Nakapatpateg a Kari
MAYSAAK nga agkabannuag nga ina a taga-Espania. Adda nakapatpateg a karik. Bay-anyo nga ilawlawagko no kasano a napasamak dayta.
Awan ti talna ken urnos iti pagtaengan dagiti dadakkelko. Nakaro ti ladingit ti pamiliami idi natay ti agtawen iti uppat nga adingko a lalaki gapu iti aksidente. Kas maysa nga asawa, saan a naragsak ni nanangko gapu iti dakes nga ugali ni tatangko. Ngem saan a dayta ti nakalapped kenkuana a nangyukuok kadagiti moral a pagalagadan kadakami ken manongko.
Idi agangay, nagasawa ni manongko, ken nakiasawaak metten. Di nagbayag, natakuatan nga adda kanser ni nanangko ket dayta ti impatayna. Ngem sakbay a natay, adda nakapatpateg a gameng nga impatawidna kadakami.
Maysa kadagiti am-ammona ti nakisarita kenkuana maipapan iti namnama a panagungar a nailanad iti Biblia, ket inawat ni nanangko ti naitukon a panagadal iti Biblia. Idi maudin a paset ti biagna, naragsakan ken naaddaan iti namnama gapu iti mensahe nga impaay ti Biblia.
Idi nakitami ti nagsayaat nga epekto kenkuana ti mensahe ti Biblia, rinugianmi ken manongko ti nagadal iti Sao ti Dios. Nagpabautisarak kas maysa a Saksi ni Jehova makabulan sakbay a naipasngay ti maikadua nga anakmi, maysa a napintas nga ubing a babai a pinanagananmi iti Lucía.
Nakapatpateg kaniak ti aldaw ti panagpabautisarko. Ti maysa a makagapu ket kukuanakon ni Jehova gapu ta naidedikarkon ti biagko nga agserbi kenkuana iti agnanayon. Ti maikadua, mairanudkon ti pammatik kadagiti patpatgek nga annak.
Ngem nasinga ti maikadua a pakaragsakak. Idi agtawen ni Lucía iti uppat, nakaro ti panagsakit ti tianna. Kalpasan ti sumagmamano a panangsukimat, inlawlawag ti radiologist nga adda tumor iti dalemna a kas iti kadakkel ti naranghita. Imbaga ti doktor nga addaan ni Lucía iti neuroblastoma, maysa a kita ti kanser a nalaka nga agwaras. Kasta ti nangrugian ti pito a tawen a pannakidangadang ni Lucía iti kanser, agraman dagiti napaut a panagnaedna iti ospital.
Managsakripisio nga Espiritu
Bayat dagitoy a narigat a tawen, masansan a maparagsaknak ni Lucía babaen kadagiti nairut nga arakupna ken ti mangipanamnama nga agekna. Maragsakan met dagiti doktor ken nars iti ospital iti pamay-an ti panangdaerna iti sakitna. Kanayon a magagaran a makitinnulong kadagiti nars. Tultulonganna ida nga agitulod iti yogurt, juice, ken dadduma pay a banag kadagiti naospital nga ubbing nga adda iti dadduma a kuarto ti ospital. Inikkan pay ketdi dagiti nars iti puraw a kagay ken lapel badge a pakabigbigan kenkuana kas “katulongan ti nars.”
“Maragragsakanak ken Lucía,” malagip ti maysa nga agtartrabaho iti ospital. “Nagaget, managparnuay nga ubing, ken kaay-ayona ti agpinta. Ammona nga iyebkas ti rikriknana ken talaga a nataengan ti panagpampanunotna.”
Naaddaan ni Lucía iti bileg ken kinatimbeng gapu iti Sao ti Dios. (Heb. 4:12) Kombinsido nga idiay baro a lubong, “awanton ni patay, awanto metten ti panagleddaang wenno panagsangit wenno ut-ot,” kas inkari ti Sao ti Dios. (Apoc. 21:4) Gapu ta maseknan kadagiti sabsabali, us-usarenna ti amin a gundaway a mangiranud iti mensahe ti Biblia. Ti natibker a namnama ni Lucía iti panagungar ti nakatulong kenkuana a maaddaan iti talna ti panunot ken mangtaginayon iti kinaragsakna nupay ammona a saanen a maimbagan. (Isa. 25:8) Tinaginayonna dayta a kababalin agingga a natay.
Iti daydi nga aldaw a nangaramidak iti nakapatpateg a kari. Dandanin di makamulagat ni Lucía. Pinetpetan ni tatangna ti maysa nga imana bayat a pinetpetak met ti maysa. “Dika madanagan, saanka a pampanawan,” inyarasaasko. “In-inayadem laeng ti aganges. Inton makariingka, naimbagkanton. Awanton ti mariknam nga ut-ot, ket addaakto iti sibaymo.”
Ita, masapul a tungpalek dayta a karik. Ammok a narigat ti panaguray. Ngem ammok met a no siaanus nga agtalekak ken Jehova ken salimetmetak ti kinatarnawko, addaakto sadiay inton agungar.
Ti Impatawid ni Lucia
Nagdakkel ti epektona iti di manamati nga asawak ti kinatured ni Lucía, agraman ti nagsayaat a suporta ti kongregasion. Idi aldaw ti ipapatay ni Lucía, imbaga ni lakayko a masapul nga usigennan ti kasasaadna. Sumagmamano a lawas kalpasanna, nagpayadal iti Biblia iti maysa a panglakayen iti kongregasion. Di nagbayag, nangrugin a tumabuno kadagiti amin a gimong. Babaen ti tulong ni Jehova, insardengnan ti agsigarilio, banag a saanna a naaramid sakbay a nagadal iti Biblia.
Maladingitanak pay laeng gapu iti ipapatay ni Lucía, ngem agyamanak unay ken Jehova gapu iti impatawid ni Lucía. Maliwliwakami ken lakayko iti nagsayaat a namnama a panagungar, ken ar-arapaapenmi pay ti tiempo a pannakakitami manen ken Lucía—dagiti narimat, nabukel a matana, ken dagiti kallidan a nakaisem a pingpingna.
Dakkel met ti epekto ti kapadasan ti anakko iti maysa a kaarrubami. Maysa nga agtudtudo nga agsapa ti Sabado, adda babai nga immay iti balaymi. Kaeskuelaan ni Lucía ti anakna. Natay ti maysa pay nga anakna a lalaki, nga agtawen iti 11. Kapada ti sakit ni Lucía ti impatayna. Sinapulna ti balaymi idi nadamagna ti napasamak ken Lucía ket sinarungkarannakami. Kayatna a maammuan no kasano a nadaerak ti ipapatay ni Lucía ket insingasingna a mangbuangaykami iti maysa a grupo a makatulong kadakami tapno a maliwliwami dagiti inna a nagpasar iti umasping a kasasaad.
Inlawlawagko a nasarakakon ti pudno a liwliwa iti maysa kadagiti kari ti Biblia, ti kasayaatan a liwliwa ngem iti aniaman a maipaay ti tao. Naragsakan idi imbasak kenkuana dagiti sasao ni Jesus a nailanad iti Juan 5:28, 29. Inawatna ti panagadal iti Biblia ket di nagbayag nariknana “ti talna ti Dios a mangringbaw iti isuamin a panunot.” (Fil. 4:7) No agad-adalkami, masansan nga agsardengkami ken arapaapenmi nga addakami iti baro a lubong, a mangsabsabet kadagiti nagungar nga ing-ingungotenmi.
Wen, ti ababa a biag ni Lucía ket nangibati iti agpaut a tawid. Ti pammatina ti namagkaykaysa iti pamiliami nga agserbi iti Dios, ken nangpabileg iti determinasionko nga agtalinaed a natibker iti pammati. Awan duadua a dagiti amin a natayan makitadanto dagiti ing-ingungotenda a mabalin a mapagungarto.
[Ladawan iti panid 20]
Ti paraiso nga indrowing ni Lucía