Panangbigbig iti Panggep ti Disiplina

ANIA ti mapanunotyo no mangngegyo ti sao a “disiplina”? Maysa a diksionario ti mangdepinar iti disiplina kas “ti kadawyan a panangisuro kadagiti tattao nga agtulnog kadagiti linteg wenno pagalagadan iti kababalin, ken panangdusa kadakuada no dida tungpalen dayta.” Nupay saan laeng a dayta ti depinasion ti disiplina, adu a tattao ita ti addaan iti umasping a negatibo a kapanunotan iti aniaman a mainaig iti disiplina.

Ngem naiduma ti panangilawlawag ti Biblia iti disiplina. Insurat ni masirib nga Ari Solomon: “Ti disiplina ni Jehova, O anakko, saanmo a laksiden.” (Proverbio 3:11) Saan a ti kadawyan a disiplina ti tuktukoyen dagitoy a sasao no di ket “ti disiplina ni Jehova,” ti disiplina a naibatay kadagiti natan-ok a prinsipio ti Dios. Dayta laeng a kita ti disiplina ti mangparayray ken makagunggona iti naespirituan​—matarigagayan pay ketdi. Maisupadi iti dayta, masansan a mangabuso ken mangdangran ti disiplina a naibatay iti panangmatmat ti tao a maisalungasing kadagiti natan-ok a prinsipio ni Jehova. Dayta ti makagapu no apay nga adu ti addaan iti negatibo a kapanunotan maipapan iti disiplina.

Apay a maidagdagadag nga ipangagtayo ti disiplina ni Jehova? Iti Kasuratan, nadeskribir ti nadiosan a disiplina kas ebkas ti panagayat ti Dios kadagiti pinarsuana a tattao. Gapuna, intuloy a kinuna ni Solomon: “Daydiay ayaten ni Jehova tubngarenna, kas met laeng iti panangtubngar ti maysa nga ama iti anak a pakasarakanna iti ragsak.”​—Proverbio 3:12.

Disiplina Wenno Dusa​—Ania Kadagita?

Adu ti aspeto ti disiplina a nayebkas iti Biblia​—panangiwanwan, instruksion, panangsanay, pangtubngar, panangatur, ken uray pay ti pannusa. Ngem aniaman kadagita, mangdisiplina ni Jehova gapu iti ayatna, ken ti pagimbagan daydiay disiplinaenna ti pampanunotenna. Ti mangatur a disiplina ni Jehova ket saan a kanayon a nairanta a mangdusa.

Iti sabali a bangir, ti panangdusa ti Dios ket saan a kanayon a nairanta a mangatur wenno mangisuro kadagidiay madisiplina. Kas pagarigan, iti mismo nga aldaw a nagbasol da Adan ken Eva, nangrugi a sinagabada dagiti bunga ti panagsukirda. Pinapanaw ida ni Jehova iti paraiso a minuyongan ti Eden, ket napasaranda dagiti epekto ti kinaimperpekto, sakit, ken panaglakay. Kalpasan ti ginasut a tawen ti narigat a panagbiag, napukawda iti agnanayon. Nadibinuan a pannusa amin dagita, ngem saan a nairanta a mangatur. Gapu ta situtulok ken saan a nagbabawi da Adan ken Eva, imposible ti panangatur kadakuada.

Ti dadduma pay a salaysay ti panangdusa ni Jehova iramanna ti Layus idi kaaldawan ni Noe, ti pannakadadael ti Sodoma ken Gomorra, ken ti pannakatalipupos dagiti buyot ti Egipto iti Nalabaga a Baybay. Dagitoy nga inaramid ni Jehova ket saan a nairanta a mangipaay iti panangiwanwan, instruksion, wenno panangsanay kadagidiay dinusana. No maipapan kadagita a panangdusa ti Dios, insurat ni apostol Pedro: “Saan a nagteppel a mangdusa iti kadaanan a lubong, ngem inaywananna ni Noe, maysa a manangaskasaba iti kinalinteg, a sitatalged agraman ti pito a sabsabali pay idi nangyeg iti layus iti lubong dagiti di nadiosan a tattao; ket babaen ti panangpadapo kadagiti siudad ti Sodoma ken Gomorra kinondenarna ida, a nangipasdek iti pagtuladan maipaay kadagiti di nadiosan a tattao maipapan iti bambanag nga umay.”​—2 Pedro 2:5, 6.

Iti ania nga anag a dagitoy a panangdusa ket “nangipasdek iti pagtuladan maipaay kadagiti di nadiosan a tattao maipapan iti bambanag nga umay”? Iti surat ni Pablo kadagiti taga Tesalonica, impatuldona ti kaaldawantayo kas ti tiempo inton ti Dios, babaen ti Anakna a ni Jesu-Kristo, iyegna ti “pammales kadagidiay saan a makaammo iti Dios ken kadagidiay saan nga agtulnog iti naimbag a damag.” Innayon ni Pablo: “Dagitoy a mismo agpasardanto iti pannakaukom a dusa nga agnanayon a pannakadadael.” (2 Tesalonica 1:8, 9) Nalawag, dayta a pannusa ket saan a nairanta a mangisuro wenno manggugor kadagidiay madusanto. Nupay kasta, no idagadag ni Jehova kadagiti agdaydayaw kenkuana nga awatenda ti disiplina, saanna a tuktukoyen ti pannusa nga agpaay kadagidiay managbasol a saan nga agbabawi.

Nakakadkadlaw ta ti Biblia dina intampok ni Jehova kas manangdusa. Imbes ketdi, kaaduanna a nadeskribir kas naayat a mannursuro ken naanus a manangsanay. (Job 36:22; Salmo 71:17; Isaias 54:13) Wen, kanayon a nabuyogan iti ayat ken anus ti nadiosan a disiplina a naipaay tapno mangatur. Babaen ti panangbigbig iti panggep ti disiplina, nalaklaka nga awaten ken ipakat dayta dagiti Kristiano buyogen ti umiso a kababalin.

Ti Disiplina Dagiti Naayat a Nagannak

Iti uneg ti pamilia ken iti kongregasion Kristiano, masapul a matarusan ti amin ti panggep ti disiplina. Nangnangruna a pudno daytoy kadagidiay addaan iti autoridad, kas kadagiti nagannak. Kuna ti Proverbio 13:24: “Daydiay mangigawid iti pagbautna gurguraenna ti anakna, ngem daydiay mangay-ayat kenkuana isu daydiay kumitkita kenkuana a buyogen ti disiplina.”

Kasano ti panangdisiplina dagiti nagannak? Kuna ti Biblia: “Dakayo, nga amma, dikay ruroden ti annakyo, no di ket itultuloyyo a padakkelen ida iti disiplina ken panangiturong-panunot ni Jehova.” (Efeso 6:4) Naigunamgunam daytoy a balakad babaen dagitoy a sasao: “Dakayo nga amma, dikay rurruroden ti annakyo, tapno saan a maupay ti riknada.”​—Colosas 3:21.

Saan a sidadarasudos nga agtignay dagiti Kristiano a nagannak a makatarus iti panggep ti disiplina. Ti prinsipio a nadakamat iti 2 Timoteo 2:24 ket mayaplikar iti wagas a panangdisiplina dagiti nagannak. Insurat ni Pablo: “Ti adipen ti Apo saan a kasapulan a makiapa, no di ket kasapulan nga agbalin a naalumamay kadagiti isuamin, kualipikado a mangisuro.” Dagiti di mamedmedan a panagpungtot, panagbugtak, ken dagiti makainsulto wenno mangumsi a sasao dida maibilang a naayat a disiplina ken awan lugarda iti Nakristianuan a panagbiag.​—Efeso 4:31; Colosas 3:8.

Ti panangatur dagiti nagannak saanna laeng a ramanen ti napartak ken determinado a panangdusa. Kaaduan nga ubbing ti masapul a maulit-ulit a mabalakadan sakbay a baliwanda ti panagpampanunotda. Gapuna, dagiti nagannak nasken a mangbusbosda iti tiempo, watwatenda ti panaganus, ken usigenda a naimbag ti wagas ti panangdisiplinada. Masapul a laglagipenda a nasken a mapadakkel dagiti ubbing iti “disiplina ken panangiturong-panunot ni Jehova.” Kaipapanan daytoy ti adu a tawen a panangsanay.

Mangdisiplina Dagiti Kristiano a Pastor Buyogen ti Kinaalumamay

Agaplikar met dayta a prinsipio kadagiti Kristiano a panglakayen. Kas naayat a papastor, ikagumaanda koma a pabilgen ti arban babaen ti panangipaay iti instruksion, panangiwanwan, ken pannubngar no kasapulan. No aramidenda ti kasta, masapul a silalagipda iti panggep ti disiplina. (Efeso 4:11, 12) No ti laeng mangdusa ti pampanunotenda, mabalin a madusada ti nakabasol, ngem agingga la dita ti maaramidanda. Nupay kasta, adda pay ti ramanenna ti nadiosan a disiplina. Gapu iti ayat, itultuloy dagiti panglakayen a tulongan dagidiay nakabasol. Gapu ta pudno a maseknanda, masansan a mangiwayada iti sumagmamano a tiempo a mangparegta ken mangsanay.

Sigun iti balakad a masarakan iti 2 Timoteo 2:25, 26, uray kadagidiay saan a dagus a mangipangag iti disiplina, nasken a sursuruan ida dagiti panglakayen “buyogen ti kinaalumamay.” Ibaga ti kasuratan no ania ti panggep ti disiplina: “Bareng no ti Dios ipaayanna ida iti panagbabawi a mangiturong iti umiso a pannakaammo iti kinapudno, ket agsublida kadagiti umiso a panagpampanunotda manipud iti silo ti Diablo.”

No dadduma, masapul a mailaksid iti kongregasion dagidiay nakabasol nga awanan iti panagbabawi. (1 Timoteo 1:18-20) Ti kasta a nainget a tignay ket maibilang latta a disiplina, saan a basta pannusa. Addada panawen a sarungkaran dagiti panglakayen dagidiay nailaksid a saanen nga agar-aramid iti dakes. Kadagiti kasta a panagsarungkar, agtignay dagiti panglakayen maitunos iti pudno a panggep ti disiplina babaen ti panangibalabalada kadagiti addang a kasapulan tapno makasubli ti indibidual iti kongregasion Kristiano.

Ni Jehova ti Perpekto nga Ukom

Ti kasta a responsabilidad ket nasken nga ipapuso dagiti nagannak, Kristiano a papastor, ken dagidiay addaan iti Nainkasuratan nga autoridad a mangdisiplina. Dida koma pulos ukomen dagiti dadduma a kasla awanen ti namnama dagitoy nga agbalbaliw. Gapuna, saanda koma pulos a mangdisiplina tapno makabalesda wenno nakaro a mangdusa.

Pudno, ibaga ti Biblia a mangipaay ni Jehova iti nainget ken di mabalbaliwan a pannusa. Kinapudnona, kuna ti Kasuratan a “nakabutbuteng a banag ti matnag kadagiti ima ti sibibiag a Dios.” (Hebreo 10:31) Ngem saan koma nga idilig ti tao ti bagina ken ni Jehova iti daytoy a banag wenno iti aniaman. Ken awan koma ti agkuna a nakabutbuteng ti matnag iti ima ti nagannak wenno iti asinoman a panglakayen iti kongregasion.

Kabaelan ni Jehova a mangipaay iti naan-anay a natimbeng a disiplina. Saan a kabaelan dayta ti tao. Ti Dios mabasana ti puso ken ammona no awanen ti namnama nga agbalbaliw ti maysa a tao ket iti kasta, maikari iti sigurado ken saanen a mabalbaliwan a pannusa. Iti sabali a bangir, saan a kabaelan ti tao ti mangipaay iti kasta a panangukom. Gapu iti dayta, no kasapulan a mangdisiplina, dagidiay addaan iti autoridad kanayon koma nga aramidenda dayta nga addaan panggep a mangatur.

Panangawat iti Disiplina ni Jehova

Kasapulantayo amin ti disiplina ni Jehova. (Proverbio 8:33) Kinapudnona, rumbeng a sapulentayo ti panangdisiplina ti Sao ti Dios. Bayat nga ad-adalentayo ti Sao ti Dios, maawattayo ti disiplina a direkta a naggapu ken ni Jehova babaen ti Kasuratan. (2 Timoteo 3:16, 17) Ngem no dadduma, makaawattayo met iti disiplina manipud kadagiti padatayo a Kristiano. Ti panangbigbig iti makagapu no apay a naipaay dayta a disiplina tulongannatayo a sidadaan a mangipangag iti dayta.

Binigbig ni apostol Pablo: “Pudno, awan disiplina a kasla makaparag-o iti agdama, no di ket makapaladingit.” Sana intuloy: “Ngem kalpasanna kadagidiay a nasanayen iti dayta mangpataud iti natalna a bunga, awan sabali, ti kinalinteg.” (Hebreo 12:11) Ti disiplina ni Jehova ket ebkas ti nasged a panagayatna kadatayo. Mangdisiplinatayo man wenno datayo ti madisiplina, ditay koma liplipatan ti panggep ti nadiosan a disiplina ken ipangagtayo ti masirib a balakad ti Biblia: “Petpetam ti disiplina; saanmo a palusposan. Saluadam dayta, ta dayta ti biagmo.”​—Proverbio 4:13.

[Dagiti Ladawan iti panid 21]

Dagiti nakabasol a saan nga agbabawi mapasaranda ti pannusa ti Dios, saan a ti mangatur a disiplinana

[Dagiti Ladawan iti panid 22]

Gapu iti ayat, iwayaan dagiti panglakayen ti agsukimat ken tumulong kadagidiay nakabasol

[Dagiti Ladawan iti panid 23]

Siaanus ken siaayat nga ipaay dagiti nagannak ti “disiplina ken panangiturong-panunot ni Jehova”