Birokem ti Makagunggona a Panggep ti Biag
“Tunggal agang-anges a banag—idaydayawna koma ni Jah.”—SALMO 150:6.
1. Isalaysayyo no kasano a binirok ti maysa a lalaki ti makagunggona a panggep ti biag.
“NAGADALAK iti kinadoktor ta kayatko nga usaren ti biagko a tumulong kadagiti tattao. Pampanunotek a naragsakakto no maysaakon a doktor gapu iti dayaw ken kinabaknang nga itdenna kaniak,” kuna ni Seung Jin, a dimmakkel idiay Korea.a “Ngem naupayak idi makitak a bassit la gayam ti maitulong ti panagbalin a doktor. Nangalaak iti kurso mainaig iti panagbalin a pintor, ngem nakitak a nagbassit ti maitulongna kadagiti sabsabali, ken kasla ti laeng pagragsakak ti pampanunotek. Nagadalak manen iti kinamaestro ket naamirisko a makayallatiwak laeng iti impormasion ngem saanak a makaipaay iti giya a mangyeg iti pudno a kinaragsak.” Adu ti kas ken Seung Jin nga agbirbirok iti makagunggona a panggep ti biag.
2. (a) Kasanotayo a maaddaan iti panggep ti biag? (b) Kasanotayo nga ammo nga adda panggep ti Dios a nangparsua kadatayo?
2 Tapno maaddaantayo iti pudno a panggep ti biag, masapul nga addaantayo iti rason nga agbiag, nalawag a kalat, ken adda nakaisentruan dagiti panagreggettayo. Mabalin kadi a maaddaan dagiti tattao iti kasta a panggep? Wen! Naparsuatayo nga addaan iti sirib, konsiensia, ken pannakaawat. Dayta ti mangipakita nga adda nasayaat a panggep ti Dios a nangparsua kadatayo. No kasta, mabirokan ken maragpattayo ti pudno a panggep ti biag no agbiagtayo a maitunos iti panggep ti Namarsua.
3. Ania ti ramanen ti panggep ti Dios agpaay kadagiti tattao?
3 Sigun iti Biblia, adu ti ramanen ti panggep ti Dios agpaay kadatayo. Kas pagarigan, ti nagsayaat a pannakaaramidtayo ipakitana a naan-anay ti panagayat kadatayo ti Dios. (Salmo 40:5; 139:14) Gapuna, masapul a naan-anay nga ayatentayo dagiti sabsabali a kas iti panagayat ti Dios kadakuada. Iti kasta, makapagbiagtayo a maitunos iti panggep ti Dios. (1 Juan 4:7-11) Masapul met a tungpalentayo dagiti bilinna, a tumulong kadatayo nga agbiag a maitunos iti naayat a panggepna.—Eclesiastes 12:13; 1 Juan 5:3.
4. (a) Ania ti kasapulan tapno maaddaantayo iti pudpudno a panggep ti biag? (b) Ania ti katan-okan a panggep a mabirokan ti asinoman?
4 Panggep met ti Dios a sangsangkamaysa nga agbiag a naragsak ken natalna dagiti tattao. (Genesis 1:26; 2:15) Ngem ania ti nasken nga aramidentayo tapno agbalintayo a naragsak, natalged, ken natalna? No kasano a naragsak ken natalged ti rikna ti ubing no kaduana dagiti nagannakna, maaddaan met ti biagtayo iti pudpudno a direksion ken panggep no addaantayo iti nasayaat a relasion iti nailangitan nga Amatayo. (Hebreo 12:9) Tagtagiragsakentayo ti kasta a relasion gapu ta ipalpalubos ti Dios a makaadanitayo kenkuana ken ipangpangagna dagiti kararagtayo. (Santiago 4:8; 1 Juan 5:14, 15) No ‘makipagnatayo iti Dios’ buyogen ti pammati ken agbalintayo a gayyemna, maparagsak ken maidaydayawtayo ti nailangitan nga Amatayo. (Genesis 6:9; Proverbio 23:15, 16; Santiago 2:23) Dayta ti katan-okan a panggep a mabalin a mabirokan ti asinoman. Insurat ti salmista: “Tunggal agang-anges a banag—idaydayawna koma ni Jah.”—Salmo 150:6.
Ania ti Panggep ti Biagmo?
5. Apay a saan a nainsiriban ti panangyun-una kadagiti material a kinabaknang?
5 Masapul nga aywanantayo a naimbag ti bagitayo ken ti pamiliatayo, a pakairamanan ti pisikal ken naespirituan a kasapulantayo. Paset dayta ti panggep ti Dios agpaay kadatayo. Gapuna, masapul nga agbalintayo a natimbeng tapno dagiti sekular a trabaho ken pakaseknantayo dida ringbawan dagiti napatpateg a naespirituan a kasapulantayo. (Mateo 4:4; 6:33) Nakalkaldaang ta adu a tattao ti nangisentro iti biagda iti pananggun-od kadagiti material a bambanag. Ngem saan a nainsiriban no padasentayo a penken ti amin a kasapulantayo babaen kadagiti material a bambanag. Sigun iti maysa a nabiit pay a surbey kadagiti milionario iti Asia, adu kadakuada ti “maburiboran ken di makarikna iti kinatalged, uray pay no nalatakda iti alta sosiedad ken nabaknangda.”—Eclesiastes 5:11.
6. Ania ti imbalakad ni Jesus maipapan iti pananggun-od kadagiti kinabaknang?
6 Dinakamat ni Jesus ti maipapan iti “makaallilaw a pannakabalin ti kinabaknang.” (Marcos 4:19) Kasano a makaallilaw dagiti kinabaknang? Mabalin a panunoten dagiti tattao a dayta ti mangparagsak kadakuada idinto ta saan met. Kinuna ti masirib a ni Ari Solomon: “Ti managayat laeng iti pirak saanto a mapnek iti pirak.” (Eclesiastes 5:10) Ngem posible kadi a paggiddanen dagiti materialistiko a kalat ken ti amin-kararua a panagserbi iti Dios? Saan. Kinuna ni Jesus: “Awan ti makabalin nga agpaadipen iti dua nga appo; ta mabalin a guraenna ti maysa ket ayatenna ti sabali, wenno agtalinaed iti maysa ket umsienna ti sabali. Saanyo a mabalin ti agpaadipen iti Dios ken iti Kinabaknang.” Indagadag ni Jesus kadagiti pasurotna a saanda nga agurnong kadagiti material a kinabaknang ditoy daga no di ket “kadagiti gameng idiay langit,” kayatna a sawen, maaddaanda iti naimbag a nagan iti imatang ti Dios a ‘makaammo no ania ti bambanag a kasapulantayo sakbay pay a dawatentayo kenkuana.’—Mateo 6:8, 19-25.
7. Kasano a ‘mapetpetantayo a sititibker ti pudpudno a biag’?
7 Iti suratna iti katrabahuanna a ni Timoteo, nangted ni apostol Pablo iti nainget a balakad mainaig iti daytoy a banag. Kinunana ken Timoteo: ‘Ibilinmo kadagidiay babaknang nga isadagda ti namnamada, saan nga iti pagduaduaan a kinabaknang, no di ket iti Dios, a sibabaknang a mangipaay kadatayo iti amin a bambanag a pagragsakantayo, nga agbalinda a naparabur, sisasagana a mangiranud, a sitatalged nga agurnongda maipaay iti bagbagida iti nasayaat a pamuon maipaay iti masanguanan, tapno mapetpetanda a sititibker ti pudpudno a biag.’—1 Timoteo 6:17-19.
Ania “ti Pudpudno a Biag”?
8. (a) Apay nga adu ti mangikagkagumaan a gumun-od iti kinabaknang ken dayaw? (b) Ania ti saanda a maamiris?
8 Iti panangmatmat ti kaaduan, “ti pudpudno a biag” ket daydiay nakanamnam-ay ken napno iti ragragsak. Kinuna ti maysa a pagiwarnak iti Asia: “Dagidiay agbuybuya iti pelikula wenno telebision arapaapenda a gun-oden ti mabuybuyada a nanam-ay a biag.” Pagbalinen ti adu a tattao kas kalatda ti pananggun-od iti kinabaknang ken dayaw. Adu ti mangisakripisio iti panawen ti kinaagtutuboda, salun-at, pamilia, ken naespirituan a prinsipioda tapno laeng magun-odda dagitoy a bambanag. Manmano ti makaamiris a dagita a mabuybuyada iti telebision ken pelikula ket mangyanninaw iti “espiritu ti lubong”—ti nasaknap a panagpampanunot a mangim-impluensia iti kaaduan a tattao ditoy daga ken mangtignay kadakuada nga agbiag a maikaniwas iti panggep ti Dios. (1 Corinto 2:12; Efeso 2:2) Saan a pakasdaawan nga adu ti saan a naragsak ita!—Proverbio 18:11; 23:4, 5.
9. Ania ti saan a pulos a maibanag dagiti tattao, ken apay?
9 Komusta met dagidiay agsaksakripisio a tumulong kadagiti dadduma, a mangikagkagumaan a mangikkat iti bisin, sakit, ken kinaawan hustisia? Adu met ti matultulonganda. Ngem iti laksid ti panangikagumaanda, didanto pulos mapagbalin a nalinteg ken makaay-ayo daytoy a sistema ti bambanag. Apay? Gapu ta “ti intero a lubong adda iti pannakabalin daydiay nadangkes”—ni Satanas—ket dina kayat a sumayaat ti kasasaadtayo.—1 Juan 5:19.
10. Kaano a matagiragsakto dagiti matalek “ti pudpudno a biag”?
10 Anian a nakalkaldaang no iti daytoy laeng agdama a lubong ti pangnamnamaan ti maysa! “No iti daytoy laeng a biag a nanginanamatayo ken Kristo, kadagiti amin a tattao datayo ti nakakaasi unay,” kinuna ni Pablo. “Mangan ken uminumtayo, ta inton bigat mataytayo.” Dayta ti panangmatmat dagiti tattao a mangipagarup a kastoy lattan ti biag. (1 Corinto 15:19, 32) Nupay kasta, adda namnama a “baro a langlangit ken baro a daga nga ur-urayentayo sigun iti kari [ti Dios], ket kadagitoy agtaeng ti kinalinteg.” (2 Pedro 3:13) Iti dayta a tiempo, matagiragsakto dagiti Kristiano “ti pudpudno a biag,” ti ‘agnanayon a perpekto a biag,’ idiay man langit wenno iti sidong ti naayat a panangituray ti Pagarian ti Dios!—1 Timoteo 6:12.
11. Apay a makagunggona ti panangyun-una kadagiti interes ti Pagarian ti Dios?
11 Ti laeng Pagarian ti Dios ti naan-anay a mangrisut kadagiti parikut ti sangatauan. Ngarud, ti panangyun-una kadagiti interes ti Pagarian ti Dios ti kasayaatan a kalat a mabalin a ragpaten ti asinoman. (Juan 4:34) No aramidentayo dayta, matagiragsaktayo ti naparaburan a relasion iti nailangitan nga Amatayo. Maaddaantayo met iti rag-o a makipagserbi kadagiti minilion a kakabsattayo, nga addaan iti agpapada a panggep ti biag.
Umiso a Panagsakripisio
12. Pagdumaenyo ti biag iti agdama a sistema ken “ti pudpudno a biag.”
12 Ti agdama a lubong ket “aglabas ken kasta met ti tarigagayna,” kuna ti Biblia. Awan ti maispal a paset ti lubong ni Satanas, agraman ti dayaw ken kinabaknangna, “ngem ti agaramid iti pagayatan ti Dios agtalinaed iti agnanayon.” (1 Juan 2:15-17) Mapukaw ti kinabaknang, agkupas ti dayaw, ken temporario dagiti ragragsak iti agdama a sistema. Ngem “ti pudpudno a biag”—ti biag nga agnanayon iti sidong ti Pagarian ti Dios—ket permanente ken maikari a pagreggetantayo no la ketdi ta umiso ti panagsakripisiotayo.
13. Kasano a nakaaramid ti maysa nga agassawa iti umiso a panagsakripisio?
13 Usigentayo da Henry ken Suzanne. Naan-anay nga agtalekda iti kari ti Dios a tulonganna ti amin a mangyun-una iti Pagarianna. (Mateo 6:33) Gapuna, inkeddengda ti agnaed iti simple a pagtaengan tapno imbes nga agtrabahoda a dua, ad-adu ti tiempoda nga agserbi iti Dios a kadua ti dua a babbalasangda. (Hebreo 13:15, 16) Maysa a maseknan a gayyemda ti nasdaaw iti dayta a pangngeddengda. Imbagana ken Suzanne: “No kayatmo ti agnaed iti nasaysayaat a pagtaengan, kissayam ti panawenmo kadagiti naespirituan a bambanag.” Ngem ammo da Henry ken Suzanne a gapu ta iyun-unada ni Jehova, manamnamada ti ‘naikari a biag ita ken daydiay umay.’ (1 Timoteo 4:8; Tito 2:12) Nagbalin a naregta a payunir dagiti babbalasangda. Kas pamilia, saanda a narikna a naikapisda iti aniaman; imbes ketdi, dakkel ti nagunggonada gapu ta pinagbalinda a kalat “ti pudpudno a biag.”—Filipos 3:8; 1 Timoteo 6:6-8.
Diyo ‘Usaren a Naan-anay ti Lubong’
14. Ania ti pagbanaganna no malipatantayo ti pudno a panggep ti biag?
14 Napeggad no malipatantayo ti pudno a panggep ti biagtayo ken lumukay ti panangpetpettayo iti “pudpudno a biag.” Posible a ‘mayaw-awantayo kadagiti pakaringgoran ken kinabaknang ken ragragsak daytoy a biag.’ (Lucas 8:14) Mabalin a masiluantayo iti daytoy sistema ti bambanag no nalabes ti panagtarigagaytayo kadagiti material a bambanag ken no ‘maringgorantayo unay iti pagbiagtayo.’ (Lucas 21:34) Nakalkaldaang ta dadduma ita ti nangipangpangruna iti pananggun-od iti kinabaknang ken ‘nayaw-awanda manipud iti pammati ket sinalputda ti intero a bagbagida iti adu nga ut-ot,’ a napukawda pay ti nagpateg a relasionda ken Jehova. Anian a nasayang a pribilehio gapu iti saanda a ‘panangpetpet a sititibker iti agnanayon a biag’!—1 Timoteo 6:9, 10, 12; Proverbio 28:20.
15. Kasano a nagunggonaan ti maysa a pamilia gapu ta ‘saanda a naan-anay nga inusar ti lubong’?
15 Imbalakad ni Pablo a “dagidiay mangus-usar iti lubong [agbalinda koma a] kas kadagidiay di mangus-usar a naan-anay iti dayta.” (1 Corinto 7:31) Inyaplikar dayta da Keith ken Bonnie. “Nagbalinak a Saksi ni Jehova idi dandaniak aggraduar iti kinadentista,” kuna ni Keith. “Mabalinko ti umawat iti adu a pasiente tapno ad-adu ti kuartak, ngem maapektaran met ti panagserbik iti Dios. Gapuna, inkeddengko a limitaran ti awatek a pasiente tapno ad-adu ti panawenko iti pamiliak ken iti panagserbimi iti Dios. Gapu ta bassit laeng ti urnongmi, nasursuromi ti agbadyet, ket dikami nagkurang iti kasapulan. Nasinged, agdidinnungngo, ken nakaragragsak ti pamiliami. Idi agangay, nagpayunirkami amin. Ita, naasawaanen ti lima nga annakmi, ket tallo kadakuada ti addaanen kadagiti annak. Naragsak met ti pamiliada bayat nga itultuloyda nga iyun-una ti panggep ni Jehova.”
Iyun-unayo ti Panggep ti Dios
16, 17. Siasino ti sumagmamano a dinakamat ti Biblia nga addaan kadagiti abilidad, ken ania ti ad-adda a malaglagip kadakuada?
16 Salaysayen ti Biblia dagidiay nangitunos ken di nangitunos iti biagda iti panggep ti Dios. Dagiti maadal kadagita a kapadasan ket agaplikar kadagiti tattao iti amin nga edad, kultura, ken kasasaad. (Roma 15:4; 1 Corinto 10:6, 11) Nangbangon ni Nimrod kadagiti dadakkel a siudad, ngem inaramidna dayta tapno busorenna ni Jehova. (Genesis 10:8, 9) Maisupadi iti dayta, adu met dagidiay mapagwadan. Kas pagarigan, saan a pinagbalin ni Moises a panggep ti biagna ti panangsalimetmet iti natan-ok a saadna idiay Egipto. Imbes ketdi, dagiti annongen nga intalek ti Dios kenkuana ti imbilangna “kas kinabaknang a dakdakkel ngem kadagiti gameng ti Egipto.” (Hebreo 11:26) Kas maysa a mangngagas, mabalin a pinaimbag ni Lucas ti sakit ni Pablo ken ti dadduma pay. Ngem ad-adda a nagdinamag ni Lucas kas ebanghelisador ken mannurat iti Biblia. Nagdinamag met ni Pablo saan a kas maysa a nalaing iti Linteg no di ket kas misionero, ‘maysa nga apostol iti nasnasion.’—Roma 11:13.
17 Ad-adda a nalatak ni David kas “maysa a lalaki a naanamongan iti puso [ti Dios],” saan ket a kas panguluen ti buyot wenno musikero ken kompositor. (1 Samuel 13:14) Pagaammotayo ni Daniel kas nasungdo a mammadto ni Jehova, saan ket a kas opisial iti palasio ti Babilonia; ni Ester kas pagwadan iti kinatured ken pammati, saan ket a kas reyna iti Persia; da Pedro, Andres, Santiago, ken Juan, kas apostol ni Jesus, saan ket a kas mangngalap. Ken kangrunaanna, nagdindinamag ni Jesus kas “ti Kristo,” saan ket a kas “ti allawagi.” (Marcos 6:3; Mateo 16:16) Isuda amin silalawag a matarusanda nga aniaman nga abilidad, sanikua, wenno saad a tagtagiragsakenda, masapul a ti panagserbi iti Dios ti nakaisentruan ti biagda imbes a kadagiti sekular a karerada. Ammoda a ti kasayaatan ken makagunggona unay a panggep ti biagda isu ti panagbalinda nga adipen ti Dios.
18. Ania ti inkeddeng ti maysa nga agtutubo a Kristiano a pangusaran iti biagna, ken ania ti nabigbigna?
18 Nabigbig met dayta ni Seung Jin, a nadakamat itay. “Imbes a busbosek ti amin a pigsak iti tay-ak ti medisina, panagpinta, wenno sekular a panangisuro, inkeddengko nga usaren ti biagko a maitunos iti dedikasionko iti Dios,” kinunana. “Agserserbiak itan iti lugar nga agkasapulan iti ad-adu a mannursuro iti Biblia tapno matulongak dagiti tattao a magna iti dalan nga agturong iti biag nga agnanayon. Ipagarupko idi a saan a makakarit ti panagpayunir. Ngem ad-adda a makakarit itan ti biagko, bayat a paspasayaatek ti personalidad ken abilidadko a mangisuro kadagiti tattao manipud iti nadumaduma a kultura. Gapuna, nabigbigko a makagunggona laeng ti wagas ti panagbiagtayo no maitunos dayta iti panggep ni Jehova.”
19. Kasano a masarakantayo ti pudno a panggep ti biag?
19 Kas Kristiano, naparaburantayo iti mangispal-biag a pannakaammo ken iti namnama a maisalakan. (Juan 17:3) Sapay koma ngarud ta saantayo nga ‘awaten ti di kaikarian a kinamanangngaasi ti Dios ngem maikapistayo iti panggepna.’ (2 Corinto 6:1) Imbes ketdi, usarentayo ti amin a panawentayo a mangidayaw ken Jehova. Irakuraktayo ti pannakaammo a mangyeg iti pudpudno a kinaragsak ken agturong iti biag nga agnanayon. No aramidentayo dayta, mapaneknekantayo nga agpayso dagiti sasao ni Jesus: “Ad-adu ti kinaragsak iti panangted ngem iti panangawat.” (Aramid 20:35) Iti kasta, masarakantayo ti pudno a panggep ti biag.
[Footnote]
a Nabaliwan ti dadduma a nagan.
Mailawlawagyo Kadi?
• Ania ti katan-okan a panggep ti biag a mabalintay a ragpaten?
• Apay a saan a nainsiriban nga ipamaysatayo ti biagtayo kadagiti material a bambanag?
• Ania “ti pudpudno a biag” nga inkari ti Dios?
• Kasano nga usarentayo ti biagtayo a maitunos iti panggep ti Dios?
[Dagiti Ladawan iti panid 18]
Masapul nga agsakripisio dagiti Kristiano iti umiso a wagas