Mapan Kadi Idiay Langit Amin a Naimbag a Tao?
IDI rabii sakbay ti pannakapapatay ni Jesus ken kalpasan ti maudi a pangrabii a kaduana dagiti apostolna, inkari ni Jesus nga isaganaanna ida iti lugarda idiay langit kas gunggonada. Kinunana: “Idiay balay ni Amak adu ti pagyanan. Ta no saan, imbagak koma kadakayo, agsipud ta mapanak tapno mangisaganaak iti lugar a maipaay kadakayo.” (Juan 14:2) Apay nga ipaayan ida ni Jesus iti lugar idiay langit? Ania ti aramidenda sadiay?
Adda naisangsangayan nga annongen nga isagsagana ni Jesus para kadagiti adalanna. Bayat daydi met laeng a rabii, kinunana: “Dakayo dagidiay nagtalinaed kaniak kadagiti pannakasusuotko; ket mangaramidak iti tulag kadakayo, kas iti panangaramid ni Amak iti maysa a tulag kaniak, maipaay iti maysa a pagarian.” (Lucas 22:28, 29) Ti Dios inkarina ken Jesus nga isu agbalin nga Ari a mangipaay iti maysa kadagiti kapatgan a kasapulan ti sangatauan—ti nasayaat a gobierno. Ispalen ni Jesus dagiti tattao manipud iti pakarigatan ken rumekenna dagiti mangsasaur kadakuada. Nupay “agingga kadagiti ungto ti daga” ti masakupan ti turay ni Jesus, idiayto langit ti ayan ti tronona.—Salmo 72:4, 8; Daniel 7:13, 14.
Nupay kasta, saan nga agmaymaysa ni Jesus nga agturay. Gapuna, inkarina kadagiti apostol nga ipaayanna ida iti lugar idiay langit. Isuda ti damo a napili nga ‘agturay kas ar-ari iti daga.’—Apocalipsis 5:10.
Mano ti mapan idiay langit? Kas iti aniaman a gobierno, bassit laeng ti bilang dagiti agturay iti nailangitan a Pagarian ti Dios no idilig iti kaadu ti amin a tattao nga iturayanto dayta a gobierno. Kinuna ni Jesus kadagidiay kaduananto nga agturay: “Dikay agbuteng, bassit nga ipastoran, agsipud ta inanamongan ni Amayo ti panangited kadakayo ti pagarian.” (Lucas 12:32) Agdagupto dayta a “bassit nga ipastoran” iti 144,000. (Apocalipsis 14:1) Bassit dayta a bilang no idilig iti minilion a tattao a mangtagiragsakto iti biag nga agnanayon ditoy daga kas nasungdo nga iturayan ti Pagarian.—Apocalipsis 21:4.
Gapuna, saan a mapan idiay langit ti amin a naimbag a tattao. Maipapan ken naimbag nga Ari David, imbatad ni apostol Pedro: “Ni David saan nga immuli iti langlangit.” (Aramid 2:34) Naimbag a tao ni Juan a Mammautisar. Kaskasdi, impasimudaag ni Jesus a saanto a maital-o kas maysa nga ari nga agturay idiay langit. “Kadagidiay nayanak kadagiti babbai,” kinuna ni Jesus, “awan ti naibangon a dakdakkel ngem ni Juan a Mammautisar; ngem daydiay a nanumnumo iti pagarian ti langlangit ket dakdakkel ngem isu.”—Mateo 11:11.
Awatemto Kadi ti Gunggona Dagiti Naimbag a Tattao?
Tapno magunggonaan iti agnanayon a biag ditoy daga, ania ti masapul nga aramiden ti maysa a tao? Kinuna ni Jesus: “Ti Dios inayatna ti lubong iti kasta unay isu nga intedna ti bugbugtong nga Anakna, tapno tunggal maysa a mangwatwat iti pammati kenkuana saan koma a madadael no di ket maaddaan iti agnanayon a biag.” (Juan 3:16) Imutektekam ta ti ayat ti Dios iti lubong ti nangtignay kenkuana a mangilukat iti gundaway a panagbiag nga agnanayon para iti isuamin, ngem dagidiay laeng “mangwatwat iti pammati” ti umawatto iti dayta a gunggona.
Ti pammati masapul a naibatay iti umiso a pannakaammo. (Juan 17:3) Maipakitam a maysaka a naimbag a tao babaen ti panangadalmo iti ad-adu pay maipapan iti panggep ni Jehova para iti tao. Buyogen ti pammati, iyaplikarmo dagiti maadalmo. Iti kasta, manamnamam a talaga a silulukat kenka ti gundaway nga agbiag nga agnanayon.
[Kahon iti panid 7]
Ania ti Kunaen ti Biblia?
Saludsod:
Ania ti mapasamak kadagiti naimbag a tattao no matayda?
Sungbat:
“No maipapan kadagiti natay, saanda a pulos sipapanunot iti aniaman.”—ECLESIASTES 9:5.
Saludsod:
Ania ti namnama dagiti naimbag a tattao?
Sungbat:
“Um-umayen ti oras nga amin dagidiay adda kadagiti pakalaglagipan a tanem mangngegdanto ti timek [ni Jesus] ket rummuarda.”—JUAN 5:28, 29.
Saludsod:
Sadino nga agbiag ti kaaduan a naimbag a tattao?
Sungbat:
“Dagiti nalinteg tagikuaendanto ti daga, ket agtaengdanto nga agnanayon iti dayta.”—SALMO 37:29.