Maidaddadanes Ngem Naragsak

“Naragsakkayo inton umsiendakayo dagiti tattao ken idadanesdakayo ken siuulbod a sawenda ti tunggal kita ti nadangkes a banag a maibusor kadakayo maigapu kaniak.”​—MATEO 5:11.

1. Ania ti impanamnama ni Jesus kadagiti pasurotna maipapan iti kinaragsak ken pannakaidadanes?

IDI damo nga imbaon ni Jesus dagiti apostol tapno ikasabada ti Pagarian, pinakdaaranna ida a maipasangodanto iti ibubusor. Kinunana kadakuada: “Puntiriakayto ti pananggura dagiti amin a tattao maigapu iti naganko.” (Mateo 10:5-18, 22) Ngem sakbayna, iti Sermonna iti Bantay, impanamnamana kadagiti apostolna ken kadagiti dadduma a mataginayonda ti napalaus a ragsakda iti laksid ti ibubusor. Kinapudnona, ti kinaragsak ket innaig pay ketdi ni Jesus iti pannakaidadanes kas Kristiano! Kasano koma a mangyeg iti ragsak ti pannakaidadanes?

Panagsagaba Maigapu iti Kinalinteg

2. Sigun kada Jesus ken apostol Pedro, ania a panagsagaba ti mangyeg iti kinaragsak?

² Kastoy ti maikawalo a kinaragsak a dinakamat ni Jesus: “Naragsak dagidiay maidaddadanes maigapu iti kinalinteg, yantangay kukuada ti pagarian ti langlangit.” (Mateo 5:10) Saan a ti panagsagaba ti mismo a makaparagsak. Insurat ni apostol Pedro: “Ania ti pagsayaatanna no, inton agbasbasolkayo ken matungtungpakayo, ibturanyo dayta? Ngem no, inton agar-aramidkayo iti naimbag ket agsagabakayo, ibturanyo dayta, makaay-ayo a banag daytoy iti Dios.” Sana innayon: “Nupay kasta, awan koma kadakayo ti agsagaba a kas manangpapatay wenno mannanakaw wenno managaramid iti dakes wenno kas mannakibiang kadagiti pakaseknan ti sabali a tattao. Ngem no isu agsagaba kas maysa a Kristiano, saanna koma nga ibain, no di ket itultuloyna koma nga idaydayaw ti Dios iti daytoy a nagan.” (1 Pedro 2:20; 4:15, 16) Sigun iti balikas ni Jesus, mangyeg iti ragsak ti panagsagaba no maigapu dayta iti kinalinteg.

3. (a) Ania ti kayat a sawen ti maidadanes gapu iti kinalinteg? (b) Ania ti epektona kadagiti nagkauna a Kristiano ti pannakaidadanes?

³ Ti pudno a kinalinteg ket agpannuray iti panangaramid iti pagayatan ti Dios ken kadagiti bilinna. No kasta, ti panagsagaba maigapu iti kinalinteg kaipapananna ti panagsagaba gapu ta sarsarangten ti maysa ti panangpilit a manglabsing kadagiti pagalagadan wenno kalikagum ti Dios. Dagiti Judio a lider indadanesda dagiti apostol gapu ta dida agsardeng a mangasaba iti nagan ni Jesus. (Aramid 4:18-20; 5:27-29, 40) Napukaw ngata ti rag-oda wenno nagsardengda ngata a nangasaba gapu iti dayta? Pulos a saan! “Pimmanawdan iti sanguanan ti Sanhedrin, nga agragrag-oda agsipud ta naibilangda a maikari a maibabain maigapu iti naganna. Ket iti tunggal aldaw idiay templo ken iti binalaybalay nagtultuloyda nga awan sarday a mangisuro ken mangideklara iti naimbag a damag maipapan iti Kristo, a ni Jesus.” (Aramid 5:41, 42) Nangyeg kadakuada iti rag-o dayta a pannakaidadanes ken naparayray ti regtada a mangasaba. Idi agangay, dagiti Romano indadanesda dagiti nagkauna a Kristiano gapu iti panagkedkedda nga agdayaw iti emperador.

4. Ania ti sumagmamano a pakaigapuan ti pannakaidadanes dagiti Kristiano?

⁴ Iti moderno a panawen, maidaddadanes dagiti Saksi ni Jehova gapu ta dida kayat nga isardeng nga ikasaba “daytoy naimbag a damag ti pagarian.” (Mateo 24:14) No maiparit dagiti Nakristianuan a gimongda, kaykayatda laengen ti agsagaba ngem ti isardengda ti makigimong yantangay bilin dayta ti Biblia. (Hebreo 10:24, 25) Maidaddadanesda gapu iti neutral a takderda kas Kristiano wenno gapu iti panagkedkedda nga agpayalison iti dara. (Juan 17:14; Aramid 15:28, 29) Ngem gapu iti dayta a takderda a maipaay iti kinalinteg, tagtagiragsaken ti ili ti Dios ti makin-uneg a talna ken kinaragsak.​—1 Pedro 3:14.

Maum-umsi Gapu ken Kristo

5. Ania ti kangrunaan a rason a maidaddadanes ita dagiti adipen ni Jehova?

⁵ Ti maikasiam a kinaragsak nga inlawlawag ni Jesus iti Sermonna iti Bantay ket nainaig met laeng iti pannakaidadanes. Kinunana: “Naragsakkayo inton umsiendakayo dagiti tattao ken idadanesdakayo ken siuulbod a sawenda ti tunggal kita ti nadangkes a banag a maibusor kadakayo maigapu kaniak.” (Mateo 5:11) Ti kangrunaan a rason no apay a maidaddadanes dagiti adipen ni Jehova ket maigapu iti saanda a pannakipaset iti agdama a dakes a sistema ti bambanag. Kinuna ni Jesus kadagiti adalanna: “No pasetnakayo koma ti lubong, ti lubong maayatan iti kukuana. Ita agsipud ta saankayo a paset ti lubong, no di ket pinilikayo manipud iti lubong, gapu iti daytoy guraennakayo ti lubong.” (Juan 15:19) Umasping iti dayta, kinuna ni apostol Pedro: “Agsipud ta saankayo nga agtultuloy a makipagtaray kadakuada iti daytoy a dalan nga agturong iti isu met laeng a lugnak ti kinagaramugam, masmasdaawda ket itultuloyda ti agsao a sibabassawang kadakayo.”​—1 Pedro 4:4.

6. (a) Apay a maum-umsi ken maidaddadanes dagiti natda ken dagiti kakaduada? (b) Ti kadi pannakaumsi kissayanna ti ragsaktayo?

⁶ Naadaltayo a naidadanes dagiti nagkauna a Kristiano gapu ta dida kayat nga isardeng ti mangasaba iti nagan ni Jesus. Imbilin ni Kristo kadagiti pasurotna: “Dakayto dagiti saksik . . . agingga iti kaadaywan a paset ti daga.” (Aramid 1:8) Dagiti matalek a natda kadagiti napulotan a kakabsat ni Kristo, a tultulongan dagiti nasungdo a kakaduada a “dakkel a bunggoy,” sireregta nga itungtungpalda dayta a bilin. (Apocalipsis 7:9) No kasta, gubgubaten ni Satanas “dagiti natda ti bin-ina [bin-i ti “babai,” ti nailangitan a paset ti organisasion ti Dios], isuda a mangtungtungpal kadagiti bilin ti Dios ken addaan iti trabaho a panangsaksi ken Jesus.” (Apocalipsis 12:9, 17) Kas Saksi ni Jehova, saksiantayo ni Jesus, ti agturturay nga Ari iti Pagarian a gobierno, a mangdadaelto kadagiti gobierno ti tao tapno awanton ti lapped iti nalinteg a baro a lubong ti Dios. (Daniel 2:44; 2 Pedro 3:13) Gapu iti dayta, maum-umsi ken maidaddadanestayo, ngem pagragsakantayo ti agsagaba maigapu iti nagan ni Kristo.​—1 Pedro 4:14.

7, 8. Ania ti ulbod a pammabasol dagiti bumusbusor kadagiti nagkauna a Kristiano?

⁷ Kinuna ni Jesus a masapul nga ibilang dagiti pasurotna a naragsakda uray no dagiti tattao “siuulbod a sawenda ti tunggal kita ti nadangkes a banag” maibusor kadakuada maigapu iti naganna. (Mateo 5:11) Pudno dayta kadagiti nagkauna a Kristiano. Idi naibalud ni apostol Pablo idiay Roma idi agarup 59-61 K.P., kinuna dagiti Judio a lider kadagiti Kristiano: “Pudno a no maipapan itoy a sekta naammuanmi a masupsupiat iti isuamin a lugar.” (Aramid 28:22) Napabasol da Pablo ken Silas a ‘binalintuagda ti mapagnaedan a daga,’ nga agtigtignayda “maibusor kadagiti bilin ni Cesar.”​—Aramid 17:6, 7.

⁸ Iti suratna maipapan kadagiti Kristiano idi panawen ti Imperio ti Roma, kinuna ni K. S. Latourette: “Nagduduma ti pammabasol kadakuada. Gapu ta nagkedkedda a makiraman kadagiti pinapagano a seremonia, naibilang nga ateista dagiti Kristiano. Gapu ta dida nakiraman iti adu nga aktibidad ti komunidad​—kas koma kadagiti pinapagano a piesta, kadagiti paglinglingayan ti publiko . . .​—nababalawda kas gumurgura iti tattao. . . . Naipadamag nga agkikita dagiti lallaki ken babbai a Kristiano iti rabii . . . ket mapasamak dagiti nalulok a sekso. . . . Gapu ta [ti Pananglaglagip iti ipapatay ni Kristo] ket rambakan laeng dagiti manamati, nangrugi ti sayangguseng a regular a mangidatdaton dagiti Kristiano iti maysa a maladaga ken kanenda ti dara ken lasagna.” Malaksid iti dayta, naibilang dagiti nagkauna a Kristiano kas kabusor ti Estado gapu iti panagkedkedda nga agdayaw iti emperador.

9. Ania ti reaksion dagiti Kristiano idi umuna a siglo mainaig iti ulbod a pammabasol kadakuada, ken ania met ti kasasaad ita?

⁹ Dagidi nga ulbod a pammabasol dida napasardeng dagiti nagkauna a Kristiano a mangitungpal iti trabahoda a panangikasaba iti naimbag a damag ti Pagarian. Idi 60-61 K.P., impakaammo ni Pablo ti “naimbag a damag” nga ‘agbungbunga ken rumangrang-ay iti intero a lubong’ ken ‘naikasaba iti isuamin a parsua nga adda iti baba ti langit.’ (Colosas 1:5, 6, 23) Kasta met ita. Siuulbod a mapabpabasol dagiti Saksi ni Jehova, no kasano a napasamak ti kasta kadagiti Kristiano idi umuna a siglo. Kaskasdi, rumangrang-ay ita ti trabaho a panangikasaba iti mensahe ti Pagarian ken nangyeg iti dakkel a ragsak kadagidiay makipaspaset iti dayta.

Naragsak a Maidadanes Kas Kadagiti Mammadto

10, 11. (a) Kasano nga inngudo ni Jesus ti panangilawlawagna iti maikasiam a kinaragsak? (b) Apay a naidadanes dagiti mammadto? Mangted kadagiti pagarigan.

¹⁰ Inngudo ni Jesus ti panangilawlawagna iti maikasiam a kinaragsak idi kinunana: “Agrag-okayo . . . , ta iti kasta a pamay-an indadanesda dagiti mammadto nga immun-una ngem dakayo.” (Mateo 5:12) Saan a nasayaat ti pannakatrato ken masansan a naidadanes dagiti mammadto nga imbaon ni Jehova a mangpakdaar kadagiti nasubeg nga Israelita. (Jeremias 7:25, 26) Pinaneknekan dayta ni apostol Pablo idi insuratna: “Ania pay ti sawek? Ta agkurangakto iti tiempo no itultuloyko a salaysayen ti maipapan . . . ti sabsabali pay a mammadto, isuda a babaen ti pammati . . . inawatda ti suotda babaen ti pannakarabrabak ken ti pannakasapsaplit, kinapudnona, ad-adda pay ngem iti dayta, babaen ti pannakaparparaut ken pannakaibalbalud.”​—Hebreo 11:32-38.

¹¹ Bayat ti panagturay ni dakes nga Ari Acab ken ti asawana a ni Jezebel, adu kadagiti mammadto ni Jehova ti napapatay iti kampilan. (1 Ar-ari 18:4, 13; 19:10) Naitul-ong ni mammadto a Jeremias ken naipisok iti napitak a pagkargaan iti danum. (Jeremias 20:1, 2; 38:6) Naitapuak ni mammadto a Daniel iti abut dagiti leon. (Daniel 6:16, 17) Naidadanes ti amin a mammadto sakbay ti panawen dagiti Kristiano gapu iti panangidepensada iti nasin-aw a panagdayaw ken ni Jehova. Adu a propeta ti indadanes dagiti Judio a panguluen ti relihion. Inawagan ni Jesus dagiti eskriba ken Fariseo kas ‘annak dagidiay namapatay kadagiti mammadto.’​—Mateo 23:31.

12. Kas Saksi ni Jehova, apay nga ibilangtayo a maysa a pribilehio ti maidadanes kas kadagiti mammadto idi ugma?

¹² Ita, masansan a maidadanestayo kas Saksi ni Jehova gapu ta sireregta nga ikaskasabatayo ti naimbag a damag ti Pagarian. Akusarandatayo dagiti kabusor kas “agresibo a mangkomkomberte,” ngem ammotayo a naipasango iti umasping a kritisismo dagiti immuna a matalek nga agdaydayaw ken ni Jehova. (Jeremias 11:21; 20:8, 11) Ibilangtayo a maysa a pribilehio ti agsagaba gapu iti isu met laeng a rason a nagsagaba dagiti matalek a mammadto idi ugma. Insurat ni adalan a Santiago: “Kakabsat, alaenyo kas pagtuladan iti panagsagaba iti dakes ken iti panangwatwat iti kinaanus dagiti mammadto, a nagsao iti nagan ni Jehova. Adtoy! Kunaentayo a naragsak dagidiay nakapagibtur.”​—Santiago 5:10, 11.

Dakkel a Pakaigapuan ti Kinaragsak

13. (a) Apay a ditay maupay iti laksid ti pannakaidadanes? (b) Ania ti mamagbalin kadatayo a makapagtakder a sititibker, ken ania ti paneknekan dayta?

¹³ Imbes a maupay gapu iti pannakaidadanes, maliwliwatayo iti kinapudno a tultuladentayo ti ulidan dagiti mammadto, dagiti nagkauna a Kristiano, ken ni Kristo Jesus a mismo. (1 Pedro 2:21) Dakkel a liwliwa ti ipaay kadatayo ti Kasuratan, kas kadagiti sasao ni apostol Pedro: “Dungdungnguen, saankayo koma a mariribukan kadagiti panangur-uram iti nagtetengngaanyo, a mapaspasamak kadakayo kas pakasuotan, a kasla mapagpagteng kadakayo ti karkarna a banag. No maum-umsikayo gapu iti nagan ni Kristo, naragsakkayo, agsipud ta ti espiritu ti dayag, ti mismo nga espiritu ti Dios, agtataeng kadakayo.” (1 Pedro 4:12, 14) Nakitatayon manipud iti kapadasan a kabaelantayo ti agtakder a sititibker iti sidong ti pannakaidadanes gapu iti pammabileg ti espiritu ni Jehova. Ti pannaranay ti nasantuan nga espiritu ket pammaneknek a bembendisionannatayo ni Jehova, a mangyeg kadatayo iti dakkel a ragsak.​—Salmo 5:12; Filipos 1:27-29.

14. Apay a naragsaktayo no maidadanestayo maigapu iti kinalinteg?

¹⁴ Naragsaktayo met no busoren ken idadanesdatayo maigapu iti kinalinteg yantangay pammaneknek dayta nga agbibiagtayo kas pudno a Kristiano nga addaan iti nadiosan a debosion. Insurat ni apostol Pablo: “Amin dagidiay agtartarigagay nga agbiag buyogen ti nadiosan a debosion a mainaig ken Kristo Jesus maidadanesdanto met.” (2 Timoteo 3:12) Naragragsaktayo manen no silalagiptayo nga iti panangsalimetmet iti kinatarnawtayo iti sidong ti pakasuotan, mapaneknekantayo nga ulbod ti karit ni Satanas nga amin a parsua ni Jehova ket agserserbi Kenkuana maigapu laeng iti inaagum nga interes. (Job 1:9-11; 2:3, 4) Naragsaktayo nga adda pasettayo, kasano man kabassit dayta, iti pannakaalangon ti nalinteg a kinasoberano ni Jehova.​—Proverbio 27:11.

Agrag-o Gapu iti Gunggona

15, 16. (a) Sigun ken ni Jesus, apay nga ‘agrag-o ken aglagtotayo gapu iti rag-o’? (b) Ania a gunggona ti agur-uray idiay langit kadagiti napulotan a Kristiano, ken kasano met a magunggonaan dagiti kakaduada a “sabsabali a karnero”?

¹⁵ Nangted ni Jesus iti kanayonan a rason nga agrag-o no mapadakes ken maidadanes kas kadagiti mammadto idi ugma. Iti maudi a paset ti maikasiam a kinaragsak, kinunana: “Agrag-o ken aglagtokayo gapu iti rag-o, yantangay dakkel ti gunggonayo iti langlangit.” (Mateo 5:12) Insurat ni apostol Pablo: “Dagiti isupapak ti basol isu ti ipapatay, ngem ti sagut nga ipaay ti Dios isu ti agnanayon a biag babaen ken Kristo Jesus nga Apotayo.” (Roma 6:23) Wen, ti ‘dakkel a gunggona’ isu ti biag, ket saan dayta a maysa a supapak a nagbannogantayo. Imbes ketdi, maysa dayta a sagut. Kinuna ni Jesus nga ‘adda idiay langit’ ti gunggona gapu ta aggapu dayta ken ni Jehova.

¹⁶ Dagiti napulotan awatenda “ti korona ti biag,” a no iti kasasaadda, maysa nga imortal a biag a kadua ni Kristo idiay langit. (Santiago 1:12, 17) Ngem no kadagidiay addaan iti naindagaan a namnama, ti “sabsabali a karnero,” mangnamnamada iti biag nga agnanayon iti maysa a paraiso a daga. (Juan 10:16; Apocalipsis 21:3-5) Para iti dayta a dua a grupo, ti “gunggona” ket saan a banag a nagbannoganda. Agpadpada nga awaten dagiti napulotan ken ti “sabsabali a karnero” ti gunggonada babaen ti “mangringbaw a di kaikarian a kinamanangngaasi” ni Jehova, a nangtignay ken ni apostol Pablo nga agkuna: “Pagyamanan iti Dios gapu iti di mailadawan a sagutna nga awanan bayad.”​—2 Corinto 9:14, 15.

17. Apay a mabalintayo ti agragsak no maidadanestayo ken piguratibo nga ‘aglagtotayo gapu iti rag-o’?

¹⁷ Insurat ni apostol Pablo kadagiti Kristiano, a dadduma ti asideg idin nga idadanes a sigugubsang ni Emperador Nero: “Agrag-otayo bayat nga addatayo kadagiti rigat, yantangay ammotayo a ti rigat mangpataud iti panagibtur; ti panagibtur, kalpasanna, maysa a naanamongan a kasasaad; ti naanamongan a kasasaad, kalpasanna, namnama, ket ti namnama saan a mangiturong iti pannakaupay.” Kinunana pay: “Agrag-okayo iti namnama. Agibturkayo iti sidong ti rigat.” (Roma 5:3-5; 12:12) Nailangitan man wenno naindagaan ti namnamatayo, ti gunggona ti panagtalinaedtayo a matalek iti sidong ti pakasuotan ket dakdakkel nga amang ngem iti aniaman a pakaikariantayo koma. Di matukod ti rag-otayo iti namnama a biag nga agnanayon tapno makapagserbi ken maidaydayawtayo ti naayat nga Amatayo, ni Jehova, iti sidong ti aritayo a ni Jesu-Kristo. Piguratibo nga ‘aglagtotayo gapu iti rag-o.’

18. Ania ti manamnama nga aramiden dagiti nasion bayat nga umad-adani ti panungpalan, ken anianto ti aramiden ni Jehova?

¹⁸ Iti dadduma a pagilian, naidadanes ken agtultuloy a maidaddadanes dagiti Saksi ni Jehova. Iti padtona maipapan iti panungpalan ti sistema ti bambanag, pinakdaaran ni Jesus dagiti pudno a Kristiano: “Puntiriakayto ti pananggura ti amin a nasnasion maigapu iti naganko.” (Mateo 24:9) Bayat nga umad-adanitayon iti panungpalan, tignayen ni Satanas dagiti nasion tapno guraenda ti ili ni Jehova. (Ezequiel 38:10-12, 14-16) Dayta ti tanda nga agtignayen ni Jehova. “Sigurado nga itan-okkonto ti bagik ken santipikarek ti bagik ken ipakaammok ti bagik iti imatang dagiti adu a nasion; ket kasapulanto a maammuanda a siak ni Jehova.” (Ezequiel 38:23) Iti kasta, santipikaren ni Jehova ti naindaklan a naganna ken ispalenna ti ilina manipud iti pannakaidadanes. Gapuna, “naragsak ti tao nga agtultuloy nga agibtur.”​—Santiago 1:12.

19. Ania ti masapul nga aramidentayo bayat nga ur-urayentayo ti naindaklan nga “aldaw ni Jehova”?

¹⁹ Bayat a nakaas-asidegen ti naindaklan nga “aldaw ni Jehova,” agrag-otayo koma agsipud ta ‘naibilangtayo a maikari a maibabain’ maigapu iti nagan ni Jesus. (2 Pedro 3:10-13; Aramid 5:41) Kas kadagiti nagkauna a Kristiano, sapay koma ta agtultuloytayo “nga awan sarday a mangisuro ken mangideklara iti naimbag a damag maipapan iti Kristo” ken iti gobierno a Pagarianna bayat nga ur-urayentayo ti gunggonatayo iti sidong ti nalinteg a baro a lubong ni Jehova.​—Aramid 5:42; Santiago 5:11.

Panagrepaso

• Ania ti kayat a sawen ti agsagaba maigapu iti kinalinteg?

• Ania ti epekto ti pannakaidadanes kadagiti nagkauna a Kristiano?

• Apay a makuna a maidaddadanes dagiti Saksi ni Jehova kas kadagiti mammadto idi ugma?

• Apay a mabalintayo ti ‘agrag-o ken aglagto gapu iti rag-o’ iti sidong ti pannakaidadanes?

[Dagiti Ladawan iti panid 16, 17]

“Naragsakkayo inton umsiendakayo dagiti tattao ken idadanesdakayo”

[Credit Line]

Dagiti naibalud: Chicago Herald-American