Ti Mesias! Ti Usaren ti Dios a Mangisalakan
“No kasano a ken Adan matmatay ti amin, kasta met nga iti Kristo mapagbiagto ti amin.”—1 COR. 15:22.
1, 2. (a) Ania ti reaksion da Andres ken Felipe idi naam-ammoda ni Jesus? (b) Apay a maikunatayo nga ad-adu ti pammaneknektayo a ni Jesus ti Mesias ngem kadagiti Kristiano idi umuna a siglo?
“NASARAKANMI ti Mesias,” kinuna ni Andres iti kabsatna a ni Pedro, a kombinsido a ni Jesus a taga-Nazaret ti Pinulotan ti Dios. Namati met ni Felipe isu a binirokna ti gayyemna a ni Natanael ket kinunana: “Nasarakanmi daydiay nga iti Linteg, ni Moises ken dagiti Mammadto insuratda, ni Jesus, ti anak ni Jose, a taga Nazaret.”—Juan 1:40, 41, 45.
2 Naan-anay kadi a kombinsidoka a ni Jesus ti naikari a Mesias, ‘ti Kangrunaan nga Ahente ti pannakaisalakan’ a dinutokan ni Jehova? (Heb. 2:10) Iti kaaldawantayo, ad-adu ti pammaneknektayo nga isu ti Mesias ngem kadagiti pasurotna idi umuna a siglo. Manipud pannakaipasngay agingga iti panagungar ni Jesus, ti Sao ti Dios ket mangted iti natalged a pammaneknek nga isu ti Kristo. (Basaen ti Juan 20:30, 31.) Ipakita pay ti Biblia nga agtultuloy nga itungpal ni Jesus ti akemna kas Mesias manipud langit. (Juan 6:40; basaen ti 1 Corinto 15:22.) Iti naespirituan nga anag, mabalinmo met a maikuna ita a ‘nasarakam ti Mesias.’ Ngem usigentayo nga umuna no apay a sikokompiansa a naikuna dagidi a nagkauna nga adalan a nasarakanda ti Mesias.
In-inut a Naipalgak ti “Sagrado a Palimed” Maipapan iti Mesias
3, 4. (a) Kasano a dagiti adalan idi umuna a siglo ‘nasarakanda ti Mesias’? (b) Apay a maikunayo a ni laeng Jesus ti nakaitungpal iti amin a Mesianiko a padto?
3 Apay a masigurado dagiti pasurot ni Jesus idi umuna a siglo nga isu ti Mesias? Babaen kadagiti mammadto, in-inut nga impalgak ni Jehova no ania dagiti pakabigbigan ti umay a Mesias. Maysa nga eskolar ti Biblia ti nangyarig iti dayta a proseso iti panangbukel iti maysa nga estatua manipud kadagiti nadumaduma a marmol a paset. Ipapanmo nga adu a lallaki a di agaammo ti saggaysa a mangipan iti siled kadagita a marmol a paset. No mapagdedekket dagita ket perpekto a makabukel iti estatua, lohikal a maikunam nga adda maymaysa a nagtaudan dagiti detalye ken nangipatulod kadagiti lallaki no ania ti aramiden ti tunggal maysa kadakuada. Kas iti tunggal paset ti estatua, ti tunggal Mesianiko a padto ket mangipaay iti napateg nga impormasion maipapan iti Mesias.
4 Posible ngata a ti amin a padto maipapan iti Mesias ket naiparparna laeng a natungpal iti maymaysa a tao? Kuna ti maysa a managsirarak nga imposible a naiparparna laeng a natungpal iti maysa a tao ti amin a Mesianiko a padto! “Ni laeng Jesus iti intero a historia ti nakaitungpal iti amin a padto.”
5, 6. (a) Kasano a maiwayat ti pannakaukom ni Satanas? (b) Kasano nga in-inut nga impalgak ni Jehova ti kapuonan ti naikari a ‘bin-i’?
5 Dagiti padto maipapan iti Mesias ket naisentro iti “sagrado a palimed.” Adu a bambanag ti ramanen dayta a mangapektar iti sangatauan. (Col. 1:26, 27; Gen. 3:15) Karaman iti dayta a palimed ket ti pannakaukom ni Satanas a Diablo, “ti kadaanan a serpiente,” a nangituggod iti sangatauan iti basol ken ipapatay. (Apoc. 12:9) Kasano a maiwayat dayta a panangukom? Impadto ni Jehova a ti ‘bin-i’ nga agtaud iti “babai” dunorenna ti ulo ni Satanas. Ti naipadto a ‘bin-i’ rumekennanto ti ulo ti serpiente, nga agresulta iti pannakaikkat ti ramut ti iyaalsa, sakit, ken ipapatay. Ngem iti pammalubos ti Dios, dunoren nga umuna ni Satanas ti simboliko a mukod ti ‘bin-i’ ti babai.
6 In-inut nga impalgak ni Jehova no asino ti naikari a ‘bin-i.’ Ti Dios inkarina ken Abraham: “Babaen ti bin-im pudno unay a dagiti amin a nasion iti daga bendisionandanto ti bagbagida.” (Gen. 22:18) Impadto ni Moises a dayta a bin-i ket agbalinto a “mammadto” a natantan-ok ngem ni Moises. (Deut. 18:18, 19) Naipanamnama ken David, ken pinasingkedan dagiti mammadto idi agangay, nga agtaud kenkuana ti Mesias ken tawidennanto ti trono ni David iti agnanayon.—2 Sam. 7:12, 16; Jer. 23:5, 6.
No Apay a ni Jesus ti Mesias
7. Iti ania a pamay-an a ni Jesus ket nagtaud iti “babai” a kukua ti Dios?
7 Ti Dios imbaonna ti Anakna, ti umuna a pinarsuana, manipud iti arig asawana nga organisasion dagiti espiritu a parsua idiay langit tapno agbalin a naikari a ‘bin-i.’ Tapno mapasamak dayta, ti bugbugtong nga Anak ti Dios masapul nga ‘uksobanna ti bagina’ iti nailangitan a biag ken mayanak kas perpekto a tao. (Fil. 2:5-7; Juan 1:14) Ti ‘pannakasalinong’ ni Maria iti nasantuan nga espiritu patalgedanna a ti ipasngayna ket “maawaganto iti nasantuan, Anak ti Dios.”—Luc. 1:35.
8. Kasano a tinungpal ni Jesus ti padto maipapan iti Mesias idi indatagna ti bagina tapno agpabautisar?
8 Ipasimudaag dagiti Mesianiko a padto no sadino a mayanak ni Jesus ken kaano nga agparang ti Mesias. Kas naipadto, nayanak ni Jesus idiay Betlehem. (Mik. 5:2) Idi umuna a siglo, magagaran unay dagiti Judio a mangpadpadaan iti iyaay ti Mesias isu a nagsaludsod ti dadduma maipapan ken Juan a Mammautisar: “Isu ngata ti Kristo?” Ngem simmungbat ni Juan: “Um-umay daydiay nabilbileg ngem siak.” (Luc. 3:15, 16) Idi napan ken Juan idi otonio ti 29 K.P. tapno agpabautisar iti edad a 30, indatag ni Jesus ti bagina kas ti Mesias iti umiso a tiempo. (Dan. 9:25) Kalpasanna, rinugianna ti nakallalagip a ministeriona, a kinunana: “Ti naituding a tiempo natungpalen, ket ti pagarian ti Dios immasidegen.”—Mar. 1:14, 15.
9. Ania ti sikokompiansa idi a patien dagiti adalan ni Jesus uray saan a naan-anay ti pannakaawatda?
9 Ngem masapul a maatur ti kapanunotan dagiti tattao maipapan iti Mesias. Umiso ti panangibilangda ken Jesus kas Ari, ngem saanda pay idi a naan-anay a matarusan a ti panagturayna ket iti masanguanan ken idiay langit. (Juan 12:12-16; 16:12, 13; Ara. 2:32-36) Nupay kasta, idi insaludsod ni Jesus, “Siasinoak iti panagkunayo?” sikokompiansa nga insungbat ni Pedro: “Sika ti Kristo, ti Anak ti sibibiag a Dios.” (Mat. 16:13-16) Kasta met la ti tignay ni Pedro idi adu ti timmallikud gapu ta naitibkolda iti maysa a pannursuro.—Basaen ti Juan 6:68, 69.
Panagimdeng iti Mesias
10. Apay nga impaganetget ni Jehova a kasapulan ti umimdeng iti Anakna?
10 Idiay langit, ti bugbugtong nga Anak ti Dios ket maysa a mannakabalin nga espiritu. Idi adda ditoy daga, isu ti “pannakabagi ti Ama.” (Juan 16:27, 28) Kinunana: “Ti isursurok saanko a kukua, no di ket kukua daydiay nangibaon kaniak.” (Juan 7:16) Bayat ti transpigurasion, pinasingkedan ni Jehova a ni Jesus ti Mesias idi imbilinna: “Agimdengkayo kenkuana.” (Luc. 9:35) Wen, masapul nga umimdeng wenno agtulnogtayo iti Daydiay Napili. Agkalikagum dayta iti pammati ken nasayaat nga ar-aramid—nga agpada a napateg tapno maay-ayo ti Dios ken magun-odan ti biag nga agnanayon.—Juan 3:16, 35, 36.
11, 12. (a) Apay a dagiti Judio idi umuna a siglo inlaksidda ni Jesus kas ti Mesias? (b) Siasino dagiti namati ken Jesus?
11 Nupay adu ti pammaneknek a ni Jesus ti Mesias, kaaduan a Judio idi umuna a siglo ti saan a nangakseptar kenkuana. Apay? Adda bukodda a kapanunotan maipapan iti kinasiasino ti Mesias, kas koma iti panagbalinna a lider ti politika a mangwayawaya kadakuada manipud iti panangidadanes ti Roma. (Basaen ti Juan 12:34.) Gapuna, saanda a maakseptar ti Mesias a nangitungpal kadagiti padto nga isu ket maumsi, liklikan dagiti tattao, nairanta kadagiti ut-ot ken makaam-ammo iti sakit, ken mapapatayto. (Isa. 53:3, 5) Napaay uray ti dadduma kadagiti nasungdo nga adalanna gapu ta saanna a winayawayaan ida manipud iti turay ti Roma. Kaskasdi, nagtalinaedda a nasungdo. Idi agangay, naipaay kadakuada ti umiso a pannakaawat.—Luc. 24:21.
12 Ti maysa pay a rason a dagiti tattao inlaksidda ni Jesus kas ti naikari a Mesias ket maigapu kadagiti pannursurona, a narigat nga awaten ti adu. Ti iseserrek iti Pagarian kalikagumanna ti ‘panangtallikud iti bagi,’ ‘pannangan’ iti lasag ken dara ni Jesus, ‘pannakayanak manen,’ ken panagbalin a “saan a paset ti lubong.” (Mar. 8:34; Juan 3:3; 6:53; 17:14, 16) Dagiti natangsit, nabaknang, ken managinsisingpet ibilangda dagitoy kas narigat nga annuroten. Ngem dagidiay napakumbaba a Judio inakseptarda ni Jesus kas ti Mesias, agraman ti dadduma a Samaritano a nagkuna: “Daytoy a tao sigurado nga isu ti manangisalakan ti lubong.”—Juan 4:25, 26, 41, 42; 7:31.
13. Kasano a nadunor ti “mukod” ni Jesus kas naipadto?
13 Impadto ni Jesus nga isu ket kondenaren dagiti panguluen a papadi ken ilansa dagiti Gentil ngem mapagungar iti maikatlo nga aldaw. (Mat. 20:17-19) Ti pammatalgedna iti saklang ti Sanhedrin nga isu “ti Kristo nga Anak ti Dios” ket naibilang a panagtabbaaw. (Mat. 26:63-66) Napaneknekan ni Pilato a saan a ‘maikari ni Jesus iti ipapatay.’ Ngem gapu ta dagiti Judio inakusaranda pay ni Jesus iti iyaalsa iti gobierno, ni Pilato “insukona ni Jesus iti pagayatanda.” (Luc. 23:13-15, 25) Iti kasta, ‘pinaglikudanda’ ken nagkukumplotda a mangpapatay iti “Kangrunaan nga Ahente ti biag,” iti laksid ti adu a pammaneknek a ni Jesus ti imbaon ti Dios. (Ara. 3:13-15) Kas naipadto, ‘nagessat’ ti Mesias, a nailansa iti kayo iti Aldaw ti Paskua idi 33 K.P. (Dan. 9:26, 27; Ara. 2:22, 23) Babaen ti nakas-ang nga ipapatayna, nadunor ti “mukod” ni Jesus kas naipadto iti Genesis 3:15.
No Apay a Masapul a Matay ti Mesias
14, 15. (a) Ania ti dua a rason nga impalubos ni Jehova a matay ni Jesus? (b) Ania ti inaramid ni Jesus kalpasan a napagungar?
14 Impalubos ni Jehova a matay ni Jesus gapu iti dua a napateg a rason. Umuna, ti kinasungdo ni Jesus agingga ken patay sinungbatanna ti maysa a napateg nga aspeto ti “sagrado a palimed.” Naan-anay a pinaneknekanna a masalimetmetan ti perpekto a tao ti “nadiosan a debosion” ken maitandudona ti kinasoberano ti Dios uray iti sidong ti karirigatan a pannubok ni Satanas. (1 Tim. 3:16) Maikadua, kas iti kinuna ni Jesus, “ti Anak ti tao immay . . . tapno itedna ti kararuana kas subbot a kasukat dagiti adu.” (Mat. 20:28) Dayta a “katupag a subbot” binayadanna ti dusa ti basol a natawid dagiti kaputotan ni Adan ken pinagbalinna a posible ti biag nga agnanayon kadagiti isuamin a mangawat ken Jesus kas ti usaren ti Dios a mangisalakan.—1 Tim. 2:5, 6.
15 Kalpasan ti tallo nga aldaw, napagungar ni Kristo, ken iti 40 nga aldaw nagparang kadagiti adalanna kas pammaneknek nga isu ket sibibiag ken nangted kadagiti kanayonan nga instruksion. (Ara. 1:3-5) Kalpasanna, nagpalangit tapno idatagna ken Jehova ti pateg ti datonna ken urayenna ti naituding a tiempo a panagarina kas Mesias. Kabayatanna, adu pay ti aramidenna.
Naan-anay a Panangitungpal iti Akemna kas Mesias
16, 17. Ania dagiti aramiden ni Jesus kas Mesias kalpasan a nagpalangit?
16 Sipud panagungar ni Jesus, simamatalek nga immatonanna dagiti aktibidad ti kongregasion Kristiano nga iturturayanna. (Col. 1:13) Iti naituding a tiempo, usarenna ti pannakabalinna kas Ari iti Pagarian ti Dios. Dagiti padto ti Biblia ken paspasamak iti lubong patalgedanda a nangrugi ti kaaddana kas Ari idi 1914, agraman “ti panungpalan ti sistema ti bambanag.” (Mat. 24:3; Apoc. 11:15) Di nagbayag kalpasanna, indauluanna dagiti nasantuan nga anghelna a nangpaksiat ken ni Satanas ken kadagiti demoniona manipud langit.—Apoc. 12:7-10.
17 Mabiiten nga agpatingga ti trabaho a panangasaba ken panangisuro a rinugian ni Jesus idi 29 K.P. Iti din agbayag, ukomenna ti amin a sibibiag. Ibagananto kadagiti marakarnero a nangakseptar kenkuana kas ti usaren ni Jehova a mangisalakan: “Tawidenyo ti pagarian a naisagana kadakayo manipud iti pannakabangon ti lubong.” (Mat. 25:31-34, 41) Madadaelto dagidiay nangilaksid ken Jesus kas Ari inton idauluanna ti nailangitan a buyot a mangtalipupos kadagiti nadangkes. Kalpasanna, parautannanto ni Satanas ken igarangugongna a kadua dagiti demoniona iti “mangliwengliweng” nga abut.—Apoc. 19:11-14; 20:1-3.
18, 19. Ania dagiti itungpalto ni Jesus kas Mesias, a mangyeg kadagiti ania a resulta iti natulnog a sangatauan?
18 Bayat ti Sangaribu a Tawen a Panagturay ni Jesus, naan-anay a maitungpalna ti amin a titulona, kas iti “Nakaskasdaaw a Manangbalakad, Mannakabalin a Dios, Agnanayon nga Ama, Prinsipe ti Kappia.” (Isa. 9:6, 7) Babaen ti panagturayna iti Pagarian, isublina dagiti tattao iti kinaperpekto agraman dagiti agungar. (Juan 5:26-29) Iturongto ti Mesias ti amin a situtulok a tattao iti “ubbog ti dandanum ti biag” tapno ti natulnog a sangatauan matagiragsakda ti natalna a relasion ken Jehova. (Basaen ti Apocalipsis 7:16, 17.) Kalpasan ti maudi a pannubok, amin a rebelde a pakairamanan ni Satanas ken dagiti demoniona ‘maitapuakda iti danaw nga apuy ken asupre,’ ti makapapatay a pannakarumek ti ulo ti “serpiente.”—Apoc. 20:10.
19 Anian a nakaskasdaaw ken naan-anay ti panangitungpal ni Jesus iti akemna kas Mesias! Mapnonto ti paraiso a daga kadagiti nasubbot a tattao nga agbiag nga agnanayon buyogen ti perpekto a salun-at ken kinaragsak. Madalusanto ti sagrado a nagan ni Jehova manipud iti amin a pannakaumsi ken naan-anay a maalangon ti kalinteganna kas soberano iti uniberso. Anian a naindaklan a tawid ti agur-uray kadagiti amin nga agtulnog iti Pinulotan ti Dios!
Nasarakam Kadin ti Mesias?
20, 21. Apay a masapul nga ipakaammom iti sabsabali ti maipapan iti Mesias?
20 Sipud idi 1914, agbibiagtayon iti periodo ti pa·rou·siʹa wenno kaadda ni Kristo. Nupay saan a makita ti kaaddana kas Ari iti Pagarian ti Dios, nabatad dayta kadagiti natungpal a padto. (Apoc. 6:2-8) Nupay kasta, kas kadagiti Judio idi umuna a siglo, kaaduan a tattao ita ti di mangikankano kadagiti pammaneknek iti kaadda ti Mesias. Kayatda met ti maysa a politikal a lider wenno asinoman nga agtignay babaen ti politika. Ngem naammuam a ni Jesus ket agturturayen kas Ari iti Pagarian ti Dios. Saanka kadi a maragsakan iti dayta? Kas kadagiti adalan idi umuna a siglo, natignayka a mangipakaammo: “Nasarakanmi ti Mesias.”
21 No isarsaritam ti maipapan iti kinapudno, itamtampokmo kadi ti akem ni Jesus kas ti Mesias? No aramidem dayta, maparayray ti apresasionmo iti inaramidna, ar-aramidenna, ken aramidennanto pay. Kas kada Andres ken Felipe, sigurado a nairanudmon kadagiti kakabagiam ken gagayyemmo ti maipapan iti Mesias. Apay a dimo aramiden manen dayta buyogen ti napabaro a regta ken ipakitam kadakuada a ni Jesu-Kristo ti naikari a Mesias, ti usaren ti Dios a mangisalakan?
Mailawlawagyo Kadi?
• Kasano a dagiti adalan idi umuna a siglo nabigbigda ti Mesias?
• Ania ti dua a napateg a rason a natay ni Jesus?
• Ania pay ti itungpal ni Jesus kas Mesias?
[Dagiti Ladawan iti panid 21]
Apay a sikokompiansa a naikuna dagiti tattao idi umuna a siglo a ni Jesus ti naikari a Mesias?
[Ladawan iti panid 23]
No isarsaritam ti maipapan iti kinapudno, itamtampokmo kadi ti akem ni Jesus kas ti Mesias?