Saludsod Dagiti Agbasbasa

Apay nga Ipalpalubos ti Dios ti Panagsagaba?

Saan a ti Dios ti makinggapuanan iti panagsagaba dagiti tattao. ‘Adayo iti pudno a Dios nga agtignay a sidadangkes!’ kuna ti Biblia. (Job 34:10) Asino ngarud ti kangrunaan a makinggapuanan iti panagsagaba?

Ni Jesus tinukoyna ni Satanas kas “ti agturay iti lubong.” (Juan 14:30) Pudno, ni Jehova ti Sapasap a Soberano. Saanna a pulos nga ited dayta nga akem iti sabali. Ngem iti sumagmamano a panawen, impalubos ti Dios nga iturayan ni Satanas ti kaaduan iti sangatauan.​—1 Juan 5:19.

Ania a kita nga agturay ni Satanas? Sipud idi damo a nakilangen ni Satanas kadagiti tattao, nagbalinen a mammapatay ken manangallilaw. Iti nadumaduma a pamay-an, rirriribuken ni Satanas ti intero a sangatauan. Isu ket inukom ni Jesus babaen kadagitoy a sasao: “Dayta ket mammapatay idi a nangrugi, ket saan a nagtakder a di maisin iti kinapudno, agsipud ta awan kenkuana ti kinapudno. No sawenna ti ulbod, agsao a maitunos iti bukodna a pagannayasan, agsipud ta isu maysa a managulbod ken ti ama ti kinaulbod.” (Juan 8:44) Kinuna pay ni Jesus nga annak ni Satanas dagidiay nangisikat iti ipapatayna. Nagtignayda a kas iti amada.

Agingga ita, imulmula ni Satanas iti puso dagiti tattao ti pagannayasan a pumatay. Kas pagarigan, sigun iti pattapatta ti propesor iti University of Hawaii iti Estados Unidos a ni R. J. Rummel, manipud idi 1900 agingga idi 1987, agarup 169,198,000 a tattao ti pinapatay ti nagduduma a gobierno gapu iti kudeta, panangikisap iti puli, ken awan gapgapuna a kinaranggas. Saan pay a karaman iti dayta ti pinullo a milion a napapatay kadagiti paggugubatan iti dayta met la a panawen.

No saan a ti Dios ti makinggapuanan iti panagsagaba, apay ngarud nga ipalpalubosna? Gapu ta masapul pay a marisut dagiti moral nga isyu a nakairamanan ti amin a parsua, a nabayagen a napataud. Usigentayo ti uray maysa laeng kadagita.

Idi rugrugi ti pakasaritaan ti tao, dimmasig kenni Satanas da Adan ken Eva. Inlaksidda ti turay ti Dios ket pinilida nga iturayan ti bagbagida, nupay ti kinaagpaysuanna ket agpapaiturayda iti Diablo.​—Genesis 3:1-6; Apocalipsis 12:9.

Ti hustisia ni Jehova kalikagumanna a palubosanna ti panaglabas ti panawen tapno maurnong dagiti ebidensia. Ania ti nalawag a resultana? Ti panangituray ti tao iti sidong ti impluensia ni Satanas ket nagbanag laeng iti panagsagaba. Wen, nagsayaatan ti tao ti panangipalubos ti Dios nga aglabas dagiti panawen. Kasano? Dagidiay nangadal ken namati iti ebidensia naaddaanda iti gundaway a mangipakita iti kinamasindadaanda nga agpasakup iti Dios. Dagidiay met nagadal ken mangyaplikar kadagiti pagalagadan ti Dios maaddaanda iti namnama nga agbiag nga agnanayon.​—Juan 17:3; 1 Juan 2:17.

Pudno a ni Satanas ti mangiturturay iti lubong. Ngem iti din agbayag, usarento ni Jehova ti Anakna a ‘mangdadael kadagiti aramid ti Diablo.’ (1 Juan 3:8) Iti panangiwanwan ti Dios, pagin-awaen ni Jesus dagiti nadudog a puso ken urnosenna dagiti nadadael a biag. Pagungarenna dagiti binilion a nagsagaba ken natay kadagiti naglabas a siglo.​—Juan 11:25.

Ti panagungar ni Jesus ket pammaneknek a kabaelan ti Dios a parmeken dagiti aramid ti Diablo​—maysa a pamalatpatan no ania ti agur-uray kadagidiay agpaituray iti Dios. (Aramid 17:31) Ipalagip kadatayo ti Biblia dayta a tiempo babaen kadagitoy a makaliwliwa a sasao: “Ti Dios a mismo addanto [iti sangatauan]. Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Ti immuna a bambanag naglabasdan.”​—Apocalipsis 21:3, 4.