“Umaykayo Kaniak, . . . Ket Pagin-awaenkayto”

‘Makapagin-awa ti ‘Panangikasaba iti Sao’

ISU ket perpekto a tao nga addaan iti napateg a mision. Epektibo unay ti pamay-an ti panangiwardasna nga uray la “nagsiddaaw unay dagiti bunggoy iti wagas ti panangisurona.” (Mateo 7:28) Saan met a nauma a nangaskasaba. Ti kangrunaan a nangusaranna iti tiempo, pigsa, ken ik-ikutanna isu ti panangikasaba iti Pagarian ti Dios. Kinapudnona, awan kaasping ti panangasaba ken panangisuro ni Jesu-Kristo bayat a sinursorna ti ilina.​—Mateo 9:35.

Ti naganat a mision ni Jesus isu ti panangikasaba iti “naimbag a damag ti pagarian” kadagiti kapanawenanna ken ti panangisurona kadagiti adalanna a mangitungpal iti umasping a trabaho iti intero a lubong. (Mateo 4:23; 24:14; 28:19, 20) Naupay kadi dagiti imperpekto ken addaan iti pagkapuyan a pasurotna gapu iti kadagsen ti annongenda a mangasaba ken kalawa ti kasabaanda agraman ti kinaganat daytoy a trabaho?

Saan la ketdi! Kalpasan a binilinna dagiti adalanna nga ikararagda ti ad-adu a trabahador “iti Apo ti panagani,” ni Jehova a Dios, imbaon ida ni Jesus a mangisuro kadagiti tattao. (Mateo 9:38; 10:1) Sana pinatalgedan kadakuada a ti annongen dagiti pasurotna​—agraman iti trabaho a panangasaba​—ket pudno a makabang-ar ken makaliwliwa. Kinuna ni Jesus: “Umaykayo kaniak, . . . ket pagin-awaenkayto.”​—Mateo 11:28.

Gubuayan ti Rag-o

Anian a nadungngo, naayat, ken naasi dayta nga awis! Iyebkasna ti sensitibo a pannakaseknan ni Jesus kadagiti pasurotna. Makapagin-awa kadagiti adalanna no itungpalda ti annongenda nga ikasaba ti “naimbag a damag” ti Pagarian ti Dios. Mangyeg daytoy kadakuada iti pudno a rag-o ken pannakapnek.​—Juan 4:36.

Sakbay pay nga immay ditoy daga ni Jesus, nabayagen nga impaganetget ti Kasuratan a ti rag-o ket nasken a paset ti sagrado a panagserbi iti Dios. Nagminar daytoy idi inkanta ti salmista: “Agdir-ikayo a sibaballigi ken Jehova, dakayo amin a tattao iti daga. Agserbikayo ken Jehova buyogen ti panagrag-o. Umaykayo iti sanguananna buyogen ti narag-o nga ikkis.” (Salmo 100:1, 2) Ita, agrag-o ken Jehova dagiti tattao iti amin a nasion, ket kasla naragsak a dir-i dagiti nagballigi a buyot ti ebkas ti pammadayawda. Dagiti pudno a debotado iti Dios umadanida kenkuana “buyogen ti narag-o nga ikkis.” Ken pudno a maikanatad dayta yantangay “naragsak a Dios” ni Jehova, a kayatna a naragsak dagiti adipenna bayat nga itungpalda ti dedikasionda kenkuana.​—1 Timoteo 1:11.

Dagiti Nagin-awaan a Ministro

Kasano a posible a makapagin-awa imbes a makapabannog ti panagregget iti tay-ak ti ministerio? Bueno, imbilang ni Jesus a makapasalun-at a taraon ti panangibanagna iti trabaho ni Jehova. Kinunana: “Ti taraonko isu ti panangaramidko iti pagayatan daydiay nangibaon kaniak ken panangturposko iti trabahona.”​—Juan 4:34.

Umasping iti dayta, naragsak dagiti naregta a mangaskasaba a Kristiano bayat nga ‘ikasabada ti sao.’ (2 Timoteo 4:2) Kuna ni Connie, agkabannuag a Kristiano a mangbusbusbos iti nasurok a 70 nga oras kada bulan iti panangasaba: “Kalpasan ti panangasaba, mariknak ti pannakapnek ken kinaragsak, uray no nabannogak iti ngudo ti aldaw.”

Kasano no dida ipangag ti mensahe ti Pagarian? Intuloy ni Connie: “Aniaman ti reaksionda, awan pay ti kanito a nagbabawyak ti pannakiramanko iti ministerio. Malaksid nga ammok a pagragsakan ni Jehova ti ar-aramidek, pagragsakak a saritaen ti kinapudno gapu ta bayat nga ar-aramidek dayta, ad-adda a maitukit iti pusok ti nagsayaat a namnama a linaon ti Biblia.”

Marikna ti dadduma a mangyeg iti pannakapnek iti biagda ti panangtulong kadagiti tattao a gumun-od iti pannakaammo iti Dios. Kuna ni Meloney, maysa nga agtutubo a babai a regular a mangbusbusbos iti nasurok a 50 nga oras kada bulan iti panangasaba: “Makapagin-awa ti ministerio gapu ta mangyeg dayta iti direksion ken panggep iti biagko. Malipatak dagiti personal a problema ken inaldaw a pakadukotan no mangasabaak.”

Kuna ni Millicent, maysa met a naregta a ministro a Saksi ni Jehova: “Agbalin a napateg ti kada aldaw no saritaek iti sabsabali ti maipapan iti panggep ti Dios iti sangatauan ken no ilawlawagko no kasano a maisubli ti Paraiso ditoy daga. Pagbalinenna a napaypayso kaniak ni Jehova iti inaldaw ken mangyeg iti talna ken ragsak a diak masagrap iti sabali a wagas.”

Nagin-awaan Dagiti Dimngeg

Sigurado a makapagin-awa ti Nakristianuan a ministerio kadagiti mangikaskasaba iti Pagarian, ket makaliwliwa ti mangted-biag a mensahe kadagidiay mangipangag. Nupay sinanay dagiti madre ken padi ti maysa a maestra idiay Portugal, nariknana a saan a naited ti simbaanda dagiti naespirituan a kasapulanna. Nagtalinaed a di nasungbatan dagiti saludsodna mainaig iti Biblia. Ngem in-inut a limmawag ti pannakaawatna iti Kasuratan idi regular a nakipagadal iti Biblia iti maysa a Saksi ni Jehova. Naragsakan ti maestra. “Magagaranak iti panagadalmi iti kada Mierkoles,” kinunana, “bayat nga in-inut a masungsungbatan dagiti saludsodko babaen dagiti makakombinsir a pammaneknek manipud iti Biblia.” Iti agdama, dedikadon nga agserserbi ken Jehova daytoy a babai, ket paginggin-awaenna met ti sabsabali babaen ti kinapudno a linaon ti Biblia.

Nalawag ngarud a saan a makapadagsen kadagiti Saksi ni Jehova ti kinaganat ti trabahoda a mangasaba wenno ti kalawa ti sangalubongan a teritoriada. Saanda met a maupay gapu iti panangyaleng-aleng wenno ibubusor. Sireregta nga itungpalda ti annongenda a mangikasaba iti Pagarian. Iranudda ti naimbag a damag sadinoman ti pakasarakanda kadagiti tattao​—iti pagsardengan ti trak idiay Estados Unidos (1), iti eropuerto idiay Korea (2), idiay Andes (3), wenno iti tiendaan idiay London (4). Sirarag-o nga itultuloy nga itungpal dagiti agdama a pasurot ni Jesus ti makagunggona a sangalubongan a trabahoda. Ket kas inkarina, pinagin-awana ida ken inusarna ida a mangpagin-awa iti adu pay a sabsabali.​—Apocalipsis 22:17.