Makaparegta ti Pammatina
IDI naipasngay ni Silvia idi Disiembre 1992, agparang a nakasalsalun-at. Ngem idi agtawen iti dua, naduktalan nga addaan ni Silvia iti cystic fibrosis, di maagasan a sakit nga in-inut a mangapektar iti pagangsan ken pagrunawan. Tapno madaeranna ti sakitna, agtomar ni Silvia iti 36 a pildoras iti inaldaw, agsul-oy iti agas, ken maipasidong iti physical therapy. Yantangay 25 porsiento laeng ti kapasidad ti barana no idilig iti normal, masapul a kanayon a nakakonektar kenkuana ti tangke ti oksihena, uray no rummuar daytoy.
“Ngem maapresiar unay no kasano a sarsarangten ni Silvia ti sakitna,” kuna ni Teresa a nanangna. “Nabileg ti pammatina gapu iti pannakaammona iti Kasuratan. Daytoy a pammati ti tumultulong kenkuana a mangdaer iti leddaang ken pakarigatanna. Malaglagipna a kanayon ti kari ni Jehova a baro a lubong, a sadiay umimbagto amin a masakit.” (Apocalipsis 21:4) No adda dagiti gundaway a maup-upay ti pamiliana, sumalibukag ti riknada no makitada ti naragsak nga isemna. Kunana kadagiti nagannak ken kakabsatna: “Ti biag idiay baro a lubong ti mangsukatto iti amin a sagsagabaentayo ita.”
Regular nga iranranud ni Silvia ti naimbag a damag ti Sao ti Dios, ket dagiti makapatangna madlawda ti ragsak iti rupana. Dagiti kameng ti Nakristianuan a kongregasion a pakigimgimonganna idiay Canary Islands apresiarenda met unay dagiti komentona ken ti pannakipasetna. Ken kada malpas ti gimong, kaykayat ni Silvia ti agpapaudi tapno makasaritana dagiti Kristiano a kakabsatna. Ni Silvia ket maipatpateg iti kongregasion gapu iti mannakigayyem ken naragsak a personalidadna.
“Adda napateg a leksion a maadaltayo ken ni Silvia,” kuna ni Antonio a tatangna. “Uray no adda parikuttayo, rumbeng nga apresiarentayo ti biag agsipud ta insagut ti Dios dayta.” Kas ken ni Silvia, amin nga adipen ti Dios—agtutubo man wenno nataengan—sigagagar nga urayenda ti tiempo inton “awanto ti agtataeng nga agkuna: ‘Masakitak.’”—Isaias 33:24.
[Ladawan iti panid 31]
Iranranud ni Silvia ti maysa a teksto ti Biblia bayat nga iggem ni nanangna ti tangke ti oksihena