Kasapulantayo Kadi ti Mesias?
NALABIT a mayimtuodmo dayta a saludsod, “Kasapulantayo kadi ti Mesias?” Wen, maitutop a saludsoden no adda met laeng a talaga ti maaramidan kenka ti Mesias.
No iti biang ti sumagmamano a nalabit raraemem ti kapanunotanda, mabalin nga ipatalgedda kenka a nalawag ken di pagduaduaan ti sungbat. Kas iti siasinoman, talaga a kasapulam ti Mesias. Maipapan iti Mesias, insurat ti maysa nga eksperto iti linteg dagiti Judio idi umuna a siglo: “Uray pay no kasano ti kaadu dagiti kari ti Dios, nagbalinda a Wen babaen kenkuana.” No kasta, impaganetgetna ti nagpateg nga akem ti Mesias iti panggep ti Namarsua kadatayo a mangbendision iti amin a nasion ditoy daga. (2 Corinto 1:20) Gapu ta napateg unay ti akem ti Mesias, ti iyaay ken biagna ti nakaisentruan dagiti padto ti Biblia. Iti maysa a libro a basbasaen ti minilion a tattao iti 70 a tawenen, kinuna ni Henry H. Halley: “Naisurat ti Daan a Tulag tapno mangparnuay iti panangsegga ken mangipakpakauna iti Iyaay ti [Mesias].” Ngem nasken kadi ti iyaayna? Apay a rumbeng a pakaseknam dayta?
“Napulotan” ti kayat a sawen ti “Mesias.” Dayta ti kaibatogan ti pagaammo a termino a “Kristo.” Sigun iti Encyclopædia Britannica, 1970 Edition, ti Mesias “ti kangrunaan a mannubbot,” ket immay gapu iti panagbasol ti immuna a pagassawaan, da Adan ken Eva. Naparsuada a perpekto, nga addaan iti nagsayaat a namnama nga agbiag nga agnanayon iti Paraiso, ngem napukawda dayta a namnama. Imparipirip ti maysa a rebelioso nga anghel, a naawagan iti Satanas a Diablo, a nainget unay kano ti Namarsua kadakuada ken nasaysayaat kano ti pagbanaganda no isuda a mismo ti mangikeddeng iti naimbag ken dakes.—Genesis 3:1-5.
Naallilaw ni Eva ket namati iti dayta a kinaulbod. Gapu ta nalabit napatpateg ken ni Adan ti asawana ngem ti kinasungdo iti Dios, kimmanunong iti dayta nga iyaalsa nga insungsong ti Diablo. (Genesis 3:6; 1 Timoteo 2:14) Gapu iti inaramidda, malaksid a napukawda ti mismo a namnamada nga agbiag nga agnanayon iti paraiso, impatawidda pay ti basol ken ti bungana nga ipapatay kadagiti saan pay idi a naipasngay nga annakda.—Roma 5:12.
Ti Namarsua kadatayo a ni Jehova nangyurnos a dagus iti pamay-an tapno mapukaw dagiti dakes a kasasaad a pinataud idi agangay ti iyaalsa. Nangaramid iti pannakikappia babaen ti pagannurotan a nairaman idi agangay iti Mosaiko a Linteg—biag iti biag. (Deuteronomio 19:21; 1 Juan 3:8) Nasken a maipatungpal daytoy a pagannurotan tapno magun-odan dagiti daksanggasat a kaputotan da Adan ken Eva ti biag nga awan inggana iti paraiso a daga, ta dayta ti panggep ti Namarsua iti sangatauan. Iturongnatayo daytoy iti Mesias.
Idi sinentensiaanna ti Diablo, insawang ni Jehova a Dios ti kaunaan a padto ti Biblia: “Mangikabilakto ti panagginnura iti nagbaetanyo iti babai ken iti nagbaetan ti bin-im ken ti bin-ina. Dunorennakanto iti ulo ket dunoremto iti mukod.” (Genesis 3:15) Kinuna ti maysa nga eskolar ti Biblia a “dayta ti kaunaan kadagiti kari maipapan iti Mesias a nailanad iti Kasuratan.” Kinuna ti maysa pay nga eskolar a ti Mesias ti usaren ti Dios a “mangikkat iti amin a dakes a kasasaad a pinarnuay ti panagbasol” da Adan ken Eva, ken mangyeg kadagiti bendision iti sangatauan.—Hebreo 2:14, 15.
Ngem kas pagaammom, nakalkaldaang ti kasasaad ti sangatauan. Nailumlom ti sangatauan iti kinaawan namnama. Dayta ti gapuna a kuna ti The World Book Encyclopedia nga “adu a Judio ti mangnamnama pay laeng iti iyaay ti Mesias” ket isu “ti mangilinteg kadagiti bambanag ken mangparmek kadagiti kabusor dagiti tattao.” Nupay kasta, kuna ti Biblia a dimtengen ti Mesias. Adda kadi pamatiantayo iti ibagbaga ti Biblia? Sungbatan dayta ti sumaganad nga artikulo.