Report Dagiti Manangiwaragawag iti Pagarian

“Makaisuro Dayta!”

NI Dorota, maysa nga amin-tiempo a ministro dagiti Saksi ni Jehova idiay Poland, kinaduaanna ti agtawen iti 14 a baritona iti regular a panagpaeksamen iti klinika ti eskuelaan. Bayat ti eksamenasion, ti doktora a ni Janina,a nagimtuod ken ni Dorota maipapan kadagiti annongen ti anakna iti pagtaengan.

“No diak masaparan nga isagana ti pangrabii ti pamiliami a buklen ti innem, ti anakko ti mangaramid iti dayta,” insungbat ni Dorota. “Dalusanna met ti balay ken tumulong a mangtarimaan kadagiti bambanag iti balay. Pagay-ayatna ti agbasa. Naanep nga estudiante.”

“Naidumduma ti anakmo,” kinuna ni Janina. “Adda 12 a tawenen nga agtartrabahoak ditoy, ket awan pay a pulos nadamagko a kasta.”

Idi makitana nga adda gundawayna a mangasaba, inlawlawag ni Dorota: “Adu a nagannak ita ti saan a mangipapaay iti umiso a panangsanay kadagiti annakda. Dayta ti makagapu a bassit ti panagraem dagiti ubbing iti bagida.”

“Apay nga ammom amin dagita?” inyimtuod ni Janina. “Saan nga ammo ti kaaduan a nagannak ti maipapan kadagita a banag.”

“Ti Biblia ket nagpateg a gubuayan ti kasta nga impormasion,” insungbat ni Dorota. “Kas pagarigan, sigun iti Deuteronomio 6:6-9, ti panangisuro kadagiti annaktayo ket mangrugi iti panangisurotayo nga umuna iti bagitayo. Saan aya a rumbeng nga itukittayo nga umuna iti puso ken panunottayo dagiti nasayaat a prinsipio a kayattayo nga itukit kadagiti annaktayo?”

“Nagsayaaten,” kinuna ni Janina. “Talaga a nagsayaat!” Kalpasanna, inyimtuodna ken ni Dorota no kasano a nakatulong kenkuana ti Biblia a mangpadakkel ken mangisuro kadagiti annakna.

“Linawas nga iyadalmi ti Biblia kadagiti annakmi,” inlawlawag ni Dorota. “Usarenmi ti libro a napauluan Dagiti Saludsod nga Iyimtuod ti Agtutubo​—Dagiti Sungbat nga Epektibo.”b Intuloyna a dineskribir ti libro ken dinakamatna ti sumagmamano kadagiti saklawenna a topiko.

“Makaisuro dayta!” inyebkas ni Janina. “Mabalinko kadi a makita dayta a libro?”

Maysa nga oras kalpasanna, nagsubli ni Dorota nga awitna ti libro.

“Ania ti relihionmo?” inyimtuod ni Janina, bayat a suksukimatenna ti libro.

“Maysaak kadagiti Saksi ni Jehova.”

“Ania ti panangtrato dagiti Saksi ni Jehova kadagidiay saanda a kapammatian?”

“Kas iti panangtratok kenka​—nabuyogan iti panagraem,” insungbat ni Dorota, sana innayon: “Siempre, kayatmi a maammuanda koma ti kinapudno iti Biblia.”

“Nakasaysayaat ti riknak ita,” impudno ni Janina.

Iti ngudo ti panagbisita, imparegta ni Dorota a basaen ni Janina ti Biblia. “Mangted dayta iti kaipapanan iti biagmo ken tulongannaka iti trabahom.”

“Pinabilegnak a talaga a mangaramid iti dayta,” inaklon ni Janina.

Buyogen ti determinasion ken naannad a pannakisao, ti regular nga ipapan ni Dorota iti opisina ti doktor ket nagbalin a nasayaat a gundaway a mangasaba.​—1 Pedro 3:15.

[Footnotes]