Agpaiwanwankayo iti Dios iti Amin a Banag

“Daytoy a Dios isu ti Diostayo agingga iti tiempo a di nakedngan, iti mismo nga agnanayon. Isu ibagnosnatayto agingga a mataytayo.”​—SAL. 48:14.

1, 2. Apay a nasken nga agtalektayo iti panangiwanwan ni Jehova imbes nga iti bukodtayo a sirib, ken ania dagiti tumaud a saludsod?

AL-ALLILAWENTAYO ti bagitayo no matmatantayo a napateg dagiti bambanag a makadangran wenno awanan iti pateg. (Prov. 12:11) No tartarigagayantayo nga aramiden ti maysa a banag a saan a maiparbeng kadagiti Kristiano, mabalin a kombinsirennatayo ti pusotayo a mangibanag iti dayta. (Jer. 17:5, 9) Gapuna, nainsiriban nga inkararag ti salmista kenni Jehova: “Ibaonmo ti silawmo ken ti kinapudnom. Dagitoy met laeng idalandak koma.” (Sal. 43:3) Nagtalek ken Jehova, ti kasayaatan a Giya, imbes nga iti bukodna a limitado a sirib. Kas iti salmista, masapul nga agpaiwanwantayo iti Dios.

² Ngem apay a ti panangiwanwan ni Jehova ti pagtalkantayo? Kaanotayo nga agpaiwanwan kenkuana? Ania dagiti galad a nasken a patanorentayo tapno magunggonaantayo iti dayta, ken kasano nga iwanwanwannatayo ni Jehova ita? Dagitoy nga agkakapateg a saludsod ti usigentayo iti daytoy nga artikulo.

Apay nga Agtalek iti Panangiwanwan ni Jehova?

3-5. Apay a naan-anay a mapagpannurayantayo ti panangiwanwan ni Jehova?

³ Ni Jehova ti nailangitan nga Amatayo. (1 Cor. 8:6) Am-ammona a naimbag ti tunggal maysa kadatayo ken mabasana ti pusotayo. (1 Sam. 16:7; Prov. 21:2) Kinuna ni Ari David iti Dios: “Sika naammuam ti panagtugawko ken itatakderko. Naimutektekam ti panunotko manipud adayo. Ta awan pay uray maysa a sao iti dilak, ngem, adtoy! O Jehova, ammomon amin dayta.” (Sal. 139:2, 4) Gapu ta kabesadonatayo ni Jehova, sigurado nga ammona no ania ti kasayaatan para kadatayo. Awan ti makaartap iti siribna. Saan a kas iti tao, makita ken matingitingna a naimbag ti amin a banag, ken nasaksakbay nga ammona ti pagbanagan dagiti bambanag. (Isa. 46:9-11; Roma 11:33) Isu ti “Dios, a maymaysa a masirib.”​—Roma 16:27.

⁴ Malaksid iti dayta, ay-ayatennatayo ni Jehova ken ti pagimbagantayo ti kanayon a pampanunotenna. (Juan 3:16; 1 Juan 4:8) Kas naayat a Dios, isu ket naparabur kadatayo. Insurat ni adalan a Santiago: “Tunggal naimbag a sagut ken tunggal naan-anay a rangkap aggapu iti ngato, ta bumaba dayta manipud iti Ama dagiti nailangitan a lawag.” (Sant. 1:17) Nakaparparabur ti Dios kadagidiay agpapaiwanwan kenkuana.

⁵ Kamaudiananna, mannakabalin-amin ni Jehova. Kinuna ti salmista mainaig iti dayta: “Ti asinoman nga agnanaed iti nalimed a lugar ti Kangatuan ikagumaannanto ti mangala iti pagdagusan iti sidong ti mismo a salinong Daydiay Mannakabalin-amin. Kunaekto ken Jehova: ‘Sika ti kamangko ken salindegko, Diosko, a pagtalkakto.’” (Sal. 91:1, 2) No surotentayo ti panangiwanwan ni Jehova, pinagbalintayo a kamangtayo ti Dios a di pulos mapaay. Uray no maipasangotayo iti ibubusor, saranayennatayo ni Jehova. Dinatay pulos baybay-an. (Sal. 71:4, 5; Basaenyo ti Proverbio 3:19-26.) Wen, ammo ni Jehova no ania ti kasayaatan para kadatayo ken kayatna nga aramiden dayta yantangay kabaelanna. Kinamaag no iyaleng-alengtayo ti panangiwanwanna! Ngem kaano a kasapulantayo dayta a panangiwanwanna?

Kaano a Kasapulantayo ti Panangiwanwan ti Dios?

6, 7. Kaanotayo a kasapulan ti panangiwanwan ni Jehova?

⁶ Siempre, kasapulantayo ti panangiwanwan ti Dios iti unos ti panagbiagtayo, manipud kinaubing agingga iti kinalakay wenno kinabakettayo. Kinuna ti salmista: “Daytoy a Dios isu ti Diostayo agingga iti tiempo a di nakedngan, iti mismo nga agnanayon. Isu ibagnosnatayto agingga a mataytayo.” (Sal. 48:14) Kas iti salmista, nainsiriban a kanayon nga agpaiwanwan dagiti Kristiano iti Dios.

⁷ Nupay kasta, adda dagiti gundaway a nangnangruna a kasapulantayo ti agpatulong. No dadduma, maipasangotayo “kadagiti nakaro a pakarigatan,” kas koma iti pannakaidadanes, nakaro a sakit, wenno di ninamnama a pannakaikkat iti trabaho. (Sal. 69:16, 17) Kadagita a gundaway, makaliwliwa ti umadani ken Jehova yantangay ammotayo a tulongannatayo nga agibtur ken iwanwannatayo a mangaramid kadagiti umiso a desision. (Basaenyo ti Salmo 102:17.) Kasapulantayo met ti tulongna iti dadduma pay a situasion. Kas pagarigan, no ikasabatayo ti naimbag a damag ti Pagarian kadagiti kaarrubatayo, masapul nga agpaiwanwantayo ken Jehova tapno agbalin nga epektibo ti panangasabatayo. Ken no adda dagiti masapul a desisionantayo​—mainaig man dayta iti panaglinglingay, panagkawkawes ken panaglanglanga, pannakikadua, panggedan, edukasion, ken dadduma pay​—​agbalin laeng a nainsiriban dayta no maitunos kadagiti pagannurotan ni Jehova. Kinapudno, kasapulantayo ti giya iti amin nga aspeto ti biagtayo.

Dagiti Peggad ti Panagwaywayas

8. Ania dagiti impamatmat ti pannangan ni Eva iti maiparit a bunga?

⁸ Laglagipentayo a kayat ni Jehova a situtulok, saan a mapilpilit, ti panagpaiwanwantayo kenkuana. Ni Eva ti kaunaan a tao a sipapakinakem a di nagpaiwanwan ken Jehova, ket ipakita ti kapadasanna no kasano kadakes ti pagbanagan ti kasta a tignay. Ken ania ti ipamatmat ti inaramidna? Kinnan ni Eva ti maiparit a bunga gapu ta kayatna ti ‘agbalin a kas iti Dios, a makaammo iti naimbag ken dakes.’ (Gen. 3:5) Wen, kayatna nga alaen ti kalintegan ti Dios a mangikeddeng no ania ti naimbag ken dakes imbes a surotenna dagiti pagalagadan ni Jehova. Gapuna, inlaksidna ti kinasoberano ni Jehova. Kayatna nga isu ti mangeddeng para iti bagina. Nakalkaldaang ta kasta met laeng ti inaramid ti asawana a ni Adan.​—Roma 5:12.

9. No laksidentayo ti panangiwanwan ni Jehova, ania ti ditay bigbigbigen, ken apay a minamaag ti kasta a tignay?

⁹ No saantayo a suroten ti panangiwanwan ni Jehova, ipakpakitatayo a ditay bigbigbigen ti kinasoberanona. Alaentayo a pagarigan ti maysa a nairuam nga agbuybuya iti pornograpia. No isu ket kameng ti kongregasion Kristiano, ammona dagiti pagalagadan ni Jehova iti daytoy a banag. No kasano a dagiti saan a nadalus a bambanag rumbeng a di man la koma madakamat, dakdakes pay ti panangbuya kadagita buyogen ti panaggartem. (Efe. 5:3) No ti Kristiano dina suroten dagita a pagalagadan ni Jehova, laklaksidenna ti kinasoberano wenno kinaulo ni Jehova. (1 Cor. 11:3) Minamaag dayta a tignay yantangay kinuna ni Jeremias, “saan a kukua ti tao a magmagna uray ti panangiturong iti addangna.”​—Jer. 10:23.

10. Apay a nasken nga usarentayo a nainsiriban ti wayawayatayo nga agikeddeng?

¹⁰ Mabalin a di umanamong ti dadduma iti kinuna ni Jeremias yantangay irasonda nga inikkannatayo ni Jehova iti wayawaya nga agikeddeng isu a dinatay mababalaw no kasanotayo nga usaren dayta. Kaskasdi, ditay liplipatan a ti wayawaya nga agikeddeng ket maysa a responsabilidad ken sagut. Adda sungsungbatantayo kadagiti bambanag a sawen wenno aramidentayo. (Roma 14:10) Kinuna ni Jesus: “Ti naruay iti puso sawen ti ngiwat.” Innayonna pay: “Rummuar manipud puso dagiti nadangkes a panagrasrason, panangpapatay, pannakikamalala, pannakiabig, panagtakaw, ulbod a pammaneknek, panagtabbaaw.” (Mat. 12:34; 15:19) Wen, ipalgak ti sasao ken aramidtayo no ania ti kasasaad ti pusotayo. Ipakitada no ania a talaga ti katataotayo. Dayta ti makagapu nga iti amin a paset ti biagtayo, nainsiriban nga agpaiwanwantayo ken Jehova. Iti kasta, masarakan ni Jehova a ‘napalungdo ti pusotayo’ ket pakitaannatayo iti ‘kinaimbag.’​—Sal. 125:4.

11. Ania ti maadaltayo iti kapadasan ti Israel?

¹¹ Laglagipenyo ti kapadasan ti Israel. Sinalakniban ida ni Jehova idi nangaramidda kadagiti umiso a pangngeddeng ken nagtulnogda kadagiti bilinna. (Jos. 24:15, 21, 31) Nupay kasta, masansan a di umiso ti panangusarda iti wayawayada nga agikeddeng. Idi kaaldawan ni Jeremias, kinuna kadakuada ni Jehova: “Saanda nga immimdeng, saanda met nga inyallingag ti lapayagda, no di ket nagnada kadagiti panagem iti kinasungit ti dakes a pusoda, iti kasta nagpasanud ti turongda ket saan a nagpasango.” (Jer. 7:24-26) Anian a nakalkaldaang! Sapay koma ta ditay ipalubos a ti kinasukir wenno panangpennek iti tarigagay ti lasag ti mangituggod kadatayo a mangilaksid iti panangiwanwan ni Jehova ken magna iti bukodtayo a sirib, iti kasta, arigna a ‘nagpasanud imbes a nagpasangotayo’!

Kasanotayo a Matungpal ti Balakad ti Dios?

12, 13. (a) Apay a kayattayo ti agpaiwanwan ken Jehova? (b) Apay a napateg ti pammati?

¹² Gapu ta ay-ayatentayo ni Jehova, kayattayo ti agpaiwanwan kenkuana. (1 Juan 5:3) Nupay kasta, impatuldo ni Pablo ti maysa a banag a kasapulantayo idi kinunana: “Magmagnakami babaen ti pammati, saan a babaen ti panagkita.” (2 Cor. 5:6, 7) Apay a napateg ti pammati? Iturongnatayo ngamin ni Jehova “kadagiti desdes ti kinalinteg,” desdes a di agturong iti kinabaknang wenno pannakaidayaw iti daytoy a lubong. (Sal. 23:3) Gapuna, ti mata ti pammatitayo masapul a naipamaysa kadagiti awan kaaspingna a naespirituan a gunggona nga iyeg ti panagserbi ken Jehova. (Basaenyo ti 2 Corinto 4:17, 18.) Ken tumulong ti pammati tapno agbalintayo a kontento kadagiti material a banag a talaga a kasapulantayo.​—1 Tim. 6:8.

¹³ Impamatmat ni Jesus a ti pudno a panagdayaw kalikagumanna ti espiritu ti panagsakripisio, banag nga agkasapulan iti pammati. (Luc. 9:23, 24) Dadduma a matalek nga adipen nagaramidda kadagiti dakkel a panagsakripisio, nga ib-ibturanda ti kinapanglaw, panangirurumen, panangidumduma, ken nakaro a pannakaidadanes. (2 Cor. 11:23-27; Apoc. 3:8-10) Sirarag-o a naaramidanda dayta gapu ta natibker ti pammatida. (Sant. 1:2, 3) No natibker ti pammatitayo, naan-anay nga agtalektayo a kanayon ken agnanayon a pagimbagantayo ti panagpaiwanwan ken Jehova. Awan panagduaduatayo a dakdakkel nga amang ti magunggona dagidiay agtultuloy nga agibtur ngem iti aniaman nga agdama a rigat a mapaspasaranda.​—Heb. 11:6.

14. Apay a masapul nga agpakumbaba ni Agar?

¹⁴ Ti panagpaiwanwan ken Jehova kalikagumanna met ti kinapakumbaba. Paneknekan dayta ti kapadasan ni Agar nga adipen ni Sara. Gapu ta lupes ni Sara, intedna ken Abraham ti adipenna a babai, ket nagsikog. Kalpasanna, linalais ni Agar ti lupes nga apona a babai. Gapuna, “rinugian nga umsien” ni Sara ti adipenna isu a nagtalaw ni Agar. Maysa nga anghel ni Jehova ti nakisarita ken Agar ket kinunana kenkuana: “Agsublika iti apom-a-babai ket ipakumbabam ti bagim iti sidong ti imana.” (Gen. 16:2, 6, 8, 9) Mabalin a saan a dayta ti balakad a kayat a mangngeg ni Agar. Sigun iti bilin ti anghel, masapul nga iwaksi ni Agar ti kinatangsitna. Imbag laengen ta sipapakumbaba nga impangagna ti anghel isu a naipasngay ti anakna a ni Ismael iti natalged a poder ti ama ti ubing.

15. Mangted iti sumagmamano a kasasaad a nalabit agkalikagum iti panagpakumbaba tapno masurottayo ti balakad ni Jehova.

¹⁵ Tapno masurottayo ti panangiwanwan ni Jehova, nalabit a kasapulantayo met ti agpakumbaba. Nalabit a masapul a bigbigen ti dadduma a saan a makaay-ayo ken Jehova ti maysa a kita ti panaglinglingay a magusgustuanda. Wenno mabalin nga adda napasaktan ti maysa a Kristiano ket masapul nga agpadispensar. Wenno nalabit adda naaramidna a kamali ket masapul nga aminenna dayta. Kasano no nakaaramid iti nadagsen a basol ti maysa? Masapul nga agpakumbaba ket ipudnona ti basolna kadagiti panglakayen. Nalabit a mailaksid pay ketdi ti maysa. Tapno maisubli iti kongregasion, masapul a sipapakumbaba nga agbabawi ken agbalbaliw. Kadagiti kasta a kasasaad, makaliwliwa dagiti sasao ti Proverbio 29:23: “Ti mismo a kinatangsit ti naindagaan a tao mamagpakumbabanto kenkuana, ngem daydiay napakumbaba iti espiritu mangpetpetto iti dayag.”

Kasano nga Iwanwanwannatayo ni Jehova?

16, 17. Kasano a naan-anay a magunggonaantayo iti nadiosan a panangiwanwan a masarakan iti Biblia?

¹⁶ Ti kangrunaan a gubuayan ti nadiosan a panangiwanwan isu ti Biblia, ti impaltiing ti Dios a Saona. (Basaenyo ti 2 Timoteo 3:16, 17.) Tapno naan-anay a makagunggona kadatayo ti Biblia, saan a nainsiriban nga urayentayo a maipasangotayo iti narigat a situasion sakbay nga agpaiwanwantayo iti Kasuratan. Imbes ketdi, iyugalitayo ti agbasa iti Biblia iti inaldaw. (Sal. 1:1-3) Iti kasta, makabesadotayo dagiti naipaltiing a mensahena ken masursurotayo a tuladen ti panagpampanunot ti Dios. Kas resultana, nakasaganatayo a mangsango uray kadagiti di ninamnama a parikut.

¹⁷ Napateg met nga utoben dagiti mabasatayo iti Kasuratan ken ikararagtayo dayta. Usigentayo no kasano nga espesipiko a mayaplikartayo dagiti bersikulo a mabasatayo. (1 Tim. 4:15) No maipasangotayo kadagiti nakaro a parikut, ikararagtayo ken Jehova a tulongannatayo a mangbirok iti kasapulantayo a giya. Ipalagip kadatayo ti espiritu ni Jehova dagiti makatulong a Nainkasuratan a prinsipio a nabasatayo iti Biblia wenno kadagiti publikasion a naibatay iti Biblia.​—Basaenyo ti Salmo 25:4, 5.

18. Kadagiti ania a pamay-an nga us-usaren ni Jehova ti Nakristianuan a panagkakabsattayo tapno iwanwannatayo?

¹⁸ Ti sabali pay a napateg a gubuayan ti panangiwanwan ni Jehova isu ti Nakristianuan a panagkakabsattayo. Ti napateg a paset dayta a panagkakabsat isu ti “matalek ken masirib nga adipen” ken ti representantena a Bagi a Manarawidwid, a regular a mangipapaay iti naespirituan a taraon babaen kadagiti nayimprenta a material ken kadagiti gimong ken asamblea. (Mat. 24:45-47; idiligyo ti Aramid 15:6, 22-31.) Malaksid iti dayta, adda pay dagiti nataengan a kakabsat, nangruna dagiti panglakayen, a kualipikado a mangipapaay iti personal a tulong ken Nainkasuratan a balakad. (Isa. 32:1) Adda sabali pay a napateg a gubuayan ti panangiwanwan para kadagiti agtutubo a kameng dagiti Kristiano a pamilia. Insaad ti Dios dagiti manamati a nagannakda tapno kanayon koma a pagpaiwanwananda.​—Efe. 6:1-3.

19. Ania dagiti bendision a tagtagiragsakentayo gapu ta agtultuloy nga agpapaiwanwantayo ken Jehova?

¹⁹ Wen, iwanwanwannatayo ni Jehova iti nagduduma a pamay-an ket masapul a naan-anay nga aprobetsarentayo dagita. No maipapan iti tiempo a matalek pay idi ti Israel, kinuna ni Ari David: “Kenka nagtalek dagiti ammami; nagtalekda, ket nagtultuloy nga inlisim ida. Kenka imkisda, ket nakatalawda a sitatalged; kenka nagtalekda, ket saanda a naibabain.” (Sal. 22:3-5) No agpaiwanwantayo ken Jehova buyogen ti panagtalek, ‘saantayto met a maibabain.’ Saanto a mapaay ti namnamatayo. No ‘iyadanitayo ken Jehova ti danatayo’ imbes nga agtalektayo iti bukodtayo a sirib, matagiragsaktayo ti aglaplapusanan a bendision uray ita. (Sal. 37:5) Ken no agtultuloytayo nga agibtur, agnanayonto dagita a bendision. Insurat ni Ari David: “Ni Jehova ket managayat iti kinahustisia, ket saannanto a panawan dagidiay nasungdona. Agingga iti tiempo a di nakedngan sigurado a masaluadandanto . . . Dagiti nalinteg tagikuaendanto ti daga, ket agtaengdanto nga agnanayon iti dayta.”​—Sal. 37:28, 29.

Mailawlawagyo Kadi?

• Apay nga agtalektayo iti panangiwanwan ni Jehova?

• Ania ti ipakpakitatayo no laksidentayo ti panangiwanwan ni Jehova?

• Ania ti sumagmamano a kasasaad a kasapulan nga agpakumbaba ti maysa a Kristiano?

• Kasano nga iwanwanwannatayo ita ni Jehova?

[Dagiti Ladawan iti panid 8]

Agpapaiwanwankayo kadi ken Jehova iti amin nga aspeto ti biagyo?

[Ladawan iti panid 9]

Inlaksid ni Eva ti kinasoberano ni Jehova

[Ladawan iti panid 10]

Ania a galad ti kasapulan ni Agar tapno matungpalna ti bilin ti anghel?