Praktikal Kadi Pay Laeng ti “Daan a Tulag”?
IDI 1786, maysa a mangngagas a Pranses ti nangipablaak iti libro a napauluan iti Traité d’anatomie et de physiologie (Pannakailawlawag ti Anatomia ken Pisiolohia). Idi a tiempo, maibilang dayta a kas ti kauumisuan a libro maipapan iti pakabuklan ti utek, ken manmano laeng a kopia ti nabiit pay a nailako iti nasurok a 27,000 a doliar! Nupay kasta, manmano a pasiente ita ti agtalek kadagiti siruhano nga agus-usar iti dayta a daan unayen a libro maipapan iti medisina. Para iti maysa a masakit a tao ita, saan a makatulong ti kinadaan ken kinapintas ti pannakaisurat ti kasta a libro.
Kasta met ti panangmatmat ti adu a tattao maipapan iti maaw-awagan a Daan a Tulag. Mabigbigda ti pateg ti salaysayenna a pakasaritaan ti Israel ken apresiarenda ti naindaniwan a pannakaisuratna. Ngem dida patien a praktikal a suroten ti maysa a giya a nasurok a 2,400 ti tawennan. Naiduma unay itan ti pannakaammo iti siensia, komersio, ken uray iti kabibiag ti pamilia no idilig idi naisurat ti Biblia. Ni Philip Yancey, dati nga editor ti Christianity Today, insuratna iti librona a The Bible Jesus Read: “Saan a kanayon a lohikal ti Daan a Tulag, ken no lohikal man, makasair dayta kadagiti tattao ita. Gapu kadagitoy ken iti dadduma pay a rason, manmano la itan ti mangbasa iti Daan a Tulag, a mangbukel iti tallo a kakapat ti Biblia.” Saanen a baro dayta a panangmatmat.
Awan pay 50 a tawen kalpasan ti ipapatay ni apostol Juan idi agarup 100 K.P., maysa a nabaknang nga agkabannuag nga agnagan iti Marcion ti nangisuro a nasken a laksiden dagiti Kristiano ti Daan a Tulag. Sigun iti Ingles a historiador a ni Robin Lane Fox, inkalintegan ni Marcion a ti “‘Dios’ iti Daan a Tulag ket maysa a ‘napeklan a panatiko’ a manganamong kadagiti tulisan ken kadagiti terorista a kas ken Ari David iti Israel. Iti kasumbangirna, ni Kristo ti nagparang a baro a natantan-ok a Dios.” Insurat ni Fox a dagitoy a patpatien ti “nagbalin a ‘Marcionismo’ ken nagtultuloy a nakaallukoy kadagiti pasurot, nangnangruna kadagiti Siriac ti pagsasaoda a taga-Daya, agingga idi maikapat a siglo.” Agingga ita, adda pay laeng dagiti mangan-annurot kadagita a patpatien. Nagbanaganna, nasurok a 1,600 a tawenen ti napalabas, insurat ni Philip Yancey, “dagiti Kristiano bumasbassiten ti pannakaammoda iti Daan a Tulag ken agparang nga awanen dagita iti moderno a kagimongan.”
Nasukatan kadin ti Daan a Tulag? Kasano a mapagtunostayo dagiti sasao a “ni Jehova ti buybuyot” iti Daan a Tulag ken ti “Dios ti ayat ken ti talna” iti Baro a Tulag? (Isaias 13:13; 2 Corinto 13:11) Makagunggona kadi kadakayo ti Daan a Tulag?