No Kasano a Dagiti Dadduma Nakaawatda Kadagiti Sungbat

MINILION a tattao ti agkarkararag. Adda dagiti mamati a masungsungbatan dagiti kararagda. Dagiti dadduma pagduaduaanda no maipangpangag dagiti kararagda. Adda met dagiti agsapul kadagiti sungbat ngem saanda a pinanunot ti agpatulong iti Dios babaen ti kararag.

Tinukoy ti Biblia ti pudno a Dios kas ti “Managdengngeg iti kararag.” (Salmo 65:2) No agkararagka, sigurado kadi a naiturong dagiti kararagmo iti pudno a Dios? Dagiti kadi kararagmo isu dagiti kita ti kararag a denggenna?

Wen, nasungbatan ti kararag ti adu a tao iti intero a daga! Kasano a nakaawatda iti sungbat? Ania ti nasursuroda?

Ti Dios​—Siasino?

Idiay Portugal, adda maysa a relihioso a mannursuro a naedukaran babaen dagiti madre ken padi. Napasnek iti relihionna. Ngem nariribukan idi binalbaliwan ken binaybay-an ti simbaan dagiti ar-aramid a naisuro nga ipategna. Iti panagbaniagana, nakitana ti wagas ti panagdayaw dagiti taga Oriente, ket pinampanunotna no adda ngata maymaysa a pudno a Dios. Kasano koma ti panagdayawna? Idi nagimtuod iti padi maipapan kadagiti linaon ti Biblia, naupay gapu ta di naikankano dagiti saludsodna.

Nangiwaras ti iglesia Katolika kadagiti pampleta iti daytoy a siudad a pagnanaedan ti mannursuro a mangbalballaag kadagiti parokiano a saanda a makisasao kadagiti Saksi ni Jehova. Ngem intultuloyna ti nagsapul kadagiti sungbat. Naminsan, idi simmarungkar dagiti Saksi iti pagtaenganna, nagimdeng ket naginteres iti nangngegna. Dayta ti damo a pannakisaritana kadakuada.

Tapno masungbatan dagiti adu a saludsodna, inrugi daytoy a babai ti makipagadal iti Biblia kadagiti Saksi. Kada lawas, addaan iti atiddog a listaan dagiti saludsod nga iyimtuodna kadakuada. Kayatna a maammuan ti nagan ti Dios, no adda ngata maymaysa a pudno a Dios, no kanunonganna ngata ti panagusar iti imahen iti panagdayaw, ken adu pay. Napaliiwna a naggapu iti Biblia ti amin a naisungbat kenkuana, saan a personal a kapanunotan, isu a nasdaaw ken naragsakan iti maad-adalna. In-inut a nasungbatan dagiti adu a saludsodna. Ita, agdaydayawen ken ni Jehova buyogen ti espiritu ken kinapudno, kas imbaga ni Jesu-Kristo nga aramiden dagiti “pudno a managdaydayaw.”​—Juan 4:23.

Idiay Sri Lanka, maysa a pamilia ti regular a mangbasbasa iti Biblia a sangsangkamaysa, ngem saan a masungsungbatan ti adu kadagiti saludsod a napateg kadakuada. Kasapulanda ti tulong, ngem saan a maipaay ti padi dayta. Nupay kasta, simmarungkar dagiti Saksi ni Jehova ket impaayanda ti pamilia iti makatulong a naibatay-Biblia a literatura. Kalpasanna, idi naan-anay a nasungbatan dagiti Saksi ni Jehova dagiti saludsodda, immannugotda a mayadalan iti Biblia. Naginteresda unay gapu kadagiti nasursuroda iti panagadal.

Kaskasdi, gapu iti doktrina ti simbaan a naisuro sipud kinaubingna, narigat a patien ti asawa a babai a ti Ama ni Jesu-Kristo isu “ti maymaysa a pudno a Dios,” kas kinuna a mismo ni Jesus. (Juan 17:1, 3) Naisuro kenkuana a pumada ni Jesus iti Ama ket saan a rumbeng a kuestionaran daytoy a “misterio.” Gapu iti kinapasnek ken pannakaburiborna, nagkararag ken ni Jehova, nga inusarna ti nagan ti Dios, ket kiniddawna a mailawlawag kenkuana no siasino ni Jesus. Kalpasanna, siaannad a sinukimatna manen dagiti napapateg a kasuratan. (Juan 14:28; 17:21; 1 Corinto 8:5, 6) Nariknana a kasla saanen a bulsek iti kinapudno, ket nalawag a naawatanna itan a ni Jehova​—isu ti pudno a Dios​—ti Namarsua iti langit ken daga ken Ama ni Jesu-Kristo.​—Isaias 42:8; Jeremias 10:10-12.

Panagsagaba​—Apay nga Adda?

Nakaro a nagsagaba ti tao a ni Job. Natay amin dagiti annakna gapu iti bagyo, ken pimmanglaw. Nagsagaba met iti naut-ot a sakit ken inibturanna dagiti pammabasol dagiti ulbod a gagayyemna. Iti kangitingitan amin dagitoy a panagsagaba, nagdarasudos ni Job iti panagsaona. (Job 6:3) Ngem inkabilangan ti Dios ti kasasaad. (Job 35:15) Ammona no ania ti adda iti puso ni Job ken nangipaay iti balakad a kasapulan ni Job. Aramidenna met dayta kadagiti tattao ita.

Idiay Mozambique, agtawen laeng iti sangapulo ni Castro idi matay ni nanangna. Kasta unay ti leddaangna. “Apay a kasapulan a matay ken maulilakami?” inyimtuodna. Nupay napadakkel babaen kadagiti managbuteng-Dios a nagannak, mariribukan itan. Ania ti mangpabang-ar iti panunot ken pusona? Naliwliwa iti panangbasana iti bassit a Chichewa a Biblia ken iti pannakisaritana kadagiti manongna maipapan iti dayta.

In-inut a naakseptar ni Castro a natay ni nanangna, saan a gapu iti kinaawan hustisia iti biang ti Dios, no di ket gapu iti natawid a kinaimperpekto. (Roma 5:12; 6:23) Ti inkari ti Biblia a panagungar ti nangted kenkuana iti kasayaatan a liwliwa agsipud ta dayta ti pagibatayan tapno agtalek a makitananto manen ni nanangna. (Juan 5:28, 29; Aramid 24:15) Makapaladingit, uppat laeng a tawen kalpasanna, natay ni tatangna. Ngem iti dayta a gundaway, nabilbilegen ni Castro a mangdaer iti panagleddaang. Ita, ay-ayatenna ni Jehova ken sisusungdo nga us-usarenna ti biagna nga agserbi iti Dios. Nabatad kadagiti am-ammona ti rag-o a nasarakanna.

Adu a natayan iti ing-ingungoten ti naliwliwa kadagiti kinapudno iti Biblia a nangliwliwa ken ni Castro. Dadduma a naglak-am iti kasta unay a kinarigat gapu kadagiti aramid dagiti nadangkes ti agimtuod a kas ken ni Job: “Apay ngata nga agtultuloy nga agbiag dagiti mismo a nadangkes?” (Job 21:7) No talaga a denggen dagiti tattao ti ibagbaga ti Dios babaen ti Saona, maammuanda a pagimbaganda a mismo ti wagas ti panangtaming ti Dios kadagiti bambanag.​—2 Pedro 3:9.

Ni Barbara, a napadakkel idiay Estados Unidos, saan a personal a nadidigra iti gubat. Ngem dimmakkel iti panawen ti panaggugubat ti adu a pagilian. Inaldaw a maipadamag ti nakaal-alingget a resulta ti panaggugubat. Bayat ti panageskuelana, nariribukan a mangpampanunot kadagiti pasamak iti historia a nangrugi a kasla di napakpakadaan. Ania ti makagapu iti dayta? Maseknan kadi ti Dios iti mapaspasamak? Mamati nga adda ti Dios, ngem saan a masinunuo ti mariknana maipapan iti Dios.

Ngem in-inut a nagbaliw ti panangmatmat ni Barbara kas resulta ti pannakitimpuyogna kadagiti Saksi ni Jehova. Nagimdeng ken nakipagadal iti Biblia kadakuada. Nakigimong iti Kingdom Hall. Timmabuno pay iti maysa kadagiti dakkel a kombensionda. Kasta met, no agsaludsod, madlawna a saan nga agduduma a kapanunotan ti mangngegna manipud iti nagduduma a Saksi. Imbes ketdi, agtutunos ti sawen dagiti Saksi gapu ta naibatay iti Biblia ti pampanunotda.

Impatuldo dagiti Saksi dagiti pammaneknek manipud iti Biblia a ti lubong ket im-impluensiaan ni Satanas a Diablo, ti mangiturturay iti dayta, ken ti lubong iyan-anninawna ti espirituna. (Juan 14:30; 2 Corinto 4:4; Efeso 2:1-3; 1 Juan 5:19) Inlawlawagda a naipadto iti Biblia dagiti pasamak a mangburibor idi ken ni Barbara. (Daniel, kapitulo 2, 7, ken 8) Ti Dios impadtona dagita agsipud ta kabaelanna nga ammuen ti masanguanan no kayatna nga aramiden. Gapuanan ti Dios ti dadduma kadagitoy a pasamak. Adda met dagiti basta impalubosna. Impakita dagiti Saksi ken ni Barbara nga adda dagiti naimbag ken dakes a paspasamak iti kaaldawantayo nga impadto met ti Biblia ken ilawlawagna ti kaipapanan dagitoy. (Mateo 24:3-14) Impakitada kenkuana dagiti inkari ti Biblia a baro a lubong a ti kinalinteg ti agrairanto ken awanton ti panagsagaba.​—2 Pedro 3:13; Apocalipsis 21:3, 4.

In-inut a naawatan ni Barbara a nupay saan a ni Jehova a Dios ti makagapu iti panagsagaba ti tao, saanna a lappedan dayta babaen ti panangpilit kadagiti tattao nga agtulnog kadagiti bilinna no pilienda nga iyaleng-aleng dayta. (Deuteronomio 30:19, 20) Nangaramid ti Dios kadagiti urnos tapno agnanayon a makapagbiagtayo nga addaan ragsak, ngem ipapaayannatayo iti gundaway ita a mangipakita no pilientayo ti agbiag a maitunos iti nalinteg a daldalanna. (Apocalipsis 14:6, 7) Inkeddeng ni Barbara nga ammuen dagiti kalikagum ti Dios ken agbiag a maitunos kadagita. Nasarakanna met kadagiti Saksi ni Jehova ti kita ti ayat nga imbaga ni Jesus a pakabigbigan dagiti pudno a pasurotna.​—Juan 13:34, 35.

Mabalinmo met ti magunggonaan kadagiti urnos a nakatulong kenkuana.

Biag nga Addaan Kaipapanan

Uray kadagiti tattao a kasla naballigi ti biagda mabalin nga agsapulda kadagiti sungbat kadagiti saludsod a mangburburibor kadakuada. Kas pagarigan, ni Matthew, maysa nga agtutubo idiay Britania, nabayagen a tartarigagayanna a maammuan ti pudno a Dios ken ti panggep ti biag. Natay ni tatangna idi agtawen ni Matthew iti 17. Idi agangay, nagturpos ni Matthew iti panagadalna iti musika iti maysa nga unibersidad. Idi agangay, lumawlawag kenkuana ti kinamaag ti materialistiko a panagbiagna. Pimmanaw iti pagilianna tapno agnaed idiay Londres ket sadiay nasumokna ti panagdroga, panagpasiar kadagiti nightclub, astrolohia, espiritismo, Zen Buddhism, ken dadduma pay a pilosopia​—gapu laeng iti panagsapulna iti makapnek a biag. Gapu ta desperado, immararaw iti Dios tapno matulongan a mangsapul iti kinapudno.

Dua nga aldaw kalpasanna, nakita ni Matthew ti maysa a nabayagen a gayyemna ket inlawlawagna ti nariribuk a kasasaadna. Nakipagadal daytoy a lalaki kadagiti Saksi ni Jehova. Idi naipakita ken ni Matthew ti 2 Timoteo 3:1-5, nasdaaw iti kinaumiso ti panangiladawan ti Biblia iti lubongtayo ita. Idi binasana ti Sermon iti Bantay, natukay ti pusona. (Mateo, kapitulo 5-7) Nagkedked idi damo agsipud ta adda dagiti nabasana a maibusor kadagiti Saksi ni Jehova. Ngem idi agangay, inkeddengna ti tumabuno kadagiti gimong iti asideg a Kingdom Hall.

Naragsakan ni Matthew iti nangngegna ket inrugina ti nakipagadal iti Biblia iti maysa kadagiti panglakayen iti kongregasion. Di nagbayag, naamirisna a ti maad-adalna ket isu ti nabayagen a sapsapulenna, ti sungbat ti kararagna idi iti Dios. Nagunggonaan ni Matthew idi inwaksina dagiti aramid a di makaay-ayo ken ni Jehova. Bayat a sinukayna ti umiso a panagbuteng iti Dios, natignay a mangitunos iti biagna kadagiti bilin ti Dios. Naammuan ni Matthew nga adda pudno a kaipapanan ti kasta a biag.​—Eclesiastes 12:13.

Saan a naikeddeng a nasaksakbay a makasarak iti makapnek a biag ni Matthew ken dagiti dadduma a nadakamat iti daytoy nga artikulo. Nupay kasta, naammuanda nga addaan ni Jehova a Dios iti naayat a panggep para kadagiti amin a mayat nga agtulnog kadagiti bilinna. (Aramid 10:34, 35) Dayta a panggep iramanna ti biag nga agnanayon iti lubong nga awan ti gubat, nawayawayaan manipud sakit ken bisin, ken awanto payen ti ipapatay. (Isaias 2:4; 25:6-8; 33:24; Juan 3:16) Dayta kadi ti kayatmo? No wen, mabalinmo ti makasursuro iti ad-adu pay maipapan iti panangsarak iti tulbek iti makapnek a biag babaen ti itatabunom kadagiti naibatay-Biblia a gimong iti Kingdom Hall dagiti Saksi ni Jehova. Sibabara a maawiska a mangaramid iti dayta.

[Ladawan iti panid 7]

Sipapasnek nga agkararagka iti Dios, nga usarem ti personal a naganna

[Ladawan iti panid 7]

Makipagadalka iti Biblia kadagidiay pudno a mangisuro kadagiti linaonna

[Dagiti Ladawan iti panid 7]

Makigimongka iti Kingdom Hall

[Picture Credit Line iti panid 4]

Hiker: Chad Ehlers/Index Stock Photography