Mabalinmo ti Agbiag nga Agnanayon

KAADUAN a pasurot dagiti relihion ditoy lubong ipatpategda ti namnama a biag nga agnanayon. Kadagiti nadumaduma a relihion, mabalin nga agduduma dagiti detalyena, ngem maymaysa ti segseggaanda​—ti naragsak a panagbiag iti nasayaat a kasasaad nga awanan panagamak iti ipapatay. Dayta kadi met ti tartarigagayam? Apay a nakasaksaknap ti kasta a pammati? Maragpatto ngata ti namnama a biag nga agnanayon?

Ipakita ti Kasuratan a ti Namarsua insaadna iti panunot ti tao ti tarigagay nga agbiag nga agnanayon sipud pay idi punganay, idi pinarsuana ti immuna a pagassawaan. “Ti tiempo a di nakedngan insaad [ti Dios] iti pusoda,” kuna ti Biblia.​—Eclesiastes 3:11.

Ngem tapno matungpal dayta a tarigagay nga agbiag nga agnanayon, masapul idi a ti umuna a pagassawaan agpasakupda iti autoridad ti Dios a mangikeddeng no ania ti naimbag ken dakes. No inaramidda dayta, imbilang koma ida ni Jehova a maikari iti biag “agingga iti tiempo a di nakedngan” iti pagtaengan nga insaganana para kadakuada, ti minuyongan ti Eden.​—Genesis 2:8; 3:22.

Napukaw ti Biag nga Agnanayon

Ipakita ti rekord ti Biblia nga immula ti Dios iti minuyongan “ti kayo ti pannakaammo iti naimbag ken dakes,” ken imparitna a kanen da Adan ken Eva ti bunga dayta, di la ket ta matayda. (Genesis 2:9, 17) No saan a mangan da Adan ken Eva iti bunga dayta a kayo, ipakitana a bigbigenda ti autoridad ti Dios. Ngem no manganda iti dayta, ipakitana a laksidenda ti autoridad ti Dios. Sinukir da Adan ken Eva ti bilin ni Jehova ket nakidasigda ken Satanas, maysa nga espiritu a parsua nga immalsa maibusor iti autoridad ti Dios. Nagbanaganna, inkeddeng ti Dios a saan a maikari da Adan ken Eva nga agbiag nga agnanayon.​—Genesis 3:1-6.

Biag wenno ipapatay ti intukon ti Dios. Gapu iti panaglabsingda, naan-anay a naggibus ti biagda. Imposible nga agtultuloy nga agbiag da Adan ken Eva wenno dagiti annakda babaen ti maysa a kita ti namilagruan nga agas wenno kas maysa nga imortal a kararua.a

Nagsagaba ti amin nga annak ni Adan gapu iti iyaalsana. Inlawlawag ni apostol Pablo dagiti nagbanaganna. Kastoy ti insuratna: “Babaen iti maysa a tao simrek ti basol iti lubong ken ti ipapatay babaen iti basol, ket iti kasta ti ipapatay nagsaknap iti amin a tattao agsipud ta nagbasolda amin.”​—Roma 5:12.

Naisubli ti Biag nga Agnanayon

Inladawan ni apostol Pablo ti kasasaad dagiti annak ni Adan babaen ti panangipadisna iti dayta iti maysa nga adipen idi umuna a siglo. Gapu iti natawid a basol, di maliklikan a dagiti annak da Adan ken Eva ket maipasngay nga ‘ad-adipen iti basol,’ a naikeddeng a matay. (Roma 5:12; 6:16, 17) Di maliklikan dayta, no saan a gapu iti legal a pamuspusan nga impaay ni Jehova a manggatang iti pannakawayawaya dagita nga adipen. Inlawlawag ni Pablo: “No kasano a babaen ti maysa a labsing [ti panaglabsing ni Adan] pannakakondenar ti imbungana iti amin a kita ti tattao, kasta met a babaen ti maysa nga aramid a panangpalinteg imbungana iti amin a kita ti tattao ti pannakaideklarada a nalinteg maipaay iti biag.” Dayta nga “aramid a panangpalinteg” kinalikagumanna ti panangisakripisio ni Jesus iti perpekto a natauan a biagna kas “katupag a subbot nga agpaay iti isuamin.” Binigbig ni Jehova ti legal a bileg ti subbot a mangwayawaya iti sangatauan manipud iti “pannakaukom” iti “pannakakondenar.”​—Roma 5:16, 18, 19; 1 Timoteo 2:5, 6.

Dayta ti makagapu nga uray ania nga eksperimento ti aramiden dagiti sientista mainaig iti gene ti tao, didanto pulos masarakan ti solusion no kasano a magun-odan ti awan inggana a biag. Adda sabali a pakasarakan iti solusion. Sigun iti Biblia, ti kangrunaan a rason a matmatay ti tao ket saan a maigapu iti pisikal a depekto no di ket mainaig dayta iti moralidad ken hustisia. Adda linteg a naannurot idi indaton ni Jesus ti biagna kas subbot tapno maisubli ti biag nga agnanayon. Ti subbot iparangarangna met ti kinalinteg ti Dios ken ti naayat a kinamanangngaasina. Siasino ngarud dagiti magunggonaan manipud iti subbot ken umawat iti biag nga agnanayon?

Ti Sagut nga Imortalidad

Ni Jehova a Dios ket ‘manipud iti tiempo a di nakedngan agingga iti tiempo a di nakedngan.’ Isu ket imortal. (Salmo 90:2) Ni Jesu-Kristo ti immuna a persona nga inikkan ni Jehova iti sagut nga imortalidad. Kastoy ti inlawlawag ni apostol Pablo: ‘Ita ta naibangonen ni Kristo manipud kadagiti natay, saanen a matay; ti ipapatay saanen nga agturay kenkuana.’ (Roma 6:9) Wen, idi pinagduma ni Pablo ti napagungar a ni Jesus ken dagiti agtuturay iti daga, tinukoyna ni Jesus kas ti kakaisuna nga agik-ikut iti imortalidad. Ni Jesus agtalinaedto a “sibibiag iti agnanayon.” Ti biagna “di madadael.”​—Hebreo 7:15-17, 23-25; 1 Timoteo 6:15, 16.

Ngem saan laeng a ni Jesus ti kakaisuna a maikkan iti kasta a sagut. Dagiti Kristiano a napulotan iti espiritu ken napili a makipagturay kas ar-ari iti nailangitan a dayag umawatda met iti panagungar a kas ken Jesus. (Roma 6:5) Impakita ni apostol Juan a naited daytoy a pribilehio kadagiti 144,000 nga indibidual. (Apocalipsis 14:1) Umawatda met iti imortalidad. Maipapan iti panagungarda, kastoy ti kuna ni Pablo: “Ti lasag ken dara saanda a mabalin a tawiden ti pagarian ti Dios . . . Aguninto ti trumpeta, ket dagiti natay maibangondanto a di agrupsa, ket mabaliwantayto. Ta daytoy nga agrupsa masapul nga agkawes iti di panagrupsa, ket daytoy a mortal masapul nga agkawes iti imortalidad.” Awan ti pannakabalin ti ipapatay kadagidiay umawat iti kasta a panagungar.​—1 Corinto 15:50-53; Apocalipsis 20:6.

Talaga a nakaskasdaaw daytoy nga impalgak ti Dios. Uray dagiti anghel, nupay espirituda saanda a naparsua nga imortal. Paneknekan daytoy ti kinapudno a mapapatayto dagiti immalsa nga espiritu a parsua a nakikadua ken Satanas. (Mateo 25:41) Iti kasumbangirna, dagiti makipagturay ken Jesus awatenda ti sagut nga imortalidad, a pammaneknek a naan-anay nga agtalek ni Jehova iti kinasungdoda.

Kayatna kadi a sawen a 144,000 laeng nga indibidual, a nagbassit a bilang no idilig iti nagadu a nagbiag a tattao, ti agbiag nga agnanayon? Saan. Kitaentayo no apay.

Biag nga Agnanayon iti Paraiso a Daga

Ti libro ti Biblia nga Apocalipsis mangiparang iti nagpintas a buya dagiti di mabilang a tattao a naikkan iti biag nga agnanayon iti paraiso a daga. Karaman kadagitoy dagidiay natay ngem napagungar ken naisubli ti salun-at ken pigsada a kas idi agtutuboda pay. (Apocalipsis 7:9; 20:12, 13; 21:3, 4) Naiturongda iti “maysa a karayan ti danum ti biag, nalitnaw a kas kristal, nga agay-ayus manipud iti trono ti Dios.” Iti igidna, adda “kaykayo ti biag . . . , ket ti bulbulong dagiti kayo agpaayda iti pannakaagas dagiti nasion.” Kastoy ti naasi nga awis ni Jehova a Dios: “Ti asinoman a mawaw umay koma; ti asinoman a mayat awatenna koma ti danum ti biag nga awan bayadna.”​—Apocalipsis 22:1, 2, 17.

Dagitoy a kayo ken danum saanda a namilagruan nga agas a mangpaunday iti biag wenno ubbog ti kinaagtutubo kas kadagidiay birbiroken dagiti alchemist (dagiti agbirbirok iti pamay-an no kasano a mapaunday ti biag) ken dagiti agsuksukisok. Imbes ketdi, isimboloda dagiti probision ti Dios babaen ken Jesu-Kristo a mangisubli iti naan-anay a kasasaad ti sangatauan idi punganay.

Saan a nagbalbaliw ti panggep ti Dios a mangted iti biag nga agnanayon iti natulnog a sangatauan. Matungpalto dayta a panggep, ta mapagtalkan ni Jehova. Kastoy ti kuna ti Salmo 37:29: “Dagiti nalinteg tagikuaendanto ti daga, ket agtaengdanto nga agnanayon iti dayta.” Daytoy a kari tignayennatayo, agraman dagidiay paset ti sangatauan a naikkan iti imortalidad idiay langit, a mangiwaragawag: ‘Naindaklan ken nakaskasdaaw dagiti aramidmo, Jehova a Dios, ti Mannakabalin-amin. Nalinteg ken napudno dagiti dalanmo, Ari ti kinaagnanayon. Siasinonto a talaga ti saan nga agbuteng kenka, Jehova, ken mangpadayag iti naganmo, agsipud ta siksika ti nasungdo?’​—Apocalipsis 15:3, 4.

Tarigagayam kadi dayta nagpateg a sagut nga biag nga agnanayon? No kasta, paneknekam a nasungdo ken natulnogka iti “Ari ti kinaagnanayon.” Masapul nga ammuem ti maipapan ken Jehova ken ni Jesu-Kristo, daydiay babaen kenkuana nagbalin a posible ti kasta a biag. Maikkan iti sagut nga “agnanayon a biag” ti amin a situtulok a mangbigbig kadagiti pagalagadan ti Dios iti naimbag ken dakes.​—Juan 17:3

[Footnote]

[Kahon/Ladawan iti panid 5]

Manayon nga Arapaap

Ti naipagarup a naputar idi maikadua a milenio K.K.P. nga atiddog a Daniw ni Gilgamesh, a maysa a masirib a taga-Mesopotamia, dineskribirna ti panagsapsapul ti maysa a bannuar iti agnanayon a kinaagtutubo. Dagiti nagkauna nga Egipcio, a mamati nga imortal ti kararua, embalsamarenda dagiti minatayda. Patienda ngamin a mabalin nga usarento manen ti kararua ti bangkayna. Gapuna, dadduma a tanem dagiti Egipcio ti napno kadagiti bambanag a mabalin kano nga usaren dagiti natay bayat ti panagbiagda iti sabali a lubong.

Kadagiti Tsino nga alchemist, agparang nga idi pay la maikawalo a siglo K.K.P. a mamatida nga imortal ti bagi, ken nalabit idi maikapat a siglo K.K.P. namatida a ti bagi agbalin nga imortal babaen iti karkarna nga inumen. Dagiti Europeo idi Edad Media ken dagiti Arabo nga alchemist binirbirok ken pinadasda ti mangaramid iti bukodda nga inumen a mangpaunday iti biag. Dadduma kadagitoy ti addaan kadagiti arsenic, mercury, ken asupre. Awan ti makaammo no mano ti nasabidongan gapu iti pananginumda kadagitoy!

Adda idi tiempo a nasaknap met dagiti sarsarita maipapan iti makuna nga Ubbog ti Kinaagtutubo​—ti ubbog a mangisubli kano iti pigsa ti amin nga uminum iti dayta.

[Kahon/Dagiti Ladawan iti panid 7]

Biag nga Agnanayon​—Makauma?

Ikalintegan ti dadduma a mabalin a makauma ti biag nga agnanayon, a dayta ti kasla panangbusbos laeng iti kinaagnanayon kadagiti awan mamaayna a maulit-ulit a dibersion. Nalabit pampanunotenda a ti kinaagnanayon ket awan inggana a panangpaunday iti agdama a kasasaad ken estilo ti panagbiag a para iti dadduma kasla makauma ken awan ti mamaayna. Ngem, iti Paraiso nga isubli ti Dios, inkarina iti tao ‘ti napalalo a ragsak iti kinaruay ti talna.’ (Salmo 37:11) Babaen ti kasta a biag, addaanto gundaway ti sangatauan a manggun-od iti pannakaammo kadagiti pinarsua ni Jehova ken mangbusbos iti adu a tiempo a mangaramid iti aniaman wenno amin a makaparagsak a paglaingan, panagadal, ken trabaho a mabalin nga arapaap laeng iti kaaldawantayo.

Ni Dr. Aubrey de Grey, a maysa a geneticist (espesialista iti panagadal no kasano a maipatawid ti kababalin) idiay Cambridge University, a nangadal no kasano a mapaunday ti biag, kinunana: “Dagiti tattao a nangato ti adalda ken addaan iti tiempo a mangusar iti dayta, pulos a dida mauma ita ket saanda a maibusan kadagiti baro a bambanag a kayatda nga aramiden.” Kasta met, kuna ti naipaltiing a Sao ti Dios, ‘ti sangatauan saannanto a pulos a masarakan ti aramid nga inaramid ti pudno a Dios manipud pangrugian agingga iti pagnguduan.’​—Eclesiastes 3:11.