Ti Video a Mangtukay iti Puso Dagiti Agtutubo

ADU nga agtutubo ti naparegta a mangsukimat a naimbag iti kababalinda kalpasan a nabuyada ti video a Young People Ask​—How Can I Make Real Friends?a Naglaon ti video kadagiti nainsiriban a balakad ti kasuratan, personal nga ebkas dagiti agtutubo a Kristiano, ken makatukay iti rikna a moderno a drama a naibatay iti salaysay ti Biblia maipapan ken ni Dina. (Genesis, kapitulo 34) Naggapu iti Mexico dagiti sumaganad nga ebkas maipapan iti video.

Kuna ni Martha: “Kasta unay ti pannakatukay ti pusok iti daytoy a video. Kasla nairanta para kaniak. Kunak no umanayen nga ammo dagiti mannursuro ken kaeskuelaak a maysaak kadagiti Saksi ni Jehova. Diak napaneknekan dayta ta diak kinasabaan ida. Agyamanak kadagiti amin nga impormasion nga ipapaay ni Jehova, nangnangruna no tukayenna ti riknatayo kas iti daytoy a video.”

Kuna ni Juan Carlos: “Pagpanunotennaka a talaga daytoy a video. Kas maysa nga agkabannuag a lalaki, adda dagiti pagkamaliak ket matarusak ti dadduma a karakter iti drama. Sumagmamano a tawen ti napalabas, nagbiagak a doble kara, ngem nabigbigko a mangyeg iti dakes a bunga ti kasta a biag. Kalpasan a nabuyak ti video, desididoak nga agmatalek ken ni Jehova.”

Impudno ni Sulem: “Idi nabuyak ti video, natignay ti riknak. Insardengko ngamin ti panagbasak iti Biblia, ken saanak a regular nga agkarkararag ken ni Jehova. Idi mangngegko dagiti komento dagiti agtutubo iti video, natignayak a mangadal manen iti Biblia ken agkararag ken ni Jehova.”

Adu a karit ti sangsanguen ita dagiti agtutubo, ken masansan a napigsa ti impluensia dagiti gagayyemda iti estilo ti panagbiagda. (Salmo 26:4; Proverbio 13:20) Adu a tattao ti matultulongan nga agaramid iti umiso a desision maipapan iti daytoy gapu iti video a Young People Ask​—How Can I Make Real Friends?

[Footnote]