Makapabang-arka Kadi iti Sabsabali?
ADDA iti makin-abagatan nga ungto ti Kabambantayan ti Anti-Libano ti naranga a Bantay Hermon, a ti kangatona ket 2,814 a metro manipud iti patar ti baybay. Iti kaaduan a paset ti tawen, naarpawan iti niebe ti alimpatok ti Hermon, ket dayta ti agpataud iti alibungubong iti rabii nga agbalin a nawadwad a linnaaw. Ti linnaaw ket bumaba kadagiti saleng ken kaykayo iti nababbaba a bakras ken kaubasan iti tanap. Bayat ti napaut a kalgaw idiay nagkauna nga Israel, ti kasta a makapabang-ar a linnaaw ti kangrunaan a gubuayan ti agneb para kadagiti mula.
Iti kanta nga impaltiing ti Dios, ti makapabang-ar a panagkaykaysa dagiti agdaydayaw ken Jehova ket nayasping “iti linnaaw ti Hermon a bumabbaba kadagiti bantay ti Sion.” (Salmo 133:1, 3) No kasano a mangipapaay ti Bantay Hermon iti makapabang-ar a linnaaw kadagiti mula, mabalintay met ti mangipaay iti bang-ar kadagiti kasasaotayo. Kasano?
Ti Makapabang-ar nga Ulidan ni Jesus
Ni Jesu-Kristo ket naaddaan iti dakkel nga impluensia iti sabsabali. Makapabang-ar unay uray ti apagbiit a pannakisarita kenkuana. Kas pagarigan, kinuna ti mannurat iti Ebanghelio a ni Marcos: “[Ni Jesus] innalana dagiti ubbing kadagiti takiagna ket rinugianna a binendisionan ida, nga impatayna kadakuada dagiti imana.” (Marcos 10:16) Makapabang-ar la ketdi dayta kadagidiay nga ubbing!
Idi maudi a rabiina ditoy daga kas tao, binugguan ni Jesus ti saka dagiti adalanna. Natukay la ketdi ti puspusoda gapu iti kinapakumbabana. Kinuna ni Jesus kadakuada: “Impasdekko ti pagtuladan maipaay kadakayo, tapno, kas iti inaramidko kadakayo, rebbeng nga aramidenyo met.” (Juan 13:1-17) Wen, nasken nga agbalinda met a napakumbaba. Nupay saan nga insigida a naawatan dagiti apostol ti ibagbaga ni Jesus sada pay nagririkiar kalpasan dayta no siasino kadakuada ti katan-okan, saan a nakapungtot ni Jesus. Imbes ketdi, siaanus a nakirinnason kadakuada. (Lucas 22:24-27) Uray “idi narabrabngis [ni Jesus], saanna a sinubadan [dayta] iti panangrabngis.” Kinapudnona, “idi agsagsagaba, saan a nagipangpangta, no di ket intultuloyna nga intalek ti bagina iti daydiay mangukom a sililinteg.” Ti makapabang-ar nga ulidan ni Jesus ket maikari a tuladentayo.—1 Pedro 2:21, 23.
Kinuna ni Jesus: “Ibaklayyo ti sangolko ket agsursurokayo kaniak, ta naalumamay ti kababalinko ken napakumbaba ti pusok, ket makasarakkayto ti gin-awa a maipaay kadagiti kararuayo.” (Mateo 11:29) Ania ngata ti riknam no ni Jesus a mismo ti mangisursuro kenka? Kalpasan a nangngegda ti panangisurona iti sinagogada, nasdaaw dagiti kailianna ket kinunada: “Nangalaan daytoy a tao itoy a sirib ken kadagitoy a mannakabalin nga aramid?” (Mateo 13:54) No basaentayo ti maipapan iti biag ken ministerio ni Jesus, adu ti masursurotayo maipapan iti panagbalin a makapabang-ar iti sabsabali. Usigentayo no kasano nga inyulidan ni Jesus ti makapabileg a panagsasao ken manangtulong a kababalin.
Kanayon nga Agsaotayo iti Makapabileg
Nalaklaka ti mangrebba iti pasdek ngem iti mangbangon iti baro. Dayta a prinsipio ket agaplikar met iti panagsasaotayo. Yantangay imperpektotayo, agbiddut ken addaantay amin iti pagkurangan. Kinuna ni Ari Solomon: “Awan ti tao a nalinteg iti daga nga agtultuloy nga agaramid iti naimbag ket saan nga agbasol.” (Eclesiastes 7:20) Naglaka ti agsapul iti biddut ti sabali a tao ken mangdadael kenkuana babaen kadagiti makasair a sasao. (Salmo 64:2-4) Iti sabali a bangir, saan a nalaka ti kanayon nga agsao iti makapabileg.
Ti panagsasao ni Jesus ket kanayon a makapabileg. Nabang-aran iti naespirituan dagiti tattao gapu iti panangipakaammona kadakuada iti naimbag a damag ti Pagarian. (Lucas 8:1) Nagin-awaan met dagidiay nagbalin nga adalanna gapu iti panangisurona kadakuada maipapan iti nailangitan nga Amana. (Mateo 11:25-27) Di pakasdaawan a ni Jesus ket kaay-ayo dagiti tattao!
Saan a kas kenkuana, dagiti eskriba ken Fariseo ket saan a maseknan iti kasapulan dagiti tattao. Kinuna ni Jesus: “Kaykayatda ti katan-okan a puesto kadagiti pangrabii ken dagiti makinsango a pagtugawan kadagiti sinagoga.” (Mateo 23:6) Kinapudnona, tinagibassitda dagiti ordinario a tattao, a kunkunada: “Daytoy a bunggoy a saan a makaammo iti Linteg nailunodda a tattao.” (Juan 7:49) Talaga la ketdi a saan a makapabang-ar dayta a kababalin!
Ti panagsasaotayo masansan nga iyanninawna ti panagpampanunot ken rikriknatayo ken no kasano ti panangmatmattayo iti sabsabali. Kinuna ni Jesus: “Ti naimbag a tao mangiruar iti naimbag manipud iti naimbag a gameng ti pusona, ngem ti nadangkes a tao iruarna ti dakes manipud iti nadangkes a gamengna; ta manipud iti naruay iti puso agsao ti ngiwatna.” (Lucas 6:45) Ania ngarud ti maaramidantayo tapno masiguradotayo a makapabang-ar ti panagsasaotayo?
Ti maysa a maaramidantayo ket agpanunottayo nga umuna sakbay nga agsaotayo. Kuna ti Proverbio 15:28: “Ti puso daydiay nalinteg agmennamenna tapno makasungbat.” Saan a masapul a napaut ti kasta a panagmennamenna. No agpanunottayo a nasaksakbay, masansan nga ammotayo no anianto ti epekto kadagiti sabsabali dagiti komentotayo. Iyimtuodtayo iti bagbagitayo: ‘Panangipakita kadi iti ayat ti panangyebkas iti pampanunotek nga ibaga? Agpayso kadi daytoy wenno tsismis laeng? Daytoy kadi ket “sao iti umiso a tiempona?” Makapabang-ar ken makapabileg kadi dayta kadagidiay pangibagaak?’ (Proverbio 15:23) No maamiristayo a makapaupay wenno saan a naintiempuan dayta, ditay koma lattan ibagbaga dayta. Ngem imbes nga agulimekka lattan, apay a dika agpanunot iti sabali nga ibagam a makapabileg ken naintiempuan? Ti nadarasudos a panagsasao ket mayasping “kadagiti panangsugat ti kampilan,” idinto ta dagiti makapabileg a sasao ket “makapaimbag.”—Proverbio 12:18.
Ti maysa pay a makatulong ket ti panangpanunottayo kadagiti galad dagiti kapammatiantayo a makaay-ayo iti Dios. Kinuna ni Jesus: “Awan ti tao a makaumay kaniak malaksid no ti Ama, a nangibaon kaniak, ti mangyasideg kenkuana.” (Juan 6:44) Adda dagiti makaay-ayo a galad a makitkita ni Jehova iti tunggal matalek nga adipenna—uray kadagidiay ipagaruptayo a narigat a pakilangenan. No ikagumaantayo nga ammuen dagiti naimbag a galadda, adda panggapuantayo nga agsao iti makapabileg maipapan kadakuada.
Tulongantayo ti Sabsabali
Naan-anay a maawatan ni Jesus ti kasasaad dagiti maikuskuspil. Kinapudnona, “idi makitana dagiti bunggoy simnek ti asina kadakuada, agsipud ta nalalatan ken naiwarawarada a kasla karkarnero nga awanan pastor.” (Mateo 9:36) Ngem saan la a naasian ni Jesus gapu iti kasasaadda; adda inaramidna tapno matulonganda. Kastoy ti inyawisna kadakuada: “Umaykayo kaniak, dakayo amin a mabambannogan ken madagdagsenan, ket pagin-awaenkayto.” Impanamnamana met: “Ti sangolko nalanay ken ti awitko nalag-an.”—Mateo 11:28, 30.
Agbibiagtayo itan kadagiti “napeggad a tiempo a narigat a pakilangenan.” (2 Timoteo 3:1) Adu ti madagdagsenan kadagiti “pakaringgoran daytoy a sistema ti bambanag.” (Mateo 13:22) Madagdagsenan met ti dadduma gapu kadagiti narigat a personal a kasasaadda. (1 Tesalonica 5:14) Kasanotay a maipaayan iti bang-ar dagidiay agkasapulan? Kas ken Kristo, adda maitulongtayo tapno mapalag-anan ti pakadagsenanda.
Tapno mapalag-ananda, ipamuspusan ti dadduma nga iyebkas dagiti parikutda. No adda dagiti malmaldaangan nga agpatulong kadatayo, mangipapaaytayo kadi iti tiempo tapno umimdengtayo a naimbag kadakuada? Masapul a disiplinaantayo ti bagitayo tapno makapagimdengtayo a buyogen ti pannakipagrikna. Ramanen dayta ti napasnek a panagdengngeg iti ibagbaga ti sabali, imbes a panunotentayo a dagus no kasano ti isusungbattayo wenno no kasanotay a risuten ti problemana. Maipakitatayo a maseknantayo kenkuana babaen ti napasnek a panagimdeng, naynay a panangkita kenkuana, ken panagisem no kasapulan.
Iti kongregasion Kristiano, adu ti gundaway a mapabilegtayo dagiti kapammatiantayo. Kas pagarigan, no mapantayo makigimong idiay Kingdom Hall, kasaritatayo dagidiay addaan kadagiti parikut iti salun-at. No dadduma, ti laeng kasapulan ket sumagmamano a minuto a panangpabileg kadakuada sakbay wenno kalpasan ti gimong. Laglagipentayo met koma dagidiay di nakatabuno iti nakaitimpuyogantayo a Panagadal ti Kongregasion iti Libro. Mabalintayo ida a teleponuan tapno komustaen ken tapno iyebkas ti pannakaseknantayo wenno mangidiayatayo iti tulong.—Filipos 2:4.
Nadagsen ti responsabilidad dagiti Kristiano a panglakayen iti kongregasion. Dakkel ti maitulongtayo tapno mapalag-ananda. Kasano? Babaen ti pannakitunostayo kadakuada ken sipapakumbaba a panangaramidtayo iti aniaman nga ipaannongda kadatayo. Idagadag kadatayo ti Sao ti Dios: “Agtulnogkayo kadagidiay mangidadaulo kadakayo ket agpasakupkayo, ta agtultuloy a bambantayanda dagiti kararuayo a kasla isudanto dagidiay manungsungbat; tapno aramidenda daytoy a buyogen ti panagrag-o ket saan a buyogen ti panagsennaay, ta daytoy ket makadangran kadakayo.” (Hebreo 13:17) Babaen ti kinamasindadaantayo, mapagin-awatayo dagidiay “mangidaulo iti nasayaat a wagas.”—1 Timoteo 5:17.
Aduantayo Koma iti Makapabileg a Sasao ken Makatulong nga Aramid
Tumaud ti makapabang-ar a linnaaw gapu iti di mabilang ken nagbabassit a tedted ti danum nga in-inut a nagtinnag, a kasla kellaat lattan a timmaudda. Umasping iti dayta, ti panangpabang-ar iti sabsabali ket saan a resulta ti maysa laeng nasayaat nga aramid. Imbes ketdi, dayta ket resulta ti kanayon a panangipakitatayo kadagiti Nakristianuan a galad.
Insurat ni apostol Pablo: “Iti nainkabsatan nga ayat maaddaankayo iti kinalailo iti maysa ken maysa. Iti panangipakita ti pammadayaw iti maysa ken maysa mangidaulokayo.” (Roma 12:10) Tungpalentayo koma dayta a balakad ni Pablo. Babaen ti panagsasao ken aramidtayo, agbalintayo koma a pudpudno a gubuayan ti bang-ar kadagiti sabsabali.
[Dagiti Ladawan iti panid 16]
Ti linnaaw iti Bantay Hermon—makapabang-ar a gubuayan ti agneb para kadagiti mula
[Ladawan iti panid 17]
Mabang-aran ti sabsabali no agimdengtayo a buyogen ti pannakipagrikna