Ti Masursurotayo ken Jesus

Maipapan iti Panangtrato iti Sabsabali

Apay nga agbalin a naasi?

Naasikayo kadi uray no nauyong dagiti tattao kadakayo? No kayattayo a tuladen ni Jesus, masapul nga agbalintayo a naasi uray kadagiti manggura kadatayo. Kinuna ni Jesus: “No ayatenyo dagidiay mangay-ayat kadakayo, ania ti pagimbaganna kadakayo? Ta uray pay dagiti managbasol ayatenda dagidiay mangay-ayat kadakuada. . . . Iti kasupadina, itultuloyyo nga ayaten dagiti kabusoryo . . . , ket agbalinkayto nga annak ti Kangatuan, agsipud ta isu manangngaasi kadagiti awanan panagyaman ken nadangkes.”​—Lucas 6:32-36; 10:25-37.

Apay a mamakawan?

No agbidduttayo, kayattayo a pakawanennatayo ti Dios. Insuro ni Jesus a rumbeng nga ikararagtayo ti pammakawan ti Dios. (Mateo 6:12) Nupay kasta, imbaga met ni Jesus a pakawanennatayo laeng ti Dios no pakawanentayo ti sabsabali. Kinunana: “No pakawanenyo dagiti tattao kadagiti labsingda, pakawanennakayto met ti nailangitan nga Amayo; idinto ta no saanyo a pakawanen dagiti tattao kadagiti labsingda, uray ni Amayo saannanto a pakawanen dagiti labsingyo.”​—Mateo 6:14, 15.

Kasano nga agbalin a naragsak dagiti pamilia?

Nupay saan a pulos a nagasawa ni Jesus, adu ti masursurotayo kenkuana no kasano nga agbalin a naragsak ti pamilia. Babaen iti sao ken aramidna nangipasdek iti pagwadan a tuladentayo. Usigenyo dagiti sumaganad a tallo a punto:

1. Ti asawa a lalaki masapul nga ayatenna ti asawana a kas iti bagina. Nangipasdek ni Jesus iti pagwadan para kadagiti assawa a lallaki. Kinunana kadagiti adalanna: “Mangtedak kadakayo iti baro a bilin, nga ayatenyo ti maysa ken maysa.” Kas iti ania? “Kas iti panagayatko kadakayo,” kinunana. (Juan 13:34) Kas panangyaplikar iti daytoy a prinsipio kadagiti assawa a lallaki, kuna ti Biblia: “Assawa a lallaki, itultuloyyo nga ayaten dagiti assawayo, no kasano a ti Kristo inayatna met ti kongregasion ken inyawatna ti bagina a maipaay iti dayta . . . Iti kastoy a pamay-an rebbeng a dagiti lallaki ayatenda dagiti assawada a kas kadagiti bukodda a bagi. Ti agayat iti asawana a babai ay-ayatenna ti bagina, ta awan pay a pulos ti tao a nanggura iti bukodna a lasag; no di ket taraonan ken ipatpategna dayta, a kas met ti panangipateg ti Kristo iti kongregasion.”​—Efeso 5:25, 28, 29.

2. Dagiti agassawa masapul nga agmatalekda iti maysa ken maysa. Basol iti Dios ti pannakidenna iti saanmo nga asawa ken mangdadael dayta kadagiti pamilia. Kinuna ni Jesus: “Saanyo aya a nabasa . . . ‘Iti daytoy a rason, ti maysa a lalaki panawannanto ti amana ken ti inana ket makitiponto iti asawana, ket dagiti dua maymaysadanton a lasag’? Iti kasta, saandan a dua no di ket maymaysadan a lasag. Gapuna, ti pinagsinnangol ti Dios saan koma a pagsinaen ti tao. . . . Kunak kadakayo a ti siasinoman a mangidiborsio iti asawana a babai malaksid no maibatay iti pannakiabig, ket mangasawa iti sabali makaaramid iti pannakikamalala.”​—Mateo 19:4-9.

3. Dagiti annak masapul nga agpasakupda kadagiti dadakkelda. Nupay perpekto ni Jesus ken imperpekto dagiti nagannakna, isu ket natulnog kadakuada uray idi ubing pay. Kuna ti Biblia maipapan ken Jesus idi agtawen iti 12: “Simmalog a kaduada [dagiti dadakkelna] ket dimteng idiay Nazaret, ket nagtultuloy a nagpasakup kadakuada.”​—Lucas 2:51; Efeso 6:1-3.

Apay nga iyaplikar dagitoy a prinsipio?

Maipapan kadagiti leksion nga insurona kadagiti adalanna, kinuna ni Jesus: “No ammoyo dagitoy a banag, naragsakkayo no aramidenyo ida.” (Juan 13:17) Tapno maibilangtayo kas pudno a Kristiano, masapul nga iyaplikartayo ti balakad nga inted ni Jesus maipapan iti panangtrato kadagiti sabsabali. Kinunana: “Babaen iti daytoy maammuanto ti isuamin a dakayo dagiti adalak, no addaankayo iti ayat iti maysa ken maysa.”​—Juan 13:35.

Para iti ad-adu pay nga impormasion, kitaenyo ti kapitulo 14 ti libro nga Ania a Talaga ti Isursuro ti Biblia?a

[Footnote]

[Ladawan iti panid 16, 17]

Ti pangngarig ni Jesus maipapan iti barayuboy nga anak isurona kadatayo ti kinapateg ti kinamanangngaasi ken panangpakawan.​—Lucas 15:11-32

[Ladawan iti panid 17]

Dagiti agassawa masapul nga agmatalekda iti maysa ken maysa