Ti Pannakayanak ni Jesus​—No Kasano ken Apay a Napasamak

“IMPOSIBLE!” Adu dagiti saan a Kristiano nga agkuna iti kasta no mangngegda ti estoria maipapan iti pannakayanak ni Jesus. Saan kano ngamin a nasientipikuan ti panamati nga agsikog ken aganak ti maysa a birhen a saan a dinennaan ti lalaki. Ania ti panagkunayo?

Idi 1984, nangipablaak ti The Times idiay Londres iti surat a nangilawlawag iti dayta a banag. Kunana: “Saan a nainkalintegan nga usaren ti siensia a pangsupiat kadagiti milagro. Adda iti maysa no mamati wenno saan kadagiti milagro.” Ti surat ket pinirmaan ti 14 a propesor ti siensia kadagiti unibersidad ti Britania. Kinunada: “Siraragsak a patienmi a pudno a napasamak ti panagpasngay ti maysa a birhen, dagiti milagro a nailanad kadagiti Ebanghelio, ken ti panagungar ni Kristo.”

Nupay kasta, nakaaawat no masdaaw ti maysa a tao no damona a mangngeg ti estoria maipapan iti pannakaipasngay ni Jesus babaen ti maysa a birhen. Nasdaaw uray ti mismo a birhen nga ina ni Jesus idi kinuna ti anghel ti Dios: “Adtoy! iyinawmonto iti aanakam ken ipasngaymonto ti maysa nga anak a lalaki, ket panaganamto iti Jesus.” Insaludsod ni Maria: “Kasano a mapasamak daytoy, yantangay saanak a makidendenna iti lalaki?” Inlawlawag ti anghel nga aramiden ti Dios daytoy a milagro babaen ti nasantuan nga espirituna, sa kinunana pay: “Iti Dios awan ti deklarasion a saanto a mabalin.” (Lucas 1:31, 34-37) Nalawag a Daydiay nangparsua iti nakaskasdaaw a pamay-an ti pannakabukel ti tao ket kabaelanna met nga aramiden ti pannakaisikog ken pannakaipasngay ni Jesus iti maysa a nadalus a birhen. No ti Dios ti nangparsua iti uniberso ken kadagiti awan pagkuranganna a linteg iti uniberso, kabaelanna met ngarud nga usaren ti maysa a selula ti itlog iti obario ni Maria a mangpataud iti perpekto a tao nga Anak.

No Apay a Kasapulan

Idi agsikog ni Maria, naitulag a mayasawa iti managbuteng-Dios a lalaki a ni Jose. Iti tagtagainep, inlawlawag ti anghel ti Dios ken ni Jose ti nagsayaat a makagapu no apay a masikog ti birhen a nobiana. Kinuna ti anghel: “Dika agamak a mangyawid ken Maria nga asawam, ta dayta nabukel kenkuana ket babaen iti nasantuan nga espiritu. Mangipasngayto iti anak a lalaki, ket masapul a panaganam iti Jesus, ta isalakannanto ti ilina kadagiti basolda.” (Mateo 1:20, 21) “Ni Jehova ti Pakaisalakanan” ti kayat a sawen ti nagan a Jesus iti Hebreo. Ipalagip dayta kadatayo ti pannakasapul iti pannakaisalakan iti basol ken ipapatay ken ti urnos ni Jehova a Dios iti kasta a pannakaisalakan babaen ken Jesus.

Gapu ta nagbasol ti immuna a tao a ni Adan, nayanak nga imperpekto dagiti amin a kaputotanna, nga addaan pagannayasan a manglabsing kadagiti linteg ti Dios. (Roma 5:12) Kasano a maisalakan dagiti kaputotan ni Adan iti basol ken agbalin a perpekto? Masapul a maisakripisio ti sabali a perpekto a natauan a biag a kas kapateg ti biag ni Adan tapno mabalanse ti timbangan ti hustisia. Dayta ti gapuna nga inaramid ti Dios a simimilagro a mayanak ti perpekto a tao a ni Jesus, ken no apay nga impalubos ni Jesus nga isu ket papatayen dagiti kabusorna. (Juan 10:17, 18; 1 Timoteo 2:5, 6) Kalpasan ti panagungar ken panagpalangit ni Jesus, addaan panagtalek a kunana: “Natayak idi, ngem, adtoy! sibibiagak iti agnanayon ken awan inggana, ket adda kaniak dagiti tulbek ni patay ken ti Hades [kadawyan a tanem ti sangatauan].”​—Apocalipsis 1:18.

Yantangay adda kenkuana dagiti piguratibo a tulbek ni patay ken ti Hades, linuktan ni Jesus ti gundaway tapno magun-od dagiti managbasol a tattao ti napukaw ni Adan. Inlawlawag ni Jesus: “Siak ti panagungar ken ti biag. Ti mangwatwat iti pammati kaniak, uray no matay, agbiagto; ket tunggal maysa a sibibiag ken mangwatwat iti pammati kaniak saanto a pulos matay.” (Juan 11:25, 26) Anian a nagsayaat a kari! Ngem adda napatpateg pay a makagapu a nayanak ni Jesus.

Ti Kangrunaan a Makagapu

Saan a nangrugi ti biag ni Jesus iti pannakayinawna iti aanakan ni Maria. “Bimmabaak manipud langit,” silalawag a kinunana. (Juan 6:38) Nagbiag ni Jesus kas maysa nga espiritu a kadua ti nailangitan nga Amana manipud idi punganay ti panamarsua. Kinapudnona, kuna ti Biblia a ni Jesus “ti pangrugian ti panamarsua ti Dios.” (Apocalipsis 3:14) Idi adda idiay langit, nakita ni Jesus ti iyaalsa ti maysa a nadangkes nga anghel a nangsugsog kadagiti immuna a tao a bumusor iti turay ti Dios. Daytoy ti nangted ken Jesus iti kangrunaan a makagapu no apay a tinarigagayanna ti mayanak kas perpekto a tao nga Anak ti Dios. Ania dayta a makagapu?

Tapno paneknekanna nga adda kalintegan ti nailangitan nga Amana nga agturay iti uniberso. Babaen ti panagtalinaedna a matalek manipud pannakayanak agingga iti ipapatayna ditoy daga, impakita ni Jesus ti kinatulokna nga agpasakup iti wagas ni Jehova a mangituray kadagiti parsuana. Sakbay a pinapatay dagiti kabusor ti Dios, imbatad ni Jesus ti makagapu no apay a situtulok a matay kas sakripisio. Kinunana a tapno maammuan ti lubong nga ay-ayatenna ti Ama. (Juan 14:31) No adda la koma kasta nga ayat dagiti immuna a dua a tao, da Adan ken Eva, nakapagtalinaedda koma a matalek iti sidong ti nalaklaka nga amang a suot a nakaipasanguanda.​—Genesis 2:15-17.

Ti kinamatalek ni Jesus pinaneknekanna met nga ulbod ti nadangkes nga anghel a ni Satanas. Pinardaya ni Satanas ti Dios ken ti tao babaen ti panangibagana iti kastoy iti imatang dagiti anghel idiay langit: “Aramiden ti tao ti amin tapno agbiag.” (Job 2:1, 4, Tanakh​—The Holy Scriptures) Imbaga ni Satanas a saan kano nga agtulnog iti Dios dagiti amin a tao no agpeggad ti biagda.

Dagita nga isyu ket panangkarit iti kinalinteg ti panangituray ti Dios. Tapno marisut dagitoy, situtulok ni Jesus a mayanak kas tao ken agtalinaed a matalek agingga ken patay.

No kasta, ti kangrunaan a makagapu a nayanak ni Jesus kas tao, ket ‘tapno saksianna ti kinapudno,’ kas imbagana a mismo. (Juan 18:37) Babaen ti sao ken aramid, impakitana a naan-anay a nalinteg ti panangituray ti Dios ket agnanayon a kinaragsak ti itden ti panagpasakup iti dayta. Inlawlawag met ni Jesus nga immay ditoy lubong tapno itedna ti natauan a biagna kas “subbot a kasukat dagiti adu,” tapno maaddaan dagiti managbasol a tattao iti gundaway nga agbalin a perpekto ken agbiag nga agnanayon. (Marcos 10:45) Tapno maawatan ti sangatauan dagitoy napateg a banag, masapul nga adda rekord maipapan iti pannakayanak ni Jesus. Maysa pay, adda dadduma pay a napateg a maadaltayo kadagiti pasamak a mainaig iti pannakayanak ni Jesus, kas ipakita ti sumaganad nga artikulo.

[Dagiti Ladawan iti panid 4]

Kasano a maisalakan iti basol dagiti kaputotan ni Adan?