Kasanoka a Makapagibtur iti Panangasabam?

NAPADASAM kadin ti napaksuyan ken naupay unay nga uray la kayatmon ti sumardeng a mangasaba? Ti nakaro nga ibubusor, danag, nakapuy a salun-at, panangimpluensia dagiti kakadua, wenno di panangikankano dagiti kaskasabaantayo ti nalabit mangsubok iti panagibturtayo. Ngem panunotem ti ulidan ni Jesus. Inibturanna dagiti kakaruan a pannubok “gapu iti rag-o a naikabil iti sanguananna.” (Heb. 12:2) Ammona a babaen ti panangpaneknekna a naan-anay a palso dagiti pammadakes maibusor iti Dios, parparagsakenna ti puso ni Jehova.​—Prov. 27:11.

No itultuloymo ti agibtur iti panangasabam, maparagsakmo met ti puso ni Jehova. Ngem kasano ngay no kasla mapukpukawen ti regtam a mangasaba gapu iti dadduma a lapped? Kastoy ti kinuna ni Krystyna, maysa a baket ken nakapuyen ti salun-atna: “Pasaray mabannog ken maldaangak. No dadduma, mapukaw ti kinaregtak gapu kadagiti parikut a nainaig iti kinabaketko kas iti nakapuyen a salun-at ken kadagiti inaldaw a pakaringgoran.” Kasanoka a makapagtultuloy a mangasaba iti laksid dagiti kasta a lapped?

Tuladem Dagiti Propeta

Tapno makapagtultuloy a mangasaba dagiti matalek nga agibumbunannag iti Pagarian, mabalinda nga ikagumaan a tuladen ti panagpampanunot dagiti nagkauna a propeta. Alaentayo a pagarigan ni Jeremias. Bimdeng idi damo a naayaban nga agserbi kas propeta. Nupay kasta, naibturanna ti narigat nga annongenna iti nasurok nga 40 a tawen agsipud ta nasursurona ti agtalek a naan-anay iti Dios.​—Jer. 1:6; 20:7-11.

Ti ulidan ni Jeremias ti mangparparegta ken Henryk. Kinunana: “Bayat ti panangaskasabak iti nasuroken a 70 a tawen, pasaray maupayak gapu iti reaksion dagiti tattao kas iti ibubusor wenno kinaaleng-alengda. Kadagita a kanito, lagipek ti ulidan ni Jeremias. Gapu iti ayatna ken Jehova ken iti natibker nga espiritualidadna, napabileg a mangitultuloy iti panagipadtona.” (Jer. 1:17) Maparparegta met ni Rafał iti ulidan ni Jeremias. Kinunana: “Imbes a sangkapanunot ni Jeremias ti bagina ken dagiti riknana, isu ket nagpannuray iti Dios. Situtured a nagtultuloy iti laksid ti nasaknap nga ibubusor. Dayta ti kanayon a pampanunotek.”

Ti ulidan ni propeta Isaias ti makatulong pay iti adu kadatayo nga agibtur iti panangasaba. Impakpakauna ti Dios nga isu ket di ipangag dagiti kailianna. “Pagbalinem a di makaawat ti puso daytoy nga ili, ket pagbalinem nga awanan panagtignay dagiti mismo a lapayagda,” kinuna ni Jehova. Sigurado kadin a mapaay ni Isaias? Saan no iti panangmatmat ti Dios! Idi naayaban nga agserbi kas propeta, kinunana: “Adtoyak! Ibaonnak.” (Isa. 6:8-10) Intultuloy ni Isaias ti annongenna. Kasta met kadi ti reaksionmo iti bilin a mangasabatayo?

Tapno makapagtultuloytayo a mangasaba iti laksid ti kinaaleng-aleng dagiti tattao, kas iti inaramid ni Isaias, nasken a palabsentay lattan dagiti negatibo a reaksion a pakaipasanguantayo. Kastoy ti pangparmek ni Rafał iti pannakaupayna: “Ikagumaak a baybay-an lattan dagiti makapasair nga ibagbaga ti tattao. Adda kalintegan dagiti tattao iti teritoriami a mangyebkas iti aniaman a kayatda.” Kinuna met ni Anna: “Iwaksik ti aniaman a di makaay-ayo wenno makapaupay. Ti makatulong kaniak a mangaramid iti dayta ket ti panagkararag ken ti panangusigko iti teksto iti aldaw sakbay a mapanak mangasaba. Mapukawen a dagus ti aniaman a negatibo a kapanunotan.”

Ni propeta Ezequiel ket nagserbi kadagiti nasubeg a Judio a naidestiero idiay Babilonia. (Ezeq. 2:6) No koma ta dina impakaammo kadagiti tattao ti mensahe ti Dios ken dina pinakdaaran ti nadangkes sakbay a matay, manungsungbat la ketdi ni Ezequiel ta kinuna kenkuana ni Jehova: “Ti darana singirekto iti bukodmo nga ima.”​—Ezeq. 3:17, 18.

Ikagkagumaan ni Henryk a tuladen ti panangmatmat ni Ezequiel: “Kayatko a nadalusak iti dara ti amin a tattao. Agpegpeggad ti napateg a biag dagiti tattao.” (Ara. 20:26, 27) Kasta met ti rikna ni Zbigniew: “Masapul idi nga itultuloy ni Ezequiel ti annongenna, aniaman ti pampanunoten ti sabsabali. Dayta ti tumultulong kaniak a mangtulad iti panangmatmat ti Namarsua no maipapan iti trabaho a panangasaba.”

Saanka nga Agmaymaysa

Saanka nga agmaymaysa no mangaskasabaka. Kas ken apostol Pablo, mabalintay a kunaen: “Katrabahuannakami ti Dios.” (1 Cor. 3:9) Ni Krystyna a nangadmitir a pasaray maupay, kinunana: “Dayta ti gapuna a kanayon nga iyararawko a pabilgennak ni Jehova. Pulos a dinak paayen.” Wen, kasapulantayo ti espiritu ti Dios a tumulong kadatayo iti panangasabatayo!​—Zac. 4:6.

No mangaskasabatayo, tultulongannatayo met ti nasantuan nga espiritu a mangiparangarang kadagiti galad a mangbukel iti “bunga ti espiritu.” (Gal. 5:22, 23) Dayta met ti makatulong kadatayo nga agtultuloy a mangasaba aniaman ti mapasamak. Kuna ni Henryk: “Ti panangasaba tultulongannak a mangpasayaat iti kinataok. Masursurok ti aganus, mangikabilangan, ken saan a nalaka a maupay.” Ti panagibtur a mangasaba iti laksid ti nadumaduma a lapped tulongannaka nga ad-adda a mangyaplikar iti bunga ti espiritu.

Us-usaren ni Jehova dagiti anghelna a mangiwanwan iti naisangsangayan a trabahotayo. (Apoc. 14:6) Ipalgak ti Biblia a “linaklaksa a laksa ken rinibu a ribu” dagita nga espiritu a parsua. (Apoc. 5:11) Babaen ti panangiturong ni Jesus, dagiti ad-adipen ti Dios ditoy daga ket supsuportaran dagiti anghel. Pampanunotem kadi dayta tunggal mangaskasabaka?

“Maparparegtaak no ut-utobek a kaduatayo dagiti anghel iti panangasaba,” kuna ni Anna. “Apresiarek ti tulong nga ipapaayda babaen ti panangiwanwan da Jehova ken Jesus.” Anian a pribilehio ti makipagtrabaho kadagiti matalek nga anghel!

Dagiti ngay padatayo nga agibumbunannag iti Pagarian? Naparaburantayo a makikadua iti dakkel a bunggoy dagiti matalek a Saksi. Awan duadua a napaneknekamon a pudno daytoy a proverbio iti Biblia: “Babaen iti landok, ti met laeng landok mapatadem. Gapuna ti maysa a tao patademenna ti rupa ti sabali.”​—Prov. 27:17.

Ti pannakikadua iti sabsabali iti panangasaba ipaayannatayo iti nagsayaat a gundaway a mangpaliiw kadagiti epektibo a pamay-an a nalabit kabbaro kadatayo. Kinuna ni Elżbieta, “Ti pannakikaduak iti nadumaduma nga agibumbunannag ipapaayannak kadagiti gundaway a maipakitak ti panagayatko kadagiti kapammatiak ken kadagiti kasabaanmi.” Padasem ti mangasaba a kadua ti nadumaduma nga agibumbunannag. Ad-addanto a makapainteres ti panangasabam.

Aywanam a Naimbag ti Bagim

Tapno kanayontayo a naregta a mangasaba, masapul nga agplanotayo a naimbag, addaantayo iti nasayaat a rutina ti personal a panagadal, ken umdas ti panaginanatayo. Iti sabali a pannao, masapul nga aywanantayo a naimbag ti naespirituan ken ti pisikal a salun-attayo.

Kuna ti Biblia: “Dagiti gakat daydiay nasaet sigurado a mangipaay iti pagsayaatan.” (Prov. 21:5) Kinuna ni Zygmunt, nga agtawenen iti 88: “Ti panagbalin a sistematiko iti serbisiok ti tumultulong kaniak a mangragpat kadagiti kalatko. Ur-urnosek a naimbag ti eskediulko tapno adda umdas a tiempok a mangasaba.”

Ti nauneg a pannakaammo iti Kasuratan pabilgen ken kabalannatayo iti panangasaba. No kasano a nasken a mangantayo tapno agtalinaedtayo a napigsa, masapul met a regular a mangipaunegtayo iti naespirituan a taraon tapno makapagtultuloytayo iti trabaho a panangasaba. Mapabilegtayo a mangasaba no inaldaw nga agbasatayo iti Sao ti Dios ken kadagiti naibasar-Biblia a publikasion kas ‘taraontayo iti umiso a tiempo.’​—Mat. 24:45-47.

Binalbaliwan ni Elżbieta ti estilo ti panagbiagna tapno mapasayaatna ti panangasabana. Kinunana: “Manmanoak itan nga agbuya iti telebision tapno ad-adu ti tiempok nga agsagana iti panangasabak. Iti rinabii a panagbasak iti Biblia, pampanunotek dagiti nakasabaanmi iti teritoriami. Agbirokak kadagiti teksto ken artikulo a nalabit makatulong kadakuada.”

Makatulong kenka ti umdas a panaginana tapno agtalinaedka a nakired ken naan-anay a mabaelam ti makipaset iti panangasaba. Iti sabali a bangir, ti nalabes a panagaliwaksay mabalin a di nasayaat ti epektona iti kalidad ti trabahom. Kinuna ti naregta nga agibumbunannag a ni Andrzej: “Nalakaka a mapaksuyan no kurang ti inanam, isu a nabibiitka a maupay. Ikagkagumaak a liklikan dayta.”​—Ecl. 4:6.

Nupay nakapingpingettayo, manmano laeng dagiti mangapresiar iti naimbag a damag. Ngem di pulos lipaten ni Jehova dagiti ar-aramidentayo. (Heb. 6:10) Uray no adu ti agkitakit a makisarita kadatayo, mabalin nga addanto latta ti maibagada apaman a makapanawtayo. Mabalin a ti epekto dayta ket umasping iti mabasatayo maipapan ken Ezequiel: Dagiti tattao “sigurado a maammuandanto . . . a ti maysa a mammadto a mismo adda iti tengngada.” (Ezeq. 2:5) Talaga a saan a kaskarina ti mangasaba, ngem adu ti makita a pagimbagan dayta kadatayo ken uray kadagidiay mangipangag kadatayo.

“Ti panangasaba tulongannatayo a mangikawes iti baro a personalidad ken mangipakita iti panagayattayo iti Dios ken kadagiti padatayo a tattao,” kinuna ni Zygmunt. “Maysa a pribilehio ti makipaset iti mangispal-biag a trabaho. Dinton maulit dayta iti kastoy a kasaknap ken kadagiti umasping a kasasaad,” innayon ni Andrzej. Nawadwad met a bendision ti masagrapmo bayat nga itultuloymo ita ti panangasabam.​—2 Cor. 4:1, 2.

[Dagiti Ladawan iti panid 31]

Tapno makapagibturtayo iti panangasaba, makatulong ti panangasikaso iti naespirituan ken pisikal a kasapulantayo