Nagannak, Saluadanyo ti Napateg a Tawidyo

“Ti sirib agpaay a salaknib . . . Taginayonenna a sibibiag dagiti agik-ikut iti dayta.”​—ECLESIASTES 7:12.

1. Apay a dagiti nagannak rumbeng a matmatanda ti annakda kas sagut?

MANGIPASNGAY dagiti nagannak iti maysa a baro a biag nga addaan iti pisikal a langa ken tigtignay nga umasping kadakuada. Awagan ti Biblia dagiti kasta nga ubbing kas “tawid manipud ken Jehova.” (Salmo 127:3) Gapu ta isu ti pudno a Gubuayan ti Biag, intalek ni Jehova kadagiti nagannak ti maysa a banag a kukuana a talaga. (Salmo 36:9) Dakayo a nagannak, ania ti panangmatmatyo iti kasta a nagpateg a sagut manipud iti Dios?

2. Ania ti reaksion ni Manoa apaman a naammuanna nga isu ket agputot?

² Awan duadua a rumbeng nga awaten dagita a sagut buyogen ti kinapakumbaba ken panangipateg. Nasurok a 3,000 a tawenen ti napalabas, kasta ti reaksion ti Israelita a ni Manoa idi impakaammo ti anghel ken ni baketna nga agsikog daytoy. Apaman a nangngegna ti naimbag a damag, inkararag ni Manoa, “Dispensarennak, Jehova. Ti lalaki ti pudno a Dios a kaibabaonmo, bay-am, pangngaasim, nga umay manen kadakami ket isuronakami no ania ti rebbeng nga aramidenmi iti ubing a mayanakto.” (Uk-ukom 13:8) Nagannak, ania ti maadalyo iti ehemplo ni Manoa?

No Apay a Kasapulan Ita ti Tulong ti Dios

3. Apay a nangnangruna a kasapulan ita ti tulong ti Dios no iti panangpadakkel kadagiti annak?

³ Ita ti kapatgan a tiempo a kasapulan dagiti nagannak ti tulong ni Jehova no maipapan iti panangpadakkel kadagiti annakda. Ti makagapu? Ni Satanas a Diablo ken dagiti demoniona naitapuakdan ditoy daga manipud langit. “Asi pay ti daga,” impakdaar ti Biblia, “agsipud ta ti Diablo immulog kadakayo, nga addaan iti dakkel nga unget, yantangay ammona nga ababan ti periodo ti tiempona.” (Apocalipsis 12:7-9, 12) Sigun iti Biblia, “kasla leon a ngumerngernger” ni Satanas, nga “agsapsapul iti alun-onenna.” (1 Pedro 5:8) Dagiti nakapuy nga animal, masansan a dagiti urbon, ti kaaduan a biktimaen dagiti leon. Nainsiriban ngarud nga agpaiwanwan ken ni Jehova dagiti Kristiano a nagannak tapno masaluadanda dagiti annakda. Kasano ti kareggetyo a mangar-aramid iti dayta?

4. (a) Ania ti nasken nga aramiden dagiti nagannak no ammoda nga adda leon a nakabulos iti lugarda? (b) Ania a proteksion ti kasapulan dagiti annak?

⁴ No ammoyo nga adda leon a nakabulos iti lugaryo, sigurado a maysa a kangrunaan a pakaseknanyo ti panangsaluad kadagiti annakyo. Manangalun-on ni Satanas. Ikagkagumaanna a mulitan dagiti adipen ti Dios tapno dida maikari iti anamong ti Dios. (Job 2:1-7; 1 Juan 5:19) Dagiti ubbing ti nalaka a puntiriana. Tapno dagiti ubbing maliklikanda dagiti silo ti Diablo, masapul a maam-ammoda ni Jehova ken agtulnogda kenkuana. Napateg ti pannakaammo manipud iti Biblia. “Daytoy kaipapananna ti agnanayon a biag,” kinuna ni Jesus, “ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” (Juan 17:3) Maysa pay, kasapulan dagiti agtutubo ti sirib​—ti abilidad a mangtarus ken mangyaplikar kadagiti maad-adalda. Gapu ta “ti met laeng sirib taginayonenna a sibibiag dagiti agik-ikut iti dayta,” dakayo a nagannak nasken nga itukityo ti kinapudno iti puso dagiti annakyo. (Eclesiastes 7:12) Kasanoyo a maaramid dayta?

5. (a) Kasano a maitukit ti sirib? (b) Kasano nga inladawan ti Proverbio ti kinapateg ti sirib?

⁵ Kabaelan​—ken masapul​—nga ibasaanyo dagiti annakyo iti Sao ti Dios. Ngem saan laeng a dayta ti kasapulan tapno matulonganyo ida a mangayat ken agtulnog ken ni Jehova​—masapul a maawatanda dagiti bambanag. Kas panangyilustrar: Mabalin a naibilin iti ubing a saan nga agbalballasiw iti kalsada no di pay kimmita iti kannigid ken kannawanna. Ngem adda dagiti ubbing a di mangikankano iti dayta. Apay? Nalabit a saan a nayunay-unay iti ubing dagiti pagdaksan ti maatalan wenno mabalin a saan a nailawlawag kenkuana iti wagas a maawatanna a naimbag dagiti peggad. Iti kasta, maliklikanna koma ti “kinamaag” a mangiturong kenkuana iti aksidente. Agkalikagum iti panawen ken panaganus ti panangitukit iti sirib. Ngem nagpateg la ketdi ti sirib! “Ti daldalanna ket daldalan ti kinamakaay-ayo,” kuna ti Biblia, “ket amin a dandanana talna. Maysa dayta a kayo ti biag kadagidiay mangpetpetpet iti dayta, ket dagidiay agtultuloy a mangsalimetmet a siiirut iti dayta maawaganda iti naragsak.”​—Proverbio 3:13-18; 22:15.

Sursuro a Mangitukit iti Sirib

6. (a) Apay a masansan nga agtignay a di nainsiriban dagiti annak? (b) Ania a panangikagumaan ti madama a mapaspasamak?

⁶ Nupay naisuro kadakuada ti umiso, masansan nga agkamali dagiti ubbing agsipud ta ti pannursuro ket saan nga immukuok iti pusoda​—iti kinataoda. Ikagkagumaan ti Diablo a kontrolen ti puso dagiti ubbing. Ipamuspusanna a maisarangda kadagiti dakes nga impluensia ti lubongna. Ikagkagumaanna met a gundawayan ti natawidda a pagannayasan nga agaramid iti dakes. (Genesis 8:21; Salmo 51:5) Masapul a bigbigen dagiti nagannak nga adda a talaga ti mangikagkagumaan a mangkontrol iti puso dagiti annakda.

7. Apay a saan nga umdas ti basta panangibaga iti ubing no ania ti umiso wenno di umiso?

⁷ Kadawyan nga ibaga dagiti nagannak iti ubing no ania ti umiso wenno di umiso, a patienda a naisuroda kenkuana ti maysa a moral a pagalagadan. Mabalin nga ibagada kenkuana a dakes ti agulbod, agtakaw, wenno makidenna iti saanna nga asawa. Ngem kasapulan ti ubing ti nabilbileg a rason no apay nga agtulnog, saan a gapu ta imbaga laeng dagiti nagannakna. Linteg dagita ni Jehova. Nasken a masursuro ti ubing a nainsiriban ti agtulnog kadagiti bilin ti Dios.​—Proverbio 6:16-19; Hebreo 13:4.

8. Ania a sursuro ti makatulong kadagiti ubbing tapno makapagtignayda a nainsiriban?

⁸ Ti kinakomplikado ti uniberso, ti panagduduma dagiti sibibiag a bambanag, ti panagbaliwbaliw ti paniempo​—makatulong amin dagita tapno maawatan ti ubing nga adda maysa a kasisiriban a Namarsua. (Roma 1:20; Hebreo 3:4) Kanayonanna, nasken a maisuro iti ubing nga isu ket ay-ayaten ti Dios ken nangipaay iti probision babaen ti daton ti Anakna tapno magun-odna ti biag nga agnanayon ken maparagsakna met ti Dios babaen ti panagtulnogna kadagiti bilinna. Iti kasta, mabalin a matignay nga agserbi ken ni Jehova iti laksid dagiti panangikagumaan ti Diablo a manglapped kenkuana.​—Proverbio 22:6; 27:11; Juan 3:16.

9. (a) Ania a sursuro ti makaispal iti biag? (b) Ania ti naibilin nga aramiden dagiti amma, ken ania ti ramanen dayta?

⁹ Ti kita ti sursuro a mangsaluad iti ubing ken mangtignay kenkuana nga agaramid iti umiso ket agkasapulan iti panawen, atension, ken panangiplano. Masapul a dagiti nagannak agpaiwanwanda iti Dios. Kuna ti Biblia: “Dakayo, nga amma, . . . itultuloyyo a padakkelen [dagiti annakyo] iti disiplina ken panangiturong-panunot ni Jehova.” (Efeso 6:4) Ania ti kayat a sawen dayta? Iti orihinal a Griego, ti “panangiturong-panunot” ipasimudaagna ti ideya ti “panangimula iti isip.” Gapuna, maidagdagadag kadagiti amma nga imulada ti isip ni Jehova kadagiti annakda. Anian a salaknib dayta kadagiti ubbing! No naimula iti isip dagiti annak ti pampanunot ti Dios, masaluadanda a di agaramid iti dakes.

Tarigagay Maigapu iti Ayat

10. Tapno sieepektibo a maisuroyo ti anakyo, ania ti napateg nga ammuenyo?

¹⁰ Ngem tapno matungpal ti tarigagayyo a mapadakkelyo ti anakyo iti umiso a wagas, masapul a maigapu iti ayat ti panagreggetyo. Maysa a napateg a banag ti nasayaat a komunikasion. Ammuenyo no ania ti mapaspasamak iti biag ti anakyo ken no ania dagiti kapanunotanna. Iti maysa a naragsak a situasion, siaannad a paregtaenyo ti anakyo a mangyebkas iti riknana. No dadduma, mabalin a maklaatkayo iti ibagana. Agtanangkayo. Umimdengkayo buyogen ti pannakaseknan.

11. Kasano a ti nagannak maimulana iti anakna ti isip ni Jehova?

¹¹ Pudno, mabalin nga adu a daras a binasaam ti anakmo iti Biblia maipapan kadagiti linteg ti Dios a mangiparit iti seksual nga imoralidad. (1 Corinto 6:18; Efeso 5:5) Mabalin a nayunay-unay iti anakmo no ania ti makaay-ayo ken saan a makaay-ayo ken ni Jehova. Ngem saan laeng a dayta ti kasapulan tapno maimula iti anakmo ti isip ni Jehova. Masapul a matulongan dagiti ubbing a mangtarus iti kinapateg dagiti linteg ni Jehova. Nasken a kombinsidoda nga umiso ken makagunggona dagiti lintegna, ket ti panagtulnog kadagita ti maiparbeng ken naayat nga aramiden. Sa laeng makuna a naimulam ti isip ti Dios kadagiti annakmo no nakirinnasonka kadakuada iti Kasuratan ket awatenda ti panangmatmat ti Dios.

12. Kasano a ti nagannak matulonganna ti anakna a maaddaan iti umiso a panangmatmat iti sekso?

¹² No kasaritam maipapan iti sekso, mabalinmo nga imtuoden, “Iti panagkunam, adda kadi ragsak a pakaikapisan ti tao no agtulnog iti linteg ni Jehova a liklikan ti makidenna sakbay ti panagkasar?” Paregtaem ti anakmo a mangilawlawag iti sungbatna. Kalpasan a mairepasom kenkuana ti panaganak a nagsayaat a probision ti Dios, mabalinmo nga iyimtuod: “Iti panagkunam, mangaramid ngata ti naayat a Diostayo kadagiti linteg a mangikkat iti ragsaktayo iti biag? Wenno nairanta dagiti lintegna a mangparagsak ken mangsalaknib kadatayo?” (Salmo 119:1, 2; Isaias 48:17) Ammuem ti kapanunotan ti anakmo iti daytoy a banag. Kalpasanna, mabalin a mangdakamatka kadagiti pagarigan no kasano a nangyeg iti saem ken didigra ti seksual nga imoralidad. (2 Samuel 13:1-33) Babaen ti pannakirinnasonmo iti anakmo tapno matarusan ken awatenna ti panangmatmat ti Dios, dakkel ti magapuanam a mangimula kenkuana ti isip ti Dios. Ngem adda pay ti mabalinmo nga aramiden.

13. Matignay ti ubing nga agtulnog ken ni Jehova no matarusanna ti ania?

¹³ Nainsiriban no saanmo laeng nga isuro iti anakmo dagiti pagdaksan ti panagsukir ken ni Jehova no di ket ilawlawagmo pay no kasano a personal a maapektaran ni Jehova iti wagas ti panagbiagtayo. Ipakitam iti anakmo manipud iti Biblia a masairtayo ni Jehova no ditay aramiden ti pagayatanna. (Salmo 78:41) Mabalin nga iyimtuodmo, “Apay a dimo kayat a masair ti rikna ni Jehova?” kalpasanna ilawlawagmo: “Ni Satanas a kabusor ti Dios ibagbagana nga agserserbitayo ken ni Jehova gapu kadagiti inaagum a tarigagay, saan ket a gapu iti panagayattayo iti Dios.” Kalpasanna, ilawlawagmo no kasano a naparagsak ni Job ti puso ti Dios idi sinalimetmetanna ti kinatarnawna, a nangipaay iti sungbat iti ulbod a pammabasol ni Satanas. (Job 1:9-11; 27:5) Nasken a matarusan ti anakmo a mabalinna a maparagsak wenno mapagladingit ni Jehova, depende iti kababalinna. (Proverbio 27:11) Daytoy ken adu a dadduma pay a napateg a leksion ti mabalin nga isuro kadagiti annak babaen ti panangusar iti libro nga Agsursuroka iti Naindaklan a Mannursuro.a

Dagiti Matarigagayan a Resulta

14, 15. (a) Aniada a leksion iti libro a Mannursuro ti nangtignay kadagiti ubbing? (b) Ania dagiti nasayaat a resulta a nagun-odyo iti panangusar iti dayta a libro? (Kitaenyo met ti kahon iti panid 18-19.)

¹⁴ Sigun iti surat ti maysa a lolo idiay Croatia a mangbasbasa iti libro a Mannursuro kadua ti apona nga agtawen iti pito, imbaga ti ubing kenkuana dagiti sumaganad: “Adda imbilin ni Nanang nga aramidek ngem diak kayat nga aramiden. Idi kuan, malagipko ti kapitulo a ‘Ti Panagtulnog Salaknibannaka,’ isu a napanak manen kenkuana ket imbagak nga agtulnogak.” No maipapan iti kapitulo a “No Apay a Saantayo Koma nga Agulbod,” kinuna ti maysa nga agassawa idiay Florida, E.U.A.: “Mangipaay dayta kadagiti saludsod a mangawis kadagiti ubbing a mangyebkas iti riknada ken mangbigbig kadagiti nagkamalianda a dida koma bigbigen.”

¹⁵ Ti libro a Mannursuro ket naglaon iti nasurok a 230 a ladawan, ken addaan iti kapsion, wenno deskripsion, ti tunggal ladawan wenno grupo dagiti ladawan. “Masansan a mingmingan ti anakko ti maysa a ladawan ket dina kayat ti umalis iti sabali a panid,” kinuna ti maysa a mangap-apresiar nga ina. “Saan laeng a makaay-ayo dagiti ladawan no di ket adda pay ti masursuro kadagita, wenno gutugotenna dagiti ubbing nga agsaludsod. No maipapan iti ladawan nga adda ubing nga agbuybuya iti telebision iti uneg ti nasipnget a siled, inyimtuod ti anakko, ‘Nanang, ania ti ar-aramiden daytoy nga ubing?’ iti tono a mangipakita nga ammona nga adda problema iti dayta.” Kuna ti kapsion iti dayta a ladawan: “Siasino ti makakita iti amin nga ar-aramidentayo?”

Napateg nga Edukasion iti Kaaldawantayo

16. Ania ti napateg a maisuro ita kadagiti ubbing, ken apay?

¹⁶ Masapul a maammuan dagiti ubbing no ania ti umiso ken di umiso nga usar dagiti mabagbagida. Ngem saan a kanayon a nalaka ti panangilawlawag iti dayta. Maysa a kolumnista iti pagiwarnak ti nagkuna nga isu ket dimmakkel iti panawen a maibilang a naalas ti panangusar kadagiti termino a mangtukoy kadagiti mabagbagi. No maipapan iti panangisurona kadagiti annakna, insuratna: “Masapul a diak alusiisen.” Talaga a saan a masalakniban ti ubing no liklikan dagiti nagannak ti topiko a sekso gapu laeng ta alusiisenda. Gundawayan dagiti manangmolestia ti kinainosente ti ubing. Ti libro nga Agsursuroka iti Naindaklan a Mannursuro ilawlawagna dayta a topiko iti naannad, nadayaw a pamay-an. Saan a mamulitan ti kinainosente dagiti ubbing no isuro kadakuada ti maipapan iti sekso. Ti ketdi saan a panangisuro kadakuada iti dayta ti mabalin a mangdadael iti kinainosenteda.

17. Kasano a ti libro a Mannursuro matulonganna dagiti nagannak a mangisuro kadagiti annakda maipapan iti sekso?

¹⁷ Iti kapitulo 10, no dakdakamaten ti maipapan kadagiti dakes nga anghel nga immay ditoy daga ken nagputot iti tattao, mayimtuod iti ubing, “Ania ti ammom maipapan iti seksual a relasion?” Mangted ti libro iti simple, nadayaw a sungbat. Kalpasanna, ilawlawag ti kapitulo 32 no kasano a masalakniban dagiti ubbing kadagiti seksual a mananggundaway. Adun a surat manipud kadagiti agbasbasa iti daytoy a magasin ti nagkuna a napateg ti kasta a panangisuro. Kuna ti maysa: “Itay napan a lawas, ti ubing pay nga anakko a ni Javan nakasaritana ti doktorna a nangimtuod no nailawlawagmin kenkuana ti umiso nga usar dagiti mabagbagi. Naragsakan ti doktorna ta naaramidanmi dayta babaen ti panangusarmi iti daytoy baro a librotayo.”

18. Ania ti kuna ti libro a Mannursuro maipapan iti panangpadayaw kadagiti emblema ti pagilian?

¹⁸ Sabali pay a kapitulo ti mangilawlawag iti salaysay ti Biblia maipapan iti tallo a Hebreo nga agtutubo a da Sidrac, Misac, ken Abdenago, a nagkedked nga agrukbab iti maysa nga imahen a mangirepresentar iti Estado ti Babilonia. (Daniel 3:1-30) Nalabit a saan a makita ti dadduma nga adda koneksion ti panagdayaw iti imahen ken ti panagsaludo iti bandera, kas ipamatmat ti libro a Mannursuro. Nupay kasta, imutektekanyo ti kinuna ti autor a ni Edward Gaffney iti maysa nga interbiu ti U.S. Catholic. Kinunana nga idi imbaga kenkuana ti balasitangna kalpasan ti umuna nga aldawna iti klaseda nga adda naadalna a “baro a kararag iti eskuelaan,” impaulitna dayta kenkuana. “Imparabawna ti imana iti batog ti pusona,” kinuna ni Gaffney, “ket sipapannakkel a kinunana, ‘Ikarik nga agbalinak a nasungdo iti bandera . . .’” Intuloyna: “Bigla a nalagipko dagiti Saksi ni Jehova. Husto ti kunada. Nasapa a maisursuro idiay eskuelaan ti panagdayaw iti pagilian​—maysa a naan-anay a kinasungdo.”

Awan ti Nasayang a Panagregget

19. Ania dagiti gunggona iti panangisuro kadagiti annak?

¹⁹ Saan a masayang ti aniaman a panagreggetyo a mangisuro kadagiti annakyo. Makalua ti maysa nga ina a taga Kansas, E.U.A., idi nakaawat iti surat manipud iti barona. Kuna ti suratna: “Anian a yamanko ta pinadakkeldak iti wagas a namagbalin kaniak a natalged ken natimbeng. Maikarikayo la ketdi ken ni Tatang a makomendaran.” (Proverbio 31:28) Ti libro nga Agsursuroka iti Naindaklan a Mannursuro matulonganna ti ad-adu pay a nagannak a mangisuro kadagiti annakda tapno masaluadan daytoy napateg a tawid.

20. Ania ti nasken a kanayon a laglagipen dagiti nagannak, ken ania koma ti epektona dayta kadakuada?

²⁰ Maikari dagiti annaktayo iti amin a tiempo, atension, ken panagregget a maipaaytayo kadakuada. Ababa la ti panawen ti kinaubingda. Gundawayanyo ti tunggal kanito a makaduayo ida ken tulonganyo ida. Diyonto pulos pagbabawyan dayta. Ad-adda nga ayatendakayo. Kanayon a laglagipenyo a sagut ti Dios kadakayo dagiti annakyo. Anian a nagpateg a tawid dagiti annak! (Salmo 127:3-5) Gapuna, tratuenyo ida a kasta, ta sungsungbatanyo iti Dios no kasano ti panangpadakkelyo kadakuada.

[Footnote]

Ania ti Sungbatyo?

• Apay a nangnangruna a kasapulan ita dagiti nagannak a saluadan dagiti annakda?

• Ania a kita ti panangisuro ti makaitukit iti sirib?

• Ania a napapateg nga isyu ti nasken a pakisaritaanyo kadagiti annakyo?

• Kasano a ti libro a Mannursuro natulonganna dagiti nagannak a mangisuro kadagiti annakda?

[Kahon/Dagiti Ladawan iti panid 18, 19]

Maysa a Libro Agpaay iti Isuamin

Ti Agsursuroka iti Naindaklan a Mannursuro ket nadisenio a tumulong kadagiti nagannak wenno dadduma pay a nataengan a mangibasa ken mangilawlawag kadagiti ubbing maipapan kadagiti pannursuro ni Jesu-Kristo. Ngem uray dagiti mismo a nataengan a nakabasa iti dayta a libro inyebkasda ti napasnek a panagyamanda gapu iti nasursuroda.

Kinuna ti maysa a lalaki idiay Texas, E.U.A.: “Ti Agsursuroka iti Naindaklan a Mannursuro ket nagsayaat ti kinasimplena, a tignayennatayo aniaman ti edadtayo​—uray pay agtawentayon iti 76, a kas kaniak. Agyamanak unay, kas maysa a nagserbi ken ni Jehova sipud kinaagtutubo.”

Impakaammo ti maysa nga agbasbasa manipud London, England: “Dagiti napintas nga ilustrasion sigurado a guyugoyenna agpadpada dagiti nagannak ken annak. Nakasaysayaat dagiti saludsod ken ti wagas ti pannakaurnosda, ken makagutugot unay dagiti ilawlawagna nga isyu, kas iti kapitulo 32, ‘No Kasano a Nasalakniban ni Jesus.’” Kinunana: “Nupay nalawag a nangnangruna a nadisenio daytoy a libro agpaay kadagiti annak dagiti Saksi ni Jehova, panagkunak magustuan met dagiti mannursuro ken dagiti dadduma no maaddaanda met iti kopia. Panggepko nga usaren daytoy kadagiti sumaganad a bulbulan ken tawtawen.”

Maysa a babai manipud Massachusetts, E.U.A. ti nagkomento maipapan iti adu a “ladawan a napagpanunotan a naimbag.” Kinunana: “Nadlawko a nupay nairanta ti libro kadagiti ubbing, dagiti topiko ket makatulong met kadatayo nga adulto a mangtingiting iti personal a relasiontayo ken ni Jehova.”

“Nagsayaat la ketdi a libro!” kinuna ti maysa a babai manipud Maine, E.U.A. “Saan laeng nga agpaay daytoy kadagiti agtutubo no di ket agpaay kadatayo amin kas annak ti Dios. Sinalputna ti kaunggan ti pusok ket ginutugot ken binang-aranna ti riknak, isu a naaddaanak iti talna. Mariknak a nakasingsingedak ken ni Jehova kas Amak. Inep-epna ti amin a saem a nariknak iti naglabas a tawtawen ken pinagbalinna a nabatad dagiti panggepna.” Inngudona: “Ibagbagak iti amin, ‘Basaenyo koma daytoy.’”

Maysa a babai a taga Kyoto, Japan, ti nagkuna nga idi ibasbasana ti libro kadagiti appokona, inyimtuodda dagiti saludsod a kas iti: “‘Ania ti ar-aramiden daytoy nga ubing? Apay a maung-ungtan daytoy nga ubing? Ania ti ar-aramiden daytoy nga ina? Daytoy met ngay a leon?’ Isurona dagiti banag a paginteresantayo, isu nga ad-adda a tagipatgek daytoy ngem iti aniaman a libro a masarakak iti libraria.”

Maysa nga ama idiay Calgary, Canada, ti nagkuna nga apaman a naawatna ti libro, rinugianna nga ibasa dayta iti balasitangna nga agtawen iti innem ken iti baritona nga agtawen iti siam. “Nagsayaat a dagus ti reaksionda,” impadamagna. “Nagimdeng dagiti annakko ken sipapasnek a sinungbatanda dagiti saludsod. Nariknada nga adda pasetda iti panagadal, ken nangipaay dayta iti gundaway tapno mayebkasda ti kapanunotanda. Simmarantada ken kinuna ti balasitangko a kayatna nga adalen a rinabii ti baro a libro.”

Kalpasan ti maysa a panagadal, kinuna ti ama: “Adu nga oras a nagsaritaanmi iti baritok ti maipapan ken ni Jehova ken kadagiti panggepna. Nagadu ti saludsodna a naibatay iti linaon ti libro. Nakaluaak idi agpakadan a maturog ket inyimtuodna: ‘Mabalin kadi nga agadaltanto manen Tatang? Nagadu ti saludsodko, ket kayatko a maammuan ti amin maipapan ken Jehova.’”

[Ladawan iti panid 15]

Dakayo a nagannak, ania ti maadalyo iti ulidan ni Manoa?

[Ladawan iti panid 16]

Dakayo nga agtutubo, ania ti masursuroyo iti ulidan ti tallo a Hebreo?

[Dagiti Ladawan iti panid 17]

Dagiti ladawan ken kapsion iti libro a “Mannursuro” ket nakabilbileg nga instrumento iti panangisuro

Ania a kinaulbod ti ibagbaga ni Ananias ken ni Pedro?

Siasino ti makakita iti amin nga ar-aramidentayo?