Dikay Agbuteng​—Adda Kadakayo ni Jehova!

NASUROK a 50 a tawen ti napalabasen, di nagbayag kalpasan ti damo a panagbettak dagiti nuklear a bomba, ti sientista a nangabak iti Premio Nobel a ni Harold C. Urey kinunana maipapan iti masanguanan: “Mangantayo a sibubuteng, maturogtayo a sibubuteng, agbiagtayo a sibubuteng ken mataytayo a sibubuteng.” Pudno a napno iti buteng ti lubongtayo ita, ket di pagsiddaawan dayta! Iti inaldaw, ipakaammo dagiti pagiwarnak dagiti nakaal-alingget a detalye maipapan iti terorismo, kinaranggas, ken di mailawlawag a saksakit.

Kas Kristiano, ammotayo ti kaipapanan dagitoy a kasasaad. Ipamatmatda nga agbibiagtayon “kadagiti maudi nga aldaw” daytoy dakes a sistema, a naimpadtuan a tinukoy ti Biblia kas “napeggad a tiempo a narigat a pakilangenan.” (2 Timoteo 3:1) Sibibileg ngarud a makapagtalektayo nga asidegen nga iyeg ni Jehova a Dios ti maysa a baro a lubong a pagtaengan ti kinalinteg. (2 Pedro 3:13) Ngem kabayatanna, maliklikantayo kadi ti agbuteng?

Ti Buteng ken Dagiti Adipen ti Dios

Da Jacob, David, ken Elias ti sumagmamano kadagiti adipen ni Jehova a nakarikna iti buteng idi maipasangoda kadagiti napeggad a kasasaad. (Genesis 32:6, 7; 1 Samuel 21:11, 12; 1 Ar-ari 19:2, 3) Saan a nagkurang ti pammati dagitoy a lallaki. Imbes ketdi, di maisin ti panagtalekda ken Jehova. Ngem da Jacob, David, ken Elias ket tattaoda laeng; gapuna, nakariknada iti buteng. “Ni Elias maysa idi a tao nga addaan rikna a kas kadatayo,” insurat ni adalan a Santiago.​—Santiago 5:17.

Mabalin a maringgorantayo met no mapanunottayo ti maysa a parikut a sangsanguentayo ita wenno pakaipasanguantayto. Natural laeng ti kasta a panagbuteng. Ti Biblia a mismo ibagana a ni Satanas a Diablo ket determinado a ‘manggubat’ kadagidiay “mangtungtungpal kadagiti bilin ti Dios ken addaan iti trabaho a panangsaksi ken Jesus.” (Apocalipsis 12:17) Nupay nangnangruna nga agaplikar dagitoy a sasao kadagiti napulotan a Kristiano, insurat ni Pablo: “Amin dagidiay agtartarigagay nga agbiag buyogen ti nadiosan a debosion a mainaig ken Kristo Jesus maidadanesdanto met.” (2 Timoteo 3:12) Kaskasdi, saantayo a rumbeng a malapunos iti buteng no maipasangotayo kadagiti parikut. Apay?

‘Maysa a Dios a Mangar-aramid Kadagiti Panangisalakan’

Insurat ni salmista a David: “Ti pudno a Dios ket maysa a Dios ti mangisalakan nga ar-aramid.” (Salmo 68:20) Naulit-ulit nga impakita ni Jehova ti pannakabalinna a mangispal iti ilina, babaen man ti panangisalakanna kadakuada kadagiti napeggad a kasasaad wenno babaen ti panangpabilegna kadakuada nga agibtur. (Salmo 34:17; Daniel 6:22; 1 Corinto 10:13) Iti panangadalmo iti Biblia, kasano kaadu kadagiti kasta a “mangisalakan nga ar-aramid” ti malagipmo?

Babaen ti panangusar iti Watch Tower Publications Index,a apay a dimo usigen dagiti pudno a pasamak a kas iti sangalubongan a Delubio idi kaaldawan ni Noe, ti pannakaispal ni Lot ken dagiti babbalasangna manipud Sodoma ken Gomorra, ti Ipapanaw ti Israel manipud Egipto ken ti ilalasatda iti Nalabaga a Baybay, wenno ti natungday a gakat ni Haman a mangikisap kadagiti Judio? Ti panangbasa ken panangmennamenna kadagitoy a makapagagar a salaysay pabilgenna ti pammatim ken ni Jehova kas maysa a Dios a mangar-aramid kadagiti panangisalakan. Ket dayta ti tumulong kenka a simamaingel a mangsango kadagiti pannubok iti pammatim.

Dagiti Moderno-Aldaw a Pagarian

Adda kadi mapanunotmo a kalugaram a nangipakita iti panagibtur? Nalabit a maysa a naibalud gapu iti kinamatalekna. Mabalin nga adda ammom a lakay wenno baket a Kristiano nga agserserbi ken ni Jehova nupay nakapuyen ti salun-atna. Wenno panunotem dagiti agtutubo a nagtalinaed a naisina iti lubong iti laksid ti nabileg nga impluensia dagiti kaeskuelada. Sa adda dagiti agsolsolo a nagannak, nga agmaymaysa a mangpadpadakkel kadagiti annakda, wenno dagiti awanan assawa nga agserserbi ken Jehova iti laksid ti kinaladingit ti panagmaymaysa. Ania ti maadalmo kadakuada? Ti panangmennamennam iti kinamatalekda matulongannaka nga agibtur ken agtalinaed a natured iti laksid ti aniaman a pakasuotam.

Kasapulantayo ti tured saan laeng a no maipasangotayo iti ibubusor ken pannakaidadanes no di pay ket no mangrugi a pagduaduaantayo nga ay-ayatennatayo ni Jehova. Nasken a patanorentayo ti panagtalek a personal nga agaplikar kadatayo ti subbot ni Jesus. (Galacia 2:20) Maysa pay, mabalintayo ti umadani ken ni Jehova nga awan ti di rumbeng a panagbuteng wenno panagdanag. No mariknatayo a saantayo a maikari iti panagayat ni Jehova, nasayaat no mennamennaentayo ti kinuna ni Jesus kadagiti pasurotna: “Saan aya a ti dua a billit-tuleng mailako iti sinsilio a bassit ti pategna? Kaskasdi awan maysa kadakuada ti matnag iti daga a saan nga ammo ni Amayo. Ngem dagiti mismo a buok ti uloyo nabilangda amin. Gapuna dikay agbuteng: napatpategkayo ngem iti adu a billit-tuleng.”​—Mateo 10:29-31.

Dagiti magasin a Pagwanawanan ken Agriingkayo! masansan a mangisalaysayda kadagiti kapadasan dagiti moderno-aldaw a Saksi ni Jehova a situtured a nangsango kadagiti karit. Dina kayat a sawen a saanda man la a naaddaan iti negatibo a rikna maipapan iti narikut a kasasaadda. Ngem saanda nga impalubos a dagiti kasta a rikna ti mangpasardeng kadakuada nga agserbi ken Jehova. Makatulong kenka dagiti naipablaak a salaysayda tapno situtured a makapagibturka met. Usigem ti dua a pagarigan.

Pannakadangran a Nangbalbaliw iti Biagna

Ti Abril 22, 2003 a ruar ti Agriingkayo! ket naglaon iti artikulo a “No Kasano a ti Pannakadangran Binalbaliwanna ti Biagko,” kas insalaysay ni Stanley Ombeva, maysa a Saksi ni Jehova idiay Kenya. Imbinsabinsana dagiti karit a sinangona kas resulta ti pannakadungparna iti napartak a lugan. Gapu ta kimmapuy ti salun-atna, napukawna ti trabaho ken ti amin a benepisiona. “Bayat nga in-inut a naawatak ti kinaserioso ti kasasaadko,” inadmitir ni Kabsat Ombeva iti salaysayna, “nagbalinak a negatibo, bagik la ti pinampanunotko, ken nalakaak a marurod. No dadduma, naunget ken nauyongak.” Iti laksid ti pakarigatanna, nagtalinaed a natured daytoy a Kristiano a lalaki. Saanna nga impalubos a ti pannakaupay ti naan-anay a mangpasuko kenkuana. Imbes ketdi, nagpannuray ken Jehova. “Kanayon a tinulongannak kadagiti amin a napasarak a rigat​—kasta unay ti panangtulongna kaniak nga uray la mabainakon no dadduma,” kuna ni Kabsat Ombeva. “Nangaramidak iti nabileg a determinasion a mangbasa ken mangmennamenna kadagiti makaliwliwa a teksto ti Kasuratan.”

Adu ti situtured a nakapagibtur kadagiti pakasuotan gapu kadagiti prangka a komento ni Kabsat Ombeva. “Nagsangitak idi nabasak daytoy nga artikulo,” insurat ti maysa a Kristiano a babai. “Nariknak a babaen daytoy nga artikulo, ipakpakita ni Jehova ti nabara ken naayat a panangaywanna tapno maliwliwaak.” Insurat ti maysa pay a Saksi: “Makaparegta unay kadakami dagitoy nga artikulo gapu ta mapaspasaranmi ti umasping a kasasaad ken siuulimek nga agsagsagabakami.”

Panangdaer iti Nasaem a Rikna

Makagutugot met ti kapadasan ni Herbert Jennings, a naisalaysay iti artikulo a “Dikay Ammo no Anianto ti Pagbalinan ti Biagyo Inton Bigat.”b Agsagsagaba ni Kabsat Jennings iti bipolar disorder. Iti pananglagipna kadagiti aldaw a mangrugrugi ti sakitna, kunana: “Nagrigat uray ti makigimong laeng. Ngem naan-anay a kombinsidoak a nakapatpateg ti naespirituan a panagtataripnong. Tapno madaerak dayta, masansan a sumrekak iti Kingdom Hall kalpasan a nakatugawen ti amin ken pumanawak a dagus kalpasan ti programa, sakbay a tumakder dagiti timmabuno.”

Narigat met ti mangasaba. “No dadduma, uray no addaakon iti ridaw, maamakak pay latta nga agtuktok,” kuna ni Kabsat Jennings. Ngem saanak nga agsanud, agsipud ta ammok a ti ministeriotayo kaipapananna ti pannakaispaltayo ken ti siasinoman a mangipangag. (1 Timoteo 4:16) Kalpasan ti sumagmamano a kanito, mapagkalmak ti riknak, ket mapanak iti sumaruno a ruangan tapno padasek manen. Babaen ti agtultuloy a pannakiramanko iti ministerio, nataginayonko ti rasonable a naespirituan a salun-at, ket dayta ti ad-adda a nangpabileg kaniak nga agtultuloy.”

Ti nabatad a salaysay ni Kabsat Jennings tinulonganna ti adu nga agbasbasa a mangsango kadagiti pakarigatanda buyogen ti umasping a kinatured. Kas pagarigan, insurat ti maysa a Kristiano a babai: “Iti uneg ti 28 a tawenen a panagbasbasak iti magasin a Pagwanawanan ken Agriingkayo!, daytoy pay laeng nga artikulo ti kasta unay a nangtukay iti riknak. Insardengko ti amin-tiempo a panagserbik ngem kasla makonsiensiaak, a ti panagriknak ket nakapagtultuloyak koma no nabilbileg ti pammatik. Idi mabasak ti maipapan iti panagsardeng ni Kabsat Jennings iti annongenna tapno maasikasona ti sakitna, natulonganak a mangmatmat iti kasasaadko iti natimbeng a pamay-an. Talaga a maysa daytoy a sungbat iti kararagko!”

Umasping iti dayta, insurat ti maysa a Kristiano a lalaki: “Kalpasan ti sangapulo a tawen a panagserbik kas panglakayen, nasken nga agsardengak iti daytoy a pribilehio gapu iti sakitko iti isip. Nakaro ti pannakapaayko nga uray la diak kayaten a basaen dagiti artikulo maipapan kadagiti pakasaritaan ti biag, a masansan a mangisalaysay kadagiti naisangsangayan a gapuanan dagiti adipen ni Jehova. Ngem makaparegta kaniak ti kinapinget ni Kabsat Jennings. Namin-adu a binasak ti artikulo.”

Sikokompiansa a Panagtultuloy

Kas kada Kabsat Ombeva ken Jennings, adu a Saksi ni Jehova ti nagtultuloy a situtured nga agdaydayaw ken ni Jehova a Dios iti laksid dagiti dadakkel a lapped. Makomendaranka no maysaka kadakuada. Namnamaem: “Saan a nakillo ti Dios tapno lipatenna ti aramidyo ken ti ayat nga impakitayo maipaay iti naganna, ta nagserbikayo kadagiti sasanto ken agtultuloykayo nga agserbi.”​—Hebreo 6:10.

No kasano a tinulongan ni Jehova dagiti nagkauna a matalek nga adipenna tapno maparmekda dagiti kabusorda, matulongannaka met tapno mapagballigiam ti aniaman a lapped a sanguem. Gapuna, ipapusom dagiti sasao ni Jehova babaen ken propeta Isaias: “Dika agbuteng, ta addaak kenka. Dika agtalangkiaw, ta siak ti Diosmo. Patibkerenkanto. Pudno a tulongankanto. Pudno nga itultuloykanto nga iggaman a siiirut babaen ti bukodko a makannawan nga ima ti kinalinteg.”​—Isaias 41:10.

[Footnotes]

[Dagiti Ladawan iti panid 16]

Kas kada Stanley Ombeva (ngato) ken Herbert Jennings (kannawan), adu ti situtured nga agserserbi ken Jehova

[Picture Credit Line iti panid 14]

Retrato manipud USAF