Salsaludsod Dagiti Agbasbasa

Iti Hebreo 2:14, apay a naawagan ni Satanas kas “daydiay addaan iti pannakabalin a mangyeg iti ipapatay”?

Iti ababa a pannao, sigun ken ni Pablo, kabaelan ni Satanas a papatayen dagiti tattao, wenno babaen dagiti ahentena. Maitunos iti dayta, inawagan ni Jesus ni Satanas a “mammapatay idi a nangrugi.”​—Juan 8:44.

Mabalin a makariro ti Hebreo 2:14 gapu iti wagas ti pannakaipatarus dayta kadagiti dadduma a bersion, nga agkuna nga adda ken ni Satanas ti “pannakabalin ni patay” wenno “pannakabalin iti ipapatay.” (King James Version; Revised Standard; New International Version; Jerusalem Bible) Mabalin a pagparangen ti kasta a patarus a kabaelan ni Satanas a patayen ti asinoman. Ngem nalawag a saan. Ta no kabaelanna, nabayagen a tinalipuposna koman ditoy daga dagiti agdaydayaw ken ni Jehova.​—Genesis 3:15.

Ti Griego nga ebkas a naipatarus iti dadduma a bersion kas “pannakabalin iti ipapatay” ken iti Baro a Lubong a Patarus kas ‘ti pannakabalin a mangyeg iti ipapatay’ ket “kraʹtos tou tha·naʹtou.” Ti tou tha·naʹtou ket maysa a porma ti ebkas a kaipapananna “ipapatay.” Ti kraʹtos kaipapananna “puersa, pigsa, bileg.” Sigun iti Theological Dictionary of the New Testament, kaipapanan dayta “ti kaadda ken pateg ti puersa wenno pigsa imbes a ti usarna.” No kasta, iti Hebreo 2:14, saan nga ipaspasimudaag ni Pablo nga adda ken ni Satanas ti naan-anay a pannakabalin ni patay. Imbes ketdi, ipatpatuldona ti abilidad wenno posibilidad nga iyeg ni Satanas ti ipapatay.

Kasano nga us-usaren ni Satanas ti ‘pannakabalinna a mangyeg iti ipapatay’? Iti libro a Job, mabasatayo ti maysa a di gagangay a pasamak. Kuna ti salaysay nga inusar ni Satanas ti maysa a bagyo tapno ‘papatayenna’ dagiti annak ni Job. Ngem imutektekanyo ta nabaelan dayta ni Satanas gapu iti pammalubos ti Dios. Adda ngamin maysa a napateg nga isyu a nasken a marisut. (Job 1:12, 18, 19) Kinapudnona, ni Satanas dina napapatay ni Job. Saan a napalubosan a mangaramid iti dayta. (Job 2:6) Ipakita daytoy a nupay ni Satanas no dadduma ti pakaigapuan ti ipapatay dagiti matalek a tattao, ditay rumbeng a pagamkan a kabaelannatayo a papatayen aniaman a kanito a kayatna.

Inusar met ni Satanas dagiti tattao a mangpapatay. Gapuna, adu a Kristiano ti natay gapu iti pammatida, dadduma ti napapatay babaen dagiti makapungtot a managderraaw wenno di nainkalintegan a napapatay babaen ti bilin dagiti opisial ti gobierno wenno dakes a hues.​—Apocalipsis 2:13.

Maysa pay, no dadduma mangpapatay ni Satanas babaen ti pananggundawayna kadagiti pagkapuyan ti tao. Idi kaaldawan ti Israel, ni propeta Balaam binalakadanna dagiti Moabita a gargarienda dagiti Israelita “tapno agaramidda iti di kinamatalek ken Jehova.” (Numeros 31:16) Nagbanag dayta iti pannakapapatay ti nasurok a 23,000 nga Israelita. (Numeros 25:9; 1 Corinto 10:8) Ita, adda dagidiay matnag “kadagiti pangallilaw a pamuspusan” ni Satanas ken magargarida nga agaramid iti imoralidad wenno dadduma pay a di nadiosan nga aramid. (Efeso 6:11) Pudno, dagiti kasta a tattao dida insigida a mapukaw ti biagda. Ngem agpegpeggad a mapukawda ti namnamada nga agbiag nga agnanayon, ket iti kasta, ni Satanas ti pakaigapuan ti ipapatayda.

Nupay bigbigentayo a kabaelan ni Satanas ti mangdangran, ditay koma pagbutngan nga awan gapgapuna. Idi kinuna ni Pablo a kabaelan ni Satanas ti mangpapatay, kinunana met a natay ni Kristo tapno “pukawenna [ni Satanas] . . . ken tapno luk-atanna amin dagidiay a gapu iti buteng iti ipapatay naipasakupda iti pannakaadipen iti intero a panagbiagda.” (Hebreo 2:14, 15) Wen, binayadan ni Jesus ti subbot ket iti kasta, winayawayaanna ti sangatauan manipud pannakaadipen iti basol ken ipapatay.​—2 Timoteo 1:10.

Siempre, pagpanunotennatayo ti kinapudno a kabaelan ni Satanas ti mangpapatay, ngem makapagtalektayo a kabaelan ni Jehova nga aturen ti aniaman a panangdangran ni Satanas ken dagiti ahentena. Ipanamnama ni Jehova a ti napagungar a Jesus “dadaelenna dagiti aramid ti Diablo.” (1 Juan 3:8) Babaen ti pannakabalin ni Jehova, pagungaren ni Jesus dagiti natay ket iti kasta ikkatennanto ni patay. (Juan 5:28, 29) Inton agangay, ibutaktakto ni Jesus ti limitasion ti pannakabalin ni Satanas babaen ti panangitapuakna kenkuana iti mangliwengliweng nga abut. Iti kamaudiananna, madadael ni Satanas iti agnanayon.​—Apocalipsis 20:1-10.