Adda Kadi Eskediulyo nga Agadal iti Biblia?
IDI napan a tawen, impakaammo ti Bagi a Manarawidwid nga adda panagbalbaliw ti gimong ti kongregasion tapno ad-adu ti panawen nga agadal iti Biblia ken agsasarita kas maysa a pamilia. No maysaka nga ama, siguraduem a makagunggona ken regular ti panagadalyo iti Biblia kas pamilia. Dagiti agassawa nga awanan iti annak mabalinda nga usaren dayta a panawen tapno agkaduada nga agadal iti Biblia. Dagiti di pay naasawaan nga awanan kadagiti obligasion iti pamilia mabalinda nga usaren dayta a tiempo para iti personal a panagadalda iti Biblia.
Adu ti nangyebkas iti panangapresiarda iti urnos a Panagdayaw ti Pamilia. Kas pagarigan, kinuna ti panglakayen a ni Kevin: “Saan nga umdas ti sao a ‘pagyamanan’ tapno mayebkasmi ti panagyamanmi kas maysa a kongregasion. Pinagsasaritaanmi a papanglakayen no kasano a mausarmi dayta a nawaya a rabii tapno aramidenmi ti imbilin ti Bagi a Manarawidwid—ti panagadalmi kas pamilia.”
Ni Jodi, nga asawa ti maysa a panglakayen, kinunana: “Tallo ti annakmi a babbai nga agtawen iti 15, 11, ken 2. Kaak-akarmi iti kongregasion ti sign language. Adu ti busbosenmi a panawen ken pigsa a mangisagana kadagiti amin a maadal iti gimong. Ngem gapu iti daytoy a panagbalbaliw, naaddaankami iti kanayonan a tiempo nga agdayaw a sangapamiliaan!”
Da John ken JoAnn, agassawa a regular pioneer, kinunada: “Saan a regular ti panagadal ti pamiliami iti Biblia gapu iti kinaadu ti aktibidad ti kongregasionmi. Maysa a sagut manipud ken Jehova daytoy a baro nga urnos a mangpabileg iti espiritualidadmi—no usarenmi dayta a tiempo iti nakaisangratanna.”
Ni Tony, maysa a baro nga agtawen iti nasurok a 20, inyeskediulna ti rabii ti Martes para iti personal a panagadalna. Usarenna ti dadduma nga aldaw ti lawas tapno agsagana para kadagiti gimong ti kongregasion. Ngem kuna ni Tony, “Nangnangruna a padpadaanak ti aldaw ti Martes.” Apay? “Dayta a rabii ti espesial a panawenko para ken Jehova.” Inlawlawag ni Tony: “Agarup dua nga oras nga adalek dagiti suheto a mangpatibker iti relasionko ken Jehova. Gapu ta ad-adu ti panawenko nga agadal, ad-adda a mautobko dagiti nabasak a teksto ti Biblia.” Ti resultana? “Ad-addan nga umukuok iti pusok ti balakad ni Jehova.” Adda intedna a pagarigan. “Iti libro nga Insight, nabasak ti panaggayyem da David ken Jonatan. Adu ti nasursurok maipapan iti di managimbubukodan a kababalin ni Jonatan. Gapu iti ulidanna, ad-adda a maawatak itan no kasano ti agbalin a pudno a gayyem. Segseggaak ti ad-adu pay a kasta a gameng a madiskobrek kadagiti rabii ti Martes!”
Awan duadua nga amin nga adipen ni Jehova ket magunggonaan unay no usarenda dayta a kanayonan a tiempo para iti makaisuro a panagadal iti Biblia ken panagdayaw ti pamilia.