Panagserbi iti Dios Buyogen ti “Maymaysa a Puso ken Kararua”
DAGITI Judio ken proselita ket inaribungbonganda dagiti adalan ni Jesu-Kristo. Madama idi ti Piesta ti Pentecostes ket napan idiay Jerusalem dagita a sangaili a naggapu pay idiay Roma iti laud ken Partia iti daya. Nupay agduduma ti lenguaheda, kinasarita ida dagiti adalan ni Jesus a taga-Galilea. Inyimtuod ti dadduma kadagiti masmasdaaw a sangaili: “Kasano a mangmangngegtayo, tunggal maysa kadatayo, ti bukodna a pagsasao a nakayanakantayo?”—Ara. 2:8.
Timmakder ni apostol Pedro ket inlawlawagna ti makagapu iti milagro a maim-imatanganda. Dagus nga inawat dagiti tattao ti mensahe. Rinibu ti nabautisaran! (Ara. 2:41) Nupay nagbiit a dimmakkel ti kongregasion, nagtultuloy ti panagkaykaysa dayta. Kinuna ni Lucas a mannurat ti Biblia a “ti umariwekwek kadagidiay namati addaanda iti maymaysa a puso ken kararua.”—Ara. 4:32.
Rinibu kadagiti nabautisaran idi aldaw ti Pentecostes 33 K.P. ti nagtalinaed iti Jerusalem iti napapaut a tiempo tapno maammuanda ti ad-adu pay maipapan iti kabbaro a pammatida. Ngem saanda a nakasagana nga agbayag iti Jerusalem. Gapuna, adda naaramid a temporario a panagur-or iti pinansial a tulong. Adda dagiti manamati a boluntario a nangilako kadagiti kupkupikopanda sada inyeg kadagiti apostol dagiti naglakuanda tapno maiwaras kadagiti agkasapulan. (Ara. 2:42-47) Anian a kinamanagayat ken kinaparaburda!
Dagiti pudno a Kristiano ket kanayon nga addaanda iti kasta a naayat ken managparabur a kababalin. Ti kongregasion Kristiano ita ket agtultuloy nga agserserbi ken Jehova a sangsangkamaysa buyogen ti “maymaysa a puso ken kararua.” Us-usaren ti tunggal Kristiano ti panawen, pigsa, ken pondona a mangikasaba iti naimbag a damag ken mangsuporta kadagiti interes ti Pagarian ti Dios.—Kitaenyo ti kahon a “Dagiti Pamay-an ti Dadduma a Mangted.”
[Kahon iti panid 6, 7]
DAGITI PAMAY-AN TI DADDUMA A MANGTED
DAGITI KONTRIBUSION ITI SANGALUBONGAN A TRABAHO
Adu ti mangilasin iti kantidad tapno itinnagda kadagiti kahon ti kontribusion a namarkaan iti “Worldwide Work.”
Dagiti kongregasion ket binulan nga ipatulodda dagitoy a kantidad iti opisina dagiti Saksi ni Jehova iti pagilianda. Dagiti nakatseke a donasionyo a kuarta ket mabalin met nga ipatulodyo a direkta iti Watch Tower Bible and Tract Society of the Philippines, Inc., P.O. Box 2044, 1060 Manila, wenno iti sanga nga opisina dagiti Saksi ni Jehova iti pagilianyo. Dagiti tseke a maipatulod iti nadakamat nga adres ket nasken a maipanagan iti “Watch Tower Society.” Mabalin met nga idonar dagiti alahas wenno dadduma pay a napapateg a bambanag. Dagita a kontribusion ket masapul a mapakuyogan iti ababa a surat a mangibagbaga a dayta ket direkta a sagut.
KONDISIONAL A DONASION
Ti kuarta ket mabalin a maitalek iti Watch Tower Society tapno mausar iti sangalubongan a trabaho. Ngem maisubli dayta no kiddawen ti nangitalek. Para iti kanayonan nga impormasion, makiumankayo iti Treasurer’s Office iti nadakamat nga adres.
NAIPLANO A PANAGIDONAR
Malaksid kadagiti direkta a sagut ken kondisional a donasion a kuarta, adda dagiti sabali pay a pamay-an ti panagidonar a makatulong iti sangalubongan a panagserbi nga agpaay iti Pagarian. Karaman ditoy ti:
Insurance: Mabalin a ti Watch Tower Society ti mainaganan kas benepisiario ti life insurance policy wenno ti retirement/pension plan.
Deposito iti Banko: Dagiti deposito iti banko, sertipiko ti deposito, wenno indibidual a deposito iti panagretiro ket mabalin nga italek wenno maipanagan iti Watch Tower Society inton matay ti nagidonar, a mayannurot kadagiti paglintegan ti banko iti lugaryo.
Stock ken Bond: Mabalin nga idonar dagiti stock ken bond iti Watch Tower Society kas direkta a sagut.
Lote ken Pasdek: Mabalin nga idonar ti lote wenno pasdek kas direkta a sagut wenno, iti kaso ti maysa a balay, mapalubosan nga agnaed sadiay ti nagdonar bayat a sibibiag. Makiumankayo iti sanga nga opisina iti pagilianyo sakbay a legal nga ipanaganyo iti Watch Tower ti titulo ti aniaman a lote, balay, wenno pasdekyo.
Gift Annuity: Iti daytoy nga urnos, ti nagidonar iyakarna ti kuarta wenno dagiti security iti maysa a natudingan a korporasion nga us-usaren dagiti Saksi ni Jehova. Ti nagidonar, wenno daydiay tinudinganna, ket makaawat met iti espesipiko a kantidad kada tawen bayat a sibibiag. Makissayan ti buis a bayadan ti nagidonar iti tawen a mapatalgedan ti gift annuity.
Testamento ken Bambanag a Maitalek (Trust Fund): Mabalin nga ipatawid ti sanikua wenno kuarta iti Watch Tower Society babaen ti legal a testamento, wenno ti Watch Tower Society ti mainaganan kas benepisiario ti katulagan mainaig kadagiti bambanag a maitalek. Mabalin nga adda dagiti magun-odan a benepisio iti panagbuis no narelihiosuan nga organisasion ti benepisiario ti trust.
Kas ipasimudaag ti termino a “naiplano a panagidonar,” kalikaguman daytoy ti panagplano daydiay agidonar. Tapno matulongan dagidiay agtarigagay a tumulong iti sangalubongan a trabaho dagiti Saksi ni Jehova babaen ti maysa a kita ti naiplano a panagidonar, naisagana ti Ingles ken Espaniol a broshur a napauluan iti Charitable Planning to Benefit Kingdom Service Worldwide. Naisurat daytoy a broshur tapno maipakaammo no ania ti nadumaduma a wagas a mabalin a maited dagiti sagut wenno tawid inton matay ti nagdonar. Kalpasan a nabasada ti broshur ken nakiumanda kadagiti bukodda a mammagbaga mainaig iti linteg wenno buis, adu dagidiay nakatulong iti narelihiosuan ken pangsaranay a trabaho dagiti Saksi ni Jehova iti intero a lubong ken naaprobetsarda dagiti benepisio mainaig iti panagbuis gapu iti panangaramidda iti kasta. Magun-od daytoy a broshur manipud iti Charitable Planning Office.
Para iti kanayonan nga impormasion, agsurat wenno agteleponokayo iti Charitable Planning Office, iti adres a nailista iti baba, wenno makiumankayo iti sanga nga opisina dagiti Saksi ni Jehova iti pagilianyo.
Charitable Planning Office
Watch Tower Bible and Tract Society of the Philippines, Inc.
186 Roosevelt Avenue, San Francisco del Monte
1105 Quezon City
Telepono: (02) 411-6090