Makapabang-ar Dagiti Naespirituan a Bambanag

“Ibaklayyo ti sangolko . . . , ket makasarakkayto ti gin-awa a maipaay kadagiti kararuayo.”​—MAT. 11:29.

1. Ania ti inyurnos ti Dios idiay Bantay Sinai, ken apay?

ITI Linteg ti tulag a naipaulog idiay Bantay Sinai, karaman iti dayta ti urnos ti linawas a Sabbath. Babaen ti pannakangiwatna a ni Moises, imbilin ni Jehova iti nasion ti Israel: “Innem nga aldaw nga aramidem ti trabahom; ngem iti maikapito nga aldaw sumardengka, tapno ti torom ken ti asnom makapaginanada ket ti anak a lalaki ti adipenmo a babai ken ti ganggannaet nga agnanaed mapabang-aranda.” (Ex. 23:12) Wen, gapu iti panagayat ni Jehova kadagidiay adda iti sidong ti Linteg, inyurnosna ti maysa nga aldaw a panaginana tapno ‘mabang-aran’ dagiti adipenna.

2. Kasano a nagunggonaan ti Israel iti panangannurotna iti Sabbath?

² Ti kadi Sabbath ket maysa laeng nga aldaw a panaginana? Saan, maysa dayta a napateg a paset ti panagdayaw dagiti Israelita ken ni Jehova. Ti panangannurot iti Sabbath ket maysa a gundaway a maisuro dagiti ulo ti pamilia ti sangakabbalayanda a ‘mangsalimetmet iti dana ni Jehova tapno aramidenda ti kinalinteg.’ (Gen. 18:19) Gundaway met dayta dagiti pamilia ken aggagayyem a sangsangkamaysa a mangutob kadagiti aramid ni Jehova ken maaddaan iti naragsak a panaglalangen. (Isa. 58:13, 14) Kangrunaanna, iyanninaw ti Sabbath ti tiempo inton dumteng ti pudno a pannakabang-ar babaen ti Milenio a Panagturay ni Kristo. (Roma 8:21) Ngem ania ti iyanninaw dayta iti kaaldawantayo? Sadino ken kasano a ti kasta a pannakabang-ar ket masarakan dagiti pudno a Kristiano, a mangan-annurot iti daldalan ni Jehova.

Mabang-aran Babaen ti Nakristianuan a Timpuyog

3. Iti ania a pamay-an a nagtitinnulong dagiti Kristiano idi umuna a siglo, ken ania ti resultana?

³ Dineskribir ni apostol Pablo ti kongregasion Kristiano kas “maysa nga adigi ken sadiri ti kinapudno.” (1 Tim. 3:15) Dakkel a tulong ti naawat dagiti nagkauna a Kristiano babaen ti panagpipinnabilegda buyogen ti ayat. (Efe. 4:11, 12, 16) Idi adda idiay Efeso, napabileg ni Pablo iti ibibisita dagiti kameng ti kongregasion idiay Corinto. Imutektekanyo ti epektona: “Pagrag-oak ti kaadda ni Estefanas ken ni Fortunato ken ni Acaico,” kuna ni Pablo ‘ta binang-aranda ti espirituk.’ (1 Cor. 16:17, 18) Uray idi napan ni Tito idiay Corinto tapno agserbi kadagiti kakabsat sadiay, kastoy ti insurat ni Pablo kadakuada kalpasanna: “Ti espirituna napasaranta babaen kadakayo amin.” (2 Cor. 7:13) Kasta met laeng ita, matagiragsak dagiti Saksi ni Jehova ti pudno a pannakabang-ar babaen dagiti makapabileg a Nakristianuan a timpuyog.

4. Kasano a makapabang-ar kadatayo dagiti gimong ti kongregasion?

⁴ Napaneknekanyo a mismo a dagiti gimong ti kongregasion ket gubuayan ti dakkel a rag-o. Kadagita nga okasion a ‘makapagpipinnaregtatayo babaen ti pammati ti sabsabali.’ (Roma 1:12) Saantay laeng a basta am-ammo dagiti Kristiano a kakabsattayo. Gagayyemtayo ida, nga ipatpateg ken raraementayo. Dakkel a rag-o ken liwliwa ti magun-odtayo babaen ti regular a pannakitimpuyog kadakuada kadagiti gimong.​—Flm. 7.

5. Kasano a makapagpipinnaregtatayo kadagiti kombension ken asamblea?

⁵ Ti maysa pay a gubuayan ti pammaregta ket dagiti tinawen a kombension ken asambleatayo. Saanda laeng a mangipaay iti mangted-biag a danum ti kinapudno manipud iti Sao ti Dios, ti Biblia. Mangtedda pay kadatayo iti gundaway a ‘lumawa’ iti pannakilangentayo. (2 Cor. 6:12, 13) Ngem kasanon no managbabain ken marigatantayo a makiam-ammo kadagiti tattao? Ti maysa a pamay-an tapno maam-ammotayo dagiti kakabsat ket ti panagboluntario iti kombension. Kalpasan a nagboluntario iti maysa nga internasional a kombension, kinunana: “Dagiti laeng kapamiliak ken sumagmamano a gagayyemko ti am-ammok iti dayta a kombension. Ngem idi timmulongak iti panagdalus, adu a kakabsat ti naam-ammok! Makaparagsak dayta!”

6. Ania ti maysa a pamay-an tapno agbalin a makaparagsak ti panagpasiaryo?

⁶ Masansan idi a mapan dagiti Israelita idiay Jerusalem tapno agdayaw kabayatan ti tallo a piesta iti kada tawen. (Ex. 34:23) Masansan a kaipapanan dayta a panawanda dagiti talon ken paglakuanda ken magmagnada kadagiti natapuk a dalan iti sumagmamano nga aldaw. Kaskasdi, ti ipapanda iti templo ket mangyeg iti “dakkel a panagrag-o” yantangay makitada dagiti adda sadiay a ‘mangidatdaton iti panagdayaw ken Jehova.’ (2 Cron. 30:21) Dakkel met a pakaragsakan ita ti adu nga adipen ni Jehova ti ibibisita ti pamiliada iti pagtaengan a Bethel, ti sanga nga opisina dagiti Saksi ni Jehova. Apay a diyo padasen ti agpasiar a sangapamiliaan iti pagtaengan a Bethel?

7. (a) Ania dagiti gunggona nga itden ti panaglalangen? (b) Kasano nga agbalin a nakallalagip ken makapabileg ti panaglalangen?

⁷ Makapabileg met ti panaglalangen dagiti pamilia ken aggagayyem. Kuna ti masirib a ni Ari Solomon: “Iti maysa a tao awanen ti nasaysayaat ngem iti pannanganna ket pudno nga uminum ken ipakitana iti kararuana ti naimbag gapu iti napinget a panagtrabahona.” (Ecl. 2:24) Saan laeng a makapabang-ar iti rikna dagiti kasta a panaglalangen no di ket palagdaenda pay ti singgalut ti ayattayo kadagiti kapammatiantayo bayat nga ad-adda a maam-ammotayo ida. Tapno agbalin a nakallalagip ken makapabileg dagita nga okasion, nasaysayaat no taginayonen a bassit laeng ti grupo ken siguraduen a maimatonan a naimbag nangruna no adda arak a maidiaya.

Makapabang-ar ti Ministerio

8, 9. (a) Ania ti nagdumaan ti mensahe ni Jesus ken ti pagannurotan dagiti eskriba ken Fariseo? (b) Ania dagiti gunggona nga itden ti panangiranud kadagiti kinapudno iti Biblia?

⁸ Naregta ni Jesus iti ministerio, ken indagadagna kadagiti adalanna nga agbalinda a kasta. Nabatad dayta kadagiti sasaona: “Dakkel ti anien, ngem bassit dagiti trabahador. Ngarud, ipakaasiyo iti Apo ti panagani a mangibaon kadagiti trabahador iti panaganina.” (Mat. 9:37, 38) Pudno a makapagin-awa ti mensahe nga insuro ni Jesus; “naimbag a damag” dayta. (Mat. 4:23; 24:14) Naiduma unay dayta kadagiti makapadagsen a linteg nga impabaklay dagiti Fariseo kadagiti tattao.​—Basaen ti Mateo 23:4, 23, 24.

⁹ No iranranudtayo ti mensahe ti Pagarian iti sabsabali, ituktukonantayo ida iti naespirituan a pannakabang-ar ken ipaspasagepseptayo pay iti isip ken pusotayo dagiti agkakapateg a kinapudno iti Biblia. Maitutop ti kinuna ti salmista: “Idaydayawyo ni Jah, ta nasayaat ti mangipaay iti samiweng iti Diostayo; ta makaay-ayo dayta.” (Sal. 147:1) Mabalinmo kadi a parayrayen ti rag-om a mangidaydayaw ken Jehova kadagiti tattao?

10. Ti kadi balligi ti ministeriotayo ket agpannuray iti panangipangag dagiti tattao iti mensahetayo? Ilawlawagyo.

¹⁰ Pudno, nagduduma ti reaksion dagiti tattao iti naimbag a damag. (Basaen ti Aramid 18:1, 5-8.) No manmano laeng ti umawat iti mensahe ti Pagarian iti teritoriayo, ikagumaam nga ipamaysa ti atensionmo iti nasayaat a magapgapuanam iti ministerio. Laglagipem a saan a sayang ti agtultuloy a panagreggetmo a mangipakaammo iti nagan ni Jehova. (1 Cor. 15:58) Kanayonanna, ti balligi ti ministeriotayo ket saan nga agpannuray iti panangipangag dagiti tattao iti naimbag a damag. Manamnamatayo a siguraduen ni Jehova a dagiti nasingpet ti panagpuspusoda a tattao ket maikkan iti gundaway nga umawat iti mensahe iti Pagarian.​—Juan 6:44.

Makapabang-ar ti Panagdaydayaw ti Pamilia

11. Ania nga obligasion ti inted ni Jehova kadagiti nagannak, ken kasanoda a maitungpal dayta?

¹¹ Obligasion dagiti nagannak a Kristiano nga isuro kadagiti annakda ti maipapan ken Jehova ken ti daldalanna. (Deut. 11:18, 19) No maysaka a nagannak, adda kadi eskediulmo a mangisuro kadagiti annakmo maipapan iti naayat a nailangitan nga Amatayo? Tapno maitungpalmo daytoy a serioso nga obligasion ken maipaaymo dagiti kasapulan ti pamiliam, nangipaay ni Jehova iti aglaplapusanan a makapasalun-at a naespirituan a taraon babaen kadagiti libro, magasin, video, ken audio.

12, 13. (a) Kasano a magunggonaan dagiti pamilia iti urnos a Panagdaydayaw ti Pamilia? (b) Kasano a masigurado dagiti nagannak a ti panagdaydayaw ti pamiliada ket gubuayan ti pannakabang-ar?

¹² Kanayonanna, ti klase matalek ken masirib nga adipen ket nangyurnos iti Panagdaydayaw ti Pamilia. Gundaway daytoy ti pamilia nga agadal iti Biblia iti kada lawas. Adu ti nakapaneknek a rimmayray ti ayatda iti maysa ken maysa gapu iti daytoy nga urnos ken limmagda ti relasionda ken Jehova. Ngem kasano a masigurado dagiti nagannak a ti panagdaydayaw ti pamiliada ket gubuayan ti naespirituan a pannakabang-ar?

¹³ Makaparagsak koma ti Panagdaydayaw ti Pamilia ken saan a pagbalinen a nakaserserioso unay dayta yantangay “naragsak a Dios” ti pagdaydayawantayo. Kayatna a naragsaktayo nga agdaydayaw kenkuana. (1 Tim. 1:11; Fil. 4:4) Pudno a bendision dayta nga urnos yantangay mangted iti gundaway a mapagsasaritaan dagiti naespirituan a gameng manipud iti Biblia. Baliwbaliwan koma dagiti nagannak ti pamay-an ti panangisuroda, nga usarenda ti imahinasionda nga agpanunot iti nagduduma a metodo. Kas pagarigan, maysa a pamilia ti nangkiddaw iti sangapulo ti tawenna nga anakda a ni Brandon a mangiparang iti topiko nga “Apay nga Inusar ni Jehova ti Uleg a Mangiladawan ken Satanas?” Pakaburiboran dayta ni Brandon ta kaay-ayona ti uleg, ken masuron ta adda pakainaigan dayta ken Satanas. Dadduma a pamilia ti sagpaminsan a mangiparang kadagiti drama iti Biblia, nga agakem ti tunggal miembro iti maysa a karakter, ken basaenna ti ibagana manipud iti Biblia, wenno iyaktona ti maysa a pasamak. Saan laeng a makaparagsak dagita a metodo no di ket paregtaenna pay dagiti annak a makiraman tapno ad-adda a mayukuok iti pusoda dagiti prinsipio ti Biblia.a

Liklikanyo Dagiti Mabalin a Mangpadagsen Kadakayo

14, 15. (a) Ania ti mangipakita a kimmaro ti pakarigatan ken kinaawan iti seguridad bayat ti maudi nga al-aldaw? (b) Ania ti kanayonan a pakarigatan a pakaipasanguantayo?

¹⁴ Kumarkaro dagiti pakarigatan ken kinaawan iti seguridad iti daytoy maudi nga al-aldaw ti dakes a sistema ti bambanag. Minilion ti awanan iti panggedan ken narigat ti biagda. Uray dagiti adda panggedanda mariknada a saan nga umdas ti sueldoda, isu a dida maipaay ti amin a kasapulan ti pamiliada. (Idilig ti Haggeo 1:4-6.) Marigatan dagiti politiko ken lider ti gobierno a mangpasardeng iti terorismo ken dadduma pay a kita ti kinadakes. Adu met a tattao ti agsagsagaba gapu iti epekto ti bukodda a biddut.​—Sal. 38:4.

¹⁵ Maipaspasango met dagiti pudno a Kristiano kadagiti parikut ken pakarigatan nga itden ti sistema ti bambanag ni Satanas. (1 Juan 5:19) Adda dagiti gundaway a maipasango dagiti adalan ni Kristo kadagiti kanayonan a pakarigatan bayat nga ikagkagumaanda ti agtalinaed a matalek ken Jehova. “No indadanesdak, idadanesdakayto met,” kinuna ni Jesus. (Juan 15:20) Ngem uray ‘maidaddadanestayo, saantay a nabaybay-an iti rigat.’ (2 Cor. 4:9) Apay?

16. Ania ti makatulong kadatayo nga agtalinaed a naragsak?

¹⁶ Kinuna ni Jesus: “Umaykayo kaniak, dakayo amin a mabambannogan ken madagdagsenan, ket pagin-awaenkayto.” (Mat. 11:28) Babaen ti naan-anay a pammati iti pangsubbot a daton ni Kristo, intalektayon ti biagtayo iti ima ni Jehova. Iti kasta, maaddaantayo iti “pannakabalin a nalablabes ngem ti gagangay.” (2 Cor. 4:7) “Ti katulongan,” ti nasantuan nga espiritu ti Dios, pabilgenna iti kasta unay ti pammatitayo tapno saantay la a maibturan dagiti suot ken pakarigatantayo no di ket makapagtalinaedtayo pay a naragsak.​—Juan 14:26; Sant. 1:2-4.

17, 18. (a) Ania ti masapul a pagannadantayo? (b) Ania ti resulta ti panangipangpangruna kadagiti saan a napateg a ragragsak?

¹⁷ Masapul nga ikagumaan dagiti pudno a Kristiano ita a dida agpaimpluensia iti daytoy lubong a naipamaysa laeng iti ragragsak. (Basaen ti Efeso 2:2-5.) Ta no saan, masiluanda iti “derrep ti lasag ken ti derrep dagiti mata ken ti panangiparammag iti sanikua a pagbiag ti maysa.” (1 Juan 2:16) Wenno sibibiddut nga ipagaruptayo a mangyeg iti bang-ar ti panangpennek iti tarigagay ti lasag. (Roma 8:6) Kas pagarigan, dadduma a tattao ti mangparagsak iti bagida babaen ti droga, nalabes a panaginum, pornograpia, delikado nga isport, wenno imoral nga ar-aramid. Dagiti “pangallilaw a pamuspusan” ni Satanas ket mangballikug iti panangmatmattayo iti pudno a pannakabang-ar.​—Efe. 6:11.

¹⁸ Agpayso nga awan dakesna ti pannangan, panaginum, ken pannakipaset iti makagunggona a paglinglingayan no la ket ta kalkalainganna. Ngem ditay koma ipalubos a dagita ti kangrunaan iti biagtayo. Napateg ti kinatimbeng ken panagteppel, nangruna no ikabilangantayo ti tiempo a pagbibiagantayo. Mabalin a makapadagsen dagiti personal a pagragsakan nga uray la a pagbalinendatayo a “di aktibo wenno di nabunga maipapan iti umiso a pannakaammo ken ni Apotayo a Jesu-Kristo.”​—2 Ped. 1:8.

19, 20. Kasano a masarakan ti pudno a pannakabang-ar?

¹⁹ No an-annurotentayo dagiti pagalagadan ni Jehova, mabigbigtayo a temporario laeng ti aniaman a ragsak nga ituktukon daytoy a lubong. Kasta ti nabigbig ni Moises. (Heb. 11:25) Kinapudnona, ti pudno a pannakabang-ar​—daydiay mangyeg iti pudno, manayon a ragsak ken pannakapnek​—ket aggubuay iti panangaramid iti pagayatan ti nailangitan nga Amatayo.​—Mat. 5:6.

²⁰ Sapay koma ta itultuloytayo ti gumun-od iti pannakabang-ar manipud kadagiti naespirituan a bambanag. No aramidentayo dayta, ‘tallikudantayo ti di kinanadiosan ken nailubongan a tartarigagay bayat nga urayentayo ti naragsak a namnama ken nadayag a pannakaiparangarang ti naindaklan a Dios ken ti Manangisalakantayo, ni Kristo Jesus.’ (Tito 2:12, 13) Gapuna, determinadotayo koma nga agtultuloy a mangibaklay iti sangol ni Jesus babaen ti panagpasakuptayo iti autoridad ken panangiwanwanna. No aramidentayo dayta, masarakantayo ti pudpudno a kinaragsak ken pannakabang-ar!

[Footnote]

Ania ti Sungbatyo?

• Kasano a makasarak iti pannakabang-ar dagiti adipen ni Jehova ita?

• Iti ania a pamay-an a ti ministerio ket makapabang-ar kadatayo ken kadagiti kaskasabaantayo?

• Ania ti mabalin nga aramiden dagiti ulo ti pamilia tapno masiguradoda a makapabang-ar ti panagdaydayaw ti pamiliada?

• Ania dagiti bambanag a makapadagsen kadatayo iti naespirituan?

[Dagiti Ladawan iti panid 26]

No ibaklaytayo ti sangol ni Jesus, adu ti masarakantayo a gubuayan ti pannakabang-ar