagita manipud kinaubingna. Gapu iti sungbatna, natukay ti ayat ni Jesus kenkuana. Kinuna ni Jesus kenkuana: “Maysa a banag ti agkurang kenka: Inka, ilakom no ania dagiti bambanag nga adda kenka ket itedmo kadagiti napanglaw, ket maaddaankanto iti gameng idiay langit, ket umayka agbalinka a pasurotko.” Nupay kasta, sililiday a pimmanaw ti agkabannuag a lalaki, “ta ik-ikutanna idi ti adu a sanikua.” Kalpasanna, inyunay-unay ni Jesus kadagiti adalanna nga agbalin a tubeng iti pannakaisalakan ti nalabes a panangipateg kadagiti nailubongan a sanikua. Innayonna a di magun-od ti maysa a tao ti pannakaisalakan iti bukodna a panagregget. Ngem intuloy ni Jesus nga impanamnama kadakuada: “Kadagiti tattao di mabalin dayta, ngem saan a kasta iti Dios, ta amin a bambanag mabalin iti Dios.” (Marcos 10:18-27; Lucas 18:18-23) Kasano a posible ti pannakaisalakan?
10. Aniada a kondision ti masapul a tungpalentayo tapno maisalakantayo?
10 Sagut ti Dios ti pannakaisalakan, ngem saan a basta maited lattan. (Roma 6:23) Adda dagiti napateg a kondision a masapul a tungpalen ti tunggal maysa tapno maikari nga umawat iti dayta a sagut. Kinuna ni Jesus: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangalagad iti pammati kenkuana saan koma a madadael no di ket maaddaan iti agnanayon a biag.” Innayon met ni apostol Juan: “Ti mangalagad iti pammati iti Anak adda agnanayon a biagna; ti sumukir iti Anak dinanto makita ti biag.” (Juan 3:16, 36) Nalawag a kalikaguman ti Dios ti pammati ken panagtulnog iti tunggal maysa a mangnamnama a makagun-od iti agnanayon a pannakaisalakan. Tunggal maysa masapul nga awatenna ti subbot ken surotenna dagiti addang ni Jesus.
11. Kasano a magun-od ti maysa nga imperpekto a tao ti anamong ni Jehova?
11 Yantangay imperpektotayo, saan a nainkasigudan nga agduyostayo nga agtulnog ken imposible para kadatayo ti naan-anay a panagtulnog. Dayta ti gapuna a nangipaay ni Jehova iti subbot a mangabbong kadagiti basoltayo. Nupay kasta, masapul nga agtultuloy nga ikagumaantayo ti agbiag a mayannurot kadagiti dalan ti Dios. Kas kinuna ni Jesus iti daydi nabaknang nga agkabannuag nga agturay, masapul a tungpalentayo dagiti bilin ti Dios. No aramidentay dayta, saannatay la nga anamongan ti Dios no di pay ket maaddaantayo iti dakkel a rag-o, ta “dagiti bilinna saanda a makapadagsen”; “makapabang-ar” dagitoy. (1 Juan 5:3; Proverbio 3:1, 8, NW) Kaskasdi, saan a nalaka a salimetmetan ti namnama iti pannakaisalakan.
‘Makidangadang a Sipipinget Maipaay iti Pammati’
12. Kasano a ti namnama iti pannakaisalakan pabilgenna ti maysa a Kristiano a mangsaranget kadagiti imoral a sulisog?
12 Kayat idi ni adalan a Judas ti agsurat kadagiti nagkauna a Kristiano maipapan iti “pannakaisalakan nga ik-ikutan[da] a sapasap.” Nupay kasta, gapu iti agraraira idi a dakes a kasasaad iti moral nasken a bagbagaanna dagiti kakabsatna a ‘makidangadangda a sipipinget maipaay iti pammati.’ Wen, tapno maisalakan, saan nga umdas ti maaddaan iti pammati, panagtalinaed iti pudno a Nakristianuan a pammati, ken agtulnog no nasayaat ti kasasaad. Masapul a natibker ti debosiontayo ken Jehova tapno masarangettayo dagiti sulisog ken imoral nga impluensia. Kaskasdi, madaddadael ti panagpampanunot ken moral a kababalin ti kongregasion idi umuna a siglo gapu iti seksual a panaglablabes ken kinalulok, kinaawan panagraem iti autoridad, pannakabingaybingay, ken panagduadua. Tapno matulongan ida a mangparmek kadagiti kasta a pagannayasan, indagadag ni Judas kadagiti padana a Kristiano a laglagipenda a naimbag ti panggepda: “Dungdungnguen, babaen ti panangpabileg iti bagbagiyo iti kasasantuan a pammatiyo, ken panagkararag buyogen ti nasantuan nga espiritu, pagtalinaedenyo ti bagbagiyo iti ayat ti Dios, bayat nga ur-urayenyo ti asi ni Apotayo a Jesu-Kristo a maipaay iti agnanayon a biag.” (Judas 3, 4, 8, 19-21) Ti namnamada a maisalakan mapabilegna ida a makidangadang tapno agtalinaedda a nadalus iti moral.
13. Kasanotay a maipakita a saantayo a naikapis iti panggep ti di kaikarian a kinamanangngaasi ti Dios?
13 Namnamaen ni Jehova a Dios ti mapagwadan a moral a kababalin kadagidiay isalakanna. (1 Corinto 6:9, 10) Nupay kasta, ditay ukomen dagiti sabsabali gapu laeng ta an-annurotentayo ti moral a pagalagadan ti Dios. Saan a datayo ti mangikeddeng no ania ti agnanayon a pagtungpalan dagiti padatayo a tattao. Imbes ketdi, ti Dios ti mangaramid iti dayta, kas kinuna ni Pablo kadagiti Griego idiay Atenas: “Intudingna ti maysa nga aldaw a panggepna a panangukom a sililinteg iti mapagnaedan a daga babaen ti maysa a lalaki a dinutokanna”—ni Jesu-Kristo. (Aramid 17:31; Juan 5:22) No agbiagtayo a mayannurot iti pammatitayo iti subbot nga impaay ni Jesus, di rumbeng a kabutengtayo ti um-umay nga aldaw ti panangukom. (Hebreo 10:38, 39) Ti nasken, pulos a ditay koma “awaten ti di kaikarian a kinamanangngaasi ti Dios [ti pannakaikappiatayo kenkuana babaen ti subbot] ket maikapis[tayo] iti panggepna” babaen ti itutulok iti di umiso a panagpampanunot ken kababalin. (2 Corinto 6:1) Mainayon pay, babaen ti panangtulong kadagiti sabsabali tapno maisalakanda, ipakpakitatayo a naawatantayo ti panggep ti asi ti Dios. Kasanotay a matulongan ida?
Panangiranud iti Namnama iti Pannakaisalakan
14, 15. Siasino dagiti tinudingan ni Jesus a mangirakurak iti naimbag a damag maipapan iti pannakaisalakan?
14 Iti panangadawna iti sasao ni propeta Joel, insurat ni Pablo: “Tunggal maysa nga umawag iti nagan ni Jehova maisalakanto.” Kalpasanna innayonna: “Nupay kasta, kasano ti panangawagdanto iti daydiay a kenkuana saanda a naaddaan iti pammati? Kalpasanna, kasano a maaddaandanto iti pammati iti daydiay dida nangngeg? Kalpasanna, kasano a mangngegdanto no awan ti mangasaba?” Kadagiti simmarsaruno a sumagmamano a bersikulo, inlawlawag ni Pablo a saan a tumanor lattan ti pammati; imbes ketdi, ti pammati “sumaruno iti banag a nangngeg,” kayatna a sawen, ti “sao maipapan ken Kristo.”—Roma 10:13, 14, 17; Joel 2:32.
15 Siasino ti mangipakaammo iti “sao maipapan ken Kristo” kadagiti nasion? Intalek ni Jesus dayta a trabaho kadagiti adalanna—dagidiay nasursuruanen iti dayta a “sao.” (Mateo 24:14; 28:19, 20; Juan 17:20) No makipasettayo iti trabaho a panangikasaba iti Pagarian ken panangaramid kadagiti adalan, ar-aramidentayo ti kas insurat ni apostol Pablo idi inadawna ti sasao ni Isaias: “Anian a nagimnas ti saksaka dagidiay mangideklara ti naimbag a damag dagiti naimbag a bambanag!” Uray no adu dagiti di mangikankano iti naimbag a damag nga idandanontayo, iti imatang ni Jehova “nagimnas” latta dagiti sakatayo.—Roma 10:15; Isaias 52:7.
16, 17. Ania ti dua a panggep nga ibanag ti trabahotayo a panangasaba?
16 Adda dua a napateg a panggep ti panangitungpal iti daytoy nga annongen. Umuna, masapul a maikasaba ti naimbag a damag tapno maitan-ok ti nagan ti Dios ken maammuan dagidiay agtarigagay a maisalakan no sadino ti pagkamanganda. Naawatan ni Pablo daytoy a paset ti trabaho. Kinunana: “Iti kinapudnona, ni Jehova nangipasdek iti bilin kadakami kadagitoy a sasao, ‘Dinutokanka a kas maysa a silaw dagiti nasion, tapno agbalinka a pakaisalakanan agingga iti ungto ti daga.’” Gapuna, kas ad-adalan ni Kristo, masapul a makipaset ti tunggal maysa kadatayo a mangidanon iti mensahe ti pannakaisalakan kadagiti tattao.—Aramid 13:47; Isaias 49:6.
17 Maikadua, ti pannakaikasaba ti naimbag a damag ti pakaibatayan ti nalinteg a panangukom ti Dios. Maipapan iti dayta a panangukom, kinuna ni Jesus: “Inton ti Anak ti tao dumteng iti dayagna, ket amin dagiti anghel maikuyogda kenkuana, iti kasta agtugawto iti nadayag a tronona. Ket isuamin dagiti nasion maurnongdanto iti sanguananna, ket paglalasinennanto dagiti tattao iti maysa ken maysa, a kas ti maysa a pastor ilasinna dagiti karnero manipud kadagiti kalding.” Nupay maaramidto ti panangukom ken panamaglalasin “inton ti Anak ti tao dumteng iti dayagna,” ti trabaho a panangasaba ipaayanna dagiti tattao ita iti gundaway a mangbigbig kadagiti naespirituan a kakabsat ni Kristo ken makibinnulig kadakuada a maipaay iti agnanayon a pannakaisalakanda.—Mateo 25:31-46.
Taginayonenyo ti “Naan-anay a Pammasiguro ti Namnama”
18. Kasanotay a mapagtalinaed a naraniag ti ‘namnamatayo iti pannakaisalakan’?
18 Ti aktibo a pannakiramantayo iti trabaho a panangasaba tulongannatay met a mamagtalinaed iti namnamatayo a naraniag. Insurat ni Pablo: “Tarigagayanmi a tunggal maysa kadakayo mangipakita iti isu met laeng a kinagaget tapno maaddaan iti naan-anay a pammasiguro iti namnama agingga iti panungpalan.” (Hebreo 6:11) Sapay koma ngarud ta ikapet ti tunggal maysa kadatayo “kas kabal ti ulo ti namnama ti pannakaisalakan,” a laglagipentayo a “ti Dios intudingnatayo, saan nga iti pungtot, no di ket iti pananggun-od iti pannakaisalakan babaen ken Apotayo a Jesu-Kristo.” (1 Tesalonica 5:8, 9) Ipapusotayo met ti balakad ni Pedro: “Patibkerenyo dagiti panunotyo maipaay iti trabaho, sipupuotkayo a naan-anay; isaadyo ti namnamayo iti di kaikarian a kinamanangaasi a maiyeg kadakayo.” (1 Pedro 1:13) Amin dagidiay mangaramid iti dayta makitadanto ti naan-anay a pannakatungpal ti ‘namnamada iti pannakaisalakan’!
19. Ania ti usigentayo iti sumaganad nga artikulo?
19 Kabayatanna, ania koma ti panangmatmattayo iti natda a tiempo daytoy a sistema? Kasanotay nga usaren dayta a tiempo tapno maisalakantayo ken dagiti sabsabali? Usigentayo dagitoy a saludsod iti sumaganad nga artikulo.
Mailawlawagyo Kadi?
• Apay a masapul a pagtalinaedentayo a naraniag ti ‘namnamatayo iti pannakaisalakan’?
• Ania ti ramanen ti pannakaisalakan?
• Ania ti masapul nga aramidentayo tapno magun-odtayo ti sagut a pannakaisalakan?
• Ania ti maibanag ti trabahotayo a panangasaba maitunos iti panggep ti Dios?
[Dagiti Ladawan iti panid 10]
Saan la a pannakaispal iti pannakadadael ti kaipapanan ti pannakaisalakan