Panangirakurak iti Naimbag a Damag iti Kabambantayan ti Andes

SANGAPULO ket walokami amin a nagdagus iti maysa nga abong-abong. Inyaplagmi dagiti awitmi a pagturogan iti narugit a suelo ket kumkumterkami a naturog bayat a bumayakabak ti tudo iti galba nga atep ti dagusmi. Gapu ta nabaybay-anen ti abong-abong, napanunotmi a kasla dakami pay laeng ti damo nga imyan iti dayta.

Apay a simmarungkarkami sadiay? Kangrunaan iti amin, kayatmi a tungpalen ti bilin ni Jesus nga ikasaba ti naimbag a damag “agingga iti kaadaywan a paset ti daga.” (Ara. 1:8; Mat. 24:14) Napankami nangasaba iti naiputputong a teritoria iti kabambantayan ti Andes a masakupan ti Bolivia.

Ti Rigat ti Ipapan Sadiay

Ti umuna a karit ket ti mismo nga ipapan sadiay. Naammuanmi nga awan ti masinunuo nga eskediul ti lugan a mapan kadagita a nasulinek a lugar. Idi dimteng ti paglugananmi a bus, basbassit gayam dayta ngem iti impagarupmi isu a nakatakder ti dadduma kadakami. Nupay kasta, nakadanonkami amin iti destinasionmi.

Kalatmi a danonen dagiti bario iti kabambantayan ti Andes iti Bolivia. Isu nga apaman a nakadisaagkami iti bus, binagkatmin dagiti gargaretmi sa nagsasarunokami a nagin-inayad a nagna iti narangkis a desdes iti bantay.

Kasla babassit dagiti bario ngem agaaddayo ti balbalay isu nga adu nga oras ti nabusbosmi iti tunggal bario. Kasano man kaadayo ti pagnaenmi, kasla kanayon nga adda sabali pay a balay iti pangadaywen. Masansan a mayaw-awankami gapu kadagiti agsikkosikko a desdes iti kataltalonan.

“Apay nga Itattakayo Laeng nga Immay?”

Maysa a babai ti nangapresiar unay iti kinaadayo ti pinagnami isu nga impausarna kadakami ti kosinana ken inikkannakami iti pagsungrod tapno malutomi ti pangngaldawmi. Adda met lalaki nga idi naammuanna ti isursuro ti Biblia maipapan iti kasasaad dagiti natay, inyimtuodna, “Apay nga itattakayo laeng nga immay?” Interesado unay ta idi pumanawkamin iti bariona, kimmuyog kadakami tapno agsaludsod iti ad-adu pay bayat a magmagnakami nga agawid. Adda pay sabali a lalaki a damdamona a maam-ammo dagiti Saksi ni Jehova ket nagustuanna unay dagiti publikasiontayo. Gapu iti napalaus a yamanna iti iyaaymi, intedna kadakami ti tulbek ti maysa a kalapaw a mabalin a pagdagusanmi.

Maysa a rabii, gapu ta nasipnget unay, dimi nadlaw a ti gayam nangipatakderanmi kadagiti toldami ket iti ayan ti adu a kuton. Kinagatkagatdakami gapu iti panagbasakmi iti teritoriada. Nabambannogkami isu a saankamin nga immakar. Naimbag laengen ta di nagbayag, saanen nga inkankano dagiti kuton ti kaaddami.

Idi damo, simmakit ti bukot ken paragpagmi gapu iti pannaturogmi iti daga, ngem dimin ingginggina dayta bayat ti nagpatnag. Iti agsapa, nalipatanmin ti aniaman nga ut-ot ken sakit idi a nakitamin dagiti di pay naas-asak a tanap a dagiti deppaarda ket naabbongan iti ulep kasta met dagiti nangayed a kabambantayan a dagiti tapawda ket naabbungotan iti niebe. Iti nakataltalna nga aglawlaw, awan ti sabali a mangngeg no di ti ayus ti waig ken ti kanta dagiti tumatayab.

Idi nalpaskamin a nagdigus iti waig, inusigmi a sangsangkamaysa ti teksto ti Biblia sakbay a namigatkami. Kalpasanna, sinang-atmin ti katurturodan agingga kadagiti adayo a bario. Makagunggona ti panagbannogmi ta nakasarakkami iti maysa a baket nga uray la a nakasangit idi naammuanna a ti nagan ti Dios a Jehova ket adda gayam iti Biblia. Napalaus ti ragsakna. Ita, mabalinnan nga usaren ti nagan ti Dios iti panagkararagna!

Adda met lakay a nangibaga a nalagip isuna ti Dios, ket pagammuan ta inkantana a dagiti anghel ti nangibaon kadakami. Adda pay naam-ammomi a lalaki a masaksakit ken naidalit iti pagiddaan. Kinunana nga isu ket saan pay a pulos sinarsarungkaran dagiti kalugaranna, isu a nasdaaw idi naammuanna a naggapukami iti nakaad-adayo a La Paz tapno sumarungkarkami kenkuana. Natukay met ti puso ti maysa a lalaki iti panagbalaybalaymi ta iti dadduma a relihion, basta batingtingenda lattan ti kampana ti simbaan kas pangayab kadagiti tattao.

Awan koriente iti dayta a lugar isu nga apaman a sumipnget, maturogen dagiti bumario ken bumangonda no sumingisingen ti init. Isu a tapno maranaanmi ida kadagiti pagtaenganda, masapul a rugianmin ti mangasaba iti alas sais ti agsapa. Ta no saan, kaaduan kadakuada ti simmalogen iti kataltalonan. Idi agangay, adda dadduma a nangisardeng iti trabahoda tapno denggenda ti mensahemi manipud iti Sao ti Dios, ken nalabit tapno paginanaenda ti baka a pagar-aradoda. Adu kadagiti naranaanmi iti balbalayda ti nangyaplag iti lalat dagiti karnero tapno pagtugawanmi sada inayaban ti pamiliada tapno dumngegda met. Adda pay ketdi dadduma a mannalon a nangpabalon kadakami iti dadakkel a bag a napno iti mais kas panagyamanda kadagiti intedmi a literatura a naibasar iti Biblia.

“Didak Nalipatan”

Siempre, tapno rumang-ay dagiti tattao iti pannakaammoda iti Biblia, masapul a sarungkaranmi ida. Adu ti nagpakaasi nga agsublikami tapno mangisuro iti ad-adu pay, isu a namin-adu a nagsublikami ti dayta a paset ti Bolivia.

Iti nabiit pay nga isasarungkarmi, naragsakan ti maysa a baket ta urayna la a kinuna: “Kaslakay met laengen pudpudno nga annakko. Yaman pay ta didak nalipatan.” Adda met lalaki a nagyaman kadakami gapu iti panangasabami ket inawisnakami nga agdagus iti pagtaenganna iti sumaganad nga iyaaymi. Nalabit ti kasayaatan a nagunggonami iti panagbannogmi ket ti pannakadamagmi a ti maysa kadagiti babbai a nakasaritami iti napalabas ket maysan a manangaskasaba iti naimbag a damag iti immakaranna a siudad.

Iti naudi nga aldaw ti damo a biahemi, naibusankami iti gas a pagluto ken dandani payen maibus ti balonmi a taraon. Nagalakami iti umdas a pagsungrod, linutomi ti kaudian a taraonmi, sakami nagrubuaten nga agawid. Kinilkilometro pay ti kaadayo ti ili nga ayan ti paglugananmi a bus. Nasipngeten idi makadanonkami sadiay.

Ti Panagawidmi

Iti biahemi nga agawid, nadadaelan ti bus a naglugananmi. Naimbag laengen ta adda trak a napekpek iti tao a nangilugan kadakami. Dayta ti nangted kadakami iti gundaway a mangasaba kadagiti padami a pasahero a masmasdaaw no apay nga addakami sadiay. Nupay gagangay a managbabainda, kadawyanna a nainggayyeman ken nasingpetda.

Kalpasan ti siam nga oras a panagluganmi iti dayta a trak, nakadanonkami met laengen kadagiti pagtaenganmi, ngem nabasbasa ken kumkumterkami. Nupay kasta, saan a sayang dayta a biahemi agsipud ta bayat ti kaaddami iti lugan, maysa a babai nga agnanaed iti siudad ti nayurnosmi a mayadalan iti Biblia.

Talaga a maysa a naisangsangayan a pribilehio ti mangirakurak iti naimbag a damag kadagiti agnanaed iti nasulinek a luglugar. Uppat a bario ken nagadu a purok ti nakasabaanmi. Gapuna, nalagipmi dagitoy a sasao: “Anian a nagimnas iti rabaw dagiti bantay ti saksaka daydiay mangip-ipan iti naimbag a damag, daydiay mangipabpablaak iti talna, daydiay mangyeg iti naimbag a damag ti maysa a banag a nasaysayaat, daydiay mangipabpablaak iti pannakaisalakan.”​—Isa. 52:7; Roma 10:15.

[Ladawan iti panid 17]

Nakarubbuatkamin a mapan mangirakurak iti naimbag a damag