Kasapulan Kadi ti Nasayaat a Balakad?

ADU ita ti mangipapan nga ammoda ti naimbag ken dakes ken addaanda iti kalintegan a mangaramid iti kaykayatda. Addada mangibaga nga awan ti makuna a dakes la ketdi ta pakaragsakan dayta. Nakaro a naapektaran ti relasion dagiti agassawa ken biag ti pamilia, ti nabayagen a maibilang nga istraktura ti kagimongan ti tao.​—Genesis 3:5.

Alaentayo a pagarigan ni Verónica,a nga agnanaed idiay Mexico. Impakaammona: “Sakbay ti maika-15 nga anibersario ti kasarmi, impudno ni lakayko nga adda kabitna. Ub-ubing ken isu kano ti mangparparagsak kenkuana isu a saanna a mapanawan. Naklaatak a makaammo a saankon a makatakunaynay ti tao nga imbilangko a kasingedan a gayyem. Ti ammok idi, ti ipupusay ti maysa nga ing-ingungoten ti kangrunaan a pakaigapuan ti saem. Ngem ita, nasasaem kaniak ti pannakikamalala ni lakayko agsipud ta saanak laeng a napukawan iti maysa a patpatgen unay no di ket agtultuloy a mangar-aramid kadagiti banag a makapasakit kaniak.”

Sabali pay ti situasion ti diborsiado nga agtawen iti 22, a saan a situtulok a mangawat kadagiti pagrebbenganna kas ama ti maysa nga anak a lalaki. Namnamaenna a ni nanangna ti mangaywan kadakuada nga agama. No saan a patgan ti inana ti amin a kalikagumanna, sipupungtot a pagsasawanna, a kas iti nasabrak nga inanak. Pimpiman ti ina gapu iti kasta a kababalinna.

Gagangayen dagita a situasion. Iti sadinoman, umad-adu ti legal a panagsina ken diborsio. Adu nga annak ti pinanawan ti ama wenno inada tapno mangabaruanan. Adda dagiti agtutubo nga awanan a pulos iti panagraem kadagiti sabsabali, agraman kadagiti dadakkelda, ken aramidenda dagiti dakes a bambanag a narigat a panunoten idi. Nagbalin a gagangay ti panageksperimento iti sekso, panagabuso iti droga, kinaranggas dagiti agtutubo, ken panangpapatay dagiti ubbing kadagiti mannursuro wenno dadakkelda. Ken nalabit makitayo a saan laeng a ti panangpadakkel kadagiti ubbing ken relasion dagiti agassawa ti addaan iti parikut ita.

Bayat a kitkitaentayo dagitoy a panagbalbaliw, mabalin a masdaawtayo no apay a kastoy ti kagimongan ita. No talaga nga ammo dagiti tattao ti naimbag ken dakes, apay nga adu a parikut ti saan a masolbar? Kasapulan kadi ti nasayaat a balakad? Adda kadi gubuayan ti kasta a makagunggona a balakad a talaga a mapangnamnamaan? Nupay adu ti agkuna a mamatida iti Dios ken iti naisurat a Saona, kasla saan nga agminar dayta kadagiti desisionda. Ngem ania dagiti pagimbaganna no ikagumaantayo ti agpaiwanwan kadagiti balakad ti Dios? Usigentayo dayta iti sumaganad nga artikulo.

[Footnote]