“Itultuloyyo a Paneknekan No Aniakayo”

“Itultuloyyo a suboken no addakayo iti pammati, itultuloyyo a paneknekan no aniakayo.”​—2 CORINTO 13:5.

1, 2. (a) Kasano a maapektarannatayo ti panagduadua kadagiti patpatientayo? (b) Ania a kasasaad idiay Corinto idi umuna a siglo ti nalabit a makagapu no apay a saan nga ammo ti dadduma no ania a dana ti surotenda?

MAYSA nga agdaldaliasat iti away ti dimteng iti maysa a pagsapalan. Gapu ta dina ammo ti dalan nga agturong iti papananna, nagimtuod kadagiti lumablabas ngem nagduduma ti sungbatda. Dinan maituloy ti agdaliasat gapu ta mariro. Mabalin a kasta met ti epektona kadatayo no adda panagduaduatayo kadagiti patpatientayo. Ti kasta a panagduadua apektaranna ti nasayaat a panagdesdesisiontayo, ket ditay ammo no ania ti aramidentayo.

² Timmaud idi umuna a siglo ti maysa a kasasaad a dandani nangyeg iti umasping nga epekto kadagiti sumagmamano a tattao iti kongregasion Kristiano idiay Corinto, Grecia. ‘Dagiti nalabes ti laingda nga apostol’ kueskuestionaranda ti autoridad ni apostol Pablo, a kunkunada: “Nadagsen ken napuersa dagiti suratna, ngem ti kaaddana a mismo nakapuy ket ti panagsasaona uumsien.” (2 Corinto 10:7-12; 11:5, 6) Ti kasta a panangmatmat ti nalabit a makagapu no apay a dadduma iti kongregasion Kristiano dida ammo no kasanoda a magna.

3, 4. Apay a nasken a pakaseknantayo ti balakad ni Pablo kadagiti taga Corinto?

³ Impasdek ni Pablo ti kongregasion idiay Corinto idi nagbisita sadiay idi 50 K.P. Nagnaed idiay Corinto iti “makatawen ken innem a bulan, nga insursurona iti nagtetengngaanda ti sao ti Dios.” Kinapudnona, “adu kadagiti taga Corinto a nakangngeg nangrugida a mamati ken mabautisaran.” (Aramid 18:5-11) Maseknan unay ni Pablo iti naespirituan a kasasaad dagiti kapammatianna idiay Corinto. Maysa pay, nagsurat kenkuana dagiti taga Corinto tapno agpabalakadda mainaig iti sumagmamano nga isyu. (1 Corinto 7:1) Gapuna, impaayanna ida iti nagsayaat a balakad.

⁴ “Itultuloyyo a suboken no addakayo iti pammati,” insurat ni Pablo, “itultuloyyo a paneknekan no aniakayo.” (2 Corinto 13:5) No iyaplikarda dayta a balakad, dagidi a kakabsat idiay Corinto maliklikanda ti agduadua no ania a dana ti pagnaanda. Masalaknibannatayo met iti umasping a wagas. Kasanotay ngarud a matungpal ti balakad ni Pablo? Kasanotay a masubok no addatayo iti pammati? Ken ania ti nairaman iti panangpaneknek no aniatayo?

“Itultuloyyo a Suboken No Addakayo iti Pammati”

5, 6. Ania a pagannurotan ti mausartayo a mangsubok no addatayo met laeng iti pammati, ken apay a dayta ti kasayaatan a pagannurotan?

⁵ Iti maysa a pannubok, kadawyanna nga adda maysa a tao wenno banag a masubok ken mausar a pangsubok ti maysa a pangrukod wenno pagannurotan. Iti daytoy a kasasaad, ti masubok ket saan a ti pammati, wenno dagiti patpatientayo. Ti masubok ket datayo kas indibidual. Iti panangsuboktayo iti bagitayo, adda perpekto a pagannurotantayo. Kuna ti maysa a samiweng a pinutar ni salmista a David: “Ti linteg ni Jehova perpekto, mamagsubli iti kararua. Ti pammalagip ni Jehova mapagpiaran, mamagsirib iti daydiay awanan kapadasan. Dagiti bilin manipud ken Jehova nalintegda, mamagrag-o iti puso; ti bilin ni Jehova nadalus, mamagsilnag iti matmata.” (Salmo 19:7, 8) Naglaon ti Biblia kadagiti nalinteg a bilbilin ken awan pagkuranganna a linlinteg ni Jehova, dagiti mapagpannurayan a pammalagip ken nadalus a bilbilinna. Ti mensahe a linaon ti Biblia ti kasayaatan a pagannurotan a mausar iti panangsubok.

⁶ No maipapan iti impaltiing ti Dios a mensahe, kuna ni apostol Pablo: “Ti sao ti Dios nabiag ken adda bilegna ken natartarumamis ngem iti aniaman a kampilan a dua ti tademna ket sumalput uray agingga iti paglasinan ti kararua ken espiritu, ken kadagiti nagsusuopan ken iti patada, ket kabaelanna a lasinen dagiti panunot ken dagiti panagem ti puso.” (Hebreo 4:12) Wen, ti sao ti Dios masubokna ti pusotayo​—no aniatayo a talaga. Kasanotay a mayaplikar daytoy a sumarut ken nabileg a mensahe? Imbatad ti salmista no kasanotayo a mayaplikar daytoy. Inkantana: “Naragsak ti tao a . . . ti pakaragsakanna adda iti linteg ni Jehova, ket iti lintegna agbasa iti nababa a timek iti aldaw ken rabii.” (Salmo 1:1, 2) Masarakan ‘ti linteg ni Jehova’ iti naisurat a Sao ti Dios, ti Biblia. Pakaragsakantayo koma a basaen ti Sao ni Jehova. Kinapudnona, masapul nga adda eskediultayo a mangbasa a siuulimek, wenno mangmennamenna iti dayta. Bayat nga aramidentayo dayta, subokentayo ti bagitayo maibatay kadagiti linaonna.

7. Ania ti kangrunaan a pamay-an a masuboktayo no addatayo met laeng iti pammati?

⁷ Ti kangrunaan ngarud a pamay-an tapno masuboktayo no addatay iti pammati ket babaen ti panangbasa ken panangmennamenna iti Sao ti Dios ken panangsukimat no maitunos met laeng ti konduktatayo kadagiti maad-adaltayo. Maragsakantayo ta adu ti makatulong kadatayo a mangtarus iti Sao ti Dios.

8. Kasano a dagiti publikasion “ti matalek ken masirib nga adipen” matulongandatayo a mangsubok no addatayo met laeng iti pammati?

⁸ Mangipapaay ni Jehova kadagiti pannursuro ken instruksion babaen kadagiti publikasion “ti matalek ken masirib nga adipen,” a mangilawlawag iti Kasuratan. (Mateo 24:45) Kas pagarigan, usigenyo ti kahon a napauluan “Salsaludsod a Pagmennamennaan” iti ngudo ti tunggal kapitulo ti libro nga Umadanika ken Jehova.a Anian a nagsayaat a gundaway agpaay iti personal a panagmennamenna ti itden daytoy a libro! Dagiti adu a suheto a nailawlawag kadagiti pagbasaantayo, iti Ti Pagwanawanan ken Agriingkayo!, makatulongda met kadatayo a mangsubok no addatayo iti pammati. No maipapan kadagiti artikulo mainaig iti libro a Proverbio a nailawlawag kadagiti nabiit pay a ruar Ti Pagwanawanan, maysa a Kristiano a babai ti nagkuna: “Praktikal unay dagitoy nga artikulo. Tulongandak a mangsukimat no ti panagsasao, kondukta, ken kababalinko ket pudno met laeng a maitunos kadagiti nalinteg a pagannurotan ni Jehova.”

9, 10. Aniada a probision ni Jehova ti tumulong kadatayo nga agtultuloy a mangsubok no addatayo iti pammati?

⁹ Tagtagiragsakentay met ti aglaplapusanan a panangiwanwan ken pammaregta babaen kadagiti gimong ti kongregasion, asamblea, ken kombension. Karaman dagitoy kadagiti naespirituan a probision nga ipaay ti Dios kadagiti tattao a tuktukoyen ti padto ni Isaias: “Mapasamakto iti kamaudianan a paset dagiti aldaw a ti bantay ti balay ni Jehova sititibkerto ti pannakaipasdekna a nangatngato ngem iti tapaw ti bambantay, ket sigurado a maipangatonto iti ngatuen dagiti turod; ket amin dagiti nasion agayusdanto nga agturong iti dayta. Ket pudno unay a mapanto ti adu nga ili ket kunaenda: ‘Umaykayo, ket sumang-attayo iti bantay ni Jehova, . . . ket isuronatayto maipapan kadagiti dalanna, ket magnatayto kadagiti danana.’” (Isaias 2:2, 3) Pudno a maysa a bendision a maisursuro kadatayo dagiti dalan ni Jehova.

¹⁰ Ti sabali pay a pamay-an a masuboktayo ti bagitayo ket babaen kadagiti balakad dagidiay addaan iti naespirituan a kualipikasion, a pakairamanan dagiti Kristiano a panglakayen. No maipapan kadakuada, kuna ti Biblia: “Kakabsat, uray pay ti maysa a tao makaaramid iti aniaman a di umiso nga addang sakbay a maammuanna dayta, dakayo nga addaan kadagiti naespirituan a kualipikasion padasenyo nga aturen ti kasta a tao iti espiritu ti kinaalumamay, bayat a tunggal maysa kadakayo siputanna ti bagina, ta amangan no masulisogka met.” (Galacia 6:1) Anian a yamantayo iti daytoy a probision a mangatur kadatayo!

11. Ania ti masapul nga aramidentayo tapno masuboktayo no addatayo iti pammati?

¹¹ Dagiti publikasiontayo, dagiti Nakristianuan a gimong, dagiti nadutokan a lallaki​—agkakaimbag dagitoy a probision manipud ken Jehova. Ngem masapul a sukimatentayo ti bagitayo tapno masuboktayo no addatayo iti pammati. Gapuna, no basbasaentayo dagiti publikasiontayo wenno umim-imdengtayo kadagiti Nainkasuratan a balakad, nasken nga imtuodentayo iti bagitayo: ‘Siak kadi ti tuktukoyenna? Ar-aramidek kadi dayta? An-annurotek kadi dagiti Nakristianuan a patpatien?’ Adda epektona iti espiritualidadtayo no kasano ti panangmatmattayo kadagiti impormasion a maaw-awattayo babaen kadagitoy a probision. “Ti pisikal a tao saanna nga awaten ti bambanag ti espiritu ti Dios, ta kinamaag kenkuana dagita,” kuna ti Biblia. “Nupay kasta, ti naespirituan a tao pudno a sukimatenna ti amin a bambanag.” (1 Corinto 2:14, 15) Saan kadi a rumbeng a taginayonentayo ti manangapresiar ken naespirituan a panangmatmat kadagiti mabasbasatayo kadagiti libro, magasin, ken dadduma a publikasiontayo, agraman dagiti mangmangngegtayo kadagiti gimong ken kadagiti papanglakayen?

“Itultuloyyo a Paneknekan no Aniakayo”

12. Ania ti masapul nga aramidentayo tapno mapaneknekantayo no aniatayo?

¹² Masapul a tingitingentayo ti bagitayo tapno mapaneknekantayo no aniatayo. Wen, mabalin nga addatayo iti kinapudno, ngem komusta ti espiritualidadtayo? Masapul nga iparangarangtayo a nataengantayo iti naespirituan ken addaantayo iti pudpudno nga apresasion kadagiti naespirituan a probision tapno mapaneknekantayo no aniatayo.

13. Sigun iti Hebreo 5:14, ania ti mangipakita a nataengantayo?

¹³ Ania dagiti pammaneknek a nataengantayo a Kristiano? Insurat ni apostol Pablo: “Ti nakired a taraon agpaay kadagiti nataengan a tattao, kadagidiay a babaen iti panangusar nasanay dagiti pannakabalin ti pannakaawatda a mangilasin agpadpada iti umiso ken di umiso.” (Hebreo 5:14) Mapaneknekantayo a nataengantayo babaen ti panangsanaytayo iti abilidad ti pannakaawattayo. No kasano a dagiti piskel iti bagi ti maysa nga atleta kasapulan a mawatwat babaen ti maulit-ulit a panangusar sakbay a lumaing iti ay-ayamna, masapul a masanay ti abilidad ti pannakaawattayo babaen ti panangyaplikar kadagiti prinsipio ti Biblia.

14, 15. Apay a nasken a pagreggetantayo nga adalen dagiti nauuneg a bambanag iti Sao ti Dios?

¹⁴ Ngem sakbay a masanaytayo ti abilidad ti pannakaawattayo, masapul a gun-odentayo ti pannakaammo. Gapuna, napateg ti naanep a personal a panagadal. No regular ti personal a panagadaltayo​—nangnangruna kadagiti nauuneg a bambanag iti Sao ti Dios​—maasa ti abilidad ti pannakaawattayo. Kadagiti naglabas a tawtawen, adu a nauuneg a suheto ti nailawlawag iti Ti Pagwanawanan. Ania ti aramidentayo no mabasatayo dagiti artikulo a mangilawlawag kadagiti nauuneg a kinapudno? Agannayastayo kadi a mangliklik kadagita gapu ta naglaonda iti “sumagmamano a banag a narigat a maawatan”? (2 Pedro 3:16) Imbes a kasta ti aramidentayo, pagreggetantayo a tarusan no ania ti kayatda nga ibaga.​—Efeso 3:18.

¹⁵ Kasano no narigat para kadatayo ti personal a panagadal? Masapul a sursuruentayo a pakaay-aywan dayta.b (1 Pedro 2:2) Tapno agmataengantayo, masapul a sursuruentayo ti mangan kadagiti nakired a taraon, dagiti nauuneg a kinapudno iti Sao ti Dios. No saantayo nga aramiden dayta, agtalinaed a limitado ti abilidad ti pannakaawattayo. Ngem saan laeng a ti pananggun-od iti abilidad ti pannakaawat ti mangpaneknek a nataengan ti maysa. Iti inaldaw, masapul nga iyaplikartayo ti pannakaammo a nagun-odtayo iti naanep a personal a panagadal.

16, 17. Ania ti balakad ni adalan a Santiago no maipapan iti panagbalin a “managtungpal iti sao”?

¹⁶ Mapaneknekantayo met no aniatayo babaen dagiti aramid ti pammati a mangipakita iti apresasiontayo iti kinapudno. Babaen ti maysa a nabileg nga ilustrasion, dineskribir ni adalan a Santiago no kasano a sukimaten ti bagitayo iti daytoy a banag: “Agbalinkayo a managtungpal iti sao, ket saan a managdengngeg laeng, nga al-allilawenyo ti bagbagiyo iti ulbod a panagrasrason. Ta no ti asinoman managdengngeg iti sao, ket saan a managtungpal, daytoy ket umasping iti tao a kitkitaenna ti nakaisigudan a rupana iti maysa a pagsarmingan. Ta kitaenna ti bagina, ket isu mapan ket dagus a malipatanna no ania a kita ti tao isuna. Ngem ti mangsukimat iti perpekto a linteg a kukua ti wayawaya ken agtultuloy iti dayta, daytoy a tao, agsipud ta isu nagbalin, saan a maysa a manglipat a managdengngeg, no di ket maysa a managaramid iti trabaho, naragsakto iti panangaramidna iti dayta.”​—Santiago 1:22-25.

¹⁷ Kasla ibagbaga ni Santiago: ‘Agsarmingkayo iti sao ti Dios, ket sukimatenyo ti bagiyo. Itultuloyyo nga aramiden dayta, ket usigenyo ti bagiyo maitunos iti linaon ti sao ti Dios. Kalpasanna, diyo lipatan a dagus no ania ti nakitayo. Mangaramidkayo kadagiti kasapulan a panagbalbaliw.’ Mabalin a narigat no dadduma ti panangyaplikar iti daytoy a balakad.

18. Apay a maysa a karit ti panangtungpal iti balakad ni Santiago?

¹⁸ Alaentay a pagarigan ti bilin nga ikasabatayo ti Pagarian. “Buyogen iti puso watwaten ti maysa ti pammati maipaay iti kinalinteg,” insurat ni Pablo, “ngem buyogen iti ngiwat mangaramid ti maysa iti publiko a panangideklara maipaay iti pannakaisalakan.” (Roma 10:10) Adu dagiti masapul a balbaliwantayo tapno publiko a maideklaratayo ti pannakaisalakan. Para iti kaaduan kadatayo, saan a nalaka ti trabaho a panangasaba. Tapno sireregta a maaramid ken mayun-unatayo dayta iti biagtayo, makalikaguman ti kanayonan a panagbalbaliw ken panagsakripisio. (Mateo 6:33) Ngem inton regular a makipaspasettayo iti daytoy a trabaho nga intalek ti Dios, naragsaktayo gapu ta maidaydayawtayo ni Jehova. Gapuna, naregtatayo kadi a manangiwaragawag iti Pagarian?

19. Ania ti karaman kadagiti aramid ti pammatitayo?

¹⁹ Ania ti karaman kadagiti aramid ti pammatitayo? Kuna ni Pablo: “Ti bambanag a naadalyo kasta met nga inawat ken nangngeg ken nakitayo mainaig kaniak, annurotenyo dagitoy; ket ti Dios ti talna addanto kadakayo.” (Filipos 4:9) Mapaneknekantayo ti kinasiasinotayo babaen ti panangyaplikartayo kadagiti maad-adal, inawat, nangngeg, ken nakitatayo​—ti naan-anay a kaipapanan ti Nakristianuan a dedikasion ken panagbalin nga adalan. “Daytoy ti dalan. Magnakayo iti dayta,” imbilin ni Jehova babaen ken ni mammadto nga Isaias.​—Isaias 30:21.

20. Siasino dagidiay dakkel a bendision iti kongregasion?

²⁰ Dagiti lallaki ken babbai a siaanep a mangad-adal iti Sao ti Dios, a sireregta a mangikaskasaba iti naimbag a damag, nga awan ti pakababalawan ti kinatarnawda, ken sisusungdo a sumupsuporta iti Pagarian ket dakkel a bendision iti kongregasion. Ad-adda a natalged ti kongregasion a nakaitimpuyoganda. Makatulongda unay nangnangruna ta adu dagiti kabbaro a maaywanan. No ipapusotayo ti balakad ni Pablo nga ‘itultuloytayo a suboken no addatayo iti pammati, nga itultuloytayo a paneknekan no aniatayo,’ agbalintayo met a nasayaat nga impluensia kadagiti sabsabali.

Pagragsakanyo ti Panangaramid iti Pagayatan ti Dios

21, 22. Kasano nga agbalin a makaparagsak kadatayo ti panangaramid iti pagayatan ti Dios?

²¹ “Ti panangaramid iti pagayatam, O Diosko, nagragsakak,” inkanta ni David nga ari iti nagkauna nga Israel, “ket ti lintegmo adda kadagiti makin-uneg a pasetko.” (Salmo 40:8) Pakaragsakan ni David nga aramiden ti pagayatan ti Dios. Apay? Gapu ta adda iti pusona ti linteg ni Jehova. Saan a pagduaduaan ni David ti dana a pagnaanna.

²² No adda iti pusotayo ti linteg ti Dios, saantay nga agduadua no ania a dana ti pagnaantayo. Pakaragsakantayo nga aramiden ti pagayatan ti Dios. Gapuna, ‘umagawatayo a sipipinget’ bayat a naimpusuan nga agserserbitayo ken ni Jehova.​—Lucas 13:24.

[Footnotes]

Malagipyo Kadi?

• Kasanotay a masubok no addatayo iti pammati?

• Ania ti karaman iti panangpaneknek no aniatayo?

• Ania dagiti pammaneknek a nataengantayo a Kristiano?

• Kasano a makatulong dagiti aramid ti pammatitayo iti panangsukimat iti bagitayo?

[Ladawan iti panid 23]

Ammoyo kadi ti kangrunaan a pamay-an a masubokyo no addakayo iti pammati?

[Ladawan iti panid 24]

Mapaneknekantayo a nataengantayo a Kristiano no usarentayo dagiti abilidad ti pannakaawattayo

[Dagiti Ladawan iti panid 25]

Mapaneknekantayo no aniatayo babaen ti saan a panagbalin a ‘mananglipat a managdengngeg, no di ket managtungpal iti sao’