Bendito Dagidiay Mangipadayag iti Dios

“Agruknoydanto iti sanguanam, O Jehova, ket idayawdanto ti naganmo.”​—SALMO 86:9.

1. Apay a maipadayagtayo ti Dios iti wagas a natantan-ok ngem iti wagas dagiti awan biagda a parsua?

MAIKARI ni Jehova nga idayaw ti amin a parsuana. Nupay siuulimek ti panangipadayag kenkuana dagiti awan biagda a parsuana, datayo a tattao ket addaan iti abilidad nga agpanunot, mangtarus, agyaman, ken agdayaw. Datayo ngarud ti nakaiturongan dagiti sasao ti salmista: “Agdir-ikayo a sibaballigi iti Dios, dakayo amin a tattao iti daga. Mangipaaykayo iti samiweng iti dayag ti naganna. Aramidenyo a nadayag ti pannakaidaydayawna.”​—Salmo 66:1, 2.

2. Siasino dagiti nagtulnog iti bilin nga ipadayag ti nagan ti Dios, ken apay?

² Kaaduan iti sangatauan dida bigbigen wenno ipadayag ti Dios. Ngem iti 235 a pagilian, nasurok nga innem a milion a Saksi ni Jehova ti mangpampaneknek a makitada “dagiti di makita a kualidad” ti Dios babaen kadagiti gapuananna ken ‘mangngegda’ ti naulimek a panangsaksi dagiti parsuana. (Roma 1:20; Salmo 19:2, 3) Babaen ti panangadal iti Biblia, naam-ammo ken nasursuroda met nga ayaten ni Jehova. Impakauna ti Salmo 86:9, 10: “Amin dagiti nasion nga inaramidmo umaydanto, ket agruknoydanto iti sanguanam, O Jehova, ket idayawdanto ti naganmo. Ta naindaklanka ken agar-aramidka iti nakaskasdaaw a bambanag; sika ti Dios, sika laeng.”

3. Kasano a ti “dakkel a bunggoy” mangipapaayda iti “sagrado a panagserbi iti aldaw ken rabii”?

³ Umasping iti dayta, tinukoy ti Apocalipsis 7:9, 15 ti “maysa a dakkel a bunggoy” dagiti agdaydayaw a ‘mangipapaay iti Dios iti sagrado a panagserbi iti aldaw ken rabii idiay templona.’ Dina kayat a sawen a literal a kalikaguman ti Dios ti awan sardayna a panangidayaw kenkuana dagiti adipenna. Nupay kasta, sangalubongan nga organisasion dagiti agdaydayaw kenkuana. Isu a no rabii kadagiti dadduma a pagilian, okupado a mangaskasaba dagiti adipen ti Dios kadagiti sabali a paset ti lubong. Gapuna, maikuna a maipadpadayag ni Jehova iti aldaw ken rabii. Iti din agbayag, “tunggal agang-anges a banag” idaydayawda ni Jehova. (Salmo 150:6) Ngem kabayatanna, ania ti maaramidantayo kas indibidual tapno maipadayagtayo ti Dios? Aniada a karit ti mabalin a pakaipasanguantayo? Ken aniada a gunggona ti agur-uray kadagidiay mangipadayag iti Dios? Tapno masungbatan, usigentayo ti salaysay ti Biblia maipapan iti Gad a tribu ti Israel.

Nagkauna a Karit

4. Ania a karit ti naipasango iti tribu ti Gad?

⁴ Sakbay a simrek iti Naikari a Daga, kiniddaw dagiti kameng ti Gad a tribu ti Israel no mabalin nga agindegda iti pagaraban a rehion iti daya ti Jordan. (Numeros 32:1-5) Adda dagiti serioso a parikut a pakaipasanguan dagiti agindeg sadiay. Dagiti tribu iti laud ket salsalakniban ti Tanap ti Jordan​—maysa a natural a sarikedked manipud iti panangraut ti armada. (Josue 3:13-17) Ngem no maipapan kadagiti daga iti daya ti Jordan, kuna ti The Historical Geography of the Holy Land, nga insurat ni George Adam Smith: “Puro kapatagan, a dandani awan dagiti bangen, agingga iti patag a tapaw ti dakkel a bantay ti Arabia. Gapuna, agpeggadda a kanayon iti panangraut dagiti mabisin nga agakar-akar a tattao, ket iti kada tawen, nakaad-adu pay kadakuada ti agpaarab dita.”

5. Ania ti bilin ni Jacob kadagiti kaputotan ni Gad no adda mangraut kadakuada?

⁵ Ania ti aramiden ti tribu ni Gad iti sidong ti kasta nga agtultuloy a narigat a kasasaad? Sinigsiglo sakbayna, ti agbugbugsot nga amada a ni Jacob impadtona: “No maipapan ken Gad, rubbuotento ti maysa a buyot dagiti tulisan, ngem rubbuotennanto ti adayo a likudan.” (Genesis 49:19) Kasla makaupay dagita a sasao. Ngem kinapudnona, maysa a bilin dayta kadagiti Gadita a makirupakda. Impanamnama ni Jacob a no aramidenda dayta, maibabain a mapagtalaw dagiti rimmaut, ket kamaten ida dagiti Gadita.

Dagiti Karit iti Panagdayawtayo Ita

6, 7. Kasano nga umasping ti kasasaad dagiti Kristiano ita iti kasasaad ti tribu ni Gad?

⁶ Kas iti tribu ni Gad, maipasango ita dagiti Kristiano kadagiti pakarigatan ken dadagsen iti sistema ni Satanas; awan ti milagro a mangiliklik kadatayo manipud kadagita. (Job 1:10-12) Adu kadatayo ti mangan-andur kadagiti rigat ti panageskuela, panagsapul iti pagbiag, ken panangpadakkel kadagiti annak. Iramanyo pay dagiti personal a parikuttayo. Dadduma ti mangib-ibtur iti maysa a “siit iti lasag,” kas koma iti nakaro a pisikal a depekto wenno sakit. (2 Corinto 12:7-10) Dadduma ti agsagsagaba iti pannakarikna iti kinaawan serserbi. “Dagiti makadidigra nga aldaw” ti kinalakay wenno kinabaket mabalin a pabannayatenna ti naregta a panagserbi dagiti nataengan a Kristiano.​—Eclesiastes 12:1.

⁷ Ipalagip met kadatayo ni apostol Pablo nga “addaantayo iti pannakigubal . . . kadagiti nadangkes nga espiritu a puersa kadagiti nailangitan a disso.” (Efeso 6:12) Naynay a maisarangtayo “iti espiritu ti lubong,” ti rebelioso a kababalin ken moral a kinalulok nga itantandudo ni Satanas ken dagiti demoniona. (1 Corinto 2:12; Efeso 2:2, 3) Kas iti managbuteng-Dios a ni Lot, mabalin a maburiborantayo ita kadagiti imoral a bambanag a sasawen wenno ar-aramiden dagiti tattao iti aglawlawtayo. (2 Pedro 2:7) Maipaspasangotayo met iti direkta a panangraut ni Satanas. Gubgubaten ni Satanas dagiti natda a napulotan, isuda a “mangtungtungpal kadagiti bilin ti Dios ken addaan iti trabaho a panangsaksi ken Jesus.” (Apocalipsis 12:17) Ti “sabsabali a karnero” ni Jesus mapasaranda met ti panangraut ni Satanas babaen dagiti panangiparit ken panangidadanes.​—Juan 10:16.

Sumuko Wenno Makidangadang?

8. Ania ti nasken nga aramidentayo no rumaut ni Satanas, ken apay?

⁸ Ania ti nasken nga aramidentayo no rumaut ni Satanas? Kas iti nagkauna a tribu ni Gad, masapul a napigsatayo iti naespirituan ken makidangadangtayo a maitunos iti panangiwanwan ti Dios. Makapaladingit ta adda dagidiay nangrugi a sumuko gapu kadagiti pakarigatan ti biag, a binaybay-anda dagiti naespirituan nga annongenda. (Mateo 13:20-22) Kastoy ti kinuna ti maysa a Saksi no apay a nababa ti bilang ti makigimgimong iti kongregasionda: “Nabannog ngamin dagiti kakabsat. Marigatanda unay.” Pudno, adu ti rason a mabannog dagiti tattao ita. Gapuna, nalaka la nga ibilang a narigat wenno nadagsen nga annongen ti panagdayaw iti Dios. Ngem umiso kadi dayta a panangmatmat?

9. Kasano a makapabang-ar ti panangibaklay iti sangol ni Kristo?

⁹ Usigenyo ti kinuna ni Jesus kadagiti tattao idi kaaldawanna a nabannog kadagiti pakarigatan ti biag: “Umaykayo kaniak, dakayo amin a mabambannogan ken madagdagsenan, ket pagin-awaenkayto.” Impasimudaag kadi ni Jesus a mabang-arantayo no guminadtayo iti panagserbi iti Dios? Saan. Imbes ketdi, kinuna ni Jesus: “Ibaklayyo ti sangolko ket agsursurokayo kaniak, ta naalumamay ti kababalinko ken napakumbaba ti pusok, ket makasarakkayto ti gin-awa a maipaay kadagiti kararuayo.” Ti sangol ket maysa a kayo wenno metal a banag a tumulong tapno maawit ti maysa a tao wenno animal ti maysa a nadagsen a banag. Asino ngarud koma ti mayat a mangibaklay iti kasta a sangol? Saan aya a ‘nadagsenantayon’? Wen, ngem mabalin met a kastoy ti pannakaibaga ti Griego a teksto: “Agkaduata iti sangolko.” Panunotenyo: kayat ni Jesus ti tumulong iti panangibaklay kadagiti awittayo! Saantay a masapul nga aramiden dayta iti bukodtayo a pigsa.​—Mateo 9:36; 11:28, 29; 2 Corinto 4:7.

10. Ania ti resultana no pagreggetantayo nga ipadayag ti Dios?

¹⁰ No ibaklaytayo ti sangol ti panagbalin nga adalan, busbusorentayo ni Satanas. “Busorenyo ti Diablo, ket isu agtalawto kadakayo,” inkari ti Santiago 4:7. Saantay nga ibagbaga a nalaka laeng nga aramiden dayta. Ti panagserbi iti Dios kalikagumanna ti dakkel a panagregget. (Lucas 13:24) Ngem kastoy ti kari ti Biblia iti Salmo 126:5: “Dagidiay agimulmula iti bin-i buyogen iti lulua agapitdanto buyogen a mismo ti narag-o nga ikkis.” Wen, saantayo nga agdaydayaw iti maysa a Dios a dina ammo ti agyaman. Isu ket “mananggunggona kadagidiay sipapasnek a mangsapsapul kenkuana,” ken bendisionanna dagidiay mangipadayag kenkuana.​—Hebreo 11:6.

Panangipadayag iti Dios Kas Manangikasaba iti Pagarian

11. Kasano a ti tay-ak ti ministerio ket agserbi kas depensatayo kadagiti panangraut ni Satanas?

¹¹ Imbilin ni Jesus: “Inkayo ngarud ket mangaramidkayo iti ad-adalan kadagiti tattao iti amin a nasion.” Ti trabaho a panangasaba ti kangrunaan a pamay-an a maipaaytayo iti Dios “ti sakripisio ti panagdaydayaw.” (Mateo 28:19; Hebreo 13:15) ‘Dagiti sakatayo a nasapatosan iti alikamen ti naimbag a damag ti kappia’ ket maysa a napateg a paset ti ‘naan-anay a kabaltayo’​—ti depensatayo kadagiti panangraut ni Satanas. (Efeso 6:11-15) Ti panangidayaw iti Dios iti tay-ak ti ministerio ket maysa a nasayaat a wagas a maparayray ti pammatitayo. (2 Corinto 4:13) Tulonganna ti isiptayo a mangiwaksi kadagiti negatibo a panagpampanunot. (Filipos 4:8) No makiramantayo iti tay-ak ti ministerio, matagiragsaktayo ti makapabileg a pannakitimpuyog kadagiti padatayo nga agdaydayaw.

12, 13. Kasano a makagunggona kadagiti pamilia ti regular a pannakiraman iti tay-ak ti ministerio? Iyilustrar.

¹² Makagunggona met nga aktibidad ti pamilia ti panangasaba. Siempre, kasapulan dagiti agtutubo ti balanse a panaglinglingay. Ngem saan la koma a maysa a rutina ti sangapamiliaan a pannakiraman iti tay-ak ti ministerio. Dagiti nagannak mabalin nga aramidenda dayta a makaay-ayo babaen ti panangsanay kadagiti annakda nga agbalin nga epektibo iti ministerio. Saan aya a naragsak dagiti agtutubo no adda nasayaat a magapuananda? Imbes a pilitenda dagiti annakda a mangaramid iti banag a dida kabaelan, ti panagbalin a natimbeng dagiti nagannak tulonganna dagiti annak nga agbalin a naragsak iti panangasaba.​—Genesis 33:13, 14.

¹³ Maysa pay, lumagda ti singgalut ti pamilia no sangsangkamaysa nga idayawda ti Dios. Utobenyo ti maipapan iti maysa a kabsat a babai nga addaan iti lima nga annak ken pinanawan ti di manamati nga asawana. Maysa a karit kenkuana ti panagtrabahona tapno maipaayna ti material a kasapulan dagiti annakna. Nabannog kadi unay tapno liwayanna dagiti naespirituan a pagimbagan dagiti annakna? Malagipna pay: “Inadalko a naimbag ti Biblia ken dagiti naibatay-Biblia a publikasion ket inkagumaak nga inyaplikar dagiti nabasak. Regular nga ikuyogko dagiti ubbing kadagiti gimong ken panangasaba. Ti resulta ti panagreggetko? Nabautisaran amin dagiti annakko.” Umasping iti dayta, ti naan-anay a pannakiramanyo iti ministerio ket makatulong iti panagreggetyo a mangpadakkel kadagiti annakyo “iti disiplina ken panangiturong-panunot ni Jehova.”​—Efeso 6:4.

14. (a) Kasano a dagiti agtutubo maidaydayawda ti Dios idiay eskuelaan? (b) Ania ti makatulong kadagiti agtutubo a di ‘mangibain iti naimbag a damag’?

¹⁴ Kadakayo nga agtutubo nga agnanaed kadagiti lugar a maipalubos ti panangasaba, idaydayawyo kadi ti Dios babaen ti panangasabayo idiay eskuelaan, wenno agkedkedkayo gapu iti panagbutengyo iti tao? (Proverbio 29:25) Maysa a Saksi nga agtawen iti 13 idiay Puerto Rico ti nagsurat: “Diak pulos mabain a mangasaba idiay eskuelaan gapu ta ammok a daytoy ti kinapudno. Iti uneg ti klase, kanayonak nga agitayag tapno ibagak no ania ti naadalko iti Biblia. No adda nawaya nga orasko, mapanak iti libraria ket basaek ti libro nga Iyimtuod Dagiti Agtutubo.”a Binendisionan kadi ni Jehova dagiti panagreggetna? Impadamagna: “No dadduma, agimtuod kaniak dagiti kaklasek ken agkiddawda pay iti kopia dayta a libro.” No mabainkayo iti daytoy a banag, nalabit kasapulanyo a paneknekan iti bagiyo “ti naimbag ken makaay-ayo ken naan-anay a pagayatan ti Dios” babaen ti naanep a personal a panagadalyo. (Roma 12:2) No kombinsidokayo a ti naadalyo isu ti kinapudno, pulos a diyonto “ibain ti naimbag a damag.”​—Roma 1:16.

‘Silulukat a Ruangan’ ti Serbisio

15, 16. Ania a “maysa a dakkel a ruangan a mangiturong iti panagaramid” ti inaprobetsar ti dadduma a Kristiano, ket ania dagiti inyegna a bendision?

¹⁵ Insurat ni apostol Pablo a silulukat kenkuana ti “maysa a dakkel a ruangan a mangiturong iti panagaramid.” (1 Corinto 16:9) Ti kadi kasasaadyo ipalubosna a sumrekkayo iti maysa a ruangan ti pribilehio? Ti panagbalin a regular wenno auxiliary pioneer, kas pagarigan, ket agkalikagum iti 70 wenno 50 nga oras a panangasaba iti kada bulan. Natural laeng a dagiti pada a Kristiano ipategda dagiti payunir gapu iti matalek a panagserbida. Ngem saan a gapu ta dakdakkel ti oras a busbusbosenda iti ministerio ket mariknadan a nangatngatoda ngem kadagiti dadduma a kakabsat. Imbes ketdi, sukayenda ti kababalin nga imparegta ni Jesus: “Awan kaes-eskanmi nga ad-adipen. Ti naaramidanmi isu ti rebbeng nga aramidenmi.”​—Lucas 17:10.

¹⁶ Ti panagpayunir kalikagumanna ti panangdisiplina iti bagi, panagbalin nga organisado, ken sidadaan nga agsakripisio. Ngem dakkel met dagiti iyegna a bendision. “Maysa a pudno a bendision ti panangaramat a siuumiso iti sao ti kinapudno,” kuna ti agtutubo a payunir a ni Tamika. “No maysaka a payunir, kanayon nga usarem ti Biblia. Ita, no mapanak mangasaba, mapanunotko dagiti teksto a maitutop iti kada bumalay.” (2 Timoteo 2:15) Kuna ti payunir nga agnagan iti Mica: “Sabali pay a bendision ti pannakakita no kasano a ti kinapudno apektaranna ti biag dagiti tattao.” Maysa nga agtutubo nga agnagan Matthew ti nangdakamat iti isu met laeng a rag-o gapu iti “pannakakita iti maysa a sumrek iti kinapudno. Awan sabali a kita ti rag-o a makasandi iti dayta.”

17. Kasano a naparmek ti maysa a Kristiano ti negatibo a panagriknana iti panagpayunir?

¹⁷ Kayatyo kadi ti agpayunir? Nalabit kayatyo ngem kasla diyo kabaelan. “Negatibo ti panagriknak iti panagpayunir,” inamin ti maysa nga agtutubo a kabsat nga agnagan Kenyatte. “Kasla diak kabaelan. Diak ammo no kasano ti mangiruangan iti saritaan wenno makirinnason iti Kasuratan.” Nupay kasta, dinutokan dagiti panglakayen ti maysa a nataengan a payunir a makipagtrabaho kenkuana. “Naragsak ti makipagtrabaho kenkuana,” malagip ni Kenyatte. “Dayta ti nangtignay kaniak nga agtarigagay nga agpayunir.” Buyogen ti sumagmamano a pammaregta ken panangsanay, nalabit a kayatyonto met ti agpayunir.

18. Aniada a bendision ti dumteng kadagidiay agserbi kas misionero?

¹⁸ Mabalin a luktan ti panagpayunir ti dadduma a pribilehio ti panagserbi. Kas pagarigan, dadduma nga agassawa ti mabalin a makualipikar a masanay kas misionero tapno maibaon a mangasaba kadagiti ganggannaet a pagilian. Masapul a makibagay dagiti misionero iti pakaibaonanda a pagilian, nalabit iti baro a lenguahe, kultura, ken taraon. Ngem awan pakaimudingan dagita a rigat no idilig kadagiti bendision. Kuna ni Mildred, maysa a nabayagen a misionera idiay Mexico: “Diak pagbabawyan ti desisionko nga agmisionera. Daytoy ti kayatko sipud pay idi ubingak.” Ania dagiti bendision a tinagiragsakna? “Iti naggapuak a lugar, narigat ti agbirok iti mayadalan iti Biblia. Ditoy, adda ti agingga uppat nga iyad-adalak iti Biblia nga aggigiddan a maanamongan a mangasaba!”

19, 20. Kasano a ti panagserbi iti Bethel, iti sabali a pagilian, ken panageskuelada iti Ministerial Training School nangyegda iti bendision kadagiti adu a Kristiano?

¹⁹ Adu met dagiti bendision a sagsagrapen dagidiay agserserbi iti Bethel kadagiti sanga nga opisina dagiti Saksi ni Jehova. Ni Sven, maysa nga agkabannuag nga agserserbi idiay Alemania, kinunana maipapan iti trabahona idiay Bethel: “Iti panagriknak, mangar-aramidak iti maysa a banag nga addaan iti manayon a pateg. Mabalinko koma nga usaren dagiti paglaingak iti lubong. Ngem kaslaak la mangidepdeposito iti kuarta iti maysa a banko nga asidegen a malugi.” Pudno, maysa a sakripisio ti panagserbi kas maysa a boluntario a di masuelduan. Ngem kuna ni Sven: “No agawidka, ammom nga amin nga inaramidmo iti agmalem ket agpaay ken ni Jehova. Dayta ti mangyeg kenka iti ‘nakaragragsak’ a rikna.”

²⁰ Tinagiragsak ti dadduma a kakabsat ti pribilehio nga agserbi iti sabali a pagilian, kas iti panangbangon kadagiti sanga nga opisina. Insurat ti maysa nga agassawa a nagserbi iti walo a proyekto iti sabali a pagilian: “Nakaay-ayat dagiti kakabsat ditoy. Nadagsen ti riknam a pumanaw​—daytoy ti maikawalo a daras a ‘nasnaayan’ ti pusomi. Anian a nagsayaat ti kapadasanmi!” Sabali pay ti Ministerial Training School. Mangipaay dayta iti naespirituan a panangsanay kadagiti kualipikado a kakabsat a babbaro. Insurat ti maysa a nagraduar: “Diak ammo no kasanoak nga agyaman kadakayo gapu iti daytoy a nagsayaat nga eskuelaan. Ania pay koma nga organisasion ti mangipaay iti dakkel a panagregget a mangsanay?”

21. Ania a karit ti sanguen ti amin a Kristiano bayat ti panagserbida iti Dios?

²¹ Wen, silulukat ti adu a pribilehio iti panagserbi. Pudno, kaaduan kadatayo ti saan a makapagserbi iti Bethel wenno iti sabali a pagilian. Ni Jesus a mismo binigbigna a mangpataud dagiti Kristiano iti nadumaduma a “bunga” gapu iti nagduduma a kasasaad. (Mateo 13:23) Maysa ngarud a karit kadatayo a Kristiano no kasanotayo nga usaren ti kasasaadtayo iti kasayaatan a wagas​—a maaddaan iti naan-anay a pannakiraman iti panagserbi ken ni Jehova sigun iti ipalubos dagiti kasasaadtayo. No aramidentayo dayta, ipadpadayagtay ni Jehova, ket manamnamatayo a maay-ayo unay ti Dios. Usigenyo ni Ethel, maysa a baketen a kabsat iti pagtaripatuan kadagiti nataengan. Regular a mangasaba kadagiti kakaduana iti dayta a pagtaengan ken makiraman iti panangasaba babaen ti telepono. Iti laksid dagiti limitasionna, amin-kararua ti panagserbina.​—Mateo 22:37.

22. (a) Ania dagiti kanayonan a pamay-an a maipadayagtayo ti Dios? (b) Ania a nagsayaat a tiempo ti agur-uray kadatayo?

²² Ngem laglagipenyo a ti panangasaba ket maysa laeng a pamay-an a maipadayagtayo ni Jehova. Babaen ti panagbalintayo a mapagwadan iti kondukta ken panaglanglanga idiay pagtrabahuan, eskuelaan, ken pagtaengan, maparagsaktayo ti puso ni Jehova. (Proverbio 27:11) Ikari ti Proverbio 28:20: “Ti tao nga addaan matalek nga ar-aramid makagun-odto iti adu a bendision.” Ngarud, ‘agmulatayo koma a siwawadwad’ iti panagserbitayo iti Dios, nga ammotayo nga agapittayto a siwawadwad. (2 Corinto 9:6) No aramidentayo dayta, pribilehiotayto ti agbiag iti dayta nakaay-ayat a panawen inton ti “tunggal agang-anges a banag” itedda ken ni Jehova ti dayag a pakaikarianna unay!​—Salmo 150:6.

[Footnote]

Malagipyo Pay?

• Kasano a dagiti adipen ti Dios agserserbida ken ni Jehova iti “aldaw ken rabii”?

• Ania a karit ti nakaipasanguan ti tribu ni Gad, ket ania ti isurona dayta kadagiti Kristiano ita?

• Kasano nga agserbi a salaknibtayo ti tay-ak ti ministerio maibusor kadagiti panangraut ni Satanas?

• Ania a ‘nakalukat a ruangan’ ti sinerrek ti dadduma, ket aniada a bendision ti tinagiragsakda?

[Ladawan iti panid 15]

No kasano a dagiti Gadita nakirupakda kadagiti buyot ti tulisan, dagiti Kristiano nasken a sarangtenda dagiti panangraut ni Satanas

[Ladawan iti panid 17]

Matagiragsaktayo ti makapabileg a timpuyog iti tay-ak ti ministerio

[Dagiti Ladawan iti panid 18]

Ti panagpayunir luktanna dagiti pribilehio iti panagserbi, agraman ti:

1. Panagserbi iti sabali a pagilian

2. Panagserbi iti Bethel

3. Panagserbi kas misionero