Pagserbianda Dagiti Kristiano a Kakabsat iti Sabali a Pagilian

NANGNANGNGEGYO kadin ti sasao nga “international servant” ken “international volunteer”? Dagiti Saksi ni Jehova a mangbukel kadagitoy a grupo boluntario nga usarenda ti tiempo ken paglainganda a tumulong iti panangibangon kadagiti pasilidad a mangyimprenta ken mangiwaras iti naibatay-Biblia a mensahe ti Pagarian. Dagitoy a boluntario tumulongda met iti panangibangon kadagiti Assembly Hall ken Kingdom Hall, nga agserbi kas sentro ti panangisuro iti Biblia. Iti agdama, dagitoy a boluntario tumultulongda kadagiti panagibangon a proyekto iti 34 a nagduduma a pagilian, kangrunaanna kadagiti napanglaw a lugar. Ania dagiti partikular a pakarigatan ken rag-o a mapaspasaran dagitoy a ministro iti panagserbida kadagiti Kristiano a kakabsat iti sabali a pagilian? Ania ti panagriknada iti “sagrado a panagserbi” nga ar-aramidenda? (Apocalipsis 7:9, 15) Tapno maammuan, imutektekantayo ti ibaga ti sumagmamano a boluntario a nagserbi idiay Mexico.

Idi Mayo 1992 ti damo nga isasangpet idiay Mexico dagiti internasional a boluntario. Di nagbayag kalpasanna, indauluanda ti pannakapalawa ti sanga nga opisina, a mangiwanwan kadagiti aktibidad dagiti Saksi ni Jehova idiay Mexico. Nabangon ti 14 a baro a pasdek, agraman dagiti pagnaedan dagiti boluntario nga agserserbi iti sanga nga opisina, maysa a pagimprentaan, ken maysa a pagopisinaan.

Tapno makatulong iti daytoy a proyekto, nasurok a 730 a boluntario manipud Canada, Gran Britania, Estados Unidos, ken dadduma pay a pagilian ti abagan-abaga a nagserbi a kadua ti ginasut a boluntario manipud iti amin a paset ti Mexico. Kanayonanna, nasurok a 28,000 a Saksi a naitimpuyog iti agarup 1,600 a kongregasion nga iwanwanwan ti sanga nga opisina ti timmulong iti panagibangon bayat ti ngudo dagiti lawas. Situtulok a nagtrabaho ti amin ken inusarda dagiti paglainganda nga awan bayadna. Minatmatanda a pribilehio ti agserbi ken ni Jehova iti kasta a wagas. Iti unos ti panagibangon, sipapanunotda iti naipaltiing a sasao iti Salmo 127:1: “Malaksid no ni Jehova ti mangbangon ti balay, awan mamaayna a nagtrabaho a sipipinget iti dayta dagiti managibangon iti dayta.”

Dagiti Karit a Maipaspasango Kadakuada

Ania dagiti karit a sanguen dagiti international volunteer iti panagserbida iti sabali a pagilian? Adtoy ti sumagmamano kadagiti komentoda. Ni Curtis ken Sally, agassawa manipud Estados Unidos, timmulongda kadagiti proyekto a panagibangon idiay Alemania, India, Mexico, Paraguay, Romania, Russia, Senegal, ken Zambia. Isalaysay ni Curtis: “Ti umuna a karit isu ti pannakayadayo iti balasangmi, nga agserserbi kas payunir [amin-tiempo a ministro], ken iti nakaitimpuyoganmi a kongregasion idiay Minnesota. Naitimpuyogkami ken ni baketko iti dayta a kongregasion iti unos ti 24 a tawen, ket komportablekami unay.”

Kuna ni Sally: “Makakarit ti agbiag iti saan a nakairuaman a kasasaad, nalabit nakarkaro pay iti maysa a babai ngem iti lalaki, ngem nasursurok a posible ti makibagay. Nasursurok pay nga ibturan dagiti adu nga insekto!” Innayonna: “Iti maysa a pagilian, sangapulo kadakami a boluntario ti nagnaed iti maysa nga apartment nga awanan iti kosina ken addaan laeng iti dua a pagdigusan. Sadiay, nasursurok ti ad-adda nga aganus.”

Ti panagadal iti sabali a lenguahe ket sabali pay a karit nga agkasapulan iti panagregget ken kinapakumbaba. Ni Sharon, a nagserbi a kadua ni lakayna kadagiti panagibangon a proyekto iti nagduduma a pagilian, ti nagkuna: “Maysa a karit no saanmo nga ammo ti lenguahe ti pagilian a pagserserbiam. Iti damo, narigat ti agbalin a nasinged kadagiti kapammatian no marigatanka a mangyebkas iti rikriknam. Makapaupay dayta. Ngem nakaan-anus ken maseknan unay kadakami dagiti kakabsat a naam-ammomi iti nakaibaonanmi a pagilian. Di nagbayag, makapagsasaritakamin uray kaskasano.”

Kasapulan ti Tured iti Pannakiraman iti Ministerio

Nupay dakkel ti maar-aramidan dagitoy a managsakripisio a boluntario iti panagrang-ay ti trabaho a panagibangon, ammoda a ti kangrunaan a trabahoda isu ti panangikasaba iti naimbag a damag ti Pagarian ti Dios. Gapuna, naan-anay a suportaranda ti trabaho a panangasaba nga itungtungpal dagiti kongregasion a nakaitimpuyoganda. Da Åke ken Ing-Mari, maysa nga agassawa a timmulong iti proyekto a panagibangon idiay Guadeloupe, Malawi, Mexico, ken Nigeria, binigbigda a kasapulan ti tured iti panagsao iti sabali a lenguahe no makiraman iti tay-ak ti ministerio iti sabali a pagilian.

Isalaysay ni Ing-Mari: “Idi damo, limitado ti pannakipasetmi yantangay kanayon a makikaduakami kadagiti lumugar a Saksi, ket masansan nga isuda ti agsao gapu ta marigatankami. Ngem maysa nga agsapa, inkeddengmi ti mangasaba a dakdakami nupay agnernerbioskami. Nakasaritami ti maysa a balasang a dimngeg iti insaganak a presentasion. Imbasaak iti maysa a teksto ken impaimaak iti sumagmamano a literatura. Kalpasanna, kinuna ti babai: ‘Adda kayatko nga imtuoden. Adda kabagiak a makipagad-adal iti Biblia kadagiti Saksi ni Jehova. Mabalinko met kadi ti mayadalan?’ Nasorpresaak ket diak nakatagari a dagus. Kalpasanna, nagpanunotak ket intukonko kenkuana ti panagadal iti Biblia.”

Innayon ni Ing-Mari: “Anian ti rag-o ken panagyamanko ken ni Jehova gapu iti panangbendisionna iti panangikagumaan ken tarigagaymi a mangiranud iti kinapudno.” Nagsayaat ti panagrang-ay daytoy a babai ket nabautisaran kas maysa a Saksi iti maysa a kombension distrito idiay Mexico City. Ginupgop da Åke ken Ing-Mari ti ministerioda iti kastoy: “Tagipatgenmi unay dagiti annongenmi kadagiti nagduduma a proyekto a panagibangon, ngem awan ti dakdakkel a rag-o ken pannakapnek no di ti panangtulong iti tao tapno maammuanna ti kinapudno.”

Kinamanagsakripisio

Pudno, agsakripisio dagiti boluntario a mangpanaw iti pamilia ken gagayyem tapno agserbida kadagiti kakabsatda iti sabali a pagilian, ngem matagiragsakda ti awan kaaspingna a rag-o. Ania dagita?

Kuna ti agassawa a Howard ken Pamela a nagserbi idiay Angola, Colombia, Ecuador, El Salvador, Guyana, Mexico, ken Puerto Rico: “Maysa a pribilehio a maam-ammo dagiti kakabsat iti nagduduma a pagilian ken mapasaran a mismo ti singgalut ti ayat nga agraraira iti sangalubongan a panagkakabsat. Masansan a mabasatayo dayta, ngem ad-adda a maapresiarmo ti nakapatpateg a panagkakabsattayo no agbiag ken agserbika a kadua dagiti addaan iti sabali a kultura ken nalikudan.”

Ni Gary, a timmulong iti proyekto a panagibangon idiay Colombia, Costa Rica, Ecuador, Mexico, ken Zambia, ket nagunggonaan iti kasta unay gapu iti daytoy a programa. Insalaysayna: “Ti pannakasanayko kadagiti naglabas a tawtawen babaen ti pannakilangenko kadagiti nataengan a kakabsat nga agserserbi iti sanga nga opisina kadagiti pagilian a nakaibaonak ti ad-adda a timmulong kaniak a mangsango kadagiti karit kadagiti pakaibaonak. Makapabileg dayta iti pammati agsipud ta mangted dayta iti gundaway a matagiragsak ti panagkaykaysa a pakabigbigan iti sangalubongan nga organisasion ni Jehova​—panagkaykaysa a mangringbaw iti panagduduma ti lenguahe, puli, wenno kultura.”

Kabayatanna, nairingpasen ti panagibangon idiay Mexico, ket naidedikar ita a tawen dagiti pasilidad ti sanga nga opisina. Gapu iti ayatda iti Dios, dakkel ti naitulong dagiti international servant ken international volunteer iti panangisaknap ti pudno a panagdayaw idiay Mexico ken iti dadduma a pagilian. Ti kinatulok ken kinamanagsakripisioda nga agserbi kadagiti Kristiano a kakabsatda iti nagduduma a pagilian ket apresiaren unay dagiti Saksi ni Jehova iti intero a lubong.

[Ladawan iti panid 25]

Ecuador

[Ladawan iti panid 25]

Colombia

[Ladawan iti panid 25]

Angola

[Ladawan iti panid 26]

Ti hardin iti sanga nga opisina

[Ladawan iti panid 26]

Idi mangrugi ti panangibangon kadagiti baro a pasilidad iti sanga nga opisina ti Mexico

[Ladawan iti panid 26]

Iti baba: Dadduma a kameng ti Construction Department iti sanguanan dagiti baro a pasilidad

[Ladawan iti panid 27]

Dagiti boluntario iti panagibangon maragsakanda a mangsuporta iti trabaho a panangasaba a kadua dagiti lokal a kongregasion