Patanorem ti Ayat a Saan a Pulos nga Aggibus
‘Ti ayat ibturanna ti amin a bambanag. Ti ayat saan a pulos aggibus.’—1 COR. 13:7, 8.
1. (a) Kasano a masansan a maitampok ti ayat? (b) Nakaisentruan ti ayat ti adu a tattao?
ADUN ti naipablaak maipapan iti ayat. Dayta a galad ket nailadawan kadagiti kanta iti makaay-ayo ken romantiko a pamay-an. Ti ayat ti maysa a kasapulan ti tao. Ngem masansan a maitampok dayta kadagiti parparbo nga estoria a linaon dagiti libro ken pelikula, ken nagadu ti kasta a mailaklako. Kaskasdi, nakalkaldaang ta saanda nga itampok ti pudpudno a panagayat iti Dios ken kaarruba. Makitkitatayo ti kaitungpalan dagiti padto ti Biblia maipapan iti maudi nga al-aldaw. Dagiti tattao ‘managayatda iti bagbagida, managayat iti kuarta, managayat iti ragragsak imbes a managayat iti Dios.’—2 Tim. 3:1-5.
2. Ania ti pakdaar ti Biblia maipapan iti di umiso nga ayat?
2 Kabaelan ti tao ti agayat, ngem pakdaarannatayo ti Sao ti Dios maipapan iti di umiso nga ayat. Ken deskribiren ti Biblia no ania ti mapasamak no rumamut ti kasta nga ayat iti puso ti maysa. (1 Tim. 6:9, 10) Malagipmo pay ti kuna ni apostol Pablo maipapan ken Demas? Nupay nakikadua idi ken Pablo, inayat ni Demas ti ituktukon ti lubong. (2 Tim. 4:10) Pinakdaaran ni apostol Juan dagiti Kristiano maipapan iti dayta a peggad. (Basaen ti 1 Juan 2:15, 16.) Ti panagayat iti lubong ken kadagiti aglabas a bambanag ken daldalanna ket saan a maitunos iti panagayat iti Dios ken kadagiti agtaud kenkuana.
3. Ania a karit ti pakaipasanguantayo, a mangpataud kadagiti ania a saludsod?
3 Nupay saannatayo a paset ti lubong, agbibiagtayo iti dayta. Gapuna, maysa a karit ti panangliklik iti ballikug a panangmatmatna iti ayat. Napateg a saantayo nga ipalubos a maimpluensiaantayo iti di umiso wenno ballikug nga ayat. Gapuna, agpaay iti asino a patanoren ken ipakitatayo ti ayattayo a naibatay iti prinsipio? Ania dagiti makatulong kadatayo a mangpatanor iti kita ti ayat a makaibtur iti amin a bambanag ken saan a pulos nga aggibus? Kasano a makagunggona dayta kadatayo ita ken kasano nga apektaranna ti masakbayantayo? Kasapulantayo dagiti sungbat a maitunos iti panangmatmat ti Dios tapno siuumiso a maiwanwantayo.
Panangpatanor iti Panagayat ken Jehova
4. Kasano a rumayray ti panagayattayo iti Dios?
4 Ti panangpatanor ipasimudaagna ti panangisagana ken panangaywan iti panagdakkel ti maysa. Panunotem ti maysa a mannalon a sipipinget a mangisagana iti daga ken mangimula kadagiti bin-i. Namnamaenna a dumakkel dagiti bin-i. (Heb. 6:7) Umasping iti dayta, masapul met a dumakkel wenno rumayray ti ayattayo iti Dios. Ania ti kalikaguman dayta? Masapul a padam-egentayo ti arig daga a pusotayo, a nakaimulaan ti bin-i ti kinapudno maipapan iti Pagarian. Maaramidtayo dayta babaen ti naanep a panagadal iti Sao ti Dios tapno rumang-ay ti pannakaammotayo kenkuana. (Col. 1:10) Makatulong met iti dayta ti regular nga itatabuno ken pannakipaset kadagiti gimong. Personal kadi nga ikagkagumaantayo ti gumun-od iti naun-uneg a pannakaammo?—Prov. 2:1-7.
5. (a) Kasano a maammuantayo dagiti kangrunaan a galad ni Jehova? (b) Ania ti maikunayo maipapan iti kinahustisia, sirib, ken pannakabalin ti Dios?
5 Babaen ti Saona, ipalgak ni Jehova ti kinasiasinona. No adalentayo ti Kasuratan ken in-inut a gumun-odtayo iti pannakaammo maipapan ken Jehova, rumayray ti apresasiontayo kadagiti galadna—kinahustisia, pannakabalin, sirib, ken kangrunaan iti amin, ti di maartapan nga ayatna. Iparparangarang ni Jehova ti kinahustisiana iti amin a daldalanna ken iti perpekto a lintegna. (Deut. 32:4; Sal. 19:7) Mabalintayo nga utoben ti amin a parsua ni Jehova ken agamanga iti di matukod a kinasiribna. (Sal. 104:24) Paneknekan met ti uniberso a ni Jehova ti Gubuayan ti dinamiko nga enerhia ken di aggibus a pannakabalinna.—Isa. 40:26.
6. Kasano nga impakita ti Dios ti panagayatna kadatayo, ken ania ti epekto dayta kadakayo?
6 Ania ti maikunam maipapan iti ayat ti Dios, ti kangrunaan a galadna? Nalawa ti saklawen ti ayatna ken apektarannatayo amin. Impakitana dayta nga ayat babaen ti panangipaayna iti subbot a mangispal iti sangatauan. (Basaen ti Roma 5:8.) Daytoy a probision ket agpaay iti sangatauan, ngem dagidiay laeng agtignay iti panagayat ti Dios ken mangipakita iti pammati iti Anakna ti magunggonaan iti dayta. (Juan 3:16, 36) Ti panangipaay ti Dios ken ni Jesus kas pangikappia a daton para kadagiti basoltayo ti mangtignay koma kadatayo a mangayat met iti Dios.
7, 8. (a) Kasano a maipakitatayo ti panagayattayo iti Dios? (b) Iti laksid dagiti ania nga itungtungpal ti ili ti Dios dagiti bilinna?
7 Kasano a maipakitatayo ti panagayattayo iti Dios kas subad iti amin nga inaramidna agpaay kadatayo? Napateg ti naipaltiing a sungbat: “Daytoy ti kaipapanan ti ayat iti Dios, a tungpalentayo dagiti bilinna; ket kaskasdi a dagiti bilinna saanda a makapadagsen.” (1 Juan 5:3) Wen, ti panagayattayo ken Jehova a Dios tignayennatayo a mangtungpal kadagiti bilinna. Dayta ti maysa a rason nga ipakpakaammotayo ti nagan ken Pagarianna, a pakagunggonaan ti sabsabali. No naimpusuan nga aramidentayo dayta, pampaneknekantayo a tungtungpalentayo dagiti bilin ti Dios buyogen ti nasin-aw a motibo.—Mat. 12:34.
8 Dagiti kakabsattayo iti intero a lubong ikagkagumaanda a tungpalen dagiti bilin ti Dios iti laksid ti di panangikankano ken direkta a panangilaksid dagiti tattao iti mensahe ti Pagarian. Saanda nga agsarday a mangitungpal a naan-anay iti ministerioda. (2 Tim. 4:5) Umasping iti dayta, matignaytayo a mangiranud iti pannakaammo maipapan iti Dios ken mangtungpal iti amin a bilinna.
No Apay nga Ay-ayatentayo ti Apotayo a ni Jesu-Kristo
9. Ania dagiti inibturan ni Kristo, ken ania ti nakatignayanna nga agibtur?
9 Malaksid iti panagayat iti Dios, adu ti rason nga ayatentayo ti Anakna. Nupay saantayo a nakita ni Jesus, rumayray ti ayattayo bayat nga umad-adu ti pannakaammotayo kenkuana. (1 Ped. 1:8) Ania ti dadduma kadagiti inibturan ni Jesus? Bayat nga itungtungpalna ti pagayatan ni Amana, ginurada ni Jesus nga awan gapgapuna, indadanesda, siuulbod nga inakusaranda, inum-umsida, ken imbabainda. (Basaen ti Juan 15:25.) Naibturan ni Jesus dagita a pakasuotan gapu iti panagayatna iti nailangitan nga Amana. Ken gapu iti panagayatna, ti sakripisio nga ipapatayna ket nagserbi a subbot para iti adu.—Mat. 20:28.
10, 11. Ania ti determinasiontayo maigapu iti inaramid ni Kristo agpaay kadatayo?
10 Ti inaramid ni Jesus tignayennatayo a mangsubad iti dayta. Rumayray ti panagayattayo kenkuana no utobentayo dagiti inaramidna agpaay kadatayo. Kas pasurotna, nasken a patanoren ken itultuloytayo nga ipakita ti ayat nga imparangarang ni Kristo tapno makapagibturtayo bayat nga itungtungpaltayo ti bilinna nga ikasaba ti Pagarian ken agaramid kadagiti adalan.—Mat. 28:19, 20.
11 Iti panangsubadtayo iti panagayat ni Kristo iti sangatauan, magutugottayo a mangiringpas iti annongentayo sakbay a dumteng ti panungpalan. (Basaen ti 2 Corinto 5:14, 15.) Ti ayat nga impakita ni Kristo ti dakkel a makagapu a naitungpalna ti panggep ti Dios agpaay iti sangatauan. Ken ti ulidan nga imbati ni Kristo a masapul a surotentayo a naimbag ti tumulong tapno maaddaantayo iti paset iti panggep ti Dios. Kalikaguman dayta a patanorentayo ti panagayat iti Dios agingga iti kabaelantayo. (Mat. 22:37) No tungpalentayo dagiti pannursuro ken bilin ni Jesus, ipakpakitatayo nga isu ket ay-ayatentayo ken determinadotayo a mangitandudo iti kinasoberano ti Dios aniaman ti kalikaguman dayta, kas inaramid ni Jesus.—Juan 14:23, 24; 15:10.
Panangsurot iti Naringringbaw a Dalan ti Ayat
12. Ania ti kayat a sawen ni Pablo iti ebkas a “dalan a naringringbaw”?
12 Ni apostol Pablo tinuladna ni Kristo. Gapu ta sisisinged a sinurotna ti addang ni Kristo, adda karbengan ni Pablo a mangidagadag kadagiti kakabsat a tuladenda met ti ulidanna. (1 Cor. 11:1) Nupay indagadagna kadagiti Kristiano idiay Corinto nga itultuloyda a sipipinget a gun-oden ti dadduma a sagut ti espiritu a naiparangarang idi umuna a siglo, kas iti panangagas ken panagsao iti nadumaduma a lenguahe, impakita ni Pablo nga adda nasaysayaat a gun-oden. Iti 1 Corinto 12:31, inlawlawagna: “Kaskasdi a mangipakitaak kadakayo iti dalan a naringringbaw.” Ti konteksto dagiti sumaganad a bersikulo ipakitada nga isu dayta ti naringringbaw a dalan ti ayat. Iti ania nga anag a naringringbaw dayta? Inlawlawag ni Pablo no ania ti kayatna a sawen. (Basaen ti 1 Corinto 13:1-3.) No adda sumagmamano a naisangsangayan nga abilidadna ken adu ti nasayaat a nagapuananna ngem awan ti ayatna, ania koma ti serserbina? Awan! Babaen ti panangtignay ti espiritu ti Dios, inlawlawagna daytoy a makagutugot a kinapudno. Anian a nagbileg a pamay-an ti panangipaganetget iti kaipapanan ti ayat!
13. (a) Ania ti tekstotayo iti tawen 2010? (b) Iti ania nga anag a di pulos aggibus ti ayat?
13 Sumaruno a dinakamat ni Pablo no ania ti kaipapanan ken saan a kaipapanan ti ayat. (Basaen ti 1 Corinto 13:4-8.) Ita, sukimatem no maan-annurotmo dagiti kalikaguman ti ayat. Ipamaysam ti atensionmo iti maudi a sasao ti bersikulo 7 ken umuna a sasao ti bersikulo 8: ‘Ti ayat ibturanna ti amin a bambanag. Ti ayat saan a pulos aggibus.’ Dayta ti tekstotayo iti tawen 2010. Imutektekam ta iti bersikulo 8, kinuna ni Pablo a mapukawto dagiti sagut ti espiritu, a pakairamanan ti panagipadto ken panagsao iti nadumaduma a lenguahe—a nausar idi kaipaspasdek ti kongregasion Kristiano. Ngem saan nga agpatingga ti ayat. Agnanayon ni Jehova ken isu ti personipikasion ti ayat. Gapuna, di pulos aggibus ti ayat. Agtultuloy dayta iti agnanayon kas galad ti awan patinggana a Dios.—1 Juan 4:8.
Ti Ayat Ibturanna ti Amin a Bambanag
14, 15. (a) Kasano a ti ayat tulongannatayo a mangibtur kadagiti pakasuotan? (b) Apay a nagkedked ti maysa nga agtutubo a makikompromiso?
14 Ania ti tumulong kadagiti Kristiano a mangibtur iti aniaman a pakasuotan, narigat a kasasaad, ken parikut? Ti kangrunaan ket ti ayat a naibatay iti prinsipio. Saan laeng a panangisakripisio dayta kadagiti material nga ik-ikutantayo. Kalikagumanna pay ti naimpusuan a panangsalimetmet iti kinatarnawtayo ken panangisakripisio iti biagtayo maipaay ken Kristo. (Luc. 9:24, 25) Utobem ti kinamatalek dagiti Saksi a nagsagaba kadagiti kampo konsentrasion, kampo a pagtrabahuan, ken pagbaludan bayat ken kalpasan ti Gubat Sangalubongan II.
15 Ipakita dayta ti kapadasan ti agtutubo nga Aleman a Saksi a ni Wilhelm. Imbes a makikompromiso, nagtalinaed a nasungdo idi naipasango iti panangpapatay ti Nazi babaen ti firing squad. Iti pammakada a suratna iti pamiliana, kinunana: “Kangrunaan iti amin, masapul nga ayatentayo ti Dios, kas imbilin ti Lidertayo a ni Jesu-Kristo. No dumasigtayo kenkuana, gunggonaannatayo.” Idi agangay, iti maysa nga artikulo ti Pagwanawanan, insurat ti maysa a kapamiliana: “Iti laksid dagiti nariribuk a tiempo, impangpangruna ti pamiliami ti panagayatmi iti Dios.” Kasta ti kababalin ti adu a kakabsattayo nga agdama a mangib-ibtur iti pannakaibalud idiay Armenia, Eritrea, South Korea, ken dadduma pay a pagilian. Nagtalinaed a nasungdo dagitoy a kakabsat gapu iti ayatda ken Jehova.
16. Ania ti inibturan dagiti kakabsattayo idiay Malawi?
16 Iti adu a lugar, adda sabali a kita ti pakasuotan a mangsubsubok iti pammati ken panagibtur dagiti kakabsattayo. Iti 26 a tawen, inibturan dagiti Saksi ni Jehova idiay Malawi ti panangiparit ti gobierno, nakaro nga ibubusor, ken adu a kinaranggas. Nagunggonaan ti panagibturda. Idi bimtak ti pannakaidadanes, adda laeng agarup 18,000 a Saksi iti dayta a pagilian. Ngem kalpasan ti 30 a tawen, immadu ti bilangda iti 38,393. Kasta met laeng ti napadasan ti dadduma pay a pagilian.
17. Ania ti mapaspasaran ti dadduma a kameng ti saan nga agkakapammatian a pamilia, ken apay a maibturanda ti di umiso a pannakatrato?
17 Narigat ti maipasango iti direkta a panangidadanes dagiti bumusbusor iti ili ti Dios. Ngem narigrigat pay no ti ibubusor ket manipud iti mismo a kapamilia ti maysa a Kristiano. Mabalin a mangpataud iti pannakariribuk ti maysa a kapamilia wenno asideg a kabagian. Saan kadi nga impakpakauna ni Jesus a mapasamak ti kasta? Wen, ken adu ti nakapasar iti kaitungpalan ti sasaona. (Mat. 10:35, 36) Ib-ibturan dagiti tin-edyer ti ibubusor dagiti saan a manamati a nagannakda. Dadduma ti napagtalaw pay ketdi manipud iti pagtaenganda, ngem sinaranay ida dagiti naasi a Saksi. Adda met dagidiay inlaksid ti pamiliada. Kasano a naibturanda ti di umiso a pannakatrato? Babaen ti panagayatda kadagiti kakabsatda iti pammati ken kangrunaanna, ti pudno a panagayatda ken ni Jehova ken iti Anakna.—1 Ped. 1:22; 1 Juan 4:21.
18. Kasano a makatulong kadagiti agassawa a Kristiano ti ayat a makaibtur iti amin a bambanag?
18 Adda ti dadduma pay a kasasaad iti biag nga agkalikagum iti ayat a makaibtur iti amin a bambanag. Iti nagbaetan ti agassawa, ayat ti mangtulong kadakuada a mangtungpal kadagiti sasao ni Jesus: “Ti pinagsinnangol ti Dios saan koma a pagsinaen ti tao.” (Mat. 19:6) No agpaspasarda iti ‘rigat iti lasag,’ masapul a laglagipen dagiti agassawa a Kristiano a ni Jehova ti kangrunaan a paset ti relasionda. (1 Cor. 7:28) Kuna ti Saona a ‘ti ayat ibturanna ti amin a bambanag.’ Gapuna, nasungsungdo ken natibtibker ti relasion dagiti agassawa a nangikawes iti dayta a galad.—Col. 3:14.
19. Ania ti inaramid dagiti adipen ti Dios kalpasan dagiti kalamidad?
19 Ti ayat tulongannatayo a mangibtur iti amin a bambanag bayat ti kalamidad. Kasta ti napasamak idi nagginggined iti makin-abagatan a Peru ken dinalapus ti Bagyo a Katrina ti makin-abagatan a daya ti Estados Unidos. Adu a kakabsattayo ti napukawan iti pagtaengan wenno material a sanikua gapu kadagita a kalamidad. Ti ayat ti nangtignay kadagiti kongregasion iti intero a lubong a mangipaay iti material a saranay, ken adda dagiti boluntario a nangibangon manen kadagiti pagtaengan ken nangtarimaan kadagiti Kingdom Hall. Dagita ket pammaneknek nga ay-ayaten ken maseknan dagiti kakabsattayo iti maysa ken maysa iti amin a tiempo ken aniaman a kasasaad.—Juan 13:34, 35; 1 Ped. 2:17.
Ti Ayat Saan a Pulos nga Aggibus
20, 21. (a) Apay a nakapatpateg ti ayat? (b) Apay a determinadokayo a mangsurot iti dalan ti ayat?
20 Iti tengnga dagiti adipen ni Jehova ita, makitatayo ti pagimbagan ti panangsurot iti naringringbaw a dalan ti ayat. Wen, kanayon a nasayaat ti ibunga dayta iti amin a gundaway. Imutektekanyo no kasano nga impaganetget ni apostol Pablo dayta a kinapudno. Umuna, intampokna nga agpatingga dagiti sagut ti espiritu ken agmataengan ti kongregasion Kristiano. Kalpasanna, kinunana: “Ita, nupay kasta, mataginayon ti pammati, namnama, ayat, dagitoy a tallo; ngem ti kadakkelan kadagitoy isu ti ayat.”—1 Cor. 13:13.
21 Inton agangay, matungpalto dagiti bambanag a patientayo nga umay. Iti kasta, agpatingganton ti panangipakitatayo iti pammati kadagita. Inton mapabaro ti amin a bambanag, saantayton nga inanamaen dagiti kari nga ur-urayentayo a matungpal. Ngem komusta ngay ti ayat? Saanto a pulos nga aggibus wenno agpatingga dayta. No agbiagtayto nga agnanayon, sigurado a makita ken matarusantayo ti ad-adu pay nga aspeto ti ayat ti Dios. No aramidem ti pagayatan ti Dios bayat a sursurotem ti naringringbaw a dalan ti ayat a di pulos aggibus, mabalin nga agbiagkanto nga agnanayon.—1 Juan 2:17.
Ania ti Sungbatyo?
• Apay a masapul a liklikantayo ti di umiso nga ayat?
• Ti ayat tulongannatayo a mangibtur iti ania?
• Iti ania nga anag a ti ayat ket saan a pulos nga aggibus?
[Blurb iti panid 27]
Ti teksto iti tawen 2010 ket: ‘Ti ayat ibturanna ti amin a bambanag. Ti ayat saan a pulos aggibus.’ —1 Cor. 13:7, 8.
[Ladawan iti panid 25]
Mangasabatayo gapu iti panagayattayo iti Dios
[Ladawan iti panid 26]
Ti di aggibus nga ayat dagiti kakabsattayo idiay Malawi ti nakatulong kadakuada a mangibtur kadagiti pakasuotan