No iti Panangusar iti Autoridad, Tuladenyo ni Kristo

SUMAGMAMANO a tawen ti napalabasen, maysa a panageksperimento iti kababalin ti tao ti nangpataud kadagiti mamagpanunot a resulta. Nabingay iti dua a grupo dagidiay karaman iti daytoy nga eksperimento. Nadutokan ti maysa a grupo kas guardia a mangbantay iti sabali a grupo a nadutokan nga agakem kas balud. Ania ti napasamak?

“Iti las-ud ti sumagmamano nga aldaw,” sigun iti report, “kaaduan [kadagiti guardia] ti nagbalin nga abusado ken mamutbuteng, a mangipataw iti masansan a pannusa, bayat a nagbalin a managbutbuteng ken natulnog dagiti balud.” Kastoy ti konklusion dagiti managsirarak: Dandani amin ket posible a matnag iti silo ti di umiso a panangusar iti autoridad.

Autoridad―Umiso ken Di Umiso a Panangusar

Siempre, ti umiso a panangusar iti autoridad mangyeg iti pagimbagan. Makaipaay dayta iti maitutop a giya, a mabalin a mangted kadagiti pagimbagan ti bagi, rikna, ken espiritualidad. (Proverbio 1:5; Isaias 48:17, 18) Ngem kas ipakita ti nadakamat itay nga eksperimento, adda latta ti peggad a posible nga agbalin a nalabes ti panangusar iti autoridad. Impatuldo ti Biblia dayta a peggad idi kinunana: “No agturay ti asinoman a nadangkes, agsennaay dagiti umili.”​—Proverbio 29:2; Eclesiastes 8:9.

Makadangran ti panangabuso iti autoridad, uray no nasayaat ti motibo. Kas pagarigan, nabiit pay a napasamak ti publiko a panagpadispensar ti maysa a narelihiosuan nga organisasion idiay Ireland gapu ta dadduma a mannursuro iti eskuelaanda ket abusado a nangusar iti autoridadda kadagiti ubbing nga adda iti aywanda. Awan duadua a nasayaat ti motibo ti adu kadagitoy a mannursuro, ngem makadangran unay ti wagas nga inaramat ti dadduma. Impadamag ti maysa a pagiwarnak nga “adu nga ubbing ti nadangran ti emosionda gapu iti nakaro a kinaranggas ken kinaulpit dagiti adu a mangisursuro a kapammatianda.” (The Irish Times) No kasta, kasanoyo nga usaren ti autoridadyo tapno makagunggona dayta kadagiti dadduma imbes a paadaywen wenno saktan ti riknada babaen ti sasao wenno aramid?​—Proverbio 12:18.

“Amin nga Autoridad” Naited ken ni Jesu-Kristo

Usigenyo ti ulidan ni Jesu-Kristo. Sakbay unay a nagpalangit, kinunana kadagiti adalanna: “Isuamin nga autoridad naiteden kaniak idiay langit ken ditoy daga.” (Mateo 28:18) Napabutngan kadi iti dayta dagiti adalan? Nariknada kadi a kasla awan nakaidumaan ni Jesus no iti kababalin dagiti Cesar iti Roma, nga agdindinamag gapu iti pananglappedda iti aniaman a protesta wenno iyaalsa?

Ipakita ti rekord ti Biblia a saan! Us-usaren ni Jesu-Kristo ti autoridadna iti pamay-an a kas iti panangusar ni Amana iti dayta. Nupay ni Jehova ti nainkalintegan a mannakabalin-amin a Soberano iti Uniberso, tarigagayanna a naimpusuan ti panagserbi dagiti adipenna, saan ket a mapilpilit nga agtulnog gapu laeng iti buteng, wenno obligasion. (Mateo 22:37) Saan a pulos nga abusuen ni Jehova ti autoridadna. Ipakita dayta ti maysa a makapikapik a sirmata a naipabuya ken ni propeta Ezequiel.

Iti daytoy a sirmata, nakita ni Ezequiel ti uppat nga anghel a parsua a mangitantandudo iti kinasoberano ti Dios. Tunggal maysa kadagitoy ti addaan iti uppat a rupa. “No maipapan iti kaasping dagiti rupada,” insurat ni Ezequiel, “isuda nga uppat addaanda iti rupa ti tao nga iti makannawan rupa ti leon, ket isuda nga uppat addaanda iti rupa ti toro iti makannigid; isuda nga uppat addaanda met iti rupa ti agila.” (Ezequiel 1:10) Dagitoy nga uppat a rupa irepresentarda ti uppat a naan-anay a natimbeng ken kangrunaan a kualidad, wenno galad, ti Dios. Natukoy dagitoy iti Sao ti Dios kas: ayat, nga irepresentar ti rupa ti tao; kinahustisia, nga irepresentar ti rupa ti leon; ken kinasirib, nga irepresentar ti rupa ti agila. Dagitoy a tallo a galad siaannayas a maitunosda iti maikapat―pannakabalin, nga irepresentar ti rupa ti toro. Ania ti kaipapanan amin dagitoy? Ipakita ti sirmata a saan a pulos nga usaren ni Jehova ti di aggibus a pannakabalin ken autoridadna iti wagas a di maitunos kadagiti dadduma a kangrunaan a galadna.

Kas panangtuladna iti Amana, kanayon nga usaren ni Jesu-Kristo ti autoridadna iti wagas a naan-anay a maitunos iti ayat, kinasirib, ken kinahustisia. Dakkel a bang-ar ti narikna dagiti adalanna bayat ti panagserbida iti sidong ti autoridad ni Jesus. (Mateo 11:28-30) Ti galad nga agpada a pakabigbigan da Jehova a Dios ken ni Jesu-Kristo isu ti ayat, saan a pannakabalin wenno autoridad!​—1 Corinto 13:13; 1 Juan 4:8.

Kasano ti Panangusaryo iti Autoridad?

Komustakayo iti daytoy a banag? Kas pagarigan, dakayo kadi ti mangikedkeddeng kadagiti bambanag iti pamiliayo gapu ta dakayo ti addaan iti autoridad uray pay no agbanag dayta iti panangipilityo kadagiti personal laeng a kayatyo? No agtultulnog dagiti kameng ti pamiliayo kadagiti desisionyo, maigapu ngata dayta iti buteng wenno maigapu iti ayat? Pagtultulnogandakayo kadi ti pamiliayo gapu iti autoridadyo? Salsaludsod dagitoy a nasken nga usigen dagiti ulo ti pamilia gapu ta kayatda nga itandudo ti teokratiko nga urnos iti uneg ti pamilia.―1 Corinto 11:3.

Kasano no adda autoridadmo iti kongregasion Kristiano? Tapno masukimatmo no umiso met laeng ti panangusarmo, tingitingem ta bagim no iyap-aplikarmo met laeng dagiti sumaganad a prinsipio nga impaltiing ni Jehova a Dios ken inyulidan ni Jesu-Kristo.

“Ti adipen ti Apo . . . kasapulan nga agbalin a naalumamay kadagiti isuamin, . . . nga agtultuloy a medmedanna ti bagina iti sidong ti dakes, nga isurona a buyogen ti kinaalumamay dagidiay saan a sidadaan nga umannugot.”​—2 Timoteo 2:24, 25.

Adda dakkel nga autoridad ti sumagmamano nga indibidual iti nagkauna a kongregasion Kristiano. Kas pagarigan, kabaelan ni Timoteo nga ‘ibilin iti sumagmamano a saanda a mangisuro iti naiduma a doktrina.’ (1 Timoteo 1:3) Nupay kasta, masiguradotayo nga imparangarang ni Timoteo dagiti nadiosan a galad kadagiti amin nga aramidna, yantangay awan duadua a sinurotna ti balakad ni Pablo nga isu ket mangisuro “buyogen ti kinaalumamay” ken “kasapulan nga agbalin a naalumamay kadagiti isuamin” bayat nga imatonanna ti kongregasion Kristiano. Gapu ta ubing pay no idilig iti kaaduan a panglakayen iti daydi a tiempo, isu ket masapul nga agtignay kas maysa a nadayaw nga anak kadagiti laklakay ken kas maysa a naasi a kabsat kadagiti ub-ubing. (1 Timoteo 5:1, 2) Iti sidong ti kasta a naayat a panangaywan, maiparangarang ti kongregasion Kristiano ti espiritu ti nabara ken naayat a pamilia, saan ket a nalamiis ken awanan asi a korporasion ti negosio.―1 Corinto 4:14; 1 Tesalonica 2:7, 8.

“Dagiti agturay kadagiti nasion dominaranda ida ket dagiti naindaklan a tattao aramatenda ti autoridad kadakuada. Saan a kastoy kadakayo; no di ket siasinoman a kayatna ti agbalin a naindaklan kadakayo masapul nga agserbi kadakayo.”​—Mateo 20:25, 26.

Dagiti diktador iti lubong “dominaranda” dagiti dadduma babaen ti panangipilitda iti pagayatanda kadagiti masakupanda ken ipaaramidda dagiti bambanag iti wagas a tarigagayanda, a mangipatawda iti pannusa no agsukir dagitoy. Ngem ni Jesu-Kristo impaganetgetna ti panagserbi kadagiti sabsabali ken liklikan a piliten ida. (Mateo 20:27, 28) Kanayon a trinatona dagiti adalanna iti naayat, naasi a pamay-an. No surotem ti ulidan ni Jesus, adayo a nalaklaka a makitunos kenka dagiti sabsabali. (Hebreo 13:7, 17) Nalaklaka met kadakuada ti ‘kumuyog iti kanayonan a milia’ no kabaelanda, a sidadaan nga aramidenda dayta imbes a mapilpilitan laeng.―Mateo 5:41.

“Ipastoranyo ti arban ti Dios nga adda iti aywanyo, saan a . . . kas agturay kadagidiay tawid ti Dios, no di ket agbalinkayo a pagulidanan ti arban.”​—1 Pedro 5:2, 3.

Dagiti manangaywan ita bigbigenda a sungsungbatanda ti naespirituan a pagimbagan ti amin a kameng ti kongregasion. Saanda a tagilag-anen daytoy a responsabilidadda. Iti panangaywanda iti arban ti Dios, ikagumaanda nga aramiden dayta a situtulok, sigagagar, ken iti naayat a wagas. Kas ken apostol Pablo, pagreggetanda a pabilgen ti pammati dagidiay naitalek kadakuada, a saanda nga agtignay a kasla appo kadagiti pammatida.―2 Corinto 1:24.

No kasapulan a maipaay ti maitutop a balakad, aramiden dayta dagiti panglakayen iti espiritu ti kinaalumamay tapno aturenda ti maysa a nagkamali wenno tapno tulonganda ti padada a Kristiano a rumang-ay iti naespirituan. Sipapanunotda iti pammalagip ni apostol Pablo: “Kakabsat, uray pay ti maysa a tao makaaramid iti aniaman a di umiso nga addang sakbay a maammuanna dayta, dakayo nga addaan kadagiti naespirituan a kualipikasion padasenyo nga aturen ti kasta a tao iti espiritu ti kinaalumamay, bayat a tunggal maysa kadakayo siputanna ti bagina, ta amangan no masulisogka met.”​—Galacia 6:1; Hebreo 6:1, 9-12.

“Itultuloyyo nga anusan ti maysa ken maysa ken sibubulos a pakawanen ti maysa ken maysa . . . Kawesanyo ti bagbagiyo iti ayat, ta dayta ket naan-anay a singgalut ti panagkaykaysa.”​—Colosas 3:13, 14.

Kasano ti panangtratom iti asinoman a di makaragpat a naan-anay kadagiti Nakristianuan a pagalagadan? Ikagkagumaam kadi ti agbalin a mannakaawat kadagiti pagkuranganda, kas ar-aramiden da Jehova ken Jesu-Kristo? (Isaias 42:2-4) Wenno ipapilitmo ti nainget a panangannurot iti linteg ti Dios iti aniaman a kasasaad? (Salmo 130:3) Laglagipem, maiparbeng nga ipakita ti kinaalumamay agingga a posible, ken kinainget no kasapulan. Ti naayat a panagtignay palagdaenna ti singgalut ti kompiansa ken panagtalek iti nagbaetanyo ken dagidiay adda iti sidong ti autoridadmo.

No naitalek kenka ti aniaman nga autoridad, pagreggetam a tuladen da Jehova a Dios ken Jesu-Kristo no iti panangusar iti autoridad. Lagipem ti nagsayaat a panangiladawan ti salmista no kasano ti panangusar ni Jehova iti autoridadna kadagiti adipenna. Inkanta ni David: “Ni Jehova ti Pastorko. Saanakto nga agkurang iti aniaman. Kadagiti naraber a pagaraban pagiddaennak; iti igid dagiti nasayaat-pannakapadanumna a lugar a paginanaan idalannak. Ti kararuak pabang-aranna. Iturongnak kadagiti desdes ti kinalinteg maipagapu iti naganna.” Umasping iti dayta, no maipapan ken ni Jesus, kastoy ti mabasatayo: “Siak ti nasayaat a pastor, ket am-ammok dagiti karnerok ket dagiti karnerok am-ammodak, no kasano a ti Ama am-ammonak ken am-ammok ti Ama; ket isukok ti kararuak maigapu kadagiti karnero.” Adda pay kadi nasaysayaat a pagwadantayo no maipapan iti naayat a panangusar iti autoridad?​—Salmo 23:1-3; Juan 10:14, 15.

[Blurb iti panid 18]

Ti panangusar ni Jehova iti pannakabalinna kanayon a naan-anay a maitunos iti kinahustisia, kinasirib, ken ayat

[Ladawan iti panid 18]

No dadduma, masapul a mangipaay dagiti panglakayen iti naayat a balakad kadagiti nagkamali

[Ladawan iti panid 19]

Ni Pablo binalakadanna ni Timoteo nga agtignay a kas maysa a nadayaw nga anak ken naasi a kabsat

[Ladawan iti panid 20]

Ni Jesu-Kristo inusarna ti autoridadna iti nainsiriban, nainkalintegan, ken naayat a pamay-an