Naragsak nga Aguray ken Jehova
NAPADASANYO kadin ti nangan iti naata a prutas? Awan duadua a dikay nagustuan ti ramanna? Saan a dagus a maluom ti prutas, ngem naim-imas no urayen a maluom dayta. Adda pay dadduma a kasasaad a makagunggona ti panaguray. “Naimbag a ti maysa aguray, uray siuulimek, iti panangisalakan ni Jehova,” kuna ti Biblia. (Un-unnoy 3:26; Tito 2:13) Kadagiti ania a pamay-an a masapul nga aguray dagiti Kristiano ken Jehova? Kasano a pagimbagantayo ti panaguray kenkuana?
Panaguray iti Dios—Ania ti Ramanenna?
Kas Kristiano, ‘ur-urayen ken agtaltalinaedtayo a silalagip iti kaadda ti aldaw ni Jehova.’ Mangnamnamatayo a mabang-arantayo inton ‘dadaelenna dagiti di nadiosan a tattao.’ (2 Pedro 3:7, 12) Ni Jehova a mismo kayatnan a pagpatinggaen ti amin a kinadakes, ngem agur-uray tapno maisalakanna dagiti Kristiano iti wagas a pakaidayawan ti naganna. Kuna ti Biblia: “Ti Dios, nupay pagayatanna nga iparangarang ti pungtotna ken ipakaammo ti pannakabalinna, buyogen iti kasta unay a mabayag a panagitured nangpanuynoy kadagiti basehas ti pungtot a naaramid a maikari iti pannakadadael, tapno maipakaammona ti kinabaknang ti dayagna kadagiti basehas ti asi.” (Roma 9:22, 23) Kas iti inaramidna idi kaaldawan ni Noe, ammo ni Jehova no kaano ti kasayaatan a tiempo tapno isalakanna ti ilina ita. (1 Pedro 3:20) Gapuna, ti panaguray iti Dios ramanenna ti panaguray iti tiempo a panagtignayna.
Bayat nga ur-urayentayo ti aldaw ni Jehova, mabalin a maupaytayo a makakita a bumabbaba ti moral a pagalagadan ti lubong. Kadagita a gundaway, nasayaat nga utobentayo dagiti sasao ni Mikias a propeta ti Dios: “Daydiay nasungdo napukaw iti daga, ket iti sangatauan awan ti nalinteg.” Kalpasanna, innayonna: “Ngem no maipapan kaniak, ken Jehova nga agtultuloyakto nga agsiput. Ipakitakto ti panagur-uray iti Dios ti pannakaisalakanko.” (Mikias 7:2, 7) Ania a “panagur-uray” ti masapul a patanorentayo? Tangay masansan a makapaupay ti aguray, kasano nga agbalintayo a naragsak bayat nga ur-urayentayo ti Dios?
Naragsak Bayat nga Agur-uray
Makasursurotayo ken ni Jehova maipapan iti umiso a kababalin. “Naragsak a Dios” ni Jehova. (1 Timoteo 1:11) Naragsak bayat nga agur-uray agsipud ta agtultuloy nga agtartrabaho agingga a matungpal ti orihinal a panggepna nga agbiag a perpekto dagiti tattao a mangay-ayat kenkuana. (Roma 5:12; 6:23) Makitana dagiti makaay-ayo a resulta ti trabahona—minilion a tattao ti dimmasig iti pudno a panagdayaw. Kinuna ni Jesus: “Ni Amak agtultuloy nga agar-aramid agingga ita, ket agtultuloyak nga agar-aramid.” (Juan 5:17) Naragsak daydiay mangar-aramid iti maysa a banag agpaay iti sabsabali. (Aramid 20:35) Kasta met, saan nga agur-uray lattan dagiti pudno a Kristiano nga awan ti ar-aramidenda, no di ket, agtultuloy a tulonganda dagiti sabsabali a mangammo iti panggep ti Dios para iti sangatauan.
Dagiti matalek a tattao kontentoda a mangidaydayaw iti Dios bayat nga ur-urayenda ti panagtignayna. Usigenyo kas pagarigan ni salmista a David. Isu ket indadanes ti ari, liniputan ti maysa a nasinged a kaduana, ken ginuliban ti anakna. Kadagitoy a kasasaad, mabalin kadi nga agragsak ni David bayat nga ur-urayenna ti bang-ar nga iyeg ni Jehova iti umiso a tiempo? Kastoy ti kuna ti Salmo 71, a nalawag nga insurat ni David: “No maipapan kaniak, agurayakto a patinayon, ket nayonakto ti isuamin a pakaidaydayawam. Ti bukodko a ngiwat ibinsabinsananto ti kinalintegmo, iti intero nga agmalem ti panangisalakanmo.” (Salmo 71:14, 15) Imbes a natektekan, nagrag-o ni David agsipud ta okupado a mangidaydayaw ken ni Jehova ken mangpabpabileg kadagiti dadduma iti pudno a panagdayaw.—Salmo 71:23.
Ti panaguray ken ni Jehova ket saan a kas iti makapaksuy a panaguray iti naladaw a bus. Imbes ketdi, mayarig dayta iti naragsak a panaguray dagiti nagannak bayat a dumakdakkel ken agmatmataengan ti anakda a mabalin a maipagpannakkeldanto. Okupadoda iti adu a tawen a mangsansanay, mangisursuro, ken mangdisdisiplina tapno nasayaatto ti pagbanaganna. Kasta met, datayo nga agur-uray ken Jehova maragsakantayo a tumulong iti sabsabali nga umadani iti Dios. Kayattayo met a magun-odan ti anamong ti Dios ken, kamaudiananna, ti pannakaisalakan.
Ditay Maawanan iti Namnama
Ti panaguray ken Jehova kaipapananna ti agtultuloy a panangayat ken panagserbi kenkuana a di maawanan iti namnama. Mabalin a narigat daytoy. Adu nga adipen ti Dios ita ti agbibiag kadagiti komunidad a manglalais iti asinoman a mamati kadagiti kari ti Dios. Ngem usigenyo ti pagwadan dagiti matalek nga Israelita a nagtalinaed a siiinanama bayat ti 70 a tawen a pannakaidestiero idiay Babilonia. Ania ti nakatulong kadakuada? Nalawag a nakapabileg kadakuada ti panangbasbasada kadagiti salmo. Kastoy ti kuna ti maysa a makaparegta a salmo a mabalin a naisurat iti daydi a tiempo: “Iti saona nagurayak. Ti kararuak naguray ken Jehova ad-adda ngem kadagiti managwanawan iti bigat, nga agpadpadaan iti bigat. Ti Israel agtultuloy koma nga aguray ken Jehova.”—Salmo 130:5-7.
Gapu ta sinalimetmetan dagiti Judio ti namnamada babaen ti panagbasa ken panangisaritada iti dayta, nagunggonaanda idi a dagiti rimmaut pinarmekda ti Babilonia. Rinibu a matalek a Judio ti dagus a napan idiay Jerusalem. Kastoy ti naisurat maipapan iti dayta a tiempo: “Idi inummong nga insubli ni Jehova dagidiay kautibo ti Sion, . . . napno ti ngiwattayo iti katawa.” (Salmo 126:1, 2) Saan a naawanan iti namnama dagidiay a Judio, no di ket intultuloyda a pinabileg ti pammatida. Ket saanda a pulos a nagsardeng a nagkanta iti panangidaydayaw ken ni Jehova.
Uray ita, dagiti pudno a Kristiano nga agur-uray iti Dios bayat “ti panungpalan ti sistema ti bambanag” kanayon nga ikagkagumaanda a salimetmetan ti pammatida. Adalenda ti Sao ti Dios, agpipinnabilegda, ken itultuloyda nga idaydayaw ni Jehova babaen ti panangikasaba iti naimbag a damag ti Pagarianna.—Mateo 24:3, 14.
Pananguray iti Gunggona nga Iyeg ti Disiplina
Insurat ni Jeremias a mammadto ti Dios: “Naimbag a ti maysa aguray, uray siuulimek, iti panangisalakan ni Jehova.” (Un-unnoy 3:26) Kayat a sawen ni Jeremias a nasaysayaat no liklikan ti ili ti Dios ti agreklamo maipapan iti wagas a panangdisiplina ni Jehova kadakuada idi impalubosna a madadael ti Jerusalem. Imbes ketdi, makasursuroda koma iti dayta a kapadasan babaen ti panangutobda iti panagsukirda ken ti kinapateg ti panangbalbaliwda iti kababalinda.—Un-unnoy 3:40, 42.
Ti pagimbagan nga iyeg ti disiplina ni Jehova ket mayarig iti panagbalin a natangkenan ti maysa a bunga. Kastoy ti kuna ti Biblia maipapan iti disiplina manipud iti Dios: “Kadagidiay a nasanayen iti dayta mangpataud iti natalna a bunga, awan sabali, ti kinalinteg.” (Hebreo 12:11) No kasano a kasapulan ti tiempo tapno maluom ti bunga, masapul met ti tiempo tapno mabalbaliwantayo dagiti kababalintayo maitunos iti panangsanay ti Dios. Kas pagarigan, no mapukawtayo ti dadduma a pribilehiotayo iti kongregasion gapu iti di umiso a kababalintayo, saantayo a maupay wenno sumardeng no situtuloktayo nga aguray iti Dios. Kadagita a kasasaad, makaparegta dagiti naipaltiing a sasao ni David: “Ti kaadda iti sidong ti unget [ti Dios] ket apagkanito, ti kaadda iti sidong ti naimbag a nakemna ket bayat ti panagbiag. Iti rabii mabalin nga agtaeng [wenno agpaut] ti panagsangit, ngem iti bigat adda narag-o nga ikkis.” (Salmo 30:5) No aguray ken iyaplikartayo dagiti balakad ti Sao ti Dios ken ti organisasionna, dumtengto ti panawen nga ‘agikkistayo iti rag-o.’
Ti Panagmataengan Kalikagumanna ti Tiempo
No agtutubokayo wenno nabiitkay pay a nabautisaran, mabalin a magagarankayo a maaddaan iti annongen iti kongregasion Kristiano. Ngem agkalikagum iti tiempo sakbay a mapatanor ti naespirituan a kinanataengan tapno maibaklay dagita nga annongen. Ikagumaanyo ngarud ti agbalin a naespirituan a tao bayat ti kinaagtutuboyo. Kas pagarigan, ti kinaagtutubo ket nagsayaat a panawen tapno basaen ti intero a Biblia, patanoren dagiti Nakristianuan a kababalin, ken sursuruen ti kinasigo a mangaramid kadagiti adalan. (Eclesiastes 12:1) Dumtengto ti tiempo nga ikkannakayo ni Jehova iti ad-adu nga annongen no sipapakumbaba nga aguraykayo.
Agkalikagum met iti panaganus ti panagaramid iti adalan. No kasano nga agtultuloy nga agsibug ti mannalon agingga a ti Dios pagtubuenna ti bukel, kasta met iti trabaho a panagaramid iti adalan. (1 Corinto 3:7; Santiago 5:7) Masapul ti adu a bulan wenno tawen a panangyadal iti Biblia sakbay a mapatanor ti pammati ken panangapresiar ken Jehova iti puso dagiti sabsabali. Ti panaguray ken Jehova ramanenna ti panagporsegi uray pay no saan a dagus nga iyaplikar dagiti estudiante dagiti maad-adalda. No mangipakitada iti uray bassit laeng a panangapresiar, mabalin a pagilasinan dayta nga ipangpangagda ti espiritu ni Jehova. No aganuskayo, maragsakankayto a makakita iti iyad-adalanyo nga agbalin nga adalan ni Kristo.—Mateo 28:20.
Panangyebkas iti Ayat Babaen ti Panaguray
Tapno maawatam no apay a ti panaguray ket ebkas ti panagayat ken panagtalek, usigem ti kasasaad ti maysa a baket nga agnanaed iti desierto ti Andes, iti Abagatan nga America. Duada laeng a Saksi ni Jehova iti barioda. Mapanunotyo kadi no kasano ti panangseggada iti isasarungkar dagiti padada a Kristiano? Naminsan, nayaw-awan ti maysa nga agdaldaliasat a manangaywan idi damo a bumisita kadakuada. Masapul nga agsubli iti naggapuanna tapno masurotanna ti dalanna isu a sumagmamano nga oras a naladaw. Pumarbangonen idi masaripatpatanna ti bario. Tangay awan ti koriente iti lugar, nasdaaw a makakita iti silaw. Anian a ragsakna idi sumreken iti bario ket nakitana ti lawag ti lampara nga itagtag-ay ti baket! Masiguradona a sumangpet ti manangaywan, isu nga inur-urayna.
Maragsakantayo met nga aguray ken Jehova buyogen ti kasta a panaganus. Masiguradotayo a tungpalenna dagiti karina. Ket kas iti dayta nga agdaldaliasat a manangaywan, apresiarentayo dagidiay siaayat nga aguray kadatayo. No kasta, saan a nakaskasdaaw nga apresiaren ti Dios dagidiay agur-uray kenkuana. Kuna ti Biblia: “Ni Jehova makasarak iti ragsak . . . kadagidiay agur-uray iti naayat a kinamanangngaasina.”—Salmo 147:11.
[Ladawan iti panid 18]
Dagiti tattao nga okupado a mangidaydayaw iti Dios maragsakanda nga aguray ken Jehova