Salsaludsod Dagiti Agbasbasa
Ania ti kaipapananna ti komento iti Hebreo 12:4: “Saankayo pay a pulos a simmaranget agingga iti dara”?
Ti sasao a “simmaranget agingga iti dara” ipasimudaagna ti isasaranget uray pakatayan, ti literal a pannakaibukbok ti dara ti maysa a tao.
Ammo ni apostol Pablo a kas resulta ti pammatida, dadduma a Hebreo a Kristiano ti ‘nagibtur iti dakkel a salisal iti sidong dagiti panagsagaba.’ (Hebreo 10:32, 33) Idi impatuldona dayta, agparang a nagusar ni Pablo iti mangiladawan a pannakidangadang iti atletiko a salisal dagiti Griego, a mabalin a ramanenna ti panagtaray, gabbo, boksing, ken panagibato iti discus ken gayang. Gapuna, iti Hebreo 12:1, indagadagna kadagiti padana a Kristiano: “Ikkatentayo met ti tunggal dadagsen ken ti basol a silalaka a mangsagud kadatayo, ket buyogen ti panagibtur tarayentayo ti lumba a naikabil iti sanguanantayo.”
Kalpasan ti tallo a bersikulo, iti Hebreo 12:4, mabalin a tuktukoyen ni Pablo ti pasalip a boksing, saanen a ti lumba a panagtaray. (Agpada a nadakamat dagiti tumataray ken boksingero iti 1 Corinto 9:26.) Dagiti gemgem ken pungupunguan dagiti nagkauna a boksingero ket nabedbedan iti lalat. Iti bedbed, mabalin nga adda naisigpit a “buli, landok, wenno dagiti buton ti metal, a mamataud iti nakaro a sugat kadagiti boksingero.” Ti kasta a naranggas a panaglaban ket agresulta iti panagdara, ipapatay pay ketdi no dadduma.
Ti nalawag ket addaan dagiti Hebreo a Kristiano iti umdas a pagwadan dagiti matalek nga adipen ti Dios a nagsagaba iti pannakaidadanes ken pannakaranggas, uray no mapapatayda, “agingga iti dara.” Amirisenyo ti konteksto ti ibagbaga ni Pablo a napasaran dagiti nagkauna a matalek tattao:
“Nauborda, nasuotda, naragaragadida, natayda babaen ti pannakagudas iti kampilan, nagpagnapagnada a sikakawes kadagiti lalat ti karnero, kadagiti lalat ti kalding, bayat nga addada iti kinakirang, iti rigat, iti sidong ti dakes a pannakatrato.” Kalpasanna, intampok ni Pablo daydiay Manangan-anay iti pammatitayo, ni Jesus: “Inibturanna ti kayo a pagtutuokan, nga inumsina ti bain, ket nagtugaw iti makannawan ti trono ti Dios.”—Hebreo 11:37; 12:2.
Wen, adu dagiti “simmaranget agingga iti dara,” kayatna a sawen, agingga iti ipapatay. Ti inaramidda ket nalablabes ngem makin-uneg a pannakidangadang maibusor iti basol a kinakurang ti pammati. Nasungdoda iti laksid ti pannakaranggasda, a tinaginayonda ti kinamatalekda agingga iti ipapatayda.
Saan pulos a nakapasar iti kasta a nakaro a pannakasuot dagiti kabbaro iti kongregasion idiay Jerusalem, a nalabit a sada la nagbalin a Kristiano kalpasan ti nakas-ang a pannakaidadanes. (Aramid 7:54-60; 12:1, 2; Hebreo 13:7) Kaskasdi, uray dagiti di nakaro a pakasuotan ket makalapped iti dadduma kadakuada nga agtultuloy a makisalip; ‘mabambannoganda ken agkapuy dagiti kararuada.’ (Hebreo 12:3) Nasken nga agmataenganda. Dayta ti mangpabileg iti panagibturda iti aniaman a pakasuotan a sumangbay, uray no dayta ket ramanenna ti pisikal a pannakadangran a pakatayanda.—Hebreo 6:1; 12:7-11.
Iti moderno a panawen, adu a Kristiano ti “simmaranget agingga iti dara,” a napapatayda agsipud ta dida tinallikudan ti Kinakristianoda. Imbes nga agbutengtayo gapu iti kuna ti Hebreo 12:4, dayta koma ti mangipamatmat no agingga iti ania a determinadotayo nga agtalinaed a nasungdo iti Dios. Kalpasanna, iti isu met laeng a suratna kadagiti Hebreo, kinuna ni Pablo: “Itultuloytayo koma ti maaddaan iti di kaikarian a kinamanangngaasi, a babaen iti dayta makaipaaytayo iti sagrado a panagserbi a makaay-ayo iti Dios buyogen ti nadiosan a buteng ken panagamak.”—Hebreo 12:28.