Salsaludsod Dagiti Agbasbasa
Iti Nehemias 8:10, naibaga kadagiti Judio a “kanenyo ti nataba a bambanag,” idinto ta ti Linteg iti Levitico 3:17 kunana: “Dikay pulos kanen ti aniaman a taba.” Kasano a mapagtunos dagitoy a teksto?
Iti orihinal a lenguahe, nagduma a termino ti nagtaudan ti sasao a “nataba a bambanag” iti Nehemias 8:10 ken ti “taba” iti Levitico 3:17. Ti Hebreo a sao a cheʹlev, a naipatarus kas “taba” iti Levitico 3:17, tuktukoyenna ti taba ti tao wenno animal. (Lev. 3:3; Uk. 3:22) Ti konteksto iti bersikulo 17 ipakitana a saan a mangan dagiti Israelita kadagiti taba a naikalupkop iti bagis ken iti bekkel dagiti maidaton nga animal wenno taba iti lomo gapu ta “ti isuamin a taba kukua ni Jehova.” (Lev. 3:14-16) Gapuna, ti naiparit a taba isu daydiay taba ti animal a maisakripisio ken Jehova.
Iti sabali a bangir, ti sao a naipatarus a “nataba a bambanag” iti Nehemias 8:10 ket mash·man·nimʹ, ken daytoy laeng ti nagparanganna iti Hebreo a Kasuratan. Naggapu daytoy iti berbo a sha·menʹ, a kaipapananna “lumukmeg, agpalukmeg.” Dagiti sasao a nainaig iti daytoy a berbo ket addaan iti anag a mangipasimudaag iti kinarang-ay ken kinasalun-at. (Idiligyo ti Isaias 25:6.) Ti maysa a sao a kaaduanna a nagtaud iti berbo a sha·men’ ket ti nombre a sao a sheʹmen a masansan a maipatarus kas “lana,” agraman ti ebkas a “lana ti olibo.” (Deut. 8:8; Lev. 24:2) Kas pannakaaramatna iti Nehemias 8:10, ti mash·man·nimʹ agparang a tuktukoyenna ti namanteka a taraon ken mabalin nga uray ti karne nga addaan iti taba. Ngem saanna a tuktukoyen ti puro a taba ti animal.
Nupay naparitan dagiti Israelita a mangan iti puro a taba ti animal, mabalinda ti mangan iti namanteka, nananam a taraon. Dadduma kadagitoy ket dagiti tinapay a naaramid manipud iti bukbukel, ken nailuto, saan nga iti taba ti animal, no di ket iti lana a nagtaud iti nateng, masansan iti olibo. (Lev. 2:7) Gapuna, ti Insight on the Scriptures ilawlawagna a “ti nataba a bambanag” a nadakamat ditoy “tuktukoyenna dagiti nananam ken namanteka a taraon, agraman dagiti naimas a taraon a nalaokan iti lana ti nateng, saan ket a dagiti taraon nga awanan iti taba wenno lana.”
Nupay kasta, laglagipen koma dagiti Kristiano a ti pannakaiparit a mangan iti taba ket paset ti Mosaiko a Linteg. Awanda iti sidong ti Linteg, agraman ti pagannurotan a nainaig kadagiti maidaton nga animal.—Roma 3:20; 7:4, 6; 10:4; Col. 2:16, 17.