Dagiti Maadal iti Pakasaritaan ti Pannakayanak ni Jesus

MINILION dagiti maay-ayatan kadagiti pasamak a mainaig iti pannakayanak ni Jesus. Makita daytoy kadagiti nakaad-adu a Belen a maiparparang ken kadagiti pabuya maipapan iti pannakayanak ni Jesus iti aglikmut ti lubong no panawen ti Krismas. Nupay nakaay-ayat, dagiti pasamak a mainaig iti pannakayanak ni Jesus ket saan a nailanad iti Biblia a panglinglingay kadagiti tattao. Imbes ketdi, paset dagitoy ti amin a Kasuratan nga impaltiing ti Dios a pakasursuruan ken pakapalintegan dagiti bambanag.​—2 Timoteo 3:16.

No kayat ti Dios a rambakan dagiti Kristiano ti kasangay ni Jesus, nailanad koma ngarud iti Biblia ti eksakto a petsana. Ngem nailanad aya? Kalpasan ti panangdakamatna a naipasngay ni Jesus idi adda dagiti pastor iti away nga agbambantay iti rabii kadagiti karneroda, kinuna ni Albert Barnes, maysa nga eskolar ti Biblia idi maika-19 a siglo: “Nalawag nga ipakita daytoy a nayanak ti Mangisalakan kadatayo sakbay ti Disiembre 25 . . . Nalam-ek ngamin [no kasta a Disiembre], nangruna kadagiti nangato ken kabambantayan a disso iti asideg ti Betlehem. Saan nga impalgak ti Dios ti tiempo a pannakayanak [ni Jesus]. . . . Saan met a napateg a maammuan no kaano; ta no napateg, pinailanad koma ti Dios.”

Maigidiat iti dayta, dagiti uppat a nangisurat iti Ebanghelio silalawag nga impalgakda kadatayo ti aldaw ti ipapatay ni Jesus. Napasamak dayta iti aldaw ti Paskua, iti maika-14 nga aldaw ti Nisan a kalendario dagiti Judio, iti primavera. Maysa pay, espesipiko a binilin ni Jesus dagiti pasurotna a ngilinenda dayta nga aldaw a panglaglagip kenkuana. (Lucas 22:19) Saan a naglaon ti Biblia iti bilin maipapan iti panangrambak iti kasangay ni Jesus, wenno ti kasangay ti asinoman a sabali a tao. Nakalkaldaang ta dagiti panagsusupiat maipapan iti petsa ti pannakayanak ni Jesus mabalin a rimbawanda dagiti napatpateg a pasamak iti dayta a tiempo.

Dagiti Nagannak a Pinili ti Dios

Kadagiti rinibu a pamilia iti Israel, ania a kita dagiti nagannak ti pinili ti Dios a mangpadakkel iti Anakna? Imbilangna kadi a napateg dagiti banag a kas iti kinalatak ken kinabaknang? Saan. Imbes ketdi, dagiti naespirituan a galad dagiti nagannak ti kinita ni Jehova. Usigenyo ti kanta a pagdayaw ni Maria, kas nailanad iti Lucas 1:46-55, a kinantana idi naibaga kenkuana nga isu ti naparaburan nga agbalin nga ina ti Mesias. Malaksid kadagiti dadduma pay a banag, kinunana: “Ti kararuak itan-okna ni Jehova . . . agsipud ta kinitana ti nababa a kasasaad ti adipenna a babai.” Sipapakumbaba nga imbilangna ti bagina a ‘nababa ti saadna,’ maysa a babai nga adipen ni Jehova. Napatpateg pay, dagiti nagimnas a balikas a pagdayaw a linaon ti kanta ni Maria ipalgakda nga isu ket maysa a naespirituan a tao nga addaan iti nauneg a pannakaammo iti Kasuratan. Nupay maysa a managbasol a kaputotan ni Adan, isu ti napili a kasayaatan nga agbalin nga ina ti Anak ti Dios ditoy daga.

Ti ngay asawa ni Maria, a nagbalin a pannakaama ni Jesus? Nalaing a karpintero ni Jose. Gapu iti anepna nga agtrabaho, naipaayna dagiti masapsapul ti pamiliana a buklen idi agangay ti lima nga annak a lallaki ken di kumurang ngem dua nga annak a babbai. (Mateo 13:55, 56) Saan a nabaknang ni Jose. Idi dimteng ti tiempo a panangidatag ni Maria iti inauna nga anakna iti templo ti Dios, naupay la ketdi ni Jose agsipud ta saanda a makaidaton iti karnero. Imbes ketdi, dagiti laeng kabaelan dagiti napanglaw ti indatonda. Maipapan iti ina ti kappasngay a maladaga, kuna ti linteg ti Dios: “No saan nga umdas ti kabaelanna maipaay iti maysa a karnero, masapul ngarud a mangala iti dua a pagaw wenno dua nga urbon nga atap a kalapati, maysa ti maipaay a daton a mapuoran ken maysa ti maipaay a daton gapu iti basol, ket ti padi masapul a mangaramid iti panangabbong maipaay kenkuana, ket isu nadalusto.”​—Levitico 12:8; Lucas 2:22-24.

Kuna ti Biblia a “nalinteg” ni Jose. (Mateo 1:19) Kas pagarigan, saanna a dinennaan ti birhen nga asawana agingga a di pay nayanak ni Jesus. Nakatulong daytoy tapno awan ti asinoman nga agatap no siasino ti pudno nga Ama ni Jesus. Saan a nalaka kadagiti kakaskasar ti di agdenna bayat nga agnanaedda iti maysa a balay, ngem ipakita daytoy nga agpada nga impategda ti pribilehio nga isuda ti napili a mangpadakkel iti Anak ti Dios.​—Mateo 1:24, 25.

Kas ken Maria, naespirituan a tao ni Jose. Tinawen nga isardengna ti agtrabaho ket sangapamiliaanda nga agdaliasat iti tallo nga aldaw manipud Nazaret nga agturong idiay Jerusalem tapno dar-ayanda ti tinawen a piesta a maawagan Paskua. (Lucas 2:41) Kasta met, sinanay la ketdi ni Jose ni agtutubo a Jesus a linawas a makipaset iti panagdayaw iti sinagoga iti lugarda, a pakaibasaan ken pakailawlawagan ti Sao ti Dios. (Lucas 2:51; 4:16) Nalawag ngarud nga umiso ti pinili ti Dios nga agbalin nga ina ken pannakaama ti Anakna ditoy daga.

Naparaburan Unay Dagiti Nanumo a Pastor

Nupay narigat para iti asawana, a siam a bulan idin a masikog, napan ni Jose iti siudad dagiti kapuonanna tapno agparehistro, kas panagtungpal iti bilin ni Cesar. Idi dimtengda nga agassawa idiay Betlehem, awan masarakanda a pagdagusan gapu iti kaadu dagiti tao iti siudad. Kapilitan ngarud a nagyanda iti maysa a kuadra. Dita a naipasngay ni Jesus ket impaiddada iti kulluong. Tapno bumileg ti pammati dagitoy a napakumbaba a nagannak, impatalged ni Jehova kadakuada a pagayatan ti Dios ti pannakayanak ni Jesus. Nangibaon kadi kadagiti prominente a lallakay a naggapu idiay Betlehem a mangpatalged kadagiti agassawa? Saan. Imbes ketdi, impakaammo ni Jehova a Dios dayta a banag kadagiti nagaget a pastor nga adda iti away nga agbambantay iti rabii kadagiti karneroda.

Nagparang kadakuada ti anghel ti Dios ket imbagana kadakuada a mapanda idiay Betlehem, a pakasarakanda iti kappasngay a Mesias a ‘nakaidda iti kulluong.’ Naklaat wenno nabainan kadi dagitoy a nanumo a lallaki idi naammuanda nga adda iti kulluong ti kayanak a Mesias? Saan! Dagus a pinanawanda dagiti karneroda ket napanda idiay Betlehem. Idi nasarakanda ni Jesus, sinaritada kada Jose ken Maria ti imbaga ti anghel ti Dios. Sigurado a napabileg ti pammati dagiti agassawa ta maar-aramid ti amin a bambanag iti wagas a pinanggep ti Dios. Ket ‘dagiti pastor nagsublida, nga intantan-ok ken indaydayawda ti Dios gapu iti amin a bambanag a nangngeg ken nakitada.’ (Lucas 2:8-20) Wen, saan a nagbiddut ni Jehova a nangipalgak iti bambanag kadagiti managbuteng-Dios a papastor.

Kadagita a pasamak, maadaltayo no ania a kita dagiti tattao ti rumbeng a pagbalinantayo tapno paraburannatayo ni Jehova. Di kasapulan nga agbalintayo a nalatak wenno nabaknang. Imbes ketdi, kas ken Jose, Maria, ken dagiti pastor, masapul nga agtulnogtayo iti Dios ken paneknekantayo ti ayattayo kenkuana babaen ti panangyun-una kadagiti naespirituan a banag imbes a dagiti material a banag. Pudno nga adda dagiti nasayaat a masursurotayo iti panangutob kadagiti nairekord a pasamak iti tiempo a pannakayanak ni Jesus.

[Ladawan iti panid 7]

Ania ti ipasimudaag ti panangidaton ni Maria iti dua a pagaw?

[Ladawan iti panid 7]

Sumagmamano a nanumo a papastor ti pinili ti Dios a nangipakaammuanna iti pannakayanak ni Jesus