Report Dagiti Manangiwaragawag iti Pagarian

“Mangmangngeganda” ti Mensahe ti Pagarian Idiay Brazil

TAPNO maiwaragawag ti naimbag a damag ti Pagarian iti komunidad dagiti tuleng, adu a Saksi ni Jehova idiay Brazil ti nangawat iti karit nga agadal iti Sign Language ti Brazil. Nagsayaat dagiti resulta ti panagreggetda, kas ipakita dagiti sumaganad a kapadasan.

Idiay São Paulo, ni Eva,a a maysa a tuleng, ket nagadal iti sign language idi nakikabbalay a kaduana dagiti annakna iti maysa a tuleng a lalaki. Iti maysa a shopping mall, naam-ammo ni Eva ken ti kaayan-ayatna ti maysa a grupo dagiti tuleng a Saksi ket naawisda a makigimong iti Kingdom Hall. Immannugotda, nga impapanda a maysa dayta a pagraragsakan.

Gapu ta bassit ti ammona iti sign language, manmano ti naawatan ni Eva iti naibaga iti gimong. Kalpasanna, sumagmamano a Saksi ti nangawis kenkuana nga agmerienda iti pagtaenganda. Babaen ti panangusarda kadagiti ladawan iti broshur a Tagiragsakenyo ti Biag nga Agnanayon Ditoy Daga!, inlawlawagda ti kari ti Dios a paraiso ditoy daga iti masanguanan. Nagustuan ni Eva ti naadalna ket regular a tumabtabunon kadagiti gimong.

Di nagbayag kalpasanna, nakisina ni Eva iti lalaki a kabbalayna ta kayatna ti agbiag a maitunos kadagiti pagalagadan ti Biblia. Iti laksid ti nakaro nga ibubusor ti pamiliana, agtultuloy a rimmang-ay iti naespirituan ket nabautisaran idi 1995. Innem a bulan kalpasanna, nagpasalista ni Eva kas maysa a payunir, wenno amin-tiempo a manangiwaragawag iti Pagarian. Uppat a tuleng ti natulongannan agingga a nagdedikar ken nagpabautisarda.

Naipasngay a tuleng ni Carlos. Naigamer iti droga, imoralidad, ken panagtakaw sipud kinaubingna. Gapu ta pinangtaan dagiti miembro ti kalabanna a barkada, napan ni Carlos idiay São Paulo ket temporario a nakipagnaed ken ni João. Kas ken ni Carlos, tuleng ken dakes ti panagbiag ni João.

Sumagmamano a tawen kalpasanna, naammuan ni Carlos ti mensahe ti Pagarian, a nangtignay kenkuana a mangilinteg iti biagna ken mangikallaysa iti babai a kabbalayna. Idi natungpalnan dagiti Nainkasuratan a bilin, nabautisaran ni Carlos kas simbolo ti panagdedikarna ken ni Jehova. Kabayatanna, saan nga ammo ni Carlos a naammuan met ni João ti naimbag a damag, ket nangaramid met iti dakkel a panagbalbaliw iti biagna. Idi naammuanna a saan nga anamongan ni Jehova ti panagusar kadagiti idolo, imbelleng ni João dagiti naurnongna nga imahen. Pinanawan ni João ti dakes a panagbiagna ket nagpabautisar met.

Anian ti ragsak da Carlos ken João idi nagranada iti Kingdom Hall ken idi makitada ti nagbalbaliwan ti tunggal maysa kadakuada! Agpadadan a responsable nga ulo ti pamilia ken agserserbi a naregta a manangiwaragawag iti Pagarian.

Idiay Brazil, adda ita 30 a kongregasion ken 154 a grupo nga agus-usar iti sign language, nga addaan iti nasurok a 2,500 nga agibumbunannag, ket 1,500 kadakuada ti umel. Iti “Dagiti Mannursuro iti Sao ti Dios” a Kombension Distrito a para kadagiti tuleng a naangay idi 2001 idiay Brazil, nasurok a 3,000 ti timmabuno, ken 36 ti nabautisaran. Babaen ti pammendision ni Jehova, manamnama nga adunto pay a tuleng ti mangawat iti mensahe ti Pagarian.

[Footnote]