Panangpasiar iti Nakaskasdaaw a Pagimprentaan
MABALIN a saan la nga ita ti damo a pannakakitam iti kas daytoy magasin a basbasaem. Nalabit addan dagiti Saksi ni Jehova nga immay iti balayyo ken nangitukon kenka iti Pagwanawanan ken Agriingkayo! tapno matulongandaka nga ad-adda a mangtarus iti Biblia. Wenno mabalin a nakakitakan kadagiti Saksi a mangituktukon kadagita a naibasar-Biblia a literatura iti kalsada wenno iti tiendaan iti lugaryo. Kinapudnona, ti binulan a mayim-imprenta a kopia daytoy a magasin ket nasurok a 35 a milion, isu a kadagiti amin a narelihiosuan a magasin iti intero a lubong, daytoy ti kasasaknapan ti pannakaiwarasna.
Ngem pinampanunotmo kadin no sadino ken kasano a maar-aramid amin dagitoy a literatura? Tapno masungbatan dayta, pasiarentayo ti pagimprentaan idiay Wallkill, New York, E.U.A, a maysa laeng kadagiti nagadu a pagimprentaan dagiti Saksi ni Jehova iti nadumaduma a pagilian. Adu kadagiti agbasbasa kadagitoy a magasin iti intero a lubong ti saan a kaskarina a makapan iti pagimprentaan dagiti Saksi ni Jehova iti Estados Unidos, isu a daytoy a panagpasiar babaen kadagiti sao ken ladawan ti mabalin a makatulong kenka a mangammo iti ad-adu pay maipapan iti dayta a pagimprentaan.
Siempre, ti panagimprenta ket mangrugi iti naisurat a sasao. Babaen ti e-mail, maawat ti Graphics Department ti material a mayimprenta nga ipatulod ti Writing Department iti Brooklyn, New York. Dagita a material ti mausar iti panagaramid kadagiti printing plate. Idiay Wallkill, binulan nga agarup 1,400 a rolio ti papel ti maipan iti pagimprentaan, nga inaldaw a makaus-usar iti agarup 80 agingga iti 100 a tonelada a papel. Dagiti rolio—a dadduma kadagita ket agdagsen iti nasurok a 1,300 a kilo—ti maisubo iti lima a web-offset press, a nakaikabilan dagiti printing plate. Ti papel ket maimprentaan, maputed, ken makupin tapno agbalin a maysa a signature nga addaan iti 32 a panid. Ti magasin a basbasaem ket maysa a signature. Dagiti ngay libro? Iti bindery, dagiti signature ket mapagtitipon tapno mapagbalin kas libro. Iti agmalem laeng, ti maysa kadagiti dua a bindery ket makapataud iti 50,000 a natangken ti akkubna a libro wenno 75,000 a nalapiot ti akkubna a libro. Ti met maysa a bindery ket makapataud iti agarup 100,000 a nalapiot ti akkubna a libro.
Idi 2008, daytoy a pagimprentaan ket nakapataud iti nasurok a 28,000,000 a libro. Biblia ti nasurok a 2.6 a milion kadagita. Iti dayta met la a tawen, 243,317,564 a magasin ti nayimprenta. Nakabodega iti dayta a pagimprentaan dagiti kasta a literatura a naibasar iti Biblia iti agarup 380 a lenguahe. Ania ti sumaruno a mapasamak apaman a naaramiden dagiti literatura?
Ti pagimprentaan ket umawat kadagiti order manipud iti 12,754 a kongregasion dagiti Saksi ni Jehova iti kadakkelan a paset ti Estados Unidos ken iti 1,369 a kongregasion iti Caribe ken Hawaii. Ti Shipping Department ti mangikarton amin kadagita nga order ken mangyurnos iti pannakaitulod dagita kadagiti maitutop nga adres. Tinawen nga agarup 14 a milion a kilo a literatura ti maipan kadagiti kongregasion iti Estados Unidos.
Saan a dagiti makina ti kapatgan a paset daytoy a pagimprentaan no di ket dagiti tattao. Nasurok a 300 ti agtartrabaho kadagiti departamento a masakupan ti pagimprentaan, kas iti Graphics, Scheduling, Pressroom, Bindery, ken Shipping. Amin dagiti trabahador ket boluntario, saan a masusuelduan, ken agtawenda iti 19 agingga iti 92.
Maseknanda unay kadagiti tattao—dagidiay magagaran nga umawat kadagiti literatura ken mayat nga agpaisuro, agpaliwliwa, ken agpaiwanwan kadagiti prinsipio ti Biblia a nailawlawag kadagita. Sapay koma ta maysaka kadagiti kasta nga agbasbasa. Inanamaenmi a dagiti literatura a mayim-imprenta ditoy wenno iti maysa kadagiti pagimprentaanmi iti sabali a pagilian ket makatulong kenka nga agtultuloy a gumun-od iti pannakaammo maipapan ken Jehova a Dios ken ni Jesu-Kristo. Dayta ti makatulong kenka a mangsagrap iti biag nga agnanayon.—Juan 17:3.
[Dagiti Ladawan iti panid 16]
[Ladawan iti panid 17]