Determinado a Mangipaay iti Naan-anay a Panangsaksi
“Imbilinna a mangasabakami kadagiti tattao ken mangipaay iti naan-anay a pangsaksi.”—ARA. 10:42.
1. Ania nga annongen ti intampok ni Pedro idi kasarsaritana ni Cornelio?
ADDA dakkel a panagbalbaliw mainaig iti pannakilangen ti Dios kadagiti tattao. Nangrugi dayta idi a ti opisial ti buyot ti Italia a ni Cornelio, maysa a managbuteng iti Dios, inummongna dagiti kakabagian ken gagayyemna. Kinuna kadakuada ni apostol Pedro a naibilin kadagiti apostol a ‘mangasabada kadagiti tattao ken mangipaayda iti naan-anay a panangsaksi’ maipapan ken Jesus. Nagbalin a nabunga ti panangsaksi ni Pedro. Dagiti di nakugit a Gentil immawatda iti espiritu ti Dios, nabautisaranda, ken naaddaanda iti namnama a makipagari ken Jesus idiay langit. Anian a nagsayaat a resulta ti naan-anay a panangsaksi ni Pedro!—Ara. 10:22, 34-48.
2. Kasanotayo nga ammo a saan a limitado kadagiti 12 nga apostol ti bilin a panangsaksi?
2 Napasamak dayta idi 36 K.P. Agarup dua a tawen sakbayna, adda napasaran ti maysa a nakaro a bumusbusor iti Kristianidad a namagbalbaliw iti biagna. Ni Saulo iti Tarso ket agturong idiay Damasco idi nagpakita kenkuana ni Jesus, a nagkuna: “Sumrekka idiay siudad, ket maibaganto kenka ti masapul nga aramidem.” Ni Jesus impasiguradona ken adalan nga Ananias a mangipaay ni Saulo iti panangsaksi “kadagiti nasion kasta met iti ar-ari ken iti annak ti Israel.” (Basaen ti Aramid 9:3-6, 13-20.) Kinuna ni Ananias kenni Saulo: “Ti Dios dagidi ammatayo pinilinaka . . . agsipud ta agbalinka a saksi maipaay kenkuana kadagiti amin a tattao.” (Ara. 22:12-16) Kasano nga impateg ni Saulo, a naawagan iti Pablo idi agangay, ti annongenna a panangsaksi?
Naan-anay a Nangsaksi!
3. (a) Ania a salaysay ti usigentayo? (b) Ania ti inaramid dagiti panglakayen ti Efeso idi naawatda ti mensahe ni Pablo, ken nangted dayta iti ania a nasayaat nga ulidan?
3 Makapainteres nga adalen dagiti detalye ti amin nga inaramid ni Pablo idi agangay. Ngem ita, usigentayo ti maysa nga impalawag ni Pablo idi agarup 56 K.P., a nailanad iti Aramid kapitulo 20. Impalawag dayta ni Pablo idi dandani agpatingga ti maikatlo a panagdaliasatna kas misionero. Simmanglad idiay Mileto, a puerto iti Baybay Aegeano, ket pinaayabanna dagiti panglakayen ti kongregasion ti Efeso. Agarup 50 a kilometro ti kaadayo ti Efeso, nupay ad-adayo no suroten dagiti agsikkosikko a dalan. Mailadawanyo la ketdi ti kinagagar dagiti panglakayen idi naawatda ti mensahe ni Pablo. (Idilig ti Proverbio 10:28.) Sigurado nga implanoda ti agbiahe a mapan idiay Mileto. Nagbakasion kadi ti dadduma manipud iti trabahoda wenno inserrada ti pagtagilakuanda? Kasta ti ar-aramiden ita ti adu a Kristiano tapno awan ti malangananda uray maysa laeng a sesion iti tinawen a kombension distritoda.
4. Ania ti inaramid ni Pablo bayat ti kaaddana idiay Efeso iti sumagmamano a tawen?
4 Ania ngata ti inaramid ni Pablo idiay Mileto bayat ti tallo wenno uppat nga aldaw a panagurayna kadagiti panglakayen? No sika, ania ti aramidem? (Idilig ti Aramid 17:16, 17.) Adda maadaltayo kadagiti sinao ni Pablo kadagiti panglakayen ti Efeso. Insalaysayna ti kabibiagna kas ebanghelisador, agraman ti napasaranna idi idiay Efeso. (Basaen ti Aramid 20:18-21.) Sikokompiansa a kinunana: “Pagaammoyo unay no kasano a manipud idi umuna nga aldaw a bimmaddekak iti distrito ti Asia . . . naan-anay a nangsaksiak.” Wen, determinado a mangitungpal iti annongen nga inawatna ken Jesus. Kasano nga intungpalna dayta idiay Efeso? Ti maysa a pamay-an ket babaen ti panangasabana kadagiti Judio, a napan kadagiti lugar nga adu ti masarakanna a tao. Impadamag ni Lucas nga idi adda ni Pablo idiay Efeso idi agarup 52-55 K.P., isu ket ‘nangipaay kadagiti palawag ken nagusar iti panangguyugoy’ iti sinagoga. Idi a dagiti Judio “pinatangkenda ti bagbagida ket saanda a namati,” immakar ni Pablo iti sabali a paset ti siudad tapno kasabaanna ti sabsabali. Iti kasta, nakaipaay iti panangsaksi kadagiti Judio ken Griego iti dayta a dakkel a siudad.—Ara. 19:1, 8, 9.
5, 6. Apay a masiguradotayo a nangasaba met ni Pablo kadagiti di manamati?
5 Nagbalin a Kristiano ti dadduma a nakasabaan ni Pablo idiay Mileto ket idi agangay, nakualipikarda kas panglakayen. Impalagip kadakuada ni Pablo ti pamay-an nga inusarna: “Saanko a minedmedan ti panangibaga kadakayo ti aniaman kadagiti banag a makagunggona wenno uray ti panangisuro kadakayo iti publiko ken iti binalaybalay.” Iti panawentayo, ibaga ti dadduma a ti tuktukoyen ni Pablo ket ti trabaho a panangipastor kadagiti kapammatian. Ngem saan nga umiso dayta. Dagiti sasao a ‘panangisuro iti publiko ken iti binalaybalay’ kangrunaan a tuktukoyenna ti panangasaba kadagiti di manamati. Nabatad dayta kadagiti sumaganad a sasao ni Pablo idi kinunana a nangasaba “agpadpada kadagiti Judio ken kadagiti Griego maipapan ti panagbabawi iti Dios ken ti pammati ken Apotayo a Jesus.” Nalawag a nangipaay ni Pablo iti panangsaksi kadagiti di manamati, yantangay kasapulanda ti agbabawi ken mangipakita iti pammati ken Jesus.—Ara. 20:20, 21.
6 Iti maysa a naan-anay a panangusig iti Kristiano a Griego a Kasuratan, kastoy ti kinuna ti maysa nga eskolar maipapan iti Aramid 20:20: “Tallo a tawen a nangasaba ni Pablo idiay Efeso. Nangasaba iti tunggal balay, wenno iti amin a tao (bersikulo 26). Maysa dayta a pammaneknek a nainkasuratan ti panangasaba iti binalaybalay agraman ti panangasaba iti publiko a lugar.” Literal man a nangasaba ni Pablo iti tunggal balay wenno saan, di kayat ni Pablo a lipaten dagiti panglakayen ti Efeso no kasano ti pamay-anna a nangasaba ken no ania dagiti resultana. Kinuna ni Lucas: “Amin dagidiay agnanaed iti distrito ti Asia nangngegda ti sao ti Apo, agpadpada dagiti Judio ken dagiti Griego.” (Ara. 19:10) Ngem apay a makuna a nangngeg ti “amin” a taga-Asia, ken ania ti ipasimudaag dayta maipapan iti trabahotayo a panangasaba?
7. Kasano a nakadanon ti mensahe uray kadagidiay saan a direkta a nakasabaan ni Pablo?
7 Babaen ti panangasaba ni Pablo iti publiko a lugar ken iti binalaybalay, adu ti nakangngeg iti mensahena. Amin ngata a nakangngeg iti mensahe ni Pablo ket nagtalinaed idiay Efeso, nga awan kadakuada ti immakar gapu iti negosio wenno kakabagian, wenno tapno panawanda ti okupado a biag iti dakkel a siudad? Saan la ketdi. Adu ita ti immakar gapu kadagiti kasta a rason; nalabit uray dakayo. Dimmayo met idi ti dadduma idiay Efeso gapu kadagiti kakabagian wenno negosio. Bayat ti kaaddada sadiay, nalabit a nakasaritada ni Pablo wenno nangngegda a mangaskasaba. Ania ti inaramidda idi nagawidda? Nangasaba dagidiay immawat iti kinapudno. Nalabit a saan a nagbalin a manamati ti dadduma ngem mabalin nga insaritada ti nangngegda bayat ti kaaddada idiay Efeso. Gapuna, dagiti kakabagian, kaarruba, wenno klienteda, nangngegda ti mensahe ti kinapudno ket inawat dayta ti dadduma. (Idilig ti Marcos 5:14.) Ania ti ipakita dayta maipapan iti mabalin a resulta ti naan-anay a panangsaksi?
8. Kasano a nagsaknap ti mensahe ti kinapudno iti intero a distrito ti Asia?
8 No maipapan iti immun-una a ministeriona idiay Efeso, insurat ni Pablo a ‘naluktan kenkuana ti maysa a dakkel a ruangan a mangiturong iti panagaramid.’ (1 Cor. 16:8, 9) Ania dayta a ruangan, ken kasano a nailukat kenkuana? Ti nagtultuloy a panangasaba ni Pablo idiay Efeso ket nagresulta iti pannakaisaknap ti naimbag a damag. Usigentayo ti Colosas, Laodicea, ken Hierapolis, tallo a siudad iti ruar ti Efeso. Saan a pulos a napan ni Pablo kadagita a siudad, ngem nakadanon ti naimbag a damag kadagiti umili, a kas ken Epafras. (Col. 2:1; 4:12, 13) Nangngeg ngata ni Epafras ti panangasaba ni Pablo idiay Efeso isu a nagbalin a Kristiano? Saan nga ibaga ti Biblia. Ngem idi inkasaba ni Epafras ti kinapudno iti lugarda, mabalin nga isu ti nagserbi kas pannakabagi ni Pablo. (Col. 1:7) Nalabit a nagsaknap met ti Nakristianuan a mensahe agingga kadagiti siudad ti Filadelfia, Sardis, ken Tiatira bayat dagiti tawen a mangaskasaba ni Pablo idiay Efeso.
9. (a) Ania ti naimpusuan a tarigagay ni Pablo? (b) Ania ti teksto para iti tawen 2009?
9 Gapuna, adda rason a dagiti panglakayen ti Efeso anamonganda dagiti sasao ni Pablo: “Diak ilalaen ti kararuak a kas napateg kaniak, maturposko la ketdi ti tarayek ken ti ministerio nga inawatko ken Apo Jesus, tapno naan-anay a mangsaksiak iti naimbag a damag ti di kaikarian a kinamanangngaasi ti Dios.” Dayta a bersikulo ti nakaadawan ti makapabileg ken makaguyugoy a teksto para iti tawen 2009: “Naan-anay a mangsaksiak iti naimbag a damag.”—Ara. 20:24.
Naan-anay a Panangsaksi Ita
10. Kasanotayo nga ammo a masapul met a naan-anaytayo a mangsaksi?
10 Saan laeng a dagiti apostol ti nabilin a ‘mangasaba kadagiti tattao ken mangipaay iti naan-anay a panangsaksi.’ Idi a ti napagungar a ni Jesus kinasaritana dagiti adalanna a naummong idiay Galilea, a nalabit agdagup iti 500, imbilinna: “Inkayo ngarud ket mangaramidkayo iti ad-adalan kadagiti tattao iti amin a nasion, a bautisaranyo ida iti nagan ti Ama ken ti Anak ken ti nasantuan nga espiritu, nga isuroyo kadakuada a tungpalenda ti amin a bambanag nga imbilinko kadakayo.” Agaplikar met dayta a bilin kadagiti amin a pudno a Kristiano ita, kas ipakita dagiti sasao ni Jesus: “Adtoy! addaak kadakayo iti amin nga al-aldaw agingga iti panungpalan ti sistema ti bambanag.”—Mat. 28:19, 20.
11. Iti ania a napateg a trabaho nga agdindinamag dagiti Saksi ni Jehova?
11 Dagiti naregta a Kristiano itultuloyda a tungpalen dayta a bilin, nga ikagkagumaanda ti ‘mangipaay iti naan-anay a panangsaksi iti naimbag a damag.’ Ti maysa a kangrunaan a pamay-an tapno maitungpal dayta ket babaen iti dinakamat ni Pablo kadagiti panglakayen ti Efeso—ti panangasaba iti binalaybalay. Iti 2007 a libro maipapan iti epektibo a panagmisionero, kinuna ni David G. Stewart, Jr.: “Mas epektibo nga amang ti pamay-an dagiti Saksi ni Jehova a mangsanay kadagiti miembroda no kasano nga iranud ti pammatida ngem iti makariro, saan a nalawag [a sermon manipud iti pulpito]. Para kadagiti adu a Saksi ni Jehova, kaay-ayoda nga iranud dagiti patpatienda.” Ti resultana? “Idi 1999, adda laeng 2 agingga iti 4 a porsiento kadagiti tattao a napagsaludsodak manipud iti dua a pagilian iti Makindaya a Europa ti nangibaga a kinasabaan ida dagiti misionero ti Latter-day Saints wenno ‘Mormon.’ Nasurok a 70 a porsiento ti nangibaga a personal a kinasabaan ida dagiti Saksi ni Jehova, masansan iti adu pay a daras.”
12. (a) Apay a maulit-ulit a sumarungkartayo kadagiti pagtaengan iti teritoriatayo? (b) Mangisalaysay iti kapadasan a mangipakita a nagbalbaliw ti kababalin ti maysa mainaig iti mensahetayo.
12 Nalabit a kasta met laeng ti komento dagiti kalugaranyo. Mabalin nga adda pasetmo iti dayta. Iti personal a panangasabayo iti binalaybalay, nakasaritayo dagiti lallaki, babai, ken agtutubo. Nalabit di nangipangag ti dadduma uray maulit-ulit nga agsublikayo. Mabalin a dadduma ti apagbiit a dimngeg bayat nga inranudyo ti maysa a teksto wenno sursuro ti Biblia. Ngem adda met dagidiay naipaayanyo iti nasayaat a panangsaksi ket nangipangagda. Posible amin dagita a kasasaad bayat a ‘mangipaaytayo iti naan-anay a panangsaksi iti naimbag a damag.’ Di mabilang dagiti kapadasan a mangipakita nga adda dagidiay saan nga interesado uray no maulit-ulitda a makasabaan. Ngem adda panagbalbaliw idi agangay. Nalabit adda napasamak kadakuada, wenno iti ay-ayatenda, a nangtignay iti isip ken pusoda nga umawat iti kinapudno. Ita, nagbalindan a kakabsattayo. Gapuna, dikay sumuko uray manmano ti masarakanyo nga interesado. Ditay namnamaen nga amin ket umawat iti kinapudno. Ngem namnamaen ti Dios nga itultuloytayo nga ipaay ti naan-anay a panangsaksi buyogen ti kinaanep ken kinaregta.
Dagiti Ditay Ammo a Resulta
13. Kasano a ti panangasabatayo mabalin a mangyeg kadagiti di ninamnama a resulta?
13 Saan laeng a dagiti direkta a kinasabaan ni Pablo ti nagbalin a Kristiano. Pudno met dayta iti ministeriotayo. Ikagumaantayo ti makiraman a regular iti panangasaba iti binalaybalay, nga iranudtayo ti mensahe iti isuamin agingga iti kabaelantayo. Isaritatayo ti naimbag a damag kadagiti kaarruba, katrabahuan, kaeskuelaan, ken kakabagian. Ammotayo kadi ti amin a resultana? Iti dadduma a kasasaad, mabalin a makitayo a dagus dagiti nasayaat a resultana. Iti sabali a kaso, sa la agramut ken dumakkel ti bin-i ti kinapudno iti puso ti maysa kalpasan ti sumagmamano a tiempo. Ken uray saan a kasta ti mapasamak, mabalin a dagiti tattao a nakasabaantayo isaritada kadagiti dadduma ti maipapan iti mensahe, patpatien, ken ti kababalintayo. Wen, mabalin a di inggagara a mayallatiwda ti mensahetayo kadagiti interesado a tattao.
14, 15. Ania dagiti resulta ti panangasaba ti maysa a kabsat a lalaki?
14 Kas pagarigan, usigentayo ti kapadasan ni Ryan ken ni baketna a Mandi, nga agnanaed iti Florida, E.U.A. Di pormal a kinasabaan ni Ryan ti katrabahuanna a lalaki a napadakkel iti pamilia a Hindu. Dayawenna ti panagkawkawes ken panagsasao ni Ryan. Adu a bambanag ti insarita kenkuana ni Ryan, kas iti panagungar ken kasasaad dagiti natay. Iti maysa a rabii ti Enero, dinamag ti lalaki kenni baketna a Jodi no ania ti ammona maipapan kadagiti Saksi ni Jehova. Katoliko ni baketna ken kinuna daytoy a ti laeng ammona maipapan kadagiti Saksi ket ti “panangasabada iti binalaybalay.” Isu a nagsirarak ni Jodi iti Internet babaen ti sao a “Saksi ni Jehova” ket nasarakanna ti Web site a www.watchtower.org. Iti sumagmamano a bulan, nagbasa ni Jodi kadagiti material a masarakan iti dayta a site, agraman iti Biblia ken kadagiti artikulo a naginteresanna.
15 Idi agangay, nagam-ammo da Jodi ken Mandi, nga agpada a nars. Naragsakan ni Mandi a nangsungbat kadagiti saludsod ni Jodi. Kalpasan ti sumagmamano a tiempo, kinuna ni Jodi a napagsaritaandan ti maipapan ken “Adan agingga iti Armagedon.” Nagpayadal ni Jodi iti Biblia. Di nagbayag, timmabunon kadagiti gimong iti Kingdom Hall. Idi Oktubre, nagbalin ni Jodi a di bautisado nga agibumbunannag sa nabautisaran idi Pebrero iti sumaganad a tawen. Kinunana: “Ita ta naammuakon ti kinapudno, nakaragragsak ken makapneken ti biagko.”
16. Ania ti maadaltayo iti kapadasan ti kabsat a taga-Florida maipapan iti panangikagumaan a mangipaay iti naan-anay a panangsaksi?
16 Di ninamnama ni Ryan a gapu iti panangasabana, adda maysa nga immawat iti kinapudno. Idi agangay, naammuanna ti resulta ti panangikagumaanna a ‘mangipaay iti naan-anay a panagsaksi.’ Mabalin a mangaskasabakayo met iti binalaybalay, pagtrabahuan, eskuelaan, wenno iti di pormal a pamay-an, ket diyo ammo a gapu iti dayta, nangngeg dagiti dadduma ti naimbag a damag. No kasano a ni Pablo dina naammuan ti amin a resulta ti panangasabana iti “distrito ti Asia,” nalabit a diyo met ammo ti amin a nasayaat a resulta ti naan-anay a panangsaksiyo. (Basaen ti Aramid 23:11; 28:23.) Kaskasdi, napateg nga itultuloyyo nga aramiden dayta!
17. Ania ti ikagumaantayo nga aramiden bayat ti 2009?
17 Bayat ti 2009, sapay koma ta ipapusotayo ti annongentayo a mangasaba iti binalaybalay ken iti dadduma pay a pamay-an. Iti kasta, mayebkastayo met ti kinuna ni Pablo: “Diak ilalaen ti kararuak a kas napateg kaniak, maturposko la ketdi ti tarayek ken ti ministerio nga inawatko ken Apo Jesus, tapno naan-anay a mangsaksiak iti naimbag a damag ti di kaikarian a kinamanangngaasi ti Dios.”
Ania ti Sungbatyo?
• Kasano a naan-anay a nangsaksi da apostol Pedro ken Pablo ken dagiti dadduma pay idi umuna siglo?
• Apay a mabalin a dakdakkel ti epekto ti panangasabatayo ngem iti ipagaruptayo?
• Ania ti teksto para iti tawen 2009, ken apay a maikunam a maitutop dayta?
[Blurb iti panid 19]
Ti teksto para iti tawen 2009 ket: “Naan-anay a mangsaksiak iti naimbag a damag.”—Ara. 20:24.
[Ladawan iti panid17]
Pagaammo dagiti panglakayen idiay Efeso a kanayon a mangaskasaba ni Pablo iti binalaybalay
[Ladawan iti panid 18]
Siasino dagiti mabalin a magunggonaan iti naan-anay a panangsaksiyo?