“Ti Tulongko Aggapu ken Jehova”

Riniwriw ti Nagtignay nga Agdayaw ken ni Jehova

DAGITI padto ti Biblia a mangipatuldo iti panawentayo impakpakaunada a dagiti tattao manipud iti amin a nasion agkaykaysada iti natan-ok a panagdayaw ken ni Jehova. Kas pagarigan, babaen ken propeta Haggeo, impakaammo ni Jehova a Dios: “Yugayogekto dagiti amin a nasion, ket umayto dagiti matarigagayan a banag dagiti amin a nasion; ket daytoy a balay punnuekto iti dayag.” (Haggeo 2:7) Impadto da Isaias ken Mikias a bayat ti panawentayo​—“iti kamaudianan a paset dagiti aldaw”​—dagiti nasion ken il-ili agdayawda ken ni Jehova iti naanamongan a pamay-an.​—Isaias 2:2-4; Mikias 4:1-4.

Talaga kadi a matungtungpal ita dagita a padto? Bay-antayo a dagiti pasamak ti mangpaneknek. Iti laeng naglabas a sangapulo a tawen, nasurok a 3,110,000 a kabbaro ti nangidedikar iti bagbagida ken ni Jehova iti nasurok a 230 a pagilian. Kinapudnona, 6 iti tunggal 10 a Saksi ni Jehova nga agserserbi ita iti sangalubongan ket nabautisaran bayat ti naudi a dekada. Idi 2004, iti promedio, maysa a kabbaro a dedikado nga adipen ti Dios ti nainayon iti kongregasion Kristiano kada dua a minuto!a

Kas idi umuna a siglo, adda ita ti ‘maysa a dakkel a bilang dagiti nagbalin a manamati a nagturong iti Apo.’ Nupay ti iyaadu ket saan nga isu ti mismo a mangpaneknek iti bendision ti Dios, mangipaay dayta iti pammatalged a “ti ima ni Jehova” adda iti ilina. (Aramid 11:21) Ania ti makagapu a dagiti minilmilion a tattao pinilida ti agdayaw ken ni Jehova? Ken ania ti personal nga epektona kenka daytoy a panagrang-ay?

Naguyugoy Dagiti Umiso ti Pagannayasanda a Tattao

Silalawag a kinuna ni Jesus: “Awan ti tao a makaumay kaniak malaksid no ti Ama, a nangibaon kaniak, ti mangyasideg kenkuana.” (Juan 6:44) No an-anagen ngarud, ni Jehova ti talaga a mangyad-adani kadagiti tattao a “siuumiso nga agannayas iti agnanayon a biag.” (Aramid 13:48) Ti espiritu ti Dios matignayna dagiti tattao tapno mabigbigda ti naespirituan a kasapulanda. (Mateo 5:3) Ti masidsidir a konsiensia, ti kinaawan namnama, wenno nakaro a krisis ti mabalin a mangtignay kadagiti tattao a mangsapul iti Dios ket iti kasta maammuanda ti maipapan iti panggepna agpaay iti sangatauan.​—Marcos 7:26-30; Lucas 19:2-10.

Adu ti naguyugoy nga agdayaw ken ni Jehova agsipud ta ti programa ti kongregasion Kristiano a panangisuro iti Biblia ket nakatulong tapno masungbatan dagiti saludsod a mangburburibor kadakuada.

“No adda ti Dios, apay nga agtultuloy ti panagsagaba dagiti tattao gapu iti kinaawan hustisia?” Dayta a saludsod ti mangburburibor ken ni Davide, maysa nga aglaklako iti maiparit a droga idiay Italia. Saan nga interesado ni Davide kadagiti narelihiosuan a banag, isu nga inyimtuodna dayta a makakarit a saludsod kangrunaanna tapno laeng makairugi iti maysa a diskusion. “Kunak no awan ti makaited kaniak iti rasonable ken makakombinsir a sungbat,” kunana. “Ngem ti nakasaritak a Saksi ket nakaan-anus ken sinuportaranna dagiti ibagbagana babaen kadagiti teksto iti Biblia. Dakkel ti epektona kaniak dayta a panagpatang.” Ita, inlinteg ni Davide ti biagna ket agserserbin ken ni Jehova.

Adda dagiti nagbalin a paset ti organisasion ni Jehova kas resulta ti panangsapulda iti kaipapanan ken panggep ti biag. Iti panangikagumaanna a mangrisut iti bukodna nga emosional a parikut, maysa a sikiatrista idiay Zagreb, Croatia, ti bimmisita iti nalatak a doktor. Nasdaaw idi inted kenkuana ti doktor ti numero ti telepono ti sanga nga opisina dagiti Saksi ni Jehova idiay Zagreb, kasta met ti nagan ti maysa a Saksi nga am-ammona. “Ammom,” kinunana, “makatulong kenka dagitoy a tattao. No ibalakadko a mapanka iti simbaan, dagiti laeng awan biagna a rebulto ti makitam​—awan ti agsasao sadiay, amin ket nalidem. Panagkunak saan a makatulong kenka ti simbaan. Adda dagiti pasiente a binalakadak a mapan kadagiti Saksi ni Jehova, ket panagkunak dayta met ti kasayaatan nga aramidem.” Maysa a Saksi nga agassawa ti sidadaan a nangbisita kenkuana ket di nagbayag, rinugianda nga iyadalan iti Biblia. Kalpasan ti sumagmamano a lawas, sirarag-o a kinuna dayta a sikiatrista a naaddaan iti kaipapanan ti biagna sipud idi maammuanna ti panggep ti Dios.​—Eclesiastes 12:13.

No dumteng ti personal a pakarigatan, adu ti nakapaneknek a ti laeng kinapudno iti Biblia ti makaipaay iti pudpudno a liwliwa. Idiay Grecia, maysa nga ubing nga agtawen iti pito ti natay kalpasan a natnag manipud iti atep ti eskuelaan. Sumagmamano a bulan kalpasanna, nakasao ni nanangna ti dua a Saksi a nangliwliwa kenkuana babaen ti panangilawlawagda iti namnama a panagungar. (Juan 5:28, 29) Nagarubos ti lua ti babai. Inyimtuod dagiti kakabsat: “No kayatmo a maammuan ti ad-adu pay maipapan iti Biblia, kaano a mabalin ti bumisita kenka?” “Itan,” insungbatna. Inawisna ida iti pagtaenganna, ket nairugi ti panagadal iti Biblia. Ita, ti intero a pamilia ket agserserbin ken ni Jehova.

Makipaspasetka Kadi?

Gagangay dagiti kasta a kapadasan iti intero a lubong. Ur-urnongen ken sansanayen ni Jehova ti maysa a dakkel a bunggoy dagiti pudno nga agdaydayaw manipud iti nadumaduma a nasion. Daytoy nga internasional a grupo ket addaan iti naragsak a namnama a makalasat iti umad-adanin a panungpalan daytoy dakes a sistema dagiti bambanag ken agbiag iti maysa a nalinteg a baro a lubong.​—2 Pedro 3:13.

Kas resulta ti bendision ni Jehova, saanen a malapdan ti naballigi a pannakaibanag daytoy nga awan kaaspingna a trabaho a panangurnong. (Isaias 55:10, 11; Mateo 24:3, 14) Sireregta kadi a makipaspasetka iti panangikasaba iti Pagarian? No wen, makapagtalekka iti tulong ti Dios ken maibagam met dagitoy a sasao ti salmista: “Ti tulongko aggapu ken Jehova.”​—Salmo 121:2.

[Footnote]

[Blurb iti panid 9]

“Awan ti tao a makaumay kaniak malaksid no ti Ama, a nangibaon kaniak, ti mangyasideg kenkuana.”​—JUAN 6:44.

[Kahon iti panid 8]

MAKINGGAPUANAN ITI DAYTOY A PANAGRANG-AY?

“Malaksid no ni Jehova ti mangbangon ti balay, awan mamaayna a nagtrabaho a sipipinget iti dayta dagiti managibangon iti dayta.”​—Salmo 127:1.

“Ti Dios ti nangpadpadakkel iti dayta; iti kasta saan a daydiay agmula ti napateg wenno uray daydiay agsibug, no di ket ti Dios a mangpadakkel iti dayta.”​—1 Corinto 3:6, 7.