Salsaludsod Dagiti Agbasbasa

Ania ti rumbeng a panangmatmat ti maysa a Kristiano iti panaganup ken panagkalap?

Saan a kondenaren ti Biblia ti panaganup wenno panagkalap. (Deuteronomio 14:4, 5, 9, 20; Mateo 17:27; Juan 21:6) Kaskasdi, dagiti Kristiano nga aganup wenno agkalap masapul nga ikabilanganda ti sumagmamano a prinsipio ti Biblia.

Ti Dios pinalubosanna ni Noe ken dagiti kaputotanna nga agparti ken mangan iti karne la ketdi ta padaraenda ti animal sakbay a kanenda. (Genesis 9:3, 4) Ipakita daytoy a bilin a masapul a raemenda ti biag ti animal yantangay naggapu dayta iti Dios. Gapuna, dagiti Kristiano saanda a patayen dagiti animal tapno laeng pagay-ayaman wenno pagraragsakanda, a mangipakita nga awan panagraemda iti biag.​—Proverbio 12:10.

Sukimatentayo met ti motibo ken kababalintayo. Mabalin a nalaing a mangngalap dagiti apostol ngem awan ti mangipamatmat nga impasindayagda ti abilidadda nga agkalap wenno aganup. Dida met nakiraman kadagiti kompetision mainaig iti panagkalap wenno panaganup tapno laeng pagraragsakanda wenno paneknekanda a malalakida.​—Salmo 11:5; Galacia 5:26.

Iyimtuodtayo iti bagitayo: ‘Raraemek kadi ti panangmatmat ni Jehova iti biag? Ti kadi panaganup wenno panagkalap ti kanayon a pampanunotek ken isarsaritak? Iparparangarang kadi ti panagbiagko a pagragragsakak ti aganup, wenno ipakpakitak a maysaak a ministro ti Dios? Nasingsingedak kadi kadagiti di manamati wenno mabaybay-ak ti pamiliak gapu iti panaganup wenno panagkalap?’​—Lucas 6:45.

Matmatan ti dadduma a mabalinda a liwayan dagiti Nakristianuan nga aktibidad bayat ti panawen ti panaganup wenno panagkalap tapno adda pagtaraonda. Nupay kasta, maipakitatayo ti pammati ken panagtalek iti Dios no ditay ipalubos nga adda manglapped iti panangyun-unatayo iti pagayatanna. (Mateo 6:33) Maysa pay, an-annuroten dagiti Kristiano ti amin a paglintegan ni “Cesar” mainaig iti panaganup ken panagkalap, ipapaalagad man dayta ti gobierno wenno saan.​—Mateo 22:21; Roma 13:1.

Masapul a balbaliwan ti dadduma ti panagpampanunotda tapno matuladda ti panangmatmat ni Jehova mainaig iti panaganup ken panagkalap. (Efeso 4:22-24) Iti sabali a bangir, masapul met a raementayo ti konsiensia ti dadduma. Maitunos daytoy iti balakad ni apostol Pablo: “Saantay koma nga agiinnukomen, no di ket aramidenyo daytoy a pangngeddengyo, a dikay mangikabil iti sanguanan ti maysa a kabsat iti pakaitibkolan.” (Roma 14:13) Ti panangipakita iti di agimbubukodan nga ayat ken panagraem pagbalinenna a natalna ti kongregasion ken maay-ayo ti Namarsua kadatayo, ti Gubuayan ti amin a biag.​—1 Corinto 8:13.a

[Footnote]