“Talaga a Nagbileg ti Sao ti Dios!”
“TI SAO ti Dios nabiag ken adda bilegna.” (Hebreo 4:12) Kas pammaneknek iti di masarkedan a bileg ti Sao ti Dios, ti 2003 Calendar of Jehovah’s Witnesses intampokna ti innem a pudno a kapadasan ti biag manipud iti intero a lubong. Iti sidong ti paulo nga “Idi ken Ita,” impakita ti kalendario no kasano a ti trabaho a panangisuro dagiti Saksi ni Jehova tulonganna dagiti tattao a mangpasayaat iti moralidadda, mangisardeng iti nalulok a panagbiagda, mangpatibker iti relasion ti pamiliada, ken mangpasinged iti personal a relasionda iti Dios.
Adda dagiti naawat a surat ti panangapresiar iti 2003 a kalendario. Adtoy ti dadduma a komento:
“Daytoy a kalendario ipaneknekna kadagiti pudno a Kristiano nga adda pay dadduma a kas kadakuada a sipipinget a nakidangadang maipaay iti pammati. Ita, mabalinda a matmatan dagiti ladawan a mangipalagip kadagiti panagbalbaliw nga inaramid dagiti dadduma.”—Steven, Estados Unidos.
“Talaga a kayatko nga isurat dagitoy a sasao tapno maibagak kadakayo no kasano a ti 2003 a kalendario tinukayna ti pusok. Awan pay ti kalendario a kasta ti epektona kaniak. Tapno maipakitak ti sibibiag ken nagsayaat a pammaneknek ti impluensia a mabalin nga itden ti Biblia kadagiti indibidual, dagitoy a pakasaritaan ti biag ket iramanko kadagiti publikasion nga adda iti bagko a pangasaba.”—Marc, Belgium.
“Tinignaynak iti kasta unay daytoy a kalendario. Natukay ti riknak a nakabasa ken nakakita no kasano a napagbalbaliw ni Jehova dagitoy a tattao. Kas resultana, nagutugotak nga agtultuloy a mangaramid kadagiti panagbalbaliw iti biagko. Nangnangruna a mariknak ita a karamanak iti sangalubongan a panagkakabsat.”—Mary, Estados Unidos.
“Naasian ni Jesus iti naespirituan a kasasaad dagiti tattao. Pagyamanan ta tinuladyo ni Kristo babaen ti panangipablaakyo iti 2003 a kalendariotayo a naglaon kadagiti pakasaritaan ti biag. Awan pay ti kalendario a nangpasangit kaniak.”—Cassandra, Estados Unidos.
“Nangrugiak nga agsigarilio idi agtawenak iti 11; kalpasanna, nagdrogaak. Kanayon idi a pampanunotek ti agpakamatay. Idi naam-ammok ni Jehova, natulongannak a mangisardeng kadagitoy a bisio. Nagpateg kaniak daytoy a kalendario. Dagiti ulidan dagiti kakabsatko iti intero a lubong ti nangpabileg kaniak. Ita, ammokon a saan la a siak ti makidangdangadang, ket ti kapatgan a banag isu ti ayat ken ni Jehova ken ti naimpusuan a panagserbi kenkuana.”—Margaret, Poland.
“Talaga a nagbileg ti Sao ti Dios! Idi naawatko ti 2003 a kalendario, laplappedak ti agsangit. Dagiti kapadasan ken dagiti ladawan ket makapabileg unay iti pammati.”—Darlene, Estados Unidos.
“Ti dati a kabibiag dagiti dadduma kadagitoy a tattao ket umarngi unay iti dati a kabibiagko. Ni Jehova inikkannak iti pigsa a mangisardeng kadagiti kasla di maparmek a dakes nga aramid. Pagyamanan unay kadagitoy pudno a pakasaritaan ti biag.”—William, Estados Unidos.