Ti Impluensia ni Jesus iti Sangalubongan
“AMIN a salaysay dagiti ebanghelio maipapan kadagiti sinarita ni Jesus, iti pribado ken iti publiko, mabalin a naibagana iti dua nga oras laeng,” insurat ti agipatpatarus iti Biblia a ni Edgar Goodspeed. “Kaskasdi a mamagtignay, makagutugot ken makaabbukay unay dayta a bassit nga imbagana, ket saan a panaglablabes no kunaen nga awan ti siasinoman a nangimpluensia iti lubong iti kasta a kabileg.”
Idi naturpos ni Jesu-Kristo ti ministeriona ditoy daga idi tawen 33 K.P., di kumurang a 120 a lallaki ken babbai ti bilang dagiti pasurotna. (Aramid 1:15) Ita, nasurok a dua a bilion a tattao ti mangibagbaga a Kristianoda. Ginasut a milion pay ti mangibaga a ni Jesus ket maysa a propeta. Naisangsangayan a talaga ti impluensia dagiti sursurona iti sangatauan.
Uray dagiti lider a saan a Kristiano binigbigda ti impluensia ni Jesus iti sangalubongan. Kas pagarigan, insurat ti Judio a rabbi a ni Hyman Enelow: “Ni Jesus ti kalatakan, ti kangrunaan a nasukimat ti biagna, ti kabilgan ti impluensiana iti narelihiosuan a historia ti sangatauan.” Innayon ni Enelow: “Siasino ti makaibaga iti kabileg ti impluensia ni Jesus iti sangatauan? Ti ayat a pinarayrayna, ti liwliwa nga impaayna, ti kinaimbag a pinataudna, ti namnama ken rag-o nga imparegtana—awan ti umasping kadagita iti historia ti sangatauan. Awan kaimudingan dagiti natan-ok ken naimbag a naaramid ti tao no idilig iti sangalubongan nga impluensia ni Jesus. Isu ti kangrunaan a makapainteres a persona iti historia.” Kinuna met ti lider dagiti Hindu a ni Mohandas K. Gandhi: “Awan ti ammok a makaartap iti naaramidan ni Jesus iti sangatauan. Kinapudnona, nasayaat ti Kristianidad.” Ngem innayonna: “Ti problema ket adda kadakayo a Kristiano. Saankayo nga agbibiag maitunos kadagiti pannursuroyo.”
Namin-adu a napaay ti Kakristianuan a mangannurot kadagiti pannursuro ni Jesus. Ni Cecil John Cadoux, a historiador maipapan iti Kristianidad, kinunana a “ti in-inut ken agtultuloy a panagrakaya ti moralidad iti intero nga Iglesia” ket “ammon dagiti lider dagiti Kristiano sipud pay idi . . . 140 K.P.” Kinunana: “Daytoy a panagrakaya dagiti nagkauna a moral a kinainget ket natural a nagresulta iti panangtulad kadagiti ar-aramid ti lubong.”
Idi maikapat a siglo, limmanlan daytoy a moral a panagrakaya, idi nagbalin a Kristiano ti Romano nga Emperador a ni Constantino. Insurat ni Cadoux: “Nabigbig dagiti historiador, ken pagladingitan ti dadduma kadakuada ti nakaro a pannakikompromiso ti Iglesia idi nakialiansa daytoy ken ni Constantino.” Bayat dagiti naglabas a siglo sipud dayta, nakaaramid dagiti agkunkuna a Kristiano kadagiti banag a nakaibabainan ti nagan ni Kristo.
Dagiti saludsod ngarud a pakaseknantayo ket: Ania a talaga ti insuro ni Jesus? Ken ania ti rumbeng nga impluensiana kadatayo dagiti pannursurona?
[Ladawan iti panid 3]
“Awan ti ammok a makaartap iti naaramidan ni Jesus iti sangatauan.”—Mohandas K. Gandhi
[Ladawan iti panid 3]
“Awan ti siasinoman a nangimpluensia iti lubong iti kasta a kabileg.”—Edgar Goodspeed
[Credit Line]
Culver Pictures